Податоците на дел од граѓаните на сајтот за вакцинација се пробиени

Дарко Андоновски — Wed, 16 Jun 2021 08:23:09 +0000

Аматеризам или нечија злоупотреба, но податоците оставени на сајтот Вакцинација.мк не се безбедни. Ова за Алфа ТВ го тврди човек кој вели дека за само седум минути без особени познавања од областа на ИТ технологијата, успеал да собере дури 140 документи со лични податоци од сајтот, единствени матични броеви, електронската книшка, видот на вакцината, каде и кога сте вакцинирани и други податоци од лична природа. Вели дека, сакајќи да го преземе сопствениот сертификат за вакцинација, тој успеал за само неколку минути да влезе во системот и да оствари увид врз личните податоци кои што се наоѓаат на истиот. Загрижен за безбедноста на податоците, човекот анонимно се обрати до Алфа, но ги достави документите кои ги обезбедил, за да алармира колку лесно може некој со минимални информатички познавања да упадне во системот со стотици илјади матични броеви и лични информации, особено ако се знае дека доколку тие паднат во погрешни раце можат да бидат злоупотребени. На страницата Вакцинација. мк пишува дека контролор на личните податоци кои ги давате е Министерството за здравство, а дека самите ги одржуваат серверите и сите активности на веб страната, вклучувајќи ги логовите кои се креираат и анализата на податоците кои се пренесуваат од посетата на веб страната. Активностите на обработка на лични податоци поврзани со on-line услугите достапни преку интернет страната на МЗ, се извршуваат од страна на вработените одговорни за овие услуги или лицата задолжени за извршување на предметните активности. Не споделуваме податоци за Вас и/или за Вашата посета на нашата веб страна, на трети лица, освен во следните случаи: во случај на ангажирање на даватели на услуги ако МЗ ги ангажира како обработувачи со што ќе бидат обврзани да постапуваат по упатствата на МЗ и обезбедат заштита на личните податоци кои се обработуваат при обезбедувањето на тие услуги. По барање на суд, полиција или други органи и тела за вршење на нивните надлежности и само ако постои законски основ за тоа – стои во делот приватност на оваа веб-страница. Сепак, едноставноста со кое лице со просечни познавања на информатиката може да влезе во системот, би требало да ги загрижи речиси четврт милион граѓани кои своите податоци ги оставиле на сајтот. На каква заштита на приватноста тие можат да се надеваат и дали ќе се издадат нови, овој пат безбедни, сертификати, треба да одговорат надлежните. Одговорноста на стручните лица во Министерството за здравство е огромна а во јавноста се наметнува прашањето, колку институциите на кои им ги доверуваме нашите лични податоци ги штитат истите.

„Vakcinacija.mk“ достапна и на албански јазик- еве колку граѓани аплицирале за вакцина

Дарко Андоновски — Mon, 15 Feb 2021 08:16:55 +0000

Министерството за здравство информира дека веб-страницата „Vakcinacija.mk“ на која граѓаните може да искажат заинтересираност за вакцинација против КОВИД-19 е достапна и на албански јазик на следниот линк: https://vakcinacija.mk/alb/. На оваа веб-страница 46.023 лица ја пополниле формата за аплицирање. На овој начин, тие се регистрираат во електронскиот систем „Мој Термин“, а матичниот лекар може да го види податокот за секој пациент. Преку оваа апликација, граѓаните искажуваат само интерес, но не и закажување за термин за вакцинација. „Мој Термин“ го утврдува датумот и часот за вакцинирање согласно фазите кои се содржат во Националниот план за имунизација на населението во земјава. Вчера, во Северна Македонија пристигна првата пратка 4680 од вкупно 8000 фајзерови вакцини против КОВИД-19 од Република Србија. Во текот на денешниот ден ќе заврши и регуларната процедура во МАЛМЕД, а од среда вакцинацијата почнува со здравствените работници во модуларната клиника во Клиничкиот центар во Скопје. Вакцинацијата ќе се одвива на пет вакцинални позиции, а во тимовите за имунизација има медицински сестри и лекари. Модуларната болница ќе работи во две смени од 8 до 20 часот.

вакцинација.мк – Kurir.mk

Податоците на дел од граѓаните на сајтот за вакцинација се пробиени

„Vakcinacija.mk“ достапна и на албански јазик- еве колку граѓани аплицирале за вакцина