велигденски јајца – Kurir.mk

ВНИМАВАЈТЕ: Колку време може да се јадат велигденските јајца?

Катерина Бојаџиева — Sun, 16 Apr 2023 12:45:55 +0000

Секоја домаќинка за Велигден вапца повеќе јајца, па најчесто дел од нив се фрлаат. Треба да бидеме внимателни од каде купуваме јајца, како и колку дена ги чуваме и јадеме. Тврдо варените јајца побрзо се расипуваат од свежите бидејќи со варењето се измива заштитната мембрана и преку лушпата можат да влезат бактерии. По варењето се ставаат во ладилник и стојат најмногу една недела. Инаку, јајцата се многу вкусен и хранлив оброк. Содржат протеини и голем број витамини и минерали и се одлична замена за месо. Треба да знаете дека варените јајца не мора да стојат во фрижидер, но никако не треба да ги чувате на место каде ќе бидат изложени на сонце. Како што тврдат нутриционистите, варените jajца може да ги јадете 5-7 дена од денот на варење. Се препорачува да ги чувате во фрижидер или на ладно место. Нека не ве загрижува зеленкастата боја на жолчката, тоа не значи дека јајцето е расипано туку е последица на хемиска реакција меѓу белката и жолчката. Доколку јајцето има чуден мирис, побезбедно е да не го јадете.

Колку време може да се јадат велигденските јајца?

Катерина Бојаџиева — Sun, 24 Apr 2022 09:08:19 +0000

Доколку денес ќе ги бојадисувате јајцата овие трикови ќе ви го олеснат тоа – еве го најлесниот начин до совршени велигденски јајца

Дарко Андоновски — Sat, 23 Apr 2022 08:06:17 +0000

Многумина луѓе денеска се одлучуваат да ги бојадисаат велигденските јајца. Она со што се соочуваат повеќето луѓе пред бојадисувањето, е пукањето на јајцата, а тоа оневозможува тие да бидат бојадисани. Затоа е важно пред да ги сварите да знаете дека тенџерето не треба да го „пренатрупате“ со јајца. Иако некои луѓе тоа често го прават за да заштедат време, ваквиот чекор всушност може да го отежни самиот процес. Внимавајте на температурата Она што е посебно важно е јајцата да не ги варите на највисока температура, туку на средна. Свежите јајца помалку пукаат Свежината на јајцата е лесно да ја одредите. Ставете едно јајце во чаша со вода. Доколку потоне, значи дека е свежо. Оставете да се оладат пред бојадисувањето и украсувањето Кога водата ќе почне да врие исклучете го шпоретот. Тргнете ги јајцата од оган три минути откако ќе ја исклучите ринглата. Потоа полека ставете ги во чинија со ладна вода, во која претходно сте ставиле една лажичка сол.

Обичаи за Велики Четврток, еве што треба да направите со првото вапцано јајце

Ивона Петрова — Thu, 29 Apr 2021 05:53:03 +0000

Во великата недела со обичаи и верувања особено е исполнет Велики четврток или Величетврток како што почесто се вика меѓу народот. Главен обичај што се изведува на овој ден и со посебно внимание е вапцувањето на велигденските јајца. Според обичајот најпрвин се вапцувале три јајца, а потоа и другите. В. Кличкова запишала дека во Порече, а тоа го среќаваме и во други краишта на Македонија, првото јајце било наменето на Господ и се викало Господово јајце, второто на домаќинот ‒ главата на семејството, а третото на стоката и бериќетот. Особено повеќе обичаи и верувања се поврзани со јајцето првак за кое се верува дека има магиска моќ. Тоа подоцна стои пред иконата, со него се враќа облак, се лекуваат болести кај луѓето и стоката, тоа заштитува од пожар, гром и сл. Јајцата ги вапцува домаќинката рано наутро пред да изгрее сонцето, зашто се верувало дека ако тоа се направело подоцна јајцата ќе се засмрдат. Вапцани пред да ги види сонцето, овие јајца, особено првакот, не се расипуваат и по неколку години. Кога ги вапцува јајцата домаќинката мора да има нешто јадено или да има каснато барем еден залак леб, зашто ако тоа го прави на гладно срце, јајцето може да ја разбие, да се разболи или да е несреќна, а и таа ако го разбие тоа ќе ја загуби магиската моќ. Насекаде во Македонија, на Велики четврток, рано пред изгрејсонце, првото јајце се става во сито и се обесува на дирекот од куќата или на друго место спроти сонце за да го видат првите сончеви зраци. Во некои краишта во ситото ставаат едно во други две или три јајца. Исто така, во некои краишта во ситото ставале и жито, некаде и срп за богат бериќет или сукало, за да се сучи касметот. Ситото било покривано со црвен машки појас или со друга ткаенина но секогаш со црвена боја. По вапсувањето на јајцата, но пак рано пред изгрејсонце, домаќинката го земала јајцето првак и на децата, уште додека биле в постела, им минувала три пати по лицето зборувајќи: „Црвено бело дебело“ или: „Црвено бело здраво и живо“, што значи да се дебели како јајцето, но и црвени во образите, што е ознака за здравје и напредок. Во Скопско, како што запишала Милица Георгиева, јајцата се бојадисувале не само пред сонце туку и пред да удрело клепалото од црквата зашто таквите јајца помалку се кршеле и подолго време не се расипувале. Е. Спространов сведочи дека во Охрид вечерта се носеле во црквата неколку црвени јајца „за да чует дванајсет ванѓељја“, а потоа едно од нив закопувале во нивата или во лозјето „за бериќет“. И Стефан Тановиќ во записите од Гевгелиско сведочи за одење во црквата каде што се слушале дванаесетте евангелија, а за тоа време секој во рацете држел свеќи. Таа свеќа, пак, што се држела додека се читало последното евангелие се носела дома и од неа се палело кандилото пред иконата. Со Велики четврток се поврзани и други обичаи и верувања. Така на пр. Стефан Верковиќ забележал дека во с. Мачуково, во егејскиот дел на Македонија, „таа ден колко црни кокошки снесат јајцата, и бележуват сус кониц, да напкум ʼи закопуват уф лозјата, за да не ʼи удре грат“. Кузман Шапкарев забележал обичај според кој малите моми замесувале за прв пат тесто, кое потоа со црвените јајца (чиј број бил колку што имало членови семејството) го носеле во црквата за таму да преспие додека се читале дванаесетте евангелија. Со тој квасец по празникот замесувале леб. На Велики четврток се запотнува, како што тоа се прави на сите Величетвртоци до Спасовден кога и не се работи, како што запишал Е. Спространов „за да не бијат град“. Запотнувањето се прави на тој начин што се става потка на клучките од вратите, потоа на долапите, стомните, грнците, амбарите, каците, бочвите и други места. За потка се користат билки за кои се верува дека имаат волшебна моќ како што се: кукурек, вратика, челинок, понекогаш се запотнува со гранки од леска, дрен, и др. Се запотнува за здравје но и со верување дека на тој начин луѓето, стоката и објектите ќе се заштитат од разни болести, несреќи, елементарни непогоди и сл. На Велики четврток се изведуваат и други обичаи. На пр. се јаде пресен зелник со зелје, потоа девојките си ги мијат косите, а во водата ставаат црвено јајце и здравец, за здравје. Во Мариово, како што запишал Милан Ристески, овчарите потстригувале неколку овци за потоа да стрижат во четвртоците, жените заплевувале во нивјето за потоа и тие да можат да плеват во овие денови, а мажите уште и оделе по дрва но без секира за да не треска град. Во Радовиш според записите на З. Делиниколова на овој ден вапцуваат јајца за Велигден. Секоја домаќинка јајцата што се одредени за вапцување ги пребројува уште во средата наутро, ги става во чиста вода да се киснат – за да им излезат нечистотиите. Приквечер ги варат јајцата во вода, ги мијат и ги бришат. Тогаш се пригитвува и бојата „бакам“ која ја купуваат од продавниците. Бакамот е црвена боја во форма на корупки од фамилијата на некои растенија, махунарки, кај нас се увезува од Мала Азија. За да си ја пушти подобро бојата бакамот се става од вечер во ладна вода „да кисне“ со која утредента јајцата се вапцуваат црвено. Во поново време јајцата се вапцуваат со други аналински бои: модри, зелени, жолти, шарени и др. До неодамна за бојадисување се користеле лушпи од кромид кои исто така претходно се киснат во вода за да пуштат боја –жолта. Според кажувањето на постари жерни од градот вистински велигденски јајца се само црвените. Жолтите се сметаат за еврејски, а боењето јајца во други анилински бои продрело од скоро време во градот. Изутрина на Вели Четврток секоја домаќинка станува рано, пред сонце, тихо за да не ја чуе никој од домашните, а особено децата. Запалува огин и го става на огин раскиснатиот бакам да зоврие, на кој му додава и стипса за да фати бојата. Најнапред пушта еедно јајце – јајцето на дедо Господ – Господово јајце, со кое оди кај децата кои сеуште спијат и ги гали по лице со зборовите: Црвено бело здраво-живо, а потоа го зема јајцето, го става на некое ткаено или плетено црвено парче спроти сонце – на источната страна на куќата и се враќа да ги бојадисува и другите јајца. Тоа го прави на брзина дури не огреало сонцето, за да не се усмрдат. Ако сака домаќинката јајцата да светат ги брише отпосле со зејтинлија крпа. Истиот ден се приготвуваат и слатки за Велигден. Се месат „пупи“ – вид бисквити и гевреци. Овие месени работи се приготвуваат скришум од децата, за да не каснат, зашто е грех да се омрсат пред Велигден. Обичај е на Вели четврток да се касне посен зелник со зелје. Зелниците се месат поручек, за да бидат готови за вечета. Девојчињата и невестите си ги мијат косите сус црвено јајце и здравец – за здравје. По вечера одат во црква на „дванајсет еванѓелии“. Подготви Марко Китевски за МИА

Со овој трик сигурно нема да ви пукне јајце за Велигден

Катерина Бојаџиева — Wed, 28 Apr 2021 20:14:36 +0000

На Велики Четврток се вапцаат велигденски јајца. Се вапцаат прво црвени, па потоа јајца во други бои, а најголемиот проблем е да не испукаат јајцата. Она што можеби не сте го знаеле е дека бојата за јајца која ја купувате не мора да ја растварате во вода. Во сад ставете ја бојата и со многу малку вода една лажица до две направете смеса и валкајте ги јајцата. За оваа постапка ќе ви треба повеќе време, но бојата е силна. За да не ви пукаат јајцата ставете неколку лажици оцет.

Сè што треба да знаете пред Велики петок – eве кои јајца не треба да се купуваат!

Магдалена Андонова — Tue, 27 Apr 2021 09:55:25 +0000

Пред сè, купете чисти и неоштетени јајца и задолжително измијте ги со млака вода пред да ги варите. Наскоро ќе го прославиме најголемиот христијански празник Велигден, а само два дена пред тоа ќе уживаме во нашиот омилен обичај - фарбање јајца. Покрај естетиката, важно е да се грижиме и за здравјето. Бидејќи велигденските јајца обично стојат многу - прво чекате од петок до недела, а потоа стојат на масата додека не ги изедете (барем 2-3 дена), еве неколку од најважните совети за купување: - Купете чисти и неоштетени јајца; - Кога варите јајца, најдобро е да ги готвите 12 минути од моментот на вриење; - Ако не обоите јајца природно или со помош на храна од силни бои, кога купувате бои во вреќи, земете ги оние што се обележани како бои за храна; - Сурови јајца се потенцијален извор на салмонела, па затоа е препорачливо да ги миете со млака вода пред да ги готвите и украсите; - Насликајте толку јајца колку што сте сигурни дека ќе се изедат, бидејќи е голем грев да се фрла храна, особено велигденски јајца; - Јајцата обоени, нелупени и без оштетена лушпа и стојат неколку часа на собна температура или ако се вадат неколку пати од фрижидерот, треба да се јадат во рок од еден до два дена.

Вака Русинките бојадисуваат јајца: Ги замотуваат во салфети, а со чепкалките за уши прават вистински магии (ВИДЕО)

Дарко Андоновски — Mon, 26 Apr 2021 13:22:14 +0000

Велигден веќе ни се приближува, а во четврток домаќинките ќе треба да ги бојадисаат своите велигденски јајца, па доколку се уште немате идеја како да ги направите оваа година, ви го претставуваме најубавиот и наједноставниот начин да добиете совршени шарени јајца за Велигден! Идејата е позајмена од Русинките, чиј метод на ладно боење потполно воодушевува. За овој метод на шарање ќе ви требаат бои во кесички, ладна вода, оцет, неколку салфети, стапчиња за уши и онолку ластичиња за тегли колку што ќе бојадисувате јајца. Постапка: Сварете ги јајцата на вообичаениот начин и оставете ги целосно да се оладат. Потоа, во секоја чаша ставете по една кесичка боја за јајца. Прелејте ги со лажица ладна вода и додајте лажица оладен оцет, па измешајте ја содржината во секоја чаша за убаво да се раствори бојата. Секое јајце посебно завиткајте го во салфета (ако се повеќеслојни, раздвојте ги слоевите салвета и користете по еден за едно јајце). На врвот врзете ластиче за тегли, па потопете го памукчето од стапчето за уши во боја и спонтано нанесувајте ги боите на јајцата. Кога ќе бидат обоени од сите страни, оставете ги да се сушат 15 минути. Потоа, одвиткајте ја салветата. Вашите феноменални велигденски јајца се готови! Деталната постапка погледнете ја во следново видео:

Најубави мермерни Велигденски јајца – едноставен природен метод со преубав ефект

Дарко Андоновски — Wed, 14 Apr 2021 16:11:14 +0000

Доаѓа Велигден, па еве еден начин како да ги украсите велигденските јајца. Состојки: 7-8 бели јајца 2 кесички зелена боја Лушпи од кромид Влажни марамчиња или газа 50 мл. алкохолен оцет Подготовка: Земете поголема количина на лушпи од кромид и ставете ги во блендер да се иситнат. Јајцата навлажнете ги со ладна вода и веднаш ставете ги во иситнетите лушпи од кромид и секое јајце завиткајте го со влажно марамче или газа и прицврстете со ластиче. Вака подготвените јајца наредете ги во тенџере. Во тенџерето ставете ги кесичките со зелена боја и оцедот, варете ги јацата на тивок оган, откако водата ќе зоврие варете уште 8 до 10 минути.Откао јајцата ке се сварат истурете ја топлата вода и веднаш налијте ладна вода. Отстранете ги марамчињата или газата од јајцата во зависност од тоа што сте користиле, исчистете ги лушпите од кромид од секое јајце и оставете јајцата добро да се изладат, па потоа со намрсена газа премачкајте го секое јајце.

Да не се претерува: Колку јајца смеете да изедете за Велигден?

Ивона Петрова — Mon, 13 Apr 2020 06:39:14 +0000

За Велигден не претерувајте со јадење јајца. Според експертите за исхрана, смеете да изедете едно до две јајаца на ден. Ако јадете само белка, може пет или шест, но само две жолчки. Според нив, боите за јајца, ако поминале низ контрола, не би требало да бидат опасни по здравјето на луѓето. Но, јајцата треба да ги гледате како да се без лушпа, оти кога тие се варат, им се уништува заштитниот слој, а имаат ситни пори преку кои минува апсолутно се. Што се однесува, пак, до природните бои за бојадисување јајца, како кромид, цвекло, тогаш нема никаква опасност. Јајцата можат да се јадат седум дена, но само ако се чуваат во фрижидер. Ако стојат на собна температура, не можат да се јадат цела недела, објаснуваат стручните лица.

Мозаик: Креативна техника за украсување на велигденските јајца

Предраг Кукиќ — Fri, 26 Apr 2019 13:32:50 +0000

Не постои поубав тајминг за креативност и фантазија од велигденските празници! Постојат милион начини и техники за да имате што поубави јајца на трпезата, но оваа е една од нашите омилени. Станува збор за техниката МОЗАИК, со која јајцата ќе изгледаат неверојатно. А најдобро од се е што е многу лесна и едноставна! Она што ви е потребно се обични фарби за јајца, изолир лепак во различни бои и секако јајца. 1.Јајцата исфарбајте ги во посветли бои и оставете да се исушат. 2.Најдобро е да ги поставите јајцата на сунѓер за да бидат подеднакво исфарбани. 3.Кога јајцата ќе се исушат, исечете го изолирот на поситни еднакви фигури- триаголници, кругови… 4.Лепете ги на јајцето со оставање малку простор меѓу фигурите. 5.Потоа јајцето исфарбајте го во друга боја по ваша желба и оставете да се исуши. 6.Ви остана уште да ги одлепите траките од изолирот и добивте преубаво МОЗАИК ЈАЈЦЕ! Ова е брз,едноставен и евтин начин со кој вашите јајца ќе изгледаат неверојатно!