убиен навивач – Kurir.mk

Продолжува сослушувањето на последните 35 уапсени за инцидентите во кои беше убиен навивачот на АЕК

Катерина Бојаџиева — Sun, 13 Aug 2023 07:28:04 +0000

Последната група од 35 навивачи уапсени за инцидентите во понеделникот вечерта пред стадионот на АЕК, кога беше убиен 29-годишен навивач на атинскиот тим, денеска ќе биде изведена пред истражните судии, со што и ќе заврши маратонскиот процес што започна во петокот, јави дописничката на МИА од Атина. Од уапсените 105 навивачи, 70 веќе беа сослушани вчера и завчера и од обвиненијата не беше ослободен ниту еден од нив, со оглед на тоа дека на сите им беше одредена мерка притвор. Од нив, 67 се хрватски државјани, двајца се Грци и еден Албанец. Процесот на сослушувањето на уапсените 105 лица, кои беа поделени во три групи, започна во петокот со првата група од 30 навивачи, продолжи вчера со вторите 40 и завршува денеска со последните 35 уапсени. Уапсените се товарат за четири кривични и седум прекршочни дела, меѓу кои и за убиство со умисла, иако убиецот сѐ уште не е идентификуван, за криминална организација, за експлозија и поседување експлозивен материјал итн.

Притворени 30 лица за инцидентите во кои беше убиен навивачот на АЕК

Катерина Бојаџиева — Fri, 11 Aug 2023 20:10:47 +0000

Мерка притвор им е одредена на сите 30 навивачи кои денеска дадоа исказ пред истражни судии откако во понеделникот беа уапсени по инцидентите пред стадионот на АЕК во кои беше убиен 29-годишниот навивач на атинскиот тим, јави дописничката на МИА од Атина. Процесот на сослушувањето на уапсените 105 лица, започна денеска и ќе продолжи утре и задутре, а хулиганите се поделени во три групи, денеска исказ дадоа 30 лица, утре други 30, а останатите 45 се в недела. Меѓу оние кои денеска беа сослушани и им беше одредена мерка притвор, 28 се Хрвати, еден е Грк и еден Албанец, а според грчките медиуми, сите се бранеле дека немаат никаква поврзаност со убиството на 29-годишниот. Хрватските навивачи негирале дека поседувале ножеви и наводно рекле дека на стадионот стигнале за да го следат тренингот на Динамо Загреб, а не да ги нападнат навивачите на АЕК.

Убиен навивач на ЦСКА Москва: На лице место починал Игор Соколовски, уште 2 лица тешко повредени

Катерина Бојаџиева — Fri, 27 Jul 2018 12:26:17 +0000

Голема трагедија се случила утрово во руската престолнина Москва, откако еден навивач починал, а двајца се тешко повредени во жестока пресметка на две фракции на хулигани на железничката станица Курск, објавија руските медиуми. Инцидентот се случил на платформата на железничката станица, каде навивачи на ЦСКА го чекале возот од Санкт Петербург за Нижни Новгород за да заминат на гостувањето за дуелот од Суперкупот на Русија, помеѓу „армејците“ и првакот Локомотив Москва. Наводно станувало збор за битка за превласт на трибината, во која една фракција веќе била во возот, а другата чекала на станицата, па кога пристигнал возот, започнала жестока тепачка. Починал на лице место 30-годишниот Игор Соколовски, а други двајца, од кои еден со сериозни повреди, биле префрлени во болница. Полицијата започнала истрага за тешкиот инцидент.