училишта – Kurir.mk

Мицкоски смета дека македонската химна треба да се интонира во сите училишта во државата

Ивона Петрова — Fri, 20 Oct 2023 11:48:23 +0000

Секој граѓанин треба да покаже почит кон еден од основните симболи на државата во која е роден, му овозможила да се образува, да формира семејство и во неа живее, изјави денеска претседателот на ВМРО - ДПМНЕ, Христијан Мицкоски. Одговарајќи на прашање дали во сите општини каде градоначалниците се од ВМРО- ДПМНЕ ќе се инторнира македонската химна, тој рече дека ова прашање не би го партизирал и смета дека тоа треба да биде пракса не само во општините, каде што градоначалниците се од редовите на ВМРО - ДПМНЕ. -Мислам дека ова треба да биде политика, којашто ќе биде централизирана. Министерството за образование оваа политика ќе ја спроведе и мислам дека на целата територија на државата треба да има ваков начин на покажување почит кон државата, во којашто сите ние живееме и твориме, вели Мицкоски. Тој апелира до министерот за образование ова да биде државна политика и да се реализира во сите општини, без разлика од која политичка партија и да се градоначалниците. -Имаме држави, нашиот стратешки партнер САД, каде што има многу нации, сите стојат пред интонирање на американската химна и се горди кога ја слушаат американската химна и сите го почитуваат американското знаме. Така што оние кои не ги почитува националните атрибути на државата, во којашто живее, тогаш навистина има сериозен системски пропуст, вели Мицкоски по посетата на Општина Гази Баба.

Наставата во Гази Баба ќе започнува со химната на Република Македонија

Ивана Ефремовски — Thu, 19 Oct 2023 13:51:57 +0000

Секој понеделник наставата во училиштата на територија на општина Гази Баба ќе започнува со интонирање на химната на Република Македонија. „Нашата цел е да создадеме навика кај децата да од најмали нозе имаат почит и љубов кон својата татковина. Химната и знамето на нашата Македонија се нераскинлив дел од нашиот повеќевековен идентитет и тие ја заслужуваат нашата должна почит. На денешната редовна седница, Советот на општина Гази Баба ја донесе оваа Одлука која е задолжителна за сите општински основни училишта на нашата територија“ - истакна градоначалникот Бобан Стефковски.

Училиштата во Израел остануваат затворени, почнува учењето на далечина

Катерина Бојаџиева — Tue, 10 Oct 2023 17:44:13 +0000

Училиштата ширум Израел ќе останат затворени утре, но дадено е одобрение да започне учењето на далечина, соопшти денеска израелското Министерство за образование. -По безбедносната проценка во согласност со упатствата на командата на Домашниот фронт, Министерството за образование објавува дека утре нема да има образовни активности во училиштата низ целата земја, се вели во соопштението на Министерството. Се додава дека е одобрено учење на далечина, како она што беше на сила за време на пандемијата на коронавирусот.

Бесплатни униформи за учениците од училиштата во општина Гази Баба

Тале Кристо — Wed, 13 Sep 2023 12:29:22 +0000

УЧЕНИЦИТЕ ОД УЧИЛИШТАТА ВО ГАЗИ БАБА ДОБИВААТ БЕСПЛАТНИ УНИФОРМИ. Со задоволство сакам да објавам дека заврши постапката за набавка на бесплатни училишни униформи за сите 6800 ученици од општинските основни училишта на територија на општина Гази Баба. Оваа учебна година за прв пат во историјата општината од сопствени средства обезбедува училишна униформа која за секој ученик ќе биде бесплатна. Со реализација на овој проект ги намалуваме трошоците на родителите, а вооедно ја намалуваме класната разлика која се создава помеѓу учениците со што се постигнува степен на еднаквост помеѓу децата за време на престојот во училиштето. Од денес во училиштата започнува евидентирање на учениците со цел утврдување на величината на униформата за секое дете по што ќе следува и доделување на униформите. Реализацијата на оваа мерка доаѓа како исполнување на ветувањето дадено во мојата изборна програма. Ветувањата дадени пред граѓаните се исполнуваат!, објави на социјалната мрежа на Фејсбук градоначалникот на општина Гази Баба Бобан Стефковски.

По хоророт во мај: Полицајци ќе ги обезбедуваат сите училишта во Србија

Ивана Ефремовски — Fri, 01 Sep 2023 16:06:45 +0000

Министерот за внатрешни работи на Србија, Братислав Гашиќ денеска изјави дека во текот на учебната година полицајци ќе ги обезбедуваат сите училишта и ќе се грижат за безбедноста на учениците во таа држава. Гашиќ на ученици во едно ОУ и едно Средно училиште во Белград им порача дека „ако имате некаков проблем, знајте дека училишниот полицаец е тука да реагира и да биде личност на која можете да му верувате, како и твоите наставници и родители“, јави Бета. Според соопштението на МВР, министерот им порачал на средношколците „да ја сакаат својата земја, да се почитуваат, да го негуваат пријателството и да ги штитат своите пријатели“, а ги повика основците да бидат активни во проектот „Заедно и безбедно низ детството „ во која преку работилници ќе научат да препознаваат насилство и како да се заштитат и кому да се обратат доколку се случи. Присуството на полицијата е зголемено во и околу училиштата во Србија откако ученик од белградското основно училиште „Владислав Рибникар“ на 3 мај уби девет ученици и еден чувар. (МИА)

УНИЦЕФ: Во Украина уништени повеќе од 1.300 училишта, само една третина од учениците посетуваат целосна настава

Тале Кристо — Tue, 29 Aug 2023 14:21:17 +0000

Повеќе од 1.300 училишта се целосно уништени од почетокот на војната во областите на Украина под контрола на Киев, соопшти Детскиот фонд при ОН, УНИЦЕФ. Само околу една третина од децата на училишна возраст посетуваат настава во целост, а голем број деца го забораваат она што веќе го научиле, се вели во соопштението. Освен во Украина, повеќе од половина од децата чии семејства побегнале од конфликтот во седум земји не се запишани во национално образование, соопшти УНИЦЕФ, наведувајќи ги јазичните бариери и преоптоварените образовни системи. Некои училишта биле гранатирани, а други затворени како мерка на претпазливост во текот на 18-месечните ракетни и артилериски напади врз станбени области низ целата земја. Војната дојде по пандемијата на Ковид-19, што значи дека некои украински деца се соочуваат со четврта последователна учебна година со прекини, а неделава се враќаат на настава по летниот распуст, соопшти УНИЦЕФ. Според извештаите, украинските наставници пријавиле случаи на влошување на способностите на учениците во говорење, читање и математика.

Полицијата од 1 септември ќе ги обезбедува сите училишта во Србија

Катерина Бојаџиева — Tue, 22 Aug 2023 11:27:14 +0000

Полицијата од 1 септември ќе ги обезбедува сите училишта во Србија, а полициски службеници ќе бидат присутни пред, за време и по наставата во двете смени, соопшти денеска српското Министерство за образование. Освен во училишните дворови, ќе се зголемат полициските патроли и во близина на училиштата, а ќе се контролира и регулира безбедноста во сообраќајот, беше соопштено по работната средба што денеска ја одржаа претставници на Министерството за образование и Министерството за внатрешни работи. Раководителите на полицијата и училишните администрации, како и директорите на училиштата и началниците на полициските станици, интензивно работат на анализа на безбедносната состојба, со цел да се процени состојбата и да се преземат заеднички мерки за подигање на безбедноста на учениците и вработените на највисоко можно ниво.

УНЕСКО предупредува на прекумерна употреба на најновите технологии во училиштата

Ивона Петрова — Thu, 27 Jul 2023 06:45:54 +0000

УНЕСКО предупредува дека прекумерното потпирање на технологијата во образованието може да биде непродуктивно, па дури и штетно, доколку се меша во стекнувањето основни вештини, како што е читањето. Учениците треба да учат за технологијата во светот, но наставниците треба да внимаваат претерано да не користат „технолошки помагала“ во наставата, предупреди УНЕСКО во својот извештај. Тие додаваат дека има малку цврсти докази за додадената вредност на дигиталната технологија во образованието. Во извештајот, УНЕСКО силно предупредува на технологијата во стекнувањето на традиционални клучни вештини кои всушност би можеле да им помогнат на децата да избегнат некои од замките на современиот дигитален свет. На пример, учениците со развиени вештини за читање се многу поотпорни на измами преку е-пошта, рече Мансо Антонис, главниот автор на извештајот на УНЕСКО. „Ако научите да читате добро, да читате со разбирање, тоа исто така ве прави подобро подготвени да се движите низ дигиталниот свет, а ние често го забораваме тоа“, додаде Антонис. Технологијата во училницата „може да има штетно влијание ако е несоодветна или прекумерна“, се вели во извештајот. Антонис посочи и дека 20 години по воведувањето на лаптопите во училиштата, јасно е дека таквите политики се успешни само доколку се комбинираат со солидна педагошка рамка. Сепак, само „неколку земји беа доволно трпеливи и имаа доволно енергија да одат во таа насока“, посочи Антонис, предупредувајќи дека „не е доволно само да се дистрибуираат уреди“. Во исто време, УНЕСКО забележа растечки тренд на забрана на паметни телефони во училниците. Секоја четврта земја веќе има донесено закони и прописи во оваа насока. „Присуството на телефони во училницата може да биде многу вознемирувачко“, рече Антонис. Забранувањето на паметните телефони во училиштата, дури и во либералните земји како Холандија, беше „интересно и изненадувачко откритие“ за истражувачите на УНЕСКО, додаде тој.

Втор хакерски напад врз платформата за спроведување на завршните испити во средните училишта во Грција

Катерина Бојаџиева — Tue, 30 May 2023 09:04:05 +0000

Втор ден по ред хакерски напад создава проблеми во спроведувањето на завршните испити во средните училишта во Грција, а според грчките медиуми, обвинителот од Врховниот суд веќе наредил да се спроведе истрага, јави дописничката на МИА од Атина. Националната мрежа за технологија и истражување утрово била на мета на хакерски напад, по што паднала и платформата од која се избираат темите за завршните испити, додека пак вчера постоела масовна посета на мрежата со 280.000 конекции во секунда. Грчката новинска агенција АНА-МПА пишува дека по денешниот втор хакерски напад реагирал обвинителот од Врховниот суд Исидорос Дојакос кој побарал детална истрага, но и помош од Секторот за борба со електронски криминал. Хакерските напади, како вчера, така и денеска предизвикаа доцнења и одложувања на завршните испити во средните училишта во цела Грција. Од Министерствата за образование и дигитална политика вчера истакнаа дека случајот се однесува исклучиво на интерните полагања во средните училишта и во никој случај не е поврзан со државните испити за запишување на факултет кои започнуваат в четврток.

Масовна евакуација во Србија: Дојави за бомби добиле дури 115 основни и средни училишта

Ивана Ефремовски — Wed, 17 May 2023 08:45:15 +0000

Според првичните информации, известувања за подметнати експлозивни направи биле испратени на имејл адресите на 78 основни и 37 средни училишта во белградските општини, соопшти Министерството за образование. -Екипи на полицијата се на терен, учениците и вработените се евакуирани. Заради безбедност на учениците и вработените, наставата во прва смена беше прекината до завршување на полициската проверка, а некои училишта веќе се проверени и наставата се одвива без проблеми. Училиштата ќе ги информираат учениците и нивните родители за сите релевантни информации за наставата преку редовни канали за комуникација, велат од министерството/ Во комуникација со полицијата, директорите на училиштата ќе добијат информација кога ќе биде извршен увид во училиштето и ќе донесат одлука за попладневната смена.