википедија – Kurir.mk

Повторно навреди на Википедија за политичарите од власта (ФОТО)

Магдалена Андонова — Sun, 24 Jul 2022 14:27:34 +0000

Повторно има навреди за политичарите на Википедија. Овојпат на удар се шефот на државата, Стево Пендаровски и премиерот Димитар Ковачевски. За претседателот Стево Пендаровски, на англиската верзија на Wikipedia, непознат администратор му впишал навредливо средно име. Таму беше додаден зборот „стока“. За премиерот Димитар Ковачевски некој администратор впишал и датум на смрт (Илинден, лани). Исто така во еден момент за Ковачевски наместо премиер на Македонија, стоеше премиер на Бугарија.

„Википедија“ бележи 20 години постоење: Бесплатна енциклопедија за цел свет

Магдалена Андонова — Fri, 15 Jan 2021 17:37:09 +0000

На 15 јануари 2001 година, американецот Џими Велс го лансираше она што денес е еден од најпосетуваните сајтови во светот. Идејата на Велс да развие бесплатен енциклопедиски проект исклучиво за некомерцијални цели, била речиси незамислива. Воден од желбата на едно „онлјан“ место да ги собере најважните факти од целиот свет, тој со помош на бројни волонтери од целиот свет успеа да ја реализира својата замисла. На почетокот, содржината на „Википедија“ беше само на англиски јазик. А веќе во март 2001 година, се појави на германски и шведски јазик, па на француски, италијански, кинески, руски… 20 години подоцна, „Википедија“ има повеќе од 55,5 милиони статии и верзии на 306 јазици, а бројките постојано растат. Спротивно на традиционалните енциклопедии напишани од реномирани експерти и научници, „Википедија“ е збирка на информации и собрани знаења, обработени и објавени од волонтери. Иако темите третирани на овој начин честопати се критикувани од академските кругови, „Википедија“ од друга страна, стана една од најкорисните алатки на многу ентузијасти, љубители и обожаватели на многу теми од науката, историјата, технологијата, културата и природата. И покрај критиките, содржината постојано се модерира, така што не може целоснио да се тврди дека написите не се целосно издржани со факти. Примарната идеја да се основа ваква „електронска енциклопедија“, важи и денес. Џими Велс ја создаде „Википедија“ за да биде бесплатна и достапна за што поголем круг на луѓе, а не да служи за профит. За сите години постоење, „Википедија“ се претвори во едно од најголемите заеднички добра на дигиталниот свет. Се заснова на принципите на слобода и учество, односно на пасивното и активното учество на сите луѓе ширум светот кои се стремат да го прошират и споделат своето знаење со други. Извор: Слободен печат

СЗО и Википедија заедно во борба со дезинформациите за Ковид-19

Ивона Петрова — Fri, 23 Oct 2020 09:05:24 +0000

Светската здравствена организација и Википедија, ги здружуваат силите во борбата против дезинформациите за коронавирусот. Нивните мотиви се поврзани со бројните информации и гласини поврзани со Ковид-19. Партнерите најавија соработка за подобрување на пристапот на јавноста до најсовремените и најсигурни информации за болеста. Благодарение на оваа соработка, луѓето ширум светот ќе можат да пристапуваат и да споделуваат инфографици, видеа и други мултимедијални податоци на СЗО поврзани со јавното здравство, кои ќе бидат зачувани во Викимедија комонс. Ова ќе им овозможи на повеќе од 250.000 доброволни уредници на Википедија да го прошират опсегот на темата Ковид-19, која во моментов има повеќе од 5.200 статии на 175 јазици.

Википедија доби редизајн прв пат по 10 години

Магдалена Андонова — Sun, 27 Sep 2020 13:51:11 +0000

Википедија е составен дел од веб-културата речиси дваесет години, овозможувајќи им на корисниците да прелистуваат милиони текстови на енциклопедијата од нивниот компјутер, таблет или телефон. Сега, целокупниот изглед на Википедија на работната површина се менува за прв пат во една деценија, со цел страницата да биде подостапна за нови корисници, пред се за младите. Освен новиот, поедноставен и подобар начин на прелистување, Википедија сега содржи и анимирани GIF-ови, менито е поедноставено и полесно за пребарување, а веб-страницата исто така има и копче кое овозможува со еден клик може да го смените јазикот на содржината што ја читате. Википедија исто така ќе додаде подобрувања на алатката за пребарување за полесно наоѓање на други страници и ќе го конфигурира логото за да биде помало на секоја страница на Википедија, пишува специјализираниот портал за технологија и иновации „theverge“.

Википедија ќе добие нов дизајн

Ивона Петрова — Fri, 25 Sep 2020 10:31:08 +0000

По десет години, Википедија ќе добие нов дизајн со цел стане подостапна за нови и помлади корисници. Како најкорисна новина се истакнува тоа што корисниците ќе можат полесно да преминат во деловите што ги интересираат. Речиси дваесет години, Википедија е составен дел од веб-културата, овозможувајќи им на посетителите да читаат милиони статии од дигитални, јавно изменети, енциклопедии од нивните компјутери, таблети или телефони. Википедија исто така ќе добие копче за промена на јазикот во рамките на страницата која се чита и позиција за пребарување за полесно снаоѓање на новите страници. Ќе го смени логото и тоа ќе биде помало. Фондацијата Викимедија, компанијата што ја води страницата, објави на блог дека промените ќе доаѓаат постепено и ќе се интегрираат подолг период, овозможувајќи им на корисниците да испробаат нови функции пред тие официјално да се интегрираат. Планот за редизајн на целата верзија за десктоп компјутерите е пред крајот на 2021 година.

Турција од денеска ја укинува забраната за Википедија

Ивона Петрова — Wed, 15 Jan 2020 07:40:34 +0000

По пресудата на турскиот Уставен суд, од денеска треба да се укине забраната за Википедија во оваа земја. Судот пред извесно време одлучи дека блокадата на интернетската енциклопедија во Турција, која, патем, трае веќе две години, претставува кршење на слободата на изразување. Пресудата на Уставниот суд, објавена во Службен весник, го отвора патот за укинување на забраната воведена во април 2017 година, поради напис во Википедија со кој Турција се поврзуваше со терористички организации. Пристапот до страниците на Википедија ќе биде овозможен откако пресудата, што беше донесена со десет гласа „за“ и шест „против“ на уставните судии, и официјално и биде проследена на Агенцијата за надзор врз телекомуникациите. Укинувањето на забраната од Уставниот суд го побара Фондацијата Википедија, непрофитната организација која оддржува страници со онлајн енциклопедии.

Жалбата на Википедија за нејзина забрана во Турција пред Уставниот суд

Ивона Петрова — Wed, 11 Sep 2019 10:24:14 +0000

Уставниот суд на Турција денеска ќе ја разгледа жалбата на Википедија за забраната за користење на онлајн енциклопедијата веќе две години во таа држава. Турција го блокира пристапот до Википедија во април 2017 година поради одбивање на веб-страница да отстрани содржина што турската Влада ја смета како дел од кампањата за „оцрнување“ на државата. Забраната беше изречена според закон што дозволува владата да забранува веб-страници што се сметаат за закана за национална безбедност. Википедија вели дека забраната го нарушува правото на граѓаните за пристап до информации и слобода на изразување. Интернет-енциклопедијата се жалеше до Уставниот суд на Турција и сака да ја укине забраната. Уставниот суд се очекува денеска да разгледа дали целосна забрана за Википедија ја нарушува слободата на изразување. Википедија се обрати и до Европскиот суд за човекови права.

Република Северна Македонија и на Википедија (ФОТО)

Катерина Бојаџиева — Fri, 15 Feb 2019 09:36:37 +0000

Новото име Република Северна Македонија почна да го користи и глобалната интернет енциклопедија Википедија. Во информациите за земјава на Википедија на англиски, на француски, на грчки и на повеќе други светски јазици веќе е наведено дека новото име на државата е Република Северна Македонија. Се наведува и образложение дека тоа е направено со Договорот од Преспа, со кој беше ставен крај на 27-годишниот спор за името меѓу Скопје и Атина.

Презентации и награди по повод 18. роденден на Википедија

Ивона Петрова — Tue, 15 Jan 2019 07:10:38 +0000

Со презентации и доделување награди, признанија и благодарници денеска во кафе бар „Концепт 37“ во Скопје ќе биде одбележан 18. роденден на Википедија. Најавени се презентации на темите „Основите на Википедија“ и „Достигнувања, бројки и факти за Википедија на македонски јазик – минато, сегашност, иднина“. Ќе бидат доделени награди за победниците на фотографскиот натпревар „Вики ја сака храната 2018“ и на уредувачкиот натпревар на Википедија на македонски јазик на тема „Острови“. Признанија и благодарници ќе добијат членови на заедницата и доброволци кои оствариле значаен придонес и помогнаале за проширување и подобрување на проекти кои се спроведуваат на Википедија. Слободната интернет енциклопедија Википедија е основана на 15 јануари 2001 година. Преку неа слободно се споделува и пристапува до најразновидни содржини на знаење, податоци и информации на повеќе од 280 јазици. Дел од содржините од август 2003 година е и Википедија на македонски јазик, која пак минатата година ја заврши со 98.000 статии.