Зборник со трудови за празнувањето на Ѓурѓовден во Македонија

Ивона Петрова — Wed, 03 Oct 2018 05:47:24 +0000

Управата за заштита на културното наследство (УЗКН) и Институтот за фолклор „Марко Цепенков“ денеска ќе промовираат зборник на трудови „Ѓурѓовден во Република Македонија“ во рамки на „Европската година на културното наследство 2018“. Публикацијата е заокружување на повеќегодишната соработка меѓу УЗКН и Институтот на валоризација на празнувањата на пролетниот празник Ѓурѓовден кај сите етнички заедници во Македонија. Изданието е финансирано од Министерството за култура, а целта е да ја промовира и потенцира важноста на разноликоста во културните екпресии и да укаже на потребата од вклучување на нематеријалната култура во креирањето на државните и меѓународните развојни политики. - Препознавајќи ја кохезивната функција на нематеријалното културно наследство за нашето општество, празнувањата на Ѓурѓовден кај Македонците, Ромите, Турците, Албанците и Власите како поединечни добра се прогласени во 2011 година за културно наследство од особено, поткатегорија исклучително значење, соопшти УЗКН.

Подводно ќе се истражува локалитетот Залив на коските кај Градиште

Ивона Петрова — Wed, 13 Jun 2018 06:06:31 +0000

Управата за заштита на културното наследство (УЗКН) и Центарот за истражување на предисторијата – Скопје денеска организираат отворен ден со медиумите на локалитетот Плоча Миќов Град (Залив на коските) кај Градиште во Охрид по повод отпочнувањето нова археолошка кампања на подводни и дендрохронолошки истражувања. Како што соопшти УЗКН, на овој локалитет - предисториска наколна населба, во текот на идниот месец ќе се реализира ново археолошко истражување во рамки на меѓународен проект во соработка меѓу Центарот за истражување на предисторијата - Скопје, Универзитетот во Берн и Заводот за заштита на спомениците на културата и музеј – Охрид. - Во проектот првпат ќе бидат применето дендрохронолошко датирање на археолошки локалитет во Македонија, така што ќе се анализираат дрвените колци од населбата, а воедно ќе се изврши и нивно ГИС мапирање со цел да се одреди точната позиција. На тој начин, ќе се утврди староста на секоја градба поединечно и прецизно ќе се одреди нивниот облик. Во рамките на проектот ќе се врши фотограметриско и 3Д моделирање на наодите и нивно кабинетско проучување со цел да се дефинираат социјалните, економските и симболичките процеси на заедниците што ја формирале и живееле во оваа предисториска наколна населба, информира УЗКН. Почетокот на истражувањето со свои обраќања ќе го означат Елеонора Петрова-Митевска, директор на Управата за заштита на културното наследство, Алберт Хафнер, професор на Институтот за археологија при Унивезитетот во Берн, и Гоце Наумов, раководител на истражувањето. На настанот ќе биде презентиран планот на истражувањата, а ќе се демонстрираат и нуркачки активности на археолозите вклучени во проектот – истражувачи и студенти од Швајцарија и Македонија. Овој настан е вклучен во годишната програма на УЗКН за одбележување на Европската година на културното наследство 2018, која се спроведува под слоганот „Нашето наследство – Европска вредност“ и мотото „Кон споделена одговорност за заштита на културното наследство“.

УЗКН – Kurir.mk

Зборник со трудови за празнувањето на Ѓурѓовден во Македонија

Подводно ќе се истражува локалитетот Залив на коските кај Градиште