Угостителите и порачаа на Владата да не ги потценува: Бараат итна средба најдоцна до утре и надомест на штетите

Ивона Петрова — Thu, 17 Dec 2020 07:29:16 +0000

Независната угостителска комора со дел од здруженијата на угостители очекува до утре да добие покана од Владата за итна средба на која би се разговарало за новите рестриктивни мерки и за добивање директна финансиска помош за овој сектор. Во денешното соопштение наведуваат дека не сакаат празни ветувања од министри, туку конкретни владини мерки за надомест на штетите и загубите. Напоменуваат дека ќе ги запазат сите законски права и процедури во остварувањето на нивните права за поднесување на надоместок на штета не само за последните рестриктивни мерки туку и за претходно донесените. – Како што напоменавме во нашите минати соопштенија и изјави, овојпат законски ќе побараме сериозна одговорност и образложение на Комисијата за заразни болести од која ќе побараме да ни ги достави записниците од состаноците со сите образложенија зошто се овие мерки селективни и дискриминирачки и зошто додека на едни (угостителите) во континуитет им се ограничуваат и скратуваат правата за работа со препораки преку Владини одлуки на други им се даваат само препораки со што преќутно им се овозможува да прават што сакаат и притоа да не сносат никакви последици и консеквенции од своето работење, се вели во соопштенито. Од Комората се надеваат дека Владата ќе ги послуша барањата на, како што велат, 6.500 угостителски објекти и 35.000 илјади вработени.

НУК: Угостителите со новите мерки ќе претрпат штети во висина од 18-22 милиони евра

Ивона Петрова — Tue, 15 Dec 2020 08:08:07 +0000

Независната угостителска комора не се согласува со новите предлог мерки на Комисијата за заразни болести, меѓу кои доколку Владата ги усвои, работното време на угостителските објекти ќе биде до 18 часот за време на празниците односно од 18 декември до 21 јануари. Од НУК велат дека ги почитуваат сите досегашни одлуки, а доколку се донесат и новитѕе, Владата веднаш треба да донесе нов сет директни мерки за угостителите со кои ќе помогнат да се надоместат загубите и штетите. -Сакаме да напоменеме дека како што е обврската на Министерот за здравство Венко Филипче да делува во интерес и заштита на здравјето на граѓаните, на Независната угостителска комора и останатите здруженија е исто така обврска да ги заштитат интересите и здравјето на сите угостители и угостителски работници кои се погодени од одлуките и мерките кои се носат во име на пандемијата Ковид-19. Нашето внимание е денес насочено кон закажаната седница на Владата на која треба овие одлуки да бидат разгледани и усвоени. Спрема нашите груби првични економски процени новата рестриктивна мерка на угостителите ќе донесе директни загуби односно штета во висина од 18-22 милиони евра во угостителската индустрија кои доколку Владата не интервенира на време ќе мора угостителите самостојно да бараат начини да ја покријат и покрај тоа што нема да бидат во можност да работат, велат од НУК. Оттаму посочуваат дека новата одлука ќе примора дел од угостителите да направат повторно рационализација на трошоците особено во делот на вработените, со исклучок на оние што успеале да користат субвенции за плати кои се приморани да ги задржат своите вработени и во наредните 2 месеци и покрај тоа што нема да можат да работат односно нема да имаат услови да обезбедат работа и остварување на приходи. -За крај ги прашуваме дали серозно и навистина Министерот Венко Филипче и членовите на Комисијата за заразни болести сметаат дека само со селективни рестриктивни пораки наменети за угостителската индустрија ќе допринесат во грижата за заштита на јавното здравје и здравјето на граѓаните или можеби треба малку да прошетаат по улиците низ градовите, трговските центри и да видат колку во останатите индустрии се погрижија со соодветни препораки и протоколи реално да допринесат во интересот и заштита на здравјето на граѓаните, велат од НУК.

угистителски објекти – Kurir.mk

Угостителите и порачаа на Владата да не ги потценува: Бараат итна средба најдоцна до утре и надомест на штетите

НУК: Угостителите со новите мерки ќе претрпат штети во висина од 18-22 милиони евра