вакцинирани лица – Kurir.mk

Во период од 13 недели во Македонија починале вкупно 312 , а се заразиле 13.886 целосно вакцинирани лица

Магдалена Андонова — Fri, 05 Nov 2021 10:59:03 +0000

Министерството за здравство ја објавува анализата на вакцинирани, од позитивни случаи со Ковид 19, во период од 6 август заклучно со 4 ноември. За вакцинирани се сметаат лицата кои се вакцинирани со две дози и поминале најмалку 14 дена од примање на втора доза вакцина. Во период од 06.08 до 04.11.2021 на територија на државата 48.955 граѓанин, се позитивни од тестирани на Ковид 19, од нив 28% биле целосно вакцинирани, односно 13.886 лица. Голем е бројот на невакцинирани граѓани кои се заразиле со Ковид 19. Според статистика за изминативе два месеци, 35.069, граѓани, односно 72% од позитивните на Ковид 19 не биле вакцинирани. Процентот на хоспитализирани лица кои се невакцинирани изнесува 78%, додека само 22% од сите моментално хоспитализирани пациенти се целосно вакцинирани. Смртноста кај невакцинираните е драстично поголема, покажува анализата. Во период од 6.08 до 04.11.2021 на територија на државата починале 1.688 пациенти со Ковид 19, 1.376 пациенти од починатите, односно 82% не биле вакцинирани, а само 18%, односно 312 примиле вакцина. Според анализите починатите имале повеќе комбинирани хронични заболувања. Пациентите биле вакцинирани со сите типови вакцини кои ги има на располагање кај нас. Министерството за здравство укажува на важноста на вакцинација, секоја вакцина која ја имаме на располагање е безбедна. Апелираме граѓаните да се вакцинираат, само така ќе дојдеме до колективен имунитет и ќе спречиме ширење на мутации на СарсКов2.

Во Индија за еден ден вакцинирани 10 милиони луѓе

Дарко Андоновски — Sat, 28 Aug 2021 11:51:25 +0000

Во Индија за еден ден против коронавирус беа вакцинирани 10 милиони луѓе, што е рекорден број за земјата која се обидува да се справи со новиот бран на епидемијата. Индискиот премиер Нарендра Моди денеска го пофали „подвигот“, бидејќи земјата со 1,3 милијарди жители вчера успеа да вакцинира толку голем број граѓани. – Им честитам на вакцинираните и на оние кои ја направија кампањата за вакцинација успешна, напиша Моди на Твитер. Индиската Влада, која е цел на критики по брзото ширење на епидемијата, изрази надеж дека до крајот на 2021 година ќе вакцинира 1,1 милијарда луѓе.

За 2 недели 9 вакцинирани лица во Македонија починале како последица од коронавирусот – ова се најновите статистики

Магдалена Андонова — Fri, 20 Aug 2021 12:09:35 +0000

Министерството за здравство ја објавува двонеделната анализа на вакцинирани, од позитивни случаи со Ковид 19. За вакцинирани се сметаат лицата кои се вакцинирани со две дози и поминале најмалку 14 дена од примање на втора доза вакцина. Во период од 06.08 до 19.08.2021 на територија на државата 9881 граѓанин, се позитивни од тестирани на Ковид 19, од нив само 15% биле целосно вакцинирани, односно 1507 лица. Голем е бројот на невакцинирани граѓани кои се заразиле со Ковид 19. Според двонеделната статистика, 8374 граѓани од позитивните на Ковид 19 не биле вакцинирани. Процентот на хоспитализирани лица кои се невакцинирани изнесува 91%, додека само 9% од сите 724 моментално хоспитализирани пациенти се целосно вакцинирани. Смртноста кај невакцинираните е драстично поголема, покажува анализата. Во период од две седмици на територија на државата починало 101 лице со Ковид 19, 92 пациенти од починатите не биле вакцинирани, а само 9 односно (8%) примиле вакцина. Според анализите починатите имале повеќе хронични заболувања. Заразените и починатите се вакцинирани со вакцини што ги има на располагање кај нас, како и вакцини Модерна и Џонсон и Џонсон, кои некои од пациентите ги примиле во странство. Министерството за здравство укажува на важноста на вакцинација, секоја вакцина која ја имаме на располагање е безбедна, ја намалува шансата од заболување, спречува тешка форма на болеста и штити од смртен исход. Министерството за здравство апелира граѓаните да се вакцинираат, само така ќе дојдеме до колективен имунитет и ќе спречиме ширење на мутации на СарсКов2.

Од утре слободен влез во Хрватска за вакцинирани против Ковид-19

Дарко Андоновски — Wed, 31 Mar 2021 12:56:43 +0000

Вакцинирани со обете дози на вакцината, вклучително и кинеската и руската, и оние кои прележале Ковид-19 во последните шест месеци од утре ќе можат да влезат во Хрватска без негативен ПЦР тест, но ќе се овозможи и влез со негативен брз антиген тест, признаен во ЕУ. – На ниво на ЕУ, во моментов нема заклучок за вакцините кои не се регистрирани во рамки на ЕУ. Кога ќе дојде на дневен ред, ќе се донесе заеднички став и тогаш ќе се прилагодиме на таа одлука. Дотогаш, што се однесува до Хрватска, за нас е важно вакцината, и руска и кинеска, да е една од оние што се користат, изјави министерот за внатрешни работи на Хрватска Давор Божиновиќ, на прес-конференцијата на Националниот штаб за цивилна заштита. Директорот на Хрватскиот институт за јавно здравје Крунослав Цапак рече дека е утврден период од 14 дена по втората доза на која било вакцина за преминување на границата затоа што „14 дена по втората доза на вакцината, се развива максимален имунитет кој останува стабилен”. Со одлуката за ограничување на преминот на државната граница, која ќе стапи во сила во четврток, 1 април, покрај потврдата за вакцинација со обете дози на вакцината, оние што имаат потврда за инфекција со коронавирус во последните шест месеци ќе можат да влезат во земјата без негативен тест. Сите други ќе мора да приложат негативен ПЦР тест, а ново е дека ќе биде неопходен брз тест признат од ЕУ. Поради влошување на епидемиолошката состојба, од утре се забрануваат тренинзите во затворени простории, освен за врвни спортисти, како и работата на детските игротеки. Националниот штаб допрва ќе го разгледува предлогот на Штабот за цивилна заштита во Загреб за задолжително носење заштитни маски на отворено.

Во Албанија над 100 илјади вакцинирани против Ковид-19

Дарко Андоновски — Wed, 31 Mar 2021 10:01:03 +0000

Заклучно со вчерашниот ден во Албанија вакцинирани се над 100.000 лица, објави на Твитер министерката за здравство, Огерта Манастирлиу, додавајќи дека „светлината на крајот од тунелот се приближува секој ден и се побрзо“. -100 илјади вакцинирани до вчера. 100 илјади повеќе заштитени животи. Секој ден и се побрзо светлината се приближува кон крајот на тунелот“, пишува Манастирлиу. Премиерот Еди Рама при посетата на градот Лач, каде од блиску го следеше процесот на вакцинација, најави дека целта е да прават по 30 илјади вакцини дневно и до крајот на мај со имунизацијата да бидат опфатени пола милион албански граѓани. Денеска е четвртиот ден од масовната вакцинација низ целата земја за лица на возраст над 70- годишна возраст, а тековно во сите здравствени центри во земјата се вакцинираат просветни работници и вработени во градинките. Министерката најави дека во текот април ќе пристигнат уште 20 илјади дози вакцина од компанијата „Фајзер“. -Врз основа на договорот со Фајзер во текот на април очекување 20 илјади вакцини. Во првата недела треба да приситнат 7 илјади и до 19 април 20 илјади дози. Очекуваме да присигнат и нови количини од договорот со Синовак, рече таа. Во изминатите три дена, од кога почна масовната вакцинација, во просек се имунизираат по над 10 илјади лица. Бидејќи од денеска во овој процес е вклучен и воено-медицнскиот персонал бројот на вакцинирани на дневно ниво ќе биде повисок.

Вакцинираните лица во САД ќе добијат препораки за однесување

Тале Кристо — Fri, 12 Mar 2021 08:29:56 +0000

Националниот институт за алергиски и заразни болести во САД наскоро ќе издаде нови препораки за граѓаните вакцинирани против коронавирусот. Во интервју за телевизијата МСНБЦ, главниот специјалист за инфективни болести во земјата, Ентони Фаучи рече дека наскоро ќе бидат објавени „голем број препораки“ со најоптимални медицински правила на однесување за луѓето кои примиле барем една доза од вакцината. – Овие препораки ќе се однесуваат на патувања, за однесување на работното место и во молитвените куќи, рече Фаучи. Како што истакнува весникот „Хил“, изјавата на Фаучи е дадена во врска со се почесто манифестираната независност на одделни држави, кои ги укинаа ограничувањата наметнати од пандемијата. Властите во некои држави го укинаа задолжителното носење маски на јавни места и други безбедносни мерки, вклучително и дистанцата. Администрацијата на претседателот Џо Бајден ги повика локалните власти да се воздржат од „рано укинување на ограничувањата“ за да се избегне отстапување од позитивните трендови во борбата против пандемијата на земјата.

Еве која е првата држава во светот која ќе ги укине ограничувањата за вакцинираните лица

Магдалена Андонова — Tue, 16 Feb 2021 13:54:21 +0000

Израел од 21 февруари ќе почне да ги укинува ограничувањата против коронавирус, но само за вакцинирани и оние кои го биле излекувани од Ковид-19, соопшти Министерството за туризам на земјата. Само носителите на „зелени пасоши“ ќе имаат дозвола да посетуваат спортски сали, базени, фитнес клубови, хотели (без ресторани), културни објекти и настани. Овој документ ќе биде потребен и за одмор на Мртво Море. – Израел е првата земја во светот што воведе „зелен пасош“ за да ги охрабри луѓето да се вакцинираат. Од темпото и резултатите од вакцинацијата наскоро можеме да примаме туристи од целиот свет без да стравуваме за здравјето на нашите граѓани и патници, рече Владимир Шклар, директор на рускиот оддел на израелското Министерство за туризам, цитиран од РИА Новости. Од 22 февруари продавниците, трговските центри, музеите и библиотеките ќе бидат отворени за сите граѓани. Тие ќе работат во согласност со стандардите што предвидуваат почитување на физичкото растојание, задолжително носење маски и прием на ограничен број посетители. (МИА)