увоз – Kurir.mk

Американската стопанска комора во Косово бара укинување на забраната за увоз од Србија

Тале Кристо — Tue, 05 Sep 2023 18:21:08 +0000

Американската стопанска комора во Косово (АСКК) побара од владата на Албин Курти итно да ги преиспита мерките, воведени во јуни годинава, со кои се забранува увозот на стоки од Србија, јави дописникот на МИА од Приштина. Според соопштението што денеска го достави до медиумите, АСКК оценува дека со одлуката на владата во Приштина „се попречуваат меѓународните комерцијални интереси, преку ограничување на прометот на стоки од светски познати брендови“. Американската комора соопшти дека влијанието на оваа одлука во голема мера ги погодува меѓународните компании, вклучително и оние од Соединетите Американски Држави. Според официјалните податоци на кои се повикува Комората, „увозот од компании со значителна американска сопственост е намален за над 39 отсто во споредба со 2022 година, што го истакнува значителното влијание што сегашните мерки на Владата на Косово го имаат врз меѓународните претпријатија“. „Податоците откриваат тмурна реалност; увозот поврзан со американски компании се намалува со алармантен ритам. Понатаму, секоја трговска бариера, како што е оваа забрана, неминовно ги зголемува потрошувачките цени, дополнително оптоварувајќи ги буџетите на косовските семејства. Дотолку повеќе, во услови кога Косово веќе ја укина забраната за увоз на суровини и полуфинални производи од Србија, бесмислено и иронично е да остане на сила мерката со која се забранува увоз на стоки што претставуваат меѓународни комерцијални интереси“, се наведува во соопштението. Американската комора цени дека економската нормализација на Косово и Србија „ги надминува билатералните интереси“. „Постојано залагајќи се за отворена и урамнотежена трговска политика, АСКК бара брзи и решителни активности кои ќе го поддржат економскиот раст, просперитетот и регионалната хармонија“, се вели во соопштението. Владата на Курти одлучи да го запре увозот од Србија како економска мерка по киднапирањето на тројца косовски полицајци на територијата на земјата од страна на српските сили во јуни оваа година.

Раст на извозот, намален увозот

Ивона Петрова — Fri, 04 Aug 2023 17:07:59 +0000

Вкупната вредност на извозот на стоки од Република Северна Македонија, во периодот јануари-јуни годинава, изнесува 4 251 741 илјади евра, и бележи пораст од 3.8% во однос на истиот период лани. Вредноста на увeзената стока, пак, во првото полугодие е 5 537 740 илјади евра што е за 7.4% помалку во споредба со претходната година. Трговскиот дефицит изнесува 1 285 999 илјади евра, соопшти Државниот завод за статистика. Трговската размена по производи покажува дека во извозот најголемо е учеството на катализаторите на носачи со благородни метали или нивни соединенија, сетовите на проводници за палење и слично, за возила, авиони или бродови, електричната енергија и плоснатоваланите производи од железо или нелегиран челик, неплатинирани или необложени. Во увозот најмногу се застапени нафтените масла и маслата добиени од битуменозни минерали (освен сурови), другите метали од платинската група и нивни легури, необработени или во облик на прав, платината и легурите на платина, необработени или во прав и благородни метали во колоидна состојба; соединенија, органски или неоргански, од благородни метали, хемиски дефинирани или недефинирани; амалгами од благородни метали. Република Северна Македонија најмногу тргувала со Германија, Велика Британија, Грција, Србија и Кина.

Домати, краставици, риба: Расте извозот на албански производи во Македонија, се намалува увозот на македонски во Албанија

Ивона Петрова — Thu, 29 Jun 2023 06:32:23 +0000

Во првите пет месеци од годинава албанскиот извоз во Македонија се зголемил за речиси 1,7 милијарди лека (15, 7 милиони евра) споредено со истиот период минатата година. Според официјалните податоци на Институтот за статистика, ИНСТАТ, за надворешно трговската размена, во периодот јануари-мај, во Северна Македонија се извезени стоки во вредност од околу 9,2 милијарди лека или 82,2 милиони евра. Наспроти растот на албанскиот извоз се намалува увозот на македонски производи во Албанија. - Во овој извештаен период забележан е пад на увозот на стоки од Северна Македонија и тоа за 813 милиони лека(7,5 милиони евра). Според податоците, увозот резултира со бројки од 5,8 милијарди лека (53,7 милиони евра) наспроти 6,6 милијарди лека (61,1 милиони евра) колку што бил во првите пет месеци од 2022 година, наведува ИНСТАТ. Најизвезувани производи и понатаму се свежите производи: домати, краставици, свежа риба, свежо цитрусно овошје, производи од тесто итн. Албанија и Северна Македонија тесно соработуваат во рамките на спроведувањето на договорот ЦЕФТА 2006 година и од 2011 година трговијата меѓу двете земји е либерализирана и работи без царински давачки.

Пад на увозот во Кина

Ивона Петрова — Tue, 09 May 2023 15:26:09 +0000

Во април забележан е драстичен пад на увозот на Кина, како и забавување на извозот, што сигнализира намалена побарувачката во период на раст на каматните стапки ширум светот и зголемени геополитички тензии, Увозот во април е намален за 7,9 отсто во однос на истиот месец лани, по падот од 1,4 проценти претходниот месец. Извозот, пак, пораснал за 8,5 отсто, по растот од 14,8 проценти во март, соопшти Царинската управа. Трговскиот биланс за април покажа суфицит од 90,21 милијарди долари, поголем за 2,3 отсто во однос на март. Според официјалните податоците, кинескиот извоз во АСЕАН се зголемил за само 4,5 отсто во април по скокот од 35,4 проценти во март. Извозот во САД е намален за 6,5 отсто, а увозот за околу три проценти. Увозот на јаглен во Кина бележи драстичен пад откако го достигна највисокото ниво во последните 15 месеци во март, додека е намален увозот на бакар и природен гас. Увозот на црвениот метал според многумина е индиректен показател за растот на светската економија.

Во првите два месеца извозот зголемен за 10.2, а увозот намален за 1.5 отсто

Катерина Бојаџиева — Fri, 05 May 2023 10:45:59 +0000

Вкупната вредност на извозот на стоки од Република Северна Македонија, во првите два месеца од годинава, изнесува 1 339 941 илјада евра и бележи пораст од 10.2 % во однос на истиот период лани. Вредноста на увeзената стока, пак, изнесува 1 763 707 илјади евра, што е за 1.5 % помалку од претходната година, соопшти Државниот завод за статистика. Трговскиот дефицит, во периодот јануари − февруари 2023 година, изнесува 423 766 илјади евра, а покриеноста на увозот со извоз е 76.0 %. Трговската размена по производи покажува дека во извозот е најголемо учеството на катализаторите на носачи со благородни метали или нивни соединенија, сетовите на проводници за палење и слично, за возила, авиони или бродови, електричната енергија и плоснатоваланите производи од железо или нелегиран челик, неплатинирани или необложени. Во увозот најмногу се застапени нафтените масла и маслата добиени од битуменозни минерали (освен сурови), другите метали од платинската група и нивни легури, необработени или во облик на прав, платината и легурите на платина, необработени или во прав и благородни метали во колоидна состојба; соединенија, органски или неоргански, од благородни метали, хемиски дефинирани или недефинирани; амалгами од благородни метали. Во периодот јануари − февруари 2023 година, според вкупниот обем на надворешнотрговската размена, Република Северна Македонија најмногу тргувала со Германија, Велика Британија, Грција, Србија и Бугарија.

МАЛМЕД издаде одобрение за увоз на лекот „Трикафта“

Ивона Петрова — Mon, 20 Feb 2023 12:15:32 +0000

Агенцијата за лекови МАЛМЕД претпладнево издаде одобрение за увоз на лекот „Трикафта“ наменет за пациентите со цистична фиброза, потврди за МИА директорот на МАЛМЕД, Љирим Шабани. Тој истакна дека се завршени сите процедури за одобрување на увозот на лекот и сега останува уште да се реализира постапката. Согласно претходните најави од Владата, во случајов станува збор за интервентен увоз на „Трикафта“ наменет за осумтемина најкритични пациенти заболени од цистична фиброза, додека за обезбедување на редовно снабдување со лекот за сите останати заболени потребни се законски измени. Владата информира дека веќе е подготвен Предлог-закон за измена на правилата за јавни набавки, со кои би се овозможиле директни преговори меѓу државата и компанијата единствен производител лекот „Трикафта“ и кој треба да биде усвоен од страна на Собранието.

Блумберг: Белата куќа размислува за забрана за увоз на руски алуминиум

Тале Кристо — Wed, 12 Oct 2022 20:20:54 +0000

Администрацијата на американскиот претседател Џо Бајден размислува за целосна забрана на увоз на руски алуминиум како одговор на руската воена ескалација во Украина, пренесува Блумберг.

Белата куќа, наводно, разгледува три опции: целосна забрана, зголемување на тарифите на толку високо ниво што би можеле да бидат еквивалентни на забрана или санкции против Русал.

Ваквиот потег би имал далекусежни импликации за глобалниот пазар на алуминиум, што потенцијално ќе ги остави потрошувачите во САД и на други места да се обидуваат да најдат заменски метал.

По Кина, Русија е втор најголем светски производител на алуминиум, кој е клучен за повеќето тешки индустрии.

Само во САД, руските пратки традиционално сочинуваат околу 10 отсто од вкупниот увоз на алуминиум, а податоците покажуваат дека Русија е трет најголем извозник во САД во август.

Зголемени и извозот и увозот

Магдалена Андонова — Fri, 07 Oct 2022 10:53:14 +0000

Вкупната вредност на извозот на стоки од Република Северна Македонија, во периодот јануари – август 2022 година, изнесува 5 396 652 000 евра и бележи пораст од 18.3 % во однос на истиот период од претходната година. Вредноста на увeзената стока, во истиот период, изнесува 7 894 510 000, што е за 26.2 % повеќе во лани. Трговскиот дефицит, во периодот јануари – август 2022 година, изнесува 2 497 858 000 евра, соопшти Државниот завод за статистика. Трговската размена по производи покажува дека во извозот најголемо е учеството на катализаторите на носачи со благородни метали или нивни соединенија, сетовите на проводници за палење и слично, за возила, авиони или бродови, фероникелот и деловите за седишта. Во увозот најмногу се застапени нафтените масла и маслата добиени од битуменозни минерали (освен сурови), другите метали од платинската група и нивни легури, необработени или во облик на прав, електричната енергија и благородните метали во колоидна состојба; соединенијата, органски или неоргански, од благородни метали, хемиски дефинирани или недефинирани; амалгамите од благородни метали. Во периодот јануари – август 2022 година, Република Северна Македонија најмногу тргувала со Германија, Велика Британија, Грција, Србија и Бугарија. (МИА)

Зголемен увозот на Грција од Русија, намален од Украина

Тале Кристо — Wed, 17 Aug 2022 13:17:11 +0000

Трговското салдо на Грција со Русија е негативно, а со Украина позитивно во првата половина од 2022 година, додека пак во месец јуни увозот од Русија бележи раст од 86,3 отсто, а од Украина пад од 40,9 проценти, согласно привремените податоци објавени од грчката служба за статистика, јави дописничката на МИА од Атина. Според податоците за трговската размена во периодот јануари – јуни 2022 година дефицитот од трговското салдо на Грција со Русија изнесува 3.400,9 милиони евра, а со Украина суфицитот достигна 56,1 милиони евра. Поконкретно за Русија, во јуни годинава вредноста на грчкиот увоз од земјата изнесува 625,3 милиони евра, што бележи зголемување за 86,3 отсто во однос на ланскиот јуни, а вредноста на извозот во Русија за истиот период изнесува 12,7 милиони евра и бележи намалување од 26,9 проценти. Во првата половина од годинава, вредноста на увозот на Грција од Русија е 3.461,1 милиони евра со пораст од 112,3 отсто во однос на истиот период лани, а вредноста на грчкиот извоз во Русија во истиот периодот е намален за 30,3 проценти. Масла од нафта, нафтени гасови и гасовити јаглеводороди се главните производи кои Грција ги увезува од Русија, а во јуни 2022 година во Русија извезувала електрични машини и уреди, маслиново масло, овошни џемови, желеа, мармалади и слични производи од варено овошје. Во однос на Украина, во јуни 2022 година вредноста на грчкиот увоз била 8,5 милиони евра, за 40,9 отсто помалку во споредба со јуни 2021 година, а вредноста на извозот на Грција изнесува 86,0 милиони евра и бележи зголемување од 148,9 отсто во однос на ланскиот јуни. Во периодот јануари- јуни 2022 година, вредноста на увозот е намалена за 14,9 проценти, а на грчкиот извоз во Украина зголемена за 28,6 отсто. Меѓу главните производи кои биле увезени од Украина во јуни годинава се феролегури, пченка, стаклени шишиња и останати садови од стакло, а Грција извезувала масла од нафта, кајсии, цреши, праски, сливи и керамички производи.

Извозот во првите шест месеци зголемен за 20,2 отсто, а увозот за 28,7 проценти

Катерина Бојаџиева — Fri, 05 Aug 2022 11:10:01 +0000

Вкупната вредност на извозот од земјава во периодот јануари – јуни 2022 година изнесува 4 097 486 000 евра и бележи раст од 20,2 отсто во однос на истиот период лани, додека вредноста на увезената стока е 5 974 699 000 евра што е зголемување за 28,7 проценти, соопшти Државниот завод за статистика. Трговскиот дефицит изнесува 1 877 213 000 евра, а покриеноста на увозот со извоз изнесува 68,6 отсто. Според Државниот завод за статистика, трговската размена по производи покажува дека во извозот најголемо е учеството на катализаторите на носачи со благородни метали или нивни соединенија, сетовите на проводници за палење и слично, за возила, авиони или бродови, фероникелот и деловите на седишта од подгрупата 821.1. Во увозот најмногу се застапени нафтените масла и маслата добиени од битуменозни минерали (освен сурови), другите метали од платинската група и нивни легури, необработени или во облик на прав, електричната енергија и благородни метали во колоидна состојба; соединенија, органски или неоргански, од благородни метали, хемиски дефинирани или недефинирани; амалгами од благородни метали. Во периодот јануари -јуни 2022, според вкупниот обем на надворешнотрговската размена, земјава најмногу тргувала со Германија, Велика Британија, Грција, Србија и Бугарија.