вербална нота – Kurir.mk

МНР со вербална нота реагира на изјавата на бугарскиот пратеник и лидер на „Преродба“ Костадин Костадинов

Тале Кристо — Fri, 21 Oct 2022 06:54:28 +0000

Министерството за надворешни работи, преку амбасадата на Република Бугарија во Скопје, упати вербална нота до бугарското Министерство за надворешни работи, по повод изјавите на пратеникот и лидер на политичката партија „Преродба“ Костадин Костадинов за време на конститутивната седница на Народно Собрание на Бугарија. Во нотата, како што наведуваат од МНР, се изразува крајно незадоволство од содржина на изјавата во која јавно се изразуваат иредентистички и територијални претензии кон Република Северна Македонија. – Го повторуваме апелот дека ваквите изјави се директно спротивни на интенцијата на двете држави го почитуваа и да го негуваат духот на Договорот за пријателство и добрососедство, во насока на создавање блиски и пријателски односи базирани на меѓусебна почит и соработка. Токму во духот на добрососедството, очекуваме релевантните политички и институционални фактори во Република Бугарија да се оградат и да ги осудат ваквите провокации и обиди за нарушување на добрососедските односи, се вели во соопштението од македонското МНР.

Грчкото МНР ја испрати Вербалната нота: Македонија официјално Северна, а македонската војска ќе ја обучуваат грчки војници!

Дарко Андоновски — Tue, 12 Feb 2019 17:11:44 +0000

Атина ја испрати Вербалната нота до Скопје, потврдуваат грчки дипломатски извори, јави дописничката на МИА од Атина. Според информациите на МИА од Атина, утре, пак, во Брисел, на маргините на Самитот на министрите за одбрана на НАТО, средба ќе одржат Радмила Шекеринска и Евангелос Апостолакис, министрите за одбрана на Македонија и на Грција. Не е исклучена можноста, освен што ќе биде средба за запознавање, Апостолакис да ѝ предложи на Шекеринска, токму Грција да ја обучува македонската војска. Во претседателската палата во Атина денеска се одржа прием во чест на дипломатскиот кор. Вкупно 90 амбасадори и дипломати, меѓу кои и вршителката на должност во канцеларијата за врски на Р Македонија во Грција, Лидија Бошковска, беа пречекани и поздравени од претседателот на Грција, Прокопис Павлопулос и грчкиот премиер Алексис Ципрас, јави дописничката на МИА од Атина. На приемот, освен дипломатскиот кор и Павлопулос и Ципрас, беа присутни голем број министри од грчката Влада, меѓу кои и алтернативниот министер за надворешни работи Јоргос Катругалос, министерот за одбрана Евангелос Апостолакис и неговиот заменик Панајотис Ригас, заменик-шефовите на грчката дипломатија Маркос Боларис и Теренс Куик, министерката за цивилна заштита Олга Геровасили, министерот за поморство Фотис Кувелис, но и поранешни шефови на дипломатијата и поранешни претседатели на грчкиот Парламент.

Ципрас го извести парламентот за Вербалната нота од македонското МНР

Ивона Петрова — Thu, 17 Jan 2019 06:40:10 +0000

Грчкиот премиер Алексис Ципрас, говорејќи на расправата во грчкиот Pарламент, кусо пред гласањето доверба, ги извести пратениците дека Грција ја примила Вербалната нота од македонското МНР во која се соопштува дека се исполнети обврските согласно Договорот од Преспа, јави дописничката на МИА од Атина. Ципрас му се обрати на Мицотакис и рече дека во добиениот текст, „соседите освен што известуваат, имаат и толкувачка изјава“, односно дека се појаснуваат деловите поврзани со јазикот и државјанството. -Што појаснуваат нашите соседи во овој текст што е правно обврзувачки и ги повторува обврските што произлегуваат од договорот? Прво, дека терминот nationality се однесува исклучиво на државјанството и не го дефинира или сугерира прашањето на националноста. И второ, дека јазикот на нашите соседи, како што е споменато во договорот и е признат на конференцијата на ОН во 1977 година, припаѓа на групата јужнословенски јазици, рече Ципрас. Грчкиот премиер во неговиот говор му се обрати на лидерот на Нова демократија и му одговори на неговите барања да не го донесе Договорот од Преспа по брза постапка во парламентот, му порача дека ќе има доволно време, иако за конкретното прашање веќе една година се дискутира, а воедно го повика и на ТВ дуел. -Јас втор пат ве предизвикувам и ве поканувам, дојдете и овде во Парламентот и на еден телевизиски дијалог за Договорот од Преспа, да ни кажете кои се тие аргументи што ги имате, му порача Ципрас на Мицотакис. МИА