украдени – Kurir.mk

Украдени капаци на шахти, опожарени шахти и цевки – вандалски чин во општина Бутел

Тале Кристо — Sat, 09 Jul 2022 10:52:04 +0000

Во текот на вчерашниот ден, екипите на ЈП Водовод и канализација – Скопје, при рутинска проверка на атмосферската канализација на ул. Александар Урдаревски кај мостот на реката Серава во општина Бутел, открија вандалски чин кој е на голема штета на претпријатието, но и на самите граѓани, како и опасност по нивната безбедност. Имено, при проверката на оваа линија беше установена кражба на капаците на шахтите, опожарување на шахтите но и на самите цевки кои се дел од атмосферската канализација. Веднаш по овие сознанија, случајот беше во пријавен во Општина Бутел и МВР од каде беше извршен испекциски надзор и случајот беше заведен од страна на надлежните институции. Екипите на ЈП Водовод и канализација – Скопје, веќе утрово ја оспособија атмосферската канализациска линија со дијаметар на цевка ф1000мм, каде во текот на вчерашниот ден беше утврдено извршување на вандалски чин и нејзино оштетување и обезбедија непречен проток на атмосферска вода во истата. ЈП Водовод и канализација – Скопје, во однос на овој случај по службена должност ќе поднесе две пријави за сторено злодело, една за кражба и една за опожарување на атмосферската канализација. ЈП Водовод и канализација – Скопје, јавно и строго го осудува ваквото неодговорно однесување на групи на поединци, кои нанесуваат штета не само на претпријатието туку и на граѓаните на град Скопје и претставуваат опасност за околината.

Вработен во прилепската гимназија „Мирче Ацев“ украл 2 тони нафта

Тале Кристо — Fri, 08 Jul 2022 19:22:25 +0000

Околу два тони нафта биле украдени од прилепската гимназија „Мирче Ацев“ во изминативе денови. Директорот Рубин Матески вели дека грабежот е дело на вработен во училиштето, а истиот во моментов е суспендиран, додека пак случајот е пријавен. Имено, тие на безбедносните камери го виделе вработениот како изнесува нафта, откако претходно забележале истурена нафта кај влезните скали. -На 06.07.2022 во ОВР-Прилеп пријавено е дека во Гимназијата Мирче Ацев во Прилеп забележано е како пред влезните скали има истурено нафта. Непознато лице со подесно средство ја отворило влезната врата од училиштето потоа со подесно средство ја отворил влезната врата од котларата, наполнил нафта и заминал во непознат правец. Се преземаат мерки за расчистување на настанот и откривање на сторителот, велат од СВР Битола. Според проценката, гимназијата била оштетена за околу 200.000 денари.

САД:Запленети 94.000 биткоини украдени во 2016 година, со денешна вредност од 3,6 милијарди долари

Тале Кристо — Wed, 09 Feb 2022 07:47:58 +0000

Тим 24 сре, 09.02.2022 | 8:06 am 0 Коментари Министерството за правда на САД соопшти дека запленило повеќе од 94.000 биткоини украдени во 2016 година, кои денес вредат 3,6 милијарди долари. Биткоини биле украдени за време на хакирањето на менувачницата „Битфинекс“ (Bitfinex) во 2016 година. Во акцијата беа уапсени две лица, Илја Лихтенштајн и неговата сопруга Хедер Морган – двајцата наводно „испрале“ 119.754 украдени биткоини откако хакер упаднал во системите на „Битфинекс“. Денешните апсења, кои претставуваат најголема финансиска заплена досега, покажуваат дека криптовалутите не се безбедно засолниште за криминалците, истакна заменик-државната обвинителка Лиза Монако. Двојката може да биде осудена на затворска казна од 20 години затвор.

Украдени над 200 тони пченица

Тале Кристо — Sat, 15 Aug 2020 12:53:30 +0000

На 13.08.2020 во 14.00 часот во СВР Битола, Д.К.(48) од Битола пријавил дека во периодот од 25.07.2020 до 13.08.2020, од парцели сопственост на ЗК Пелагонија, во атарот на работна единица „Југ“, која ги опфаќа селата Кременица, Меџитлија, Породин, Лажец, Велушина, Гермијан и Бач, непознати лица извршиле кражба на 200 до 240 тони пченица. Според пријавеното, на тој начин била причинета материјална штета од околу 50.000 евра. За настанот бил известен Јавен обвинител и се преземаат мерки за расчистување на случајот.

Од магацините во Министерството за одбрана украдени се повеќе комплети униформа и други делови од униформа

Тале Кристо — Wed, 01 Jul 2020 12:41:39 +0000

Универзитетскиот професор по одбрана и безбедност, Александар Нацев објави дека изминатата ноќ од магацините кои се наоѓаат во кругот на Министерството за одбрана и Генералштабот се украдени повеќе од 35 комплети униформа и други делови од униформа -Измината ноќ од магацините кои се наоѓаат во кругот на Министерството за одбрана и Генералштабот се украдени повеќе од 35 комплети униформа и други делови од униформа. Додека министерката за одбрана си тера кампања со службени возила и користи униформирани лица за снимање партиски спотови, некој се дрзнал да ја ограбува Армијата. Министерството за одбрана засега молчи и случајот се држи во тајност, пишува на социјалната мрежа на Фејсбук Нацев.

Украдени два автомобили во Скопје

Матеја Петровски — Sat, 13 Oct 2018 13:51:21 +0000

Во текот на вчерашниот ден во 08:00 часот во Полициската станица Аеродром, М.Н.(29) од Скопје пријавил дека истиот ден во периодот од 00.00 часот до 05.00 часот од тротоар на улица „Црноризец Храбар“ непознат сторител го одзел неговото возило „Рено Меган Сеник“ со скопски регистарски ознаки. Истиот ден во 08.30 часот возилото било пронајдено на булевар „12-та Македонска Бригада“. Исто така, во текот на вчерашниот ден во 08:00 часот во Полициската станица Гази Баба, Д.Н.(63) од село Јурумлери,скопско, пријавил дека во периодот од 21.00 часот на 11.10.2018 до 06.00 часот на 12.10.2018 година, од пред семејната куќа непознат сторител одзел патничко возило „Мазда 323“ со скопски регистарски ознаки, сопственост на неговиот син. Сторителот влегол во возилото преку незаклучената врата, го стартувал со клучевите кои биле на бравата и заминал во непознат правец. Се преземаат мерки за пронаоѓање на сторителот, возилото и за расчитување на случајот.