велосипедска тура – Kurir.mk

Велосипедска тура за спортисти со попреченост

Магдалена Андонова — Tue, 08 Sep 2020 10:40:58 +0000

Триесетина спортисти со физичка и интелектуална попреченост учествуваа на велосипедската тура за спортисти со попреченост што се одржа во Преспа. Турата ја организираше Здружението на граѓани за адаптивни спортови и рехабилитација „Рекреакција“ во соработка со Здружението на граѓани „Ресурсен центар на родители на деца со посебни потреби“, Здружението на граѓани со параплегија и квадриплегија „Без ограничувања“ и Здружението „Преспа Бајк – Ресен“. Настанот е дел од проектот „Спорт за сите“, што се спроведува во рамки на Регионалната програма за локална демократија во Западен Балкан (ReLOaD), финансирана од страна на Европската Унија, а спроведувана од Програмата за развој на Обединетите нации. Во рамки на проектот беа организирани и обуки за пливање со Наташа Мешковска, за кајак со Аднан Рамадан, за нуркање со Игор Трајаноски, за новинари со Зоран Иванов, за јога со Ивана Батев, за скијање со Јане Стефанов и за медицински персонал со Маја Улк. – Целта на овој проект е да ги поттикне лицата со попреченост да ги осознаат своите можности и да градат капацитети на самостојни и самоуверени личности, кои ќе дадат придонес кон градењето на инклузивно општество, во кое сите ќе бидат еднакви во остварување на своите права, а од друга страна со учеството на лица без попреченост преку директна комуникација ќе можат да ги запознаат можностите но и потребите на лицата со попреченост за тоа како и во кои ситуации можат да им понудат помош. За тоа каков треба да биде односот кон овие лица, како и тоа дека е нужна потребата од известување во медиумите за лицата со попреченост со почит и разбирање за нивните успеси и квалитети, наспроти пристапот на милосрдие и сожалување, велат организаторите. (МИА)

Велосипедска тура во Чаир

Матеја Петровски — Sat, 22 Sep 2018 07:05:53 +0000

По повод Европската недела на мобилноста која секоја година се одржува во периодот од 16 до 22 септември, општина Чаир организира велосипедска тура која ќе започне од паркот во оваа општина. Оттаму трката ќе се одвива по должина на улиците „Џон Кенеди“ „Благоја Паровиќ“, и ќе заврши кај спортскиот терен во населба Топанско Поле. Присутни на најавениот настан, како што информираат од општина Чаир, ќе бидат вицепремиерот задолжен за европски прашања Бујар Османи и Градоначалникот на Општина Чаир Висар Ганиу. Најавениот настан има за цел подигнување на јавната свест за намалување на емисиите на штетни гасови и подигнување на нивото на чистиот воздух преку намалување на употребата на автомобилите, како и едуцирање на децата во тој правец. (Миа)

Седма велосипедска тура низ Македонија

Матеја Петровски — Sat, 01 Sep 2018 07:14:50 +0000

По повод 8-ми Септември, Денот на независноста на Република Македонија, Сојуз на спортови на Скопје ја организира седматата велосипедска тура низ државава. Настан е под покровителство на Владата на Република Македонија, а целта е да прерасне во активност која ќе го негува здравиот живот во Македонија уште многу години. Претседателот на Сојуз на спортови на Скопје, Ѓорги Кузмановски на своја 77-годишна возраст, заедно со Дејан Момировски, поранешен велосипедист и тренер на 50-годишна возраст, ќе ја започнат 90-километарската тура од плоштад „Македонија“ во Скопје во 9:30 часот и очекуваат да пристигнат во Богомила во 13:00 часот. (Миа)