успение на пресвета богородица – Kurir.mk

Честитка од Џафери по повод празникот Успение на Пресвета Богородица

Тале Кристо — Mon, 28 Aug 2023 11:16:27 +0000

Претседателот на Собранието Талат Џафери упати честитка до припадниците на православната вероисповед по повод празникот Успение на Пресвета Богородица, посакувајќи добро здравје, душевен мир, семејна среќа и топлина, меѓусебна почит, разбирање и хармонија. -Нека овој голем ден кој е во чест на Успението на Пресвета богородица биде денот во кој што ќе најдеме сите човечка сила за взаемно разбирање, во исто време ќе почувствуваме благодарност и почит кон благословите што се излеваат врз луѓето на овој празник. Да се надминеме себеси со тоа што ќе се погрижиме сите да бидеме на исправниот пат, осветлувајќи го и отворајќи го и нашиот ум и нашето срце, затоа што само тогаш ќе знаеме како да го цениме и да го живееме животот како дар во кој царува љубов, радост и взаемна почит. Тогаш ќе можеме да почувствуваме колкава е моќта на животот врз смртта и колку малку треба за да имаме мир и спокој во душата и во државата. Искрени честитки до сите Вас почитувани граѓани, со желба да најдеме сите во себе доволно доблест за правење на добри дела, за негување на позитивни вредности и споделувањето на најдоброто од нас овој и секој друг ден. Ви посакувам убаво поминат празник!, наведува Џафери во честитката.

Крводарителска акција по повод празникот Успение на Пресвета Богородица

Тале Кристо — Mon, 28 Aug 2023 08:28:02 +0000

Во Домот на АРМ денеска од 9 до 17 часот ќе се одржи традиционалната 21. крводарителска акција по повод празникот Успение на Пресветан Богородица. Целта на акцијата е да се обезбедат поголеми количини на крв во летниот период, заради можноста од недостаток на крв и крвни деривати. Организатори се Црвениот крст на Република Северна Македонија, Општинска организација Центар и Институтот за трансфузиска медицина. Акцијата започна во 2003 година со 146 дарувања, а денеска се зборува за бројка од 4391 единици крв, или во просек 220 крводарители по акција.

Почна вечерната богослужба во манастирот „Успение на Пресвета Богородица“ на Матка

Ивана Ефремовски — Sun, 27 Aug 2023 18:38:02 +0000

Почна вечерната богослужба во манастирот „Успение на Пресвета Богородица“ на Матка. Дваесетина минути пред полноќ, односно во 23:40 ќе започне сеноќното бдеење. Утре по повод празникот Успение на Пресвета Богородица, во народот познат како Голема Богородица, со почеток во 08.30 часот ќе се одржи Света Божествена литургија со која ќе чиноначалствува поглаварот на Македонската православна црква – Охридска Архиепископија, архиепископот Охридски и Македонски г.г Стефан. Традиционално на денот на празникот во дворот на манастирот се одржува крводарителска акција. -Ќе ни биде драго заедно со вас да и оддадеме почит и благодарност на нашата мајка и заштитничка – Пресвета Богородица која вистински не закрилува нас сите и заеднички достојно да го прославиме Нејзиното Успение, се вели во поканата за одбележување на празникот од сестринството на манастирот.

Традиционална крводарителска акција по повод Успение на Пресвета Богородица

Дарко Андоновски — Fri, 28 Aug 2020 10:31:19 +0000

Во Домот на АРМ во Скопје денеска се одржува традиционална крводарителска акција по повод празникот Успение на Пресвета Богородица, што оваа година се одржува по одобрени протоколи, согласно пандемијата со Ковид-19. Валентина Колеска, секретар на Црвениот крст на Северна Македонија – Општинска организација Центар, рече дека досега околу 60 крводарители учествувале во акцијата и ги повика сите граѓани кои сакаат да даруваат крв да дојдат во Домот на АРМ до 17 часот, до кога трае акцијата. -Денеска веќе се приближуваме кон бројката од 60 крводарители, задоволителна бројка нешто слично како и изминатите години, најверојатно пандемијата на Ковид-19 не ги спречува луѓето да даруваат крв. Што се однесува до организацијата испочитувани се сите протоколи за заштита од Ковид-19. Во текот на летото секогаш имам недостиг на крв и оваа акција токму затоа е многу важна. Ги повикувам крводарителите, граѓаните на Град Скопје да дојдат, акцијата трае до 17 часот, да ја покажат својата хуманост. Во овие 17 години се собрани околу 3.890 крвни единици, или во просек 230 дарители на самата акција, вели Колеска. Д-р Ефтим Димитровски од Институтот за трансфузиона медицина ги повика граѓаните да учествуваат во крводарителската акција и да не се плашат заради моменталната ситуација со Ковид-19. -Се почитуваат сите заштитни протоколи, сите мора да носат маска, се држи растојание од два метра, задолжителна дезинфекција на раце. Во нашиот протокол имаме поставено и прашалник што е задолжителен за секој крводарител, во којшто се означуваат контактите со заразени или можни сомнителни заразени со Ковид-19, вели Димитровски. Во однос на тоа дали крводарителите претходно треба да се тестираат на антитела или некој друг вид тест пред да даваат крв, тој вели дека не, но затоа пак има посебен протокол пред да се дарува крв. – Тоа би било премногу захтевно да бараме од луѓето кои сакаат да ја изразат својата хуманост, но затоа е тој протокол мора да се чувствуваат здраво, да не биле во контакт со никој заразен, да не патувале во некоја друга држава, затоа мора да се почитуваат само тие правила, што се однесува до тестирањето не е задолжително, не го бараме тоа од дарителите. Тие што веќе имале контакт со заразен треба да ги испочитуваат правилата и да направат пауза додека да дојдат да даруваат крв. Триесет и седумгодишниот крводарител Владимир Вукелиќ истакна дека веќе по 48ми пат дарува крв и оти тоа е нешто најхумано што може секој граѓанин да го направи. – Во врска со ситуацијта со коронавирусот, задоволен сум на кој начин се организираат активностите, сите превентивни мерки се запазуваат, така што не чувствувам посебен притисок заради ситуацијата зошто не би го направил тоа, зошто не би дарувал крв, вели Вукелиќ.

Ова речиси сите верници треба да го направат на овој свет ден- една работа никако не ја правете на Успението на Пресвета Богородица

Дарко Андоновски — Fri, 28 Aug 2020 10:12:50 +0000

Денеска е големиот верски празник, Успение на Пресвета Богородица или Голема Богородица, а воедно овој ден е прогласен за неработен. Од повеќето празници посветени на пресвета Богородица овој е еден од најзначајните. Затоа народот овој празник го нарекува уште и Голема Богородица. За празниците Голема и Мала Богородица обичај е, особено жените, да ги почитуваам поголемиот број забрани кои се однесуваат на извршувањето домашни обврски. На верниците, особено на жените им се препорачува утре да не чистат, перат и да ги завршуваат домашните обврски. Исто така, овој ден не е добар за отпочнување на нови бизниси.

МЗ со апел за почитување на мерките на празникот Успение на Пресвета Богородица

Дарко Андоновски — Fri, 28 Aug 2020 08:12:08 +0000

По повод празникот Успение на Пресвета Богородица, кога се очекува зголемен број верници да ги посетат верските храмови, Министерството за здравство апелира да се почитуваат превентивните мерки и препораки за носење заштитна опрема (маска или марама), одржување дистанца од најмалку еден ипол до два метра, често миење и дезинфекција на рацете, како и избегнување на поголеми групирања. Службата за итна медицинска помош по повод празникот има ангажирано девет медицински екипи за подрачјето на град Скопје, а во кругот на црквата „Рождество на Пресвета Богородица“ ќе има и дежурно амбулантно возило со комплетна медицинска екипа, во периодот од 7 до 16 часот. Во услови кога Итната медицинска помош регистрира од 80 до 100 интервенции дневно, а зголемување е забележано кај бројот на транспорти, кои изнесуваат и до 30 во тек на денот, и од оваа служба апелираат на строго придржување до превентивните мерки како единствен начин да се стави крај на патот на ширење на вирусот.

Мицкоски со честитка по повод големиот празник: Денес е денот кога секој човек дома празнувајќи ги миговите со своето семејство треба да се присети на традицијата

Дарко Андоновски — Fri, 28 Aug 2020 07:52:47 +0000

Дозволете ми во мое лично име и во име на членовите на ВМРО-ДПМНЕ на сите православни христијани да им го честитам големиот христијански празник Успение на Пресвета Богородица, ова денеска преку соопштение до јавноста го истакна лидерот на ВМРО-ДПМНЕ Христијан Мицкоски до сите граѓани. -Покрај желбите за добро здравје и радост, дозволете ми во духот на празникот да посакам добрината и заедништвото да бидат водилката низ животот на секој човек, затоа што тие се христијански и цивилизациски вредности кои го водат светот кон подобро утре. Секое време носи свои премрежија и тешки мигови, но љубовта кон ближниот, кон својот народ и својата татковина нека бидат темелот на кој секој човек, врз кои ќе ги гради своите постапки и своите дела. Денес е денот кога секој човек дома, во својот дом празнувајќи ги миговите со своето семејство треба да се присети на традицијата на меѓусебно разбирање и истрајност, длабоко вкоренети во кодот на нашиот народ, кои се основата на секоја индивидуална, но и колективна борба за подобра иднина. Секоја борба е трнлив пат, со неправди, несигурност и предизвици, но истрајноста и посветеноста на тој пат секогаш води до успех. Да научиме борбата за подобра иднина да ја водиме со сплотеност и истрајност, затоа што тоа е единствениот правилен пат, вели Мицкоски. Тој додава дека воедно дозволете да го честитам и денот на македонските рудари оние кои со мака, труд и посветеност заработуваат за своите семејства и својата иднина. -Посакувам во овие тешки мигови за нашата држава да имате работа, да ве следи добро здравје и да сте задоволни од сработеното и заработеното. Знам дека многумина од вас чувствуваат несигурност во услови кога за 5 месеци останаа 40 илјади работници без работа. Тоа е голема болка и страдање за многу семејства кои изгубија егзистенција. Посакувам секој еден од вас да си го сочува своето работно место и започнеме да градиме иднина. Македонија е нашиот заеднички дом кој сите без разлика на етничката и верска определба мораме да го чуваме и да го градиме, спротивставувајќи се на модерните предизвици како криминалот и корупцијата кои го разјадуваат и уништуваат. Домот и семејството се светост, а Македонија и македонската нација се тоа и затоа вреди секој да се посвети во чување на нашите светости. Нека е за многу години празникот. Нека е жива Македонија, вели Мицкоски.

ДЕНЕСКА Е ГОЛЕМ ДЕН: Се празнува Успението на мајка Богородица, за многу години!

Дарко Андоновски — Fri, 28 Aug 2020 07:23:35 +0000

Празник на мајката на животот Именден празнуваат: Марија, Мара, Марена, Марица, Марјан, Маријана… Меѓу дванаесетте големи христијански празници спаѓа и празникот Успение на Пресвета Богородица, во народот попознат како Голема Богородица. Поради големиот култ што го има мајката Божја меѓу верниците, овој празник се празнува многу свечено со големи народни собири. Меѓу позначајните празници што македонскиот народ ги празнува со посебно внимание се и неколкуте празници на Пресвета Богородица, мајката на Спасителот Исус Христос. Поради тоа и повеќе цркви низ цела етничка Македонија го носат нејзиното име. Народот верува дека Богородица е заштитничка на леунките и на жените им помага при породувањето. Исто така и жените што немаат деца веруваат дека со милоста на Пресвета Богородица ќе добијат рожба поради што ги посетуваат нејзините цркви, изведуваат некои обичаи, се молат и принесуваат дарови. Македонскиот народ со повеќе свечености, но и со народни собири, панаѓури и сл. што траеле и по неколку денови ги прославувал празниците на Пресвета Богородица како што се: Мала и Голема Богородица, Собор на Пресвета Богородица, Воведение на Пресвета Богородица (празник познат уште и под името Света Пречиста), Свето Благовештение, Богородичин појас, Покров на Пресвета Богородица, и сл. По раѓањето на Исус, Богородица живеела уште 48 години, извесен период кај старателот Јосиф, со синот Исус, а по неговото распетие и воскрeсение кај неговиот ученик и апостол свети Јован Богослов. За сето тоа време таа била директен сведок на многу важни настани што се од значење за христијанската црква. Кога Исус бил распнат Богородица стоела покрај крстот и плачела како секоја мајка над судбината на својот син. Од крстот Исус ѝ порачал во иднина да живее кај апостолот Јован и да го има за свој син, а нему му порачал да ја има за своја мајка. Светото евангелие според Јована за ова сведочи: „А Исус, штом ја виде мајка си, и ученикот кого го љубеше како стои ѝ рече на мајка си: „Жено, ете ти син“! Потоа му рече на ученикот: „Ете ти мајка!“ И од тој час ученикот ја зеде при себе“ (Јован 19/26, 27) Се поставува прашањето зошто Исус од крстот на мајка си ѝ се обратил со „Жено“ а не со „Мајко“? Истражувачите на оваа проблематика сметаат дека со тоа сакал да ја заштити од своите непријатели: „Околу крстот Христов се наоѓале неговите најголеми непријатели и Он така ѝ се обратил за да ја заштити од нивната дрскост и злоба, оти тие ако знаеле дека тука е неговата мајка, можеби ќе ѝ нанеле и нејзе некое зло“. За време на слегувањето на Светиот Дух врз апостолите со нив била и Богородица така што и врз неа слегол Светиот Дух, при што и таа ги примила неговите дарови. Потоа апостолите останале во Ерусалим уште 10 години, а за тоа време Богородица живеела кај свети Јован Богослов. Но кога Ирод ги започнал своите големи прогони на христијаните, апостолите со ждрепка решиле кој каде да оди и да го проповеда евангелието. Јован со Богородица отишол во Ефес, од каде што таа ги посетила св. Игнат Богоносец во Антиохија, св. Лазар воскреснатиот од Исуса кој бил епископ на Кипар и Света Гора којашто во таа прилика и ја благословила. И по враќањето во Ерусалим Богородица живеела во домот на апостолот и евангелист свети Јован Богослов и ги посетувала местата на кои за време на животот на Исус се случиле важни настани како што се Голгота, Витлеем, Гетсиманија, Елеонската Гора, потоа гробот на Исус итн. А во овие посети некои истражувачи гледаат зародиш на христијанскиот аџилак. Особено Богородица често го посетувала гробот на својот син и го молела што побргу да ја земе кај себе. Набргу Господ Исус Христос ѝ пратил вест дека е скоро часот кога таа ќе умре. Истиот оној архангел Гаврил што ѝ ја соопштил благата вест дека ќе го роди Спасителот, сега ѝ кажал дека е дојдено времето кога таа ќе се пресели кај својот син. Ѝ предал рајска палмова гранка како победа на животот над смртта со барање да ја носат пред одарот за време на погребот. Богородица не се исплашила од оваа вест туку се израдувала што наскоро ќе биде кај својот син. Му кажала на свети Јована, му ја предала рајската гранка и започнала да се подготвува за напуштање на овој свет. Посакала да ги види сите апостоли кои поради прогоните на Ирод, но и поради своите обврски да го шират христијанството биле растурени по светот. Носени од некоја таинствена сила сите апостоли веднаш пристигнале, со исклучок на Тома кој бил многу далеку и во тој момент не можел да дојде. На 15-тиот ден во месецот, во третиот час од денот, Богородица била легната во ковчегот, многу свеќи ја осветлувале просторијата, а апостолите пееле и го славеле Господа Исуса Христа. Богородица го очекувала својот син да ја поведе на небото. Одеднаш силна светлина ја исполнила просторијата, Исус слегол од небото со многу светци и ангели, а Богородица гледајќи го него извикнала: „Мојата душа го велича Господа, и мојот дух се зарадува во Бога, Спасителот мој, оти ја погледна смиреноста на слугинката Своја, и ете, отсега ќе ме ублажуваат сите родови“, (Лука, 1/46-48) по што без болки ја предала својата душа во рацете на својот син. Тогаш ангелите го запеале поздравот од Благовештение: „Радувај се благодатна! Господ е со тебе! Благословена си ти меѓу жените“. (Лука, 1/28) Во тој момент апостолите виделе како со оваа песна ангелите, заедно со Исус, ја носат душата на Богородица кон небото. Лицето ѝ светело како сонце, а од телото се ширел пријатен мирис од кој се излечиле многу болни. По сопствена желба Богородица била погребана во Гетсиманската градина, каде што биле гробовите на нејзините родители Јоаким и Ана и на свршеникот (старателот) Јосиф. За време на погребот светиот апостол Јован ја носел рајската гранка пред погребната поворка, апостолите го носеле телото на Богородица, а над нив се слушало пеењето на ангелите. Светол облак ја завиткувал поворката и непријателите не можеле да се приближат, иако постојано ја следеле и се обидувале да ја растурат поворката, а телото на Богородица да го запалат. Во еден момент на едно место малку се поткренал облакот и се видел ковчегот во кој била Богородица. Тогаш еден од еврејските свештеници се затрчал кон него, го фатил со рацете за да го преврти. Но во тој момент невидлив ангел со меч му ги отсекол рацете и дланките останале залепени на ковчегот. Свештеникот се покајал за тоа што сакал да го направи и заплакал, а апостолот Петар му рекол да ги допре рацете до пресечените дланки. Кога тоа го направил се случило чудо, рацете зараснале како никогаш да не биле пресечени. Сите што виделе се увериле дека Исус навистина е синот Божји и на тој ден многумина се крстиле и го примиле христијанството. Телото на Богородица било положено во гробот во Гетсиманската градина и врз отворот бил ставен голем камен. Три дена апостолите пееле псалми, а од воздухот се слушало пеењето на ангелите. Третиот ден по погребот пристигнал апостолот Тома кој што многу жалел затоа што не присуствувал на погребот на Божјата мајка и побарал апостолите да му го отворат гробот за да се поклони пред телото на Богородица. Апостолите му ја исполниле желбата, го отвориле гробот но на општо изненадување телото не било внатре. Имало само некои погребни платна од кои се ширел пријатен мирис. Тогаш се јавила Богородица и им соопштила дека на третиот ден по погребот Исус ја воскреснал кревајќи ја на небото. Кога се упокоила Богородица имала 63 (според други 72) години. Празникот Успение на Пресвета Богородица меѓу народот познат како Голема Богородица се празнува на 28 август според новиот (односно на 15 август според стариот) календар. За подостоинствено празнување на овој празник му претходи двенеделен пост што започнува на 14/1 август, односно на празникот Св. седум маченици Макавејски. Иако култот на Пресвета Богородица имал значајно место во христијанскиот свет уште од најстари времиња, сепак, празникот на нејзиното успение не се празнувал од почетокот. Во почетокот се празнувал празникот Собор на пресвета Богородица, веднаш по Божик, а подоцна од овој општ празник на мајката Божја како и другите нејзини празници се одделил и празникот на нејзиното Успение. На иконите Успението на Пресвета Богородица е насликано на овој начин: На одарот е поставено телото на Богородица. Околу неа се народот и апостолите. До одарот во средината е нејзиниот син Исус кој во рацете го држи нејзиниот дух во форма на новороденче, или нејзиното тело во минијатурна форма. На некои фрески меѓу апостолите што го носат ковчегот со телото на Богородица насликан е и свештеникот со пресечените раце. Низ цела етничка Македонија во манастирите или црквите што го носат името на Пресвета Богородица на празникот Мала Богородица се одржуваат масовни народни собири. Така е крај манастирот во Матка крај Скопје, кај црквата во центарот на Скопје, во Лешочкиот манастир крај Тетово, во Берово, и на повеќе други места. Тропар Успение на Пресвета Богородица Богородице, и во раѓањето си го сочувала девството, а по своето успение не си го оставила светот, туку си се преселила во живот, Мајко на Животот, и со твоите молитви ги избавуваш од смртта нашите души. (За МИА подготви Марко Китевски)

Успение на пресвета Богородица во Матка согласно мерките за заштита од Ковид-19

Ивона Петрова — Thu, 27 Aug 2020 06:34:50 +0000

Православните христијани утре го одбележуваат празникот Успение на пресвета Богородица, еден од најголемите празници посветен на Мајката Божја. Скопјани традиционално денеска поладне и утре го посетуваат манастирот посветен на Успението на пресвета Богородица во Матка, каде оваа година одбележувањето ќе биде согласност мерките за заштита од коронавирусот пропишани од Комисијата за заразни болести при Министерството за здравство. Прославата по повод празникот почнува во 17 часот со едночасовна вечерна богослужба во дворот на манастирот, на отворено, а сите присутни ќе мора да стојат на растојание. После вечерната служба ќе продолжи посетата на храмот според превентивните мерки. На денот на празникот, утре рано изутрина во 2 часот предвидено е да започне бдение кое ќе заврши со Божествена литургија, со која ќе чиноначалствува поглаварот на МПЦ – ОА г.г. Стефан. Во дворот на манастирот ќе се одржи и традиционална крводарителска акција. Во манастирот ќе се влегува на предната врата, а од таму ќе се излегува на задниот влез. Секој посетител за да влезе ќе мора задолжително да носи маска. Исто така на влезот ќе се мери температура. Верниците и посетителите ќе мора да внимаваат и да одржуваат дистанца од 1,5 метар. Местата за стоење и за правец на движење во манастирот ќе бидат одбележани. На влезот и за време на задржување во манастирот е задолжителна дезинфекија на рацете, како за посетителите така и за оние што ќе бидат задолжени за организацијата на настанот. Со оглед на законските правила и услови донесени од страна на Комисијата за заразни болести, нема да има служење на храна и пијалаци, како и културно-забавна програма. Предвидена е и надворешна продавница со манастирски производи и сувенири. На денот на празникот во дворот ќе има поставено и маса за осветување на славски колачи.

Во петок е голем и тежок празник- еве што треба да направат сите жени и мајки на најголемиот женски празник

Дарко Андоновски — Tue, 25 Aug 2020 20:08:05 +0000

Во петок е големиот верски празник, Успение на Пресвета Богородица или Голема Богородица, а воедно овој ден е прогласен за неработен. Од повеќето празници посветени на пресвета Богородица овој е еден од најзначајните. Затоа народот овој празник го нарекува уште и Голема Богородица. Во македонските цркви и манастири можат да се сретнат прекрасни претстави на настанот што црквата го слави. Обично се наоѓаат над влезната западна врата на црквата. Инаку, самиот збор успение значи заспивање; поинаку кажано, не се слави смртта, туку вознесувањето на Богородица во небесните живеалишта. Се слави нејзиното заспивање, бидејќи таа не помина низ смртта како враќање на правот на правот. Веднаш по нејзината смрт таа е земена на небото во Христовите прегратки, вознесена е заедно со телото и станува прв и најголем застапник на луѓето пред Бога. Според црковното предание, Богородица го завршува својот живот тивко и мирно без никакви болести и страдања и по смртта на нејзиниот син Господ Исус Христос, таа честопати се молела заедно со апостолите Господ Бог да ја земе нејзината душа и да ја пресели на небото. Доживеала длабока старост. За време на една молитва во Леонската Гора, светиот Архангел Гаврил и' се јавил и и' рекол дека за три дни ќе се пресели од овоземниот во небесниот живот. Таа му ја кажала веста на свети апостол Јован, кој, пак, требало да се грижи за неа до крајот на нејзиниот живот. Свети апостол Јован ја објавил веста, која бргу се проширила и сите доаѓале кај Пресвета Богородица да и' оддадат почит додека се' уште е жива. Сево ова се случувало во куќата на светиот апостол Јован каде што Богородица му ја предала својата душа на Господ Исус Христос. Била опкружена со голем број ангели и архангели. Се создал шум и голем облак, а пристигнале сите апостоли да и' оддадат чест. Меѓу нив не бил само светиот апостол Тома, по божја промисла. Тој бил далеку од другите апостоли, бидејќи го проповедал христијанството. Богородица првин легнала на одарот и во тоа време во целосна светлина дошол Господ Исус Христос, а таа станала и рекла: „Душата моја го велича Господа и духот мој се зарадува во него“. Веднаш потоа повторно легнала и заспала. Кога Пресвета Богородица им се јавила на присутните во својот гроб, во нејзина целосна слава и величина, тогаш тие поверувале дека таа од ангелите божји е воздигната од земјата на небото во придружба на голем ангели и архангели, серафими, херувими и светители. Тоа е преминот од земното кон небесното царство, односно од земниот кон вечниот живот. На иконите, овој празник обично се претставува со иконата со креветот на кој лежи Богородица со рацете вкрстени на градите. На обете страни на креветот се наоѓаат свеќници со запалени свеќи. Кај нозете на Пресвета Богородица Св. Петар поткадува со кандило, а над главата се Св. Апостол Павле и Св. Јован Апостол со главата, додека останатите апостоли стојат наоколу. Над Богородица е Христос кој ја држи душата на Богородица во форма на дете, опкружена со светлина и ангели. Бидејќи на празникот му претходи двонеделен пост, на 28 август жените одат на причест, затоа што овој ден се смета како празник за сите жени и мајки. Во некои области, се смета дека во овој период е најдобро да се изберат лековити билки кои третираат разни заболувања, бидејќи најмногу можат да им помогнат на луѓето.