версај – Kurir.mk

Версај и Лувр порано ќе ги гаснат светлата за да се заштеди енергија

Ивана Ефремовски — Sat, 17 Sep 2022 10:12:13 +0000

По Ајфеловата кула и другите култни париски згради – дворците Лувр и Версај – ќе се откажат од надворешното осветлување. Тоа е симболична мерка потребна за да се сврти вниманието кон енергетската криза, изјави денеска француската министерка за култура Рима Абдул Малак. Од вечерва пирамидата на Лувр наместо до 1 часот по полноќ ќе биде осветлена до 23 часот, најави таа. Слична одлука веќе е донесена и за Ајфеловата кула и Хотел де Вил, чии светла ќе се изгаснат порано од вообичаено. „Почнувајќи од следната недела ќе ги гасиме светилките на фасадата на замокот во Версај во 22 часот, односно еден час порано“, додаде министерката. И покрај овие „симболични мерки“, таа повика на поконкретни акции за еколошка транзиција во музеите, кината, театрите и сите културни објекти во Франција. „Музејот Орсе во Париз, на пример, ја намали потрошувачката на енергија за една третина само со менување на светилките и префрлување на лед диоди. Се обидуваме да го направиме тоа во сите музеи. Разговараме и за замена на проекторите во кината. Доколку се префрлат на ласер, може значително да се намали потрошувачката на енергија, рече Абдул Малак. Цените на енергијата драматично се зголемија во последните месеци поради руската инвазија на Украина и се прават многу напори за намалување на енергетските ресурси. (МИА)

Ограбиле продавница во трговски центар во Аеродром – украле 15 брендирани очила за сонце, едни од нив се од скапоцениот бренд Версаче (ФОТО)

Дарко Андоновски — Thu, 01 Sep 2022 10:49:25 +0000

Синоќа во 19:45 и 22:00 часот, полициски службеници од Единицата за внатрешни работи-Одделение за внатрешни работи Аеродром и Драчево ги лишиле од слобода М.Ж.(19) и Ф.Г.А.(27), двајцата од Скопје. При претреси во нивните домови, извршени со судска наредба, информираа денеска од МВР, биле пронајдени 15 брендирани очила и други предмети кои потекнуваат од кривично дело „тешка кражба“ која ја извршиле во оптика во трговски центар на подрачје на Аеродром на 20/21.08.2022. Исто така, при претресот кај Ф.Г.А. биле пронајдени и 64 пакувања со прашкаста материја, марихуана и дигитална вага. Тие биле приведени во полициска станица и по целосно документирање на случајот против нив ќе бидат поднесени соодветни поднесоци.

Версај повторно ја отвора просторијата во која е основана француската демократија

Магдалена Андонова — Thu, 31 Mar 2022 07:27:10 +0000

Близу Версајската палата во Париз утре се отвора целосно реновираното и досега неправедно запуштено Игралиште (Сала за рекреација, Salle du Jeu de Paume), просторијата во која се поставени темелите на француската демократија. Салата била изградена за Луј Четиринаесетти во 1686 година, а се користела за спортот „игра со дланки“, претходник на денешниот тенис, популарна игра во француската историја (ја играле кралеви и аристократи). Но, повеќе од еден век подоцна, собата стана место на клучен миг во историјата на Франција… На 20 јуни 1789 година, група народни пратеници од Третиот сталеж, барајќи реформи во монархијата, наишле на затворен влез во Хотел де Мењу-плезир (Hôtel des Menus-Plaisirs), каде што требало да се состанат. Тие барајќи алтернативно место за состанок завршиле во Игралиштето, каде дале заклетва што ја потврдила нивната решеност да инсистираат на промени во режимот на владеење. Пратениците настојувале на нов устав, и покрај кралската забрана. Заклетвата ја потпишале 577 лица, а само еден ја одбил. Заклетвата на Игралиштето (Serment du Jeu de Paume) го означи почетокот на Француската револуција. Потоа е основано Националното конститутивно собрание коешто го укина феудализмот и ја одобри Декларацијата за човекови права. Меѓу луѓето присутни таму тој ден имало многу познати историски личности: Максимилијан де Робеспјер, Оноре Габриел Рикети де Мирабо, Жозеф Ињас Гиљотин (по кого подоцна беше именувана гилотината)… Салата се отвора по осум месеци реновирање, нудејќи ѝ на јавноста „еден заборавен дел од историјата“ на Франција, како што истакна претседателка на Управата на палатата, Катрин Пегар. Просторијата ја краси монументално реставрирано платно засновано на познатото недовршено дело на Жак-Луј Давид, кое го прикажува потпишувањето на Заклетвата. По Револуцијата, салата прво станала складиште, потоа сликарско атеље, а во 1840 година ѝ била вратена намената на игралиште. Подоцна во неа бил сместен Музејот на Француската револуција, а потоа паднала во запуштеност со десетлетија. Палатата повторно се отвора за јавноста, како и просториите што ги користеле членовите на кралската куќа пред Револуцијата, целосно обновени во првичната состојба. (МИА)

Европски самит во Версај: 1.500 полицајци мобилизирани да патролираат во и околу замокот

Магдалена Андонова — Wed, 09 Mar 2022 20:16:12 +0000

Лидерите од земјите членки на ЕУ утре и задутре ќе се состанат во Версај, Франција, за да разговараат за војната во Украина. Улиците околу замокот ќе бидат целосно затворени за сообраќај двата дена за да ги пречекаат 27-те шефови на држави во целосна безбедност. Пешаците ќе можат да продолжат да циркулираат во одредени области и да ги користат дуќаните, иако повеќето одлучија да ги спуштат ролетните, јави дописникот на МИА. Версај немаше толкава возбуда од Г7 во 1982 година. Во четврток и петок, градот ќе пречека 27 шефови на држави или влади по повод европскиот самит со кој претседава Емануел Макрон. -Мораме да го најдеме вистинскиот баланс и за да ја обезбедиме безбедноста на дипломатите во многу чувствителен период со сите видови закани, и да се обидеме да најдеме соодветни решенија за да го ограничиме влијанието врз населението, објаснува Тома Лавиел, директор на канцеларијата на префектот на Ивелин. Војна во Украина, глобално затоплување, пасош за вакцинација, поскапување на горивата, се актуелните чувствителни теми, што може да го наруши настанот. Затоа беше направен изборот да се забарикадира замокот и неговата околина. Околу Плас д’арм никој нема да може да се движи од вечерва на полноќ, се до петок во 20 часот. Во радиус од 800 метри околу влезот во замокот ќе можат да циркулираат само пешаците, но ќе се проверуваат. -Лицето кое се движи ќе мора да живее таму или да има лекарски преглед на тоа место со доказ, продолжува Томас Лавиел. Во овие таканаречени „црвени“ и „портокалови“ зони, ниту едно возило нема да може да се движи. Затоа, жителите и трговците мора да се прилагодат. „Ќе го паркирам автомобилот на улица на 500 метри од мојата куќа, но се надевам дека ќе има простор бидејќи сите ќе го правиме истото“, предвидува жител на портокаловата зона. Агентите на префектурата веќе неколку дена се достапни во секое време да одговорат на прашања од Версај. Снабдувањето на продавници е тема која се повторува. „Од техничка гледна точка, тоа е комплицирано бидејќи вообичаено имаме испораки во четврток наутро. Избираме да ги затвориме четврток и петок затоа што многу луѓе ќе мислат дека тоа не е достапно, па затоа нема да биде доволно профитабилно за нас, вели Кристоф, заменик-директор на крепри ла Плас, за весникот Паризиен. Истата мисла ја имаа и неговите соседи во Гангет и пабот О’Парис. -Ќе затвориме по фудбалскиот натпревар во среда навечер и ќе го искористиме четвртокот за да го обединиме тимот.Повторно ќе отвориме петок во 19 часот. Тоа е рестриктивно, но ние се справуваме со тоа. За една недела, ќе беше катастрофално со Денот на Свети Патрик, објаснува Арно, директорот на О’Парис за Паризиен. Сообраќајот ќе биде прекинат и на останатите фреквентни сообраќајници. Посебно се погодени делови од булеварот де ла Рене, авениите на Европа, Сен Клауд и САД. Полицијата во соработка со општинската полиција на Версај ќе го регулира протокот на автомобили во овие сектори. Севкупно, не помалку од 1.500 полицајци се барани за да се обезбеди безбедноста на самитот. Пред замокот се поставени два големи шатори во кои можат да се сместат меѓу 500 и 1.000 новинари од цела Европска унија. Станицата Версај-Рив (РЕР Ц) ќе биде затворена од четврток од 10 до петок 18 часот, а автобусите ќе бидат пренасочени. Ќе биде забранет и пристапот до шумата Сатори. Од понеделник и до крајот на самитот, авионите и беспилотните летала не можат да летаат над Версај и неговата околина во радиус од 15 км. На крај, конзумирањето алкохол на јавни места, надвор од терасите на рестораните, е забрането од оваа среда во 8 часот до петок 22 часот во општините Версај и Сен Сир-л’Екол. (МИА)