Викторија Маринова – Kurir.mk

Северин е монструмот кој ја уби бугарската новинарка, ова се неговите зборови пред судот

Ивана Ефремовски — Fri, 19 Oct 2018 15:34:14 +0000

Осомничениот за убиството на новинарката Викторија Маринова, Северин Красимиров (21) веднаш по екстрадицијата од Германија беше донесен на сослушување во судот во Русе, каде се случи бруталното убиство. -Многу ми е жал. Не можам да поверувам дека сум направил нешто такво. Заслужувам секаква казна. Што и да добијам, па дури и доживотна казна ќе ја отслужам, изјави обвинетиот. Тој додаде и дека редовно пие лекови, иако не знае против што. Неговиот адвокат побарал судењето да биде затворено за јавноста, но судот го одбил барањето. Полицијата нашла негова ДНК на местото на убиството на новинарката Маринова, а во близина е најден закопан и неговиот мобилен. Телото на 30-годишната новинарка беше пронајдено во парк во близина на реката Дунав во Русе. Тој избегал во Германија кај мајка му, на која и признал дека ја убил новинарката, но дека бил дрогиран и пијан.

Осомничениот за убиството на бугарската новинарка: Жал ми е, не сакав да ја убијам

Катерина Бојаџиева — Fri, 19 Oct 2018 11:59:36 +0000

Обвинетиот за убиството на бугарската новинарка, Викторија Маринова, денеска во пресрет на сослушувањето во судот во градот Русе, изјавил дека жали што ја убил Маринова и дека не сакал да го направи тоа, објави БНТ. Северин Красимиров (21) пред два дена беше екстрадиран од Германија во Бугарија. Триесет годишната истражувачка новинарка беше бутално претепана, силувана и задавена во градот Русе, а нејзиното тело беше пронајдено во парк во близина на река.

Само ја удрив и бутнав: Осомничениот за убиството и силувањето на бугарската новинарка ги негира обвинувањата

Матеја Петровски — Fri, 12 Oct 2018 17:58:29 +0000

Германското обвинителство соопшти дека обвинетиот за убиството на бугарската ТВ новинарка Викторија Маринова, признал дека ја нападнал, но ги отфрлил обвинувањата дека ја силувал и ограбил. Како што пренесува АП, обвинителството во германскиот град Целе соопштило дека обвинетиот, кој во Бугарија е идентификуван како Северин Крашимиров(21), кажал дека немал намера да ја убие Маринова. Тој на обвинителите им кажал дека бил под влијание на алкохол и дрога кога во паркот влегол во расправија со жена која не ја познавал, дека ја удирал во лицето и ја бутнал во грмушка, но истакнал дека немал намера да ја убие. Германските обвинители навеле дека Крашимиров, кој во вторникот е уапсен во Германија на основ на европски налог за апсење, ќе биде вратен во Бугарија во рок од 10 дена.

Погребана убиената бугарска новинарка

Матеја Петровски — Fri, 12 Oct 2018 14:48:36 +0000

Стотици граѓани, роднини, пријатели и колеги денеска се простија од убиената бугарска новинарка Викторија Маринова на погребот во нејзиниот роден град Русе. Градоначалникот на Русе Пламен Стоилов рече дека „бруталното убиство на новинарката фрлило сенка на мирниот град“. - Во вакви моменти, освен болка, човек не може да чувствува друго. Ние испраќаме млада девојка од 30 години, мајка. Убиена на особено суров начин. Болка и лутина, нема ништо друго да се каже. Поради тоа јас ќе инсистирам на максимална казна. Оние што ќе си дозволат дури и да помислат на такво нешто, мора да бидат уништени од законот, рече Стоилов. Обвинителството во германскиот град Целе денеска соопшти дека лицето осомничено за убиството на 30-годишната новинарка наскоро ќе биде екстрадиран во Бугарија. - Дваесетгодишното момче призна дека под дејство на алкохол и дрога „ја удрил жртвата“ и ја „фрлил во грмушка“. Тој исто така тврди дека не „сакал да ја убие жртвата и негира дека ја силувал“, наведува Обвинителството. (Миа)

Осомничениот за убиството на новинарката Маринова ќе биде екстрадиран во Бугарија

Предраг Кукиќ — Fri, 12 Oct 2018 08:48:42 +0000

Човекот осомничен за убиството на бугарската новинарка Викторија Маринова наскоро ќе биде префрлен во Бугарија, соопшти Обвинителството во германскиот град Целе. Според Обвинителството, тој ќе биде екстрадиран за десет дена. - Дваесетгодишното момче призна дека под дејство на алкохол и дрога „ја удрил жртвата“ и ја „фрлил во грмушка“. Тој исто така тврди дека не „сакал да ја убие жртвата и негира дека ја силувал“, наведува Обвинителството. (МИА)

Уапсен втор осомничен за убиството на новинарката Маринова

Катерина Бојаџиева — Wed, 10 Oct 2018 08:23:52 +0000

Уште еден осомничен поврзан со убиството на бугарската истражувачка новинарка Викторија Маринова е уапсен во Германија. Првиот осомничен поврзан со убиството беше ослободен без обвинение веќе вчера. Вториот осомничен, човек на рани 20-ти години, беше уапсен откако ДНК-тестовите и другите докази покажаа дека бил вмешан во силувањето и убиството на Маринова во севернобугарскиот град Русе, според бугарскиот министер за внатрешни работи, Младен Маринов. „Постои физички доказ за поврзаноста со убиството“, рече Маринов. Тој го идентификуваше човекот како Северин Красимов, кој живее недалеку од местото на злосторството.

Осомничениот за убиството на бугарската новинарка ќе биде ослободен

Ивона Петрова — Tue, 09 Oct 2018 18:19:56 +0000

Романскиот државјанин, кој беше задржан во притвор во рамки на истрагата за убиството на бугарската новинарка Викторија Маринова, ќе биде ослободен и против него нема да биде поднесено обвинение, изјави шефот на регионалната полиција во градот Русе, Теодор Атанасов. - Нашата работа продолжува. Засега нема факти и околности што можеме да ги објавиме.Романскиот државјанин ќе биде ослободен, рече Атанасов. МИА

Во Бугарија уапсен Романец во врска со убиството на новинарката Маринова

Предраг Кукиќ — Tue, 09 Oct 2018 11:20:30 +0000

Бугарската полиција привела осомничен во врска со убиството на новинарката Викторија Маринова, изјавил владин извор запознаен со истрагата. - Можеме да кажеме дека е приведен еден осомничен, рекол изворот без да открие други детали. Претставник на бугарското Министерство за внатрешни работи не сакал ниту да ја потврди ниту да ја демантира информацијата, наведувајќи дека Министерството подоцна ќе објави соопштение. Во исто време, Бугарското национално радио јави дека државјанин на Романија е уапсен во врска со тоа тешко злосторство. Бугарската истражувачка новинарка Викторија Маринова (30) во саботата беше брутално претепана, силувана и задавена во Русе, северна Бугарија, а нејзиното тело беше пронајдено во паркот во близина на реката Дунав. Маринова беше новинар и уредник на бугарската телевизија ТВН и известуваше за истрага за наводна корупција поврзана со фондовите на ЕУ. (МИА)