упоз – Kurir.mk

Нова средба на УПОЗ со Владата, очекуваат конкретна понуда за прекин на штрајкот

Тале Кристо — Wed, 01 Nov 2023 17:06:11 +0000

Претставниците на Синдикатот на работниците од управата, правосудните органи и здруженијата на граѓани (УПОЗ) денеска повторно се на средба со претставниците Владата откако минатата недела не беше донесена одлука за нивните барања. Претседателот на УПОЗ, Трпе Деановски, во изјава за медиумите пред средбата рече дека денеска очекуваат конкретна понуда од страна на Владата што би значело и прекин на штрајкот. -Барањата се исти, 78 проценти покачување на плати, враќање на додатоци на плати. Очекуваме конкретна понуда. Без конкретна понуда од страна на Владата, ние не можеме да пренесеме ништо на нашите членови кои штрајкуваат и протестираат, и реално одлуката дали ќе се прифати таа контра понуда ако воопшто ја има, останува на членството, рече Деановски. Добра понуда од страна на Владата, како што кажа, би значело прекин на штрајкот и враќање на работниците на работа. На прашањето што би значело добра понуда, Деановски рече дека тоа би било нешто во средина. -Не би можел да кажам точно со проценти колку бараме. Ќе излеземе точно со нашите барања, реални се 78 посто и враќање на додатоци на плата. Доколку Владата даде некоја суштествена добра понуда, ќе одлучиме дали ќе ја прифатиме. Меѓутоа останува на Владата, рече Деановски. На прашањето дали очекуваат денеска да се донесе некоја одлука, Деановски одговори позитивно со тоа што, како што рече, ако нема понуда од страна на Владата постои опасност на приклучување на штрајкот во обвинителствата уште и од други институции.

Втора средба на Синдикатот на УПОЗ и Владата

Ивона Петрова — Wed, 01 Nov 2023 09:28:22 +0000

Синдикатот на УПОЗ попладне повторно треба да се сретне со претставници на Владата. На средбата ќе се разговара за барањата на вработените во судската и јавнообвинителската служба кои бараат зголемување на платите за 78 проценти и исплата на додатоците за плата. Минатата недела се одржа првата средба која заврши без конкретен договор. По средбата, претседателот на Синдикатот на УПОЗ Трпе Деановски изјави дека очекуваат конкретен предлог од Владата на следната средба. - Се договоривме наредната недела да се достават уште неколку податоци, особено за судовите. Тоа ќе го направи Министерството за финансии. Ќе се сретнеме во вторник или во среда уште еднаш за да видиме дали од спротивната страна ќе добиеме конкретна понуда за нашите барања, изјави тогаш Деаноски. Штрајкот на судската администрација, според најавите на Синдикатот на УПОЗ, ќе трае додека не добијат одговор од Владата. Дотогаш, ќе се работат само итните случаи.

Протест на УПОЗ: Судската администрација бара зголемување на платите за 78 проценти

Ивона Петрова — Thu, 28 Sep 2023 10:58:26 +0000

Членови на Синдикатот на работниците од управата, правосудните ограни и здруженијата на граѓани (УПОЗ) од судската администрација од цела држава денеска протестираат во Скопје со барање за зголемување на платите за 78 проценти и враќање на додатоците на плата. Протестот почна пред зградата на Сојузот на синдикати на Македонија, продолжи со краткотрајни собири пред Собранието и Министерството за правда, по што учесниците се упатија пред Владата. По почетокот на протестот од Синдикатот информираа дека се повикани на средба во Министерството за правда во 14 часот. Упатија пораки за достоинствени плати и предупредија дека без нив не може да функционира судството. -Судската служба повторно е на улица. Пред почетокот на судската ферија само скопските судови излеговме на двочасовен протест и побаравме 78 проценти покачување на плата и враќање на додатоците на плата како што тоа го добија функционерите. Денеска членовите на Синдикатот на УПОЗ и други вработени кои не се членови од сите судови во државата се во Скопје. Овие луѓе што се тука собрани морале да се борат за секое право што го имаат добиено – во 2002 година 80 дена штрајк, во 2016 година – 60 дена штрајк, сега од 2.000 вработени во судовите 1 000 вработени се тука во Скопје и ако тоа не е доволна порака за надлежните да го слушнат нашиот глас не знам што ќе биде, изјави Трпе Деановски, претседател на Синдикатот на УПОЗ, на собирот пред ССМ. Деановски порача дека со исполнување на нивното барање за зголемување на платата за 78 проценти никој од вработените нема да ја надмине просечната плата, туку само ќе се доближи до неа. -Работата во судовите е тимска. Доколку еден вработен не си ја заврши работата судијата нема да може да донесе пресуда. Идната недела и колегите од државното правобранителство најавија штрајк. Колегите од обвинителствата вчера започнаа штрајк. Ако колегите од судовите, луѓето што се тука и тие започнат штрајк ќе се парализира целото правосудство. Мора да се разбере дека не може да се живее и не е фер еден во судовите да зема огромна плата, а нашите плати во однос на нивните да бидат во размер 1:6 до 1:7, изјави Деановски. Апелира на одлуки од Судскиот буџетски совет и Собранието за исполнување на поставените барања. -Имаме амандман со којшто бараме за сите вработени да се преиспита одлуката за прераспределба на средства во Буџетот да добијат по 78 отсто и да се вратат додатоците. Се уште не е на Комисија за финансирање и буџетот, гледаме секој ден дали ќе ја стават на дневен ред, меѓутоа ако тоа не се измени мислам дека ја знаеме пораката од овие луѓе, рече Деановски. Тој информираше дека поради штрајкот во обвинителство веќе се одложуваат случаите и се работат само итни и неодложни предмети. -Како што најавивме вчера, значи притвори, претреси и оние предмети каде што има жалби и треба да се запазат роковите, а се’ друго не се работи и нема да се работи. Денеска бевме на разговор со обвинителот за организиран криминал, денеска ќе имаат и тие состанок, поддршката ја имаме и од обвинителот за организиран криминал, од републичкиот обвинител, на ред се министрите и Владата да се заземат за нас, рече Деановски. Доколку се зголеми за 78 проценти, просечната плата на администрацијата од судовите ќе биде околу 24.000 денари. Членството на УПОЗ по денешниот протест дополнително ќе одлучи за идниот начин на делување, дали ќе штрајкуваат или ќе излегуваат пред судовите. Протестен марш денеска од пред Кривичен суд во Скопје до Министерството за финасии организираа и Независниот синдикат на судската администрација и Синдикатот на затворската полција, со истите за зголемување на платата и враќање на додатоците на плата.

Протест на вработени во Царинска управа во петок- ова ќе биде првиот од протестите што ќе следат и во други институции

Катерина Бојаџиева — Wed, 14 Jun 2023 10:22:09 +0000

Предупредувачки протест на вработени во Царинска управа, најавија денеска од Синдикатот на УПОЗ. Протестот ќе се одржи во петок од 12 до 12:30 часот. - Вработените во Царинска управа веќе со години наназад, иако имаат право согласно закон и колективен договор за исплата на триесет проценти на плата, тој додаток никако не го добиваат, појасни претседателот на Синдикатот на УПОЗ, Трпе Деаноски на денешната прес-конференција. Тој нагласи дека доколку се нема слух за барањето, протестите за предупредување ќе се радикализираат, се размислува и за затворање на гранични премини и најави дека ова ќе биде првиот од протестите што ќе следат и во други институции.

УПОЗ: Контиунирано и сериозно се кршат правата од работен однос во УЈП

Катерина Бојаџиева — Wed, 03 May 2023 08:55:13 +0000

Синдикатот на УПОЗ, како потписник на Колективниот договор во Управата за јавни приходи, денеска преку соопштение реагира на, како што велат, континуираното и сериозно кршење на правата од работен однос во оваа институција. Според УПОЗ, во оваа институција долг временски период се ограничуваат правата на вработените со носење на поединечни акти на работодавачот, не се применуваат законските одредби и одредбите од Колективниот договор особено оние кои се однесуваат на начинот на пресметка на плата, додатоците на плата и други надоместоци од работен однос и се прават незаконски времени и трајни прераспоредувања на вработените. Од Владата, Министерството за финансии и од УЈП бараат утврдување и исплата на додадок на плата од 30 проценти и за вработените во УЈП почнувајќи од јануари годинава и пресметувањето и исплатата на платата, надоместоците и додатоците на плата најитно да се усогласи и да се врши согласно Колективниот договор. Синдикатот бара и усогласувањето на платите да биде согласно порастот на индексот на трошоци на живот во случаи кога ќе надмине 10 проценти во споредба со претходниот месец, да се признава степенот на образование на вработените и да се прекине со временото распоредување на вработените и тоа да се користи во случаи и на начин како што е пропишано согласно законот и Колективниот договор. - Време беше изворно да се слушне барем дел од вистината и за вработените во УЈП кои долги години на различни начини се обесправени во остварување на своите права од работен однос, велат од Синдикатот на УПОЗ, повикувајќи ги Државниот инспекторат за труд, Државниот завод за ревизија, Народниот правобранител и Комисијата за дискриминација да спроведат надзор по допрен глас во Управата за јавни приходи.

УПОЗ бара правична и праведна распределба на средствата за сите вработени во судовите

Ивона Петрова — Tue, 29 Nov 2022 12:37:05 +0000

Синдикатот на работниците од управата, правосудните органи и здруженија на граѓани (УПОЗ) бара од Судскиот буџетски совет веднаш да ја повлечат одлуката донесена на вчерашната седница, со која на судиите и членовите на Судскиот совет ќе им се исплатат најмалку по 12 илјади денари, а на вработените во судовите по 500 денари за додатоци на плата за ноември. Синдикатот бара правична и праведна распределба на средствата за сите вработени во судовите, а доколку не биде повлечена одлуката, велат дека одговорноста за последиците од незадоволството на вработените во судовите ќе ја сноси Судскиот буџетски совет. Доколку оваа Одлука не биде повлечена, за последиците од огромното незадоволство кај членовите на Синдикатот на УПОЗ и вработените во судовите ќе го сносат членовите на Судскиот буџетски совет. – Ваков селективен пристап при исплата на надоместоци на плата и зголемувања на платите во судовите, беше повод за многу протести и штрајкови во минатото, и Судскиот буџетски совет продолжува со незаконска и неправична поделба на надоместоци на плата. Праксата на носење одлуки, зад затворени врати, без присуство на јавноста ниту пак можност Синдикатот на УПОЗ да се стави во одбрана на вработените во судовите, и во минатото и во иднина ќе допринесуваат само да се зголемува револтот и незадоволството на вработените и повторно да се организираат протести и штрајкови, посочуваат од Синдикатот на УПОЗ.

УПОЗ: Нема да бидеме одговорни за бесот и последиците од најавеното кратење на платите

Катерина Бојаџиева — Thu, 13 Oct 2022 14:29:11 +0000

Синдикатот на УПОЗ реагира на најавеното кратење на платите на вработените во администрацијата и вели дека „со кратење на плати од вработените, ќе се покрива неспособноста на Владата“. Нагласува дека нема да бидат одговорни за бесот и последиците што ќе настанат од тоа. -Вицепремиерот Битиќи, денес ни порача дека кратењето на плати не треба да го сфатиме лично. А, како да го сфатиме? Неофицијалните информации говорат дека сите вработени кои ќе се упатат да работата од дома, ќе добијат помала плата од 10 до 30 отсто. Тоа значи дека како награда за работа од дома, која ќе значи повисоки сметки за струја, греење, храна итн. ќе добијат пониски плати, а во некои случаи дури и пониска плата од минималната плата, велат од УПОЗ. Со еден потег, додаваат, Владата ги укина синдикатите и колективното договарање, и ги прекрши Уставот, законите и конвенциите на МОТ кои ги има потпишано државата. -Ќе дочекаме за првпат во историјата на нашата држава, еден министер да добие поголеми ингеренции од премиерот и во најголемата финансиска криза да одлучува кој смее, а кој не смее да добие плата. Со ваквите постапки, Владата единствено успеа да го навлече бесот на вработените и да ги обедини Синдикатите, а за последиците и бесот кој ќе произлезе од овие мерки, ние нема да бидеме одговорни, порачуваат од Синдикатот на УПОЗ.

ССМ, СУТКОЗ И УПОЗ на средба со градоначалникот Таравари

Магдалена Андонова — Thu, 30 Jun 2022 11:18:33 +0000

Синдикатот на работниците од управата, правосудните органи и здруженијата на граѓани на Република Македонија и Општина Гостивар се договорија да склучат анекс на колективниот договор во Општина Гостивар, според кој сите вработени добиваат усогласување со минималната плата од 2 806 денари во нето износ, а Синдикатот на работниците од угостителството, туризмот, комунално – станбеното стопанство, занаетчиството и заштитните друштва на Република Македонија во Јавните претпријатија ЈП комуналец Гостивар, ЈП Паркинзи и паркови и зеленило и ЈП Спортска сала Гостивар ќе склучи спогодби за 2 806 денари во нето зголемување на платите. Ова се заклучоците од денешната средба на претседателот на Сојузот на синдикати на Македонија и СУТКОЗ, Дарко Димовски, претседателот на УПОЗ Трпе Деаноски и градоначалникот на Општина Гостивар Арбен Травари, во врска со барањата на ССМ, УПОЗ и останатите синдикати за зголемување на платите на работниците за 2 806 денари во нето износ за сите вработени во Општината, како и јавните претпријатија на општинско ниво. – На состанокот учествуваа и тимови од ССМ и УПОЗ и Општина Гостивар кои дискутираа за начинот на остварување на ова право за работниците. ССМ и УПОЗ го поздравуваат пристапот на градоначалникот, Таравари за зголемување на платите на работниците во Општината кој ги прифати барањата на ССМ и УПОЗ, велат од ССМ. Како што посочија, Општина Гостивар заедно со градоначалникот се одговорна општина која ги почитува работниците и истата претставува пример што треба да го следат и другите Општини.

Вработените во Општина Тетово ќе добијат по 2.806 денари

Ивона Петрова — Fri, 24 Jun 2022 07:36:21 +0000

Синдикатот на УПОЗ и Синдикалната организација при Општина Тетово членка на Синдикатот на УПОЗ, успешно ги завршија преговорите кои се водеа со градоначалникот на Општина Тетово Билал Касами. -Како резултат на овие преговори е Анексот на Колективниот договор на вработените во Локалната самоуправа Тетово со кој сите административни службеници во општината кои не добија усогласување на платите со порастот на минимлната плата, ќе добијат по 2.806,00 денари, информираат од УПОЗ. Посочуваат дека Синдикатот на УПОЗ вакви преговори води и во други локални самоуправи и во скоро време очекуваат усогласување на платите и во другите локални самоуправи во Р. Македонија.

ФОТО: Членовите на УПОЗ со двочасовен прекин на работата во знак на протест, бараат линеарно зголемување на платите

Ивона Петрова — Thu, 07 Apr 2022 09:17:40 +0000

Вработените во управата и правосудството денеска и утре нема да работат од 10 до 12 часот. Причина за прекинот на работата се барањата за исплата на минимална плата и линеарно зголемување на останатите плати за 2.806 денари. Како што најавија од Синдикатот на управата, правосудството и здруженија на граѓани (УПОЗ) се протестира во сите оние институции каде имаат синдикални организации, како што се министерства, агенции, фондови, управи и судови. На социјалните мрежи УПОЗ објавува фотографии од протестот. Од Синдикатот истакнаа дека во 95 проценти од институциите не се исплаќа минимална плата, а во останатите пет проценти, дел не ја подготвуваат минималната плата, а дел што веќе ја исплатиле направиле грешки и исплатиле само минимална плата без вклучен стаж.