Викторија Трајков – Kurir.mk

Њујорк како светска туристичка дестинација за нашиот државен врв

Викторија Трајков — Tue, 26 Sep 2023 08:18:01 +0000

Кога ќе излезат надвор од границите на нивната Северна, имам впечаток дека претставниците на државниот врв се однесуваат како туристи кои што едиствена цел им е прошетка по знаменитости, две-три маргинални средби колку да се покрие патниот налог и најважно од се трошење на буџетски средства. Со оглед на тоа дека живееме во едно по модерно време ќе сретнеме и по некое селфи, како тинејџерки кои го сретнале својот идол. Сликата е од прилика ваква, жалосна и непоправлива... Секоја година во овој период се случува еден од најважните настани во мултилатералната политика, годишното Генерално собрание на Обединетите Нации во Њујорк. Збиднување кое секоја држава членка на ООН го користи за сопствена видливост и промоција на своите позиции и интереси. Од Македонија во Њујорк оваа година отпатува речиси комплетниот состав на Владата плус Претседателот на државата. Во исто време таму се најдоа Пендаровски, Ковачевски, Маричиќ, Битиќи, Османи, Меџити, со цел да се збогуваат за последен пат со се она што наведов на почетокот од оваа колумна. Нешто што не се случило во поновата македонска историја. Но да одиме по ред. Најважно за секоја земја е обраќањето на шефот на делегацијата пред Генералното собрание. Во тие неколку минути секој се обидува да ги пренесе нај важните пораки за сопствената земја. Што кажа Пендаровски пред Генералното собрание на ООН? Нормално ништо значајно за Македонија. Спомна некаква стратегија за климатска акција и нормално онаа секојдневно повторувана лага дека ќе сме станеле членка на ЕУ до 2030 година. И тоа е тоа. Ништо значајно за државата и народот. Одиме понатаму... шефот на македонската дипломатија, Бујар Османи. Што да се каже за неговото учество на Генералното собрание? Исто така безначајно, како она на Пендаровски. Сите средби му беа во капацитет на претседавач со ОБСЕ, обидувајќи се себеси да се претстави како фактор за решавање на одредени конфликти во светот. Гол ПР и ништо повеќе од тоа. А да, ќе заборавев... и холивудски снимки по авениите низ Њујорк. Останатите, да бидам искрена, не ми е јасно со која цел отпатуваа во САД, со оглед на тоа што со Заменик-помошникот државен секретар на САД, Габриел Ескобар имаа средба во Македонија пред само неколку недели, а за други средби не слушнавме. За составот и човечкиот потенцијал на Постојаната мисија на Република Македонија при ООН во Њујорк, која е значајна компонента при секое годишно Генерално собрание на ООН, нема што многу да се каже. Со истата раководи Љубомир Фрчкоски. Иститот тој Фрчкоски кој и после повеќе од 30 години на македонската политичка сцена не престануваат да го следат низа скандали. Во Њујорк, според кажувањата на вработените, е на одмор на државна сметка, човек обвинет за насилство врз жени и учесник во многубројни корупциски скандали во времето на транзицијата. Лице на кое му беше одбиен агреман од САД, а Владата и Претседателот по секоја цена, од само за нив познати причини, противзаконски го испратија во Њујорк на скандалозен начин, без одбрана на тези пред собраниската комисија за надворешна политика. Останатите лица (дипломати и локален персонал), се исто така со сомнителен професионален капацитет, сите донесени во Постојаната мисија на лично барање од Фрчкоски. Вака екипирано ДКП служи само за задоволување на личните желби, да се живее во Њујорк на наш грб. Ова патување го чини буџетот на Македонија стотици илјади евра за авионски билети, сместување, дневници, итн, и е срамно да бидат потрошени во време кога државата е во длабока економска криза. Време кога нема кој не протестира барајки подобар живот. Форматот и обемот на оваа туристичка група, т.н делегација јасно кажува дека мотивот бил исклучиво скапа прошетка со наши пари. Ние живееме период на историска срамота за Македонија и Македонците. Следна дестинација, како долгогодишен дипломат од кариера им го препорачувам Собранието на Македонија. Одлична дестинација за да изгласа распуштање на истото и одличен аражман за „прошетка“ на избори. Но, овој пат ќе си платат од џеб, зошто сметката од народот е веќе пратена по пошта. Доц. др. Викторија Трајков Кариерен дипломат и стратешки соработник за меѓународна политика на Претседателот на ВМРО-ДПМНЕ

Трајков: Светот нас не знаеше како Macedonia Timeless а сега само како Северна Македонија

Катерина Бојаџиева — Thu, 20 Jul 2023 14:05:46 +0000

Во минатото бевме сведоци на одлична меѓународна промоција на Македонија. За Македонија се зборуваше на CNN, Euronews, FOX итн. Бевме присутни на секој голем светски саем. Се воодушевуваме дури и ние како Македонци на прекрасната кампања Macedonia Timeless, додека пак Invest in Macedonia ни донесе многу странски инвестиции. За жал, сега сме сведоци само на дневна политика и брутално потенцирање само на географската одредница која ја додадовме на државното име како тоа да ни ги отвора вратите за туристички посети на нашата земја ”истакна доц.д-р Викторија Трајков од Универзитет Скопје, на денешниот Симпозиум организиран од Македонската Обединета Дијаспора кој се одржа во Скопје! “Македонија има природни убави што ги нема ниту една држава во Европа. Македонија го има Кокино како втора неолитска опсерваторија, во Македонија има стари црковни градби од 10-ти, 11-ти и 12-ти век. Затоа кој дошол еднаш во Македонија, со сигурност повторно се враќа назад.” “Македонија мора да поработи на одржување на постојана и непрекината комуникација со својата дијаспора . Тоа е единствениот начин нашите Македонци да имаат чувство на припадност и никогаш да не заборават каде е нивната родна грутка”- додаде доц.д-р Викторија Трајков на денешниот Симпозиум организиран од Македонската Обединета Дијаспора кој се одржа во Скопје!

Трајков: Во македонската дипломатија владее непотизам и партизација

Дарко Андоновски — Thu, 13 Jul 2023 10:22:21 +0000

„За да водиш дипломатија и за да ги браниш интересите на својата земја, што е примарна цел на секој дипломат, многу е важно да си ја сакаш својата држава и да си добар познавач првенствено на нејзината историја“, вели во интервју за Магазинот за туризам и менаџмент, доц. д-р Викторија Трајков, кариерен дипломат и стратешки соработник за меѓународна политика на претседателот на ВМРО-ДПМНЕ. Таа смета дека во моментот македонската надворешна политика ја водат „скромноумници“ кои не влегле во библиотека и не знаат ништо за македонската историја. Како дипломат од кариера и познавач на состојбите во надворешната политика, може ли една генерална оцена за состојбите во македонската дипломатија? За жал, она што го гледаме од претставници на моменталната власт кога ќе ја поминат границата на Македонија е само однесување на агенти на добро организирана туристичка агенција. Шетаат по продавници и кафани, трошат пари од државни картички, како да се голи и гладни. Освен период на историска срамота за Македонија и Македонците, не видовме ништо друго. Во моментот, македонската надворешна политика ја водат „скромноумници“ кои не влегле во библиотека, а дома ја немаат. Не знаат ништо за македонската историја, не прочитале ништо од архивите за својата земја, а веројатно ја прескокнале и фазата во животот каде што се учи основата, кој бил окупатор, кој тиранин, кој колел и бесел и во каква положба бил нивниот народ, македонскиот. Следствено на тоа, имаме комплетно дисфункционален систем за одбрана на македонските национални интереси. Како професор, ако треба да оценам, не би дала ни шестка на „стаклени нозе“. Како судија во име на македонскиот народ, црвен картон без размислување! Што се случува во моментов во МНР? Во моментов, но и во последните 6 години од кога е оваа гарнитура на власт, ние имаме дипломатија во која владеат непотизам и партизација, се ангажираат вработени по нивно пензионирање со изговор дека не може да се најдат соодветни замени, се доделуваат награди како додаток на плата на одредени вработени без релевантни критериуми, се злоупотребуваат службени возила за партиски цели, се прават поделби на подобни и неподобни дипломати и се занемаруваат трудот, искуството и работата на дипломати од кариера кои се повеќе од 20 години во дипломатската служба. Злоупотреба на државни средства од страна на неколку амбасадори, но и дипломати од понизок ранг за кои нема никаква разрешница. Тука би го спомнала и случајот со државниот секретар во МНР, кој воедно е и претседател на Комисијата за надворешна политика на СДСМ, што претставува директно прекршување на Законот за надворешни работи. Во Членовите 63-а и 63-ѓ од Законот за надворешни работи, експлицитно е наведено дека вработен во МНР не смее да биде член на орган на политичка партија на републичко ниво, како што е случајот со државниот секретар. За да биде скандалот уште поголем, тој во својство на претседател на Комисијата за надворешна политика на СДСМ оди во посета на соседна држава со службено возило од МНР и носи со себе вработени од МНР кои сите ние ги плаќаме. Имаме ситуација каде што амбасадорот при ОН во Њујорк воопшто не се појавува на работа од првиот ден кога е таму пратен. Понатаму, имаме пример на злоупотреба на буџетски средства и недомаќинско работење, каде што за амбасадорот во Вашингтон се исплаќаат огромни средства за кирија, а таму имаме резиденција за амбасадор во сопственост на Република Македонија која седи празна затоа што на човекот не му се допаѓало да живее таму. Најнов пример, сега актуелен е амбасадорот во Токио. Против човекот се води постапка и е вратен во земјава поради физички напад и недолично однесување. Сумирано, состојбите во македонската дипломатија се повеќе од катастрофални. Македонија го почна скрининг-процесот со ЕУ. Но, се чини дека односите со Република Бугарија во последно време се затегнаа. Како, според Вас, на дипломатски начин и со посредство на европската дипломатија, најлесно би можеле да се надминат овие несогласувања? Македонија го започна скрининг-процесот, но ветувањата дека ќе бидеме членка на ЕУ до 2030 година се небулозни и несериозни за секој оној кој е свесен дека дома никој не сака да прибере корумпирани гости кои го злоупотребуваат гостопримството на домаќинот во секој можен сегмент. Така е и со приемот на Македонија во ЕУ. Многу брзо забораваме дека визната либерализација која ја добивме во 2007 година беше резултат на континуирана и макотрпна работа на тогашната владина гарнитура на ВМРО-ДПМНЕ. Европското семејство не може да ве награди доколку вие не се потрудите да покажете одлични резултати. Во однос на спорот со Бугарија. Мојот личен став, првенствено потпишувањето на т.н. Договор за пријателство, добрососедство и соработка од каде што сѐ почна, е класично велепредавство на Македонија и на македонскиот народ. Прво е национално штетен, морално неприфатлив, прави упад во уставниот поредок на нашата држава, нелегален е и неприфатлив за мнозинството Македонци кои си ја сакаат државата. Уште на самиот негов почеток погрешно се дефинираат работите. Вели: „заеднички стремеж на народите?“. Има два народа – РАЗЛИЧНИ: бугарски и македонски. Но, намерно или не, уште во самиот вовед на Договорот недостасува МАКЕДОНСКИОТ народ, за мене клучен збор што го нема во самиот Договор, кој не вреди да продолжам понатаму да го читам. Околу несогласувањата и внесување на Бугарите во Уставот на РМ, ставот и на ВМРО-ДПМНЕ и на претседателот Мицкоски е јасен и недвосмислен - НЕ за нивно внесување под бугарски диктат. Уставот да се отвори одложено т.е. при непосредното зачленување на Македонија во Европската Унија. Сметам дека европската дипломатија е доволно силна и доволно искусна да помогне за зачувување на Македонија и на македонскиот идентитет без посебни услови на одредена држава, во случајот Бугарија, која во 21 век зборува за минато, а не за иднина. Целото интервју прочитајте го ТУКА.

Трајков: МНР стана социјална служба, се прибира партиска испостава и се унапредуваат преку ноќ

Ивана Ефремовски — Wed, 31 May 2023 10:58:40 +0000

Универзитетскиот професор Викторија Трајков која и воедно е кариерен дипломат и стратешки соработник за меѓународна политика на претседателот на ВМРО-ДПМНЕ вечерва во емисијата „Заспиј ако можеш“ на Алфа телевизија истакна дека МНР стана социјална служба, се прибира партиска испостава. „Она што е генерална одлика на македонската дипломатија последните години се различните состојби во поглед на хаосот не само во дипломатско конзуларните претставништва, туку и во самото МНР. Почна со претходниот министер, продолжи со сегашниот. Од санкционирање на вработени, со што и јас лично се соочував со Димитров, до тоа кој се не претставува во државата за на крај да завршиме дека треба да се ангажираат пензионирани дипломати. Девалвирана е самата професија“, појасни Трајков. Таа укажа дека македонскиот дипломатски синдикат постојано алармира за неправедност и партизација на МНР, потоа сопруги, сопрузи, кој нема каде дошол тука, што треба да биде сосема спротивно. Се прават злоупотреби, не се даваат шанси на луѓе кои се по 12-13 години во министерството. Во МНР треба да важат други критериуми за вработување. „Има голема поделеност во МНР. Многу е мал е бројот кој смета дека министерството функционира добро, повеќето сметаат дека МНР се движи во погрешна насока, а во тие кои сметаат така дури има и од СДС и ДУИ“, рече Трајков. „Постојано алармираме во тој поглед, затоа што навистина сме загрижени за сето она што се случува, што и се случува на самата македонска дипломатија. Од една страна наградите се можеби добар поттик за да луѓето да работат меѓутоа треба да видиме и по кои критериуми сее доделувани тие награди. И тоа 10, 20, 30% на луѓе кои што вчера се вработиле во МНР, а не се баш заслужни како останатите кои што работат таму со години. Затоа ние го прашуваме министерот цело време кој е критериумот по кој што овие луѓе ги наградува. Не е спорно да се наградуваат луѓе, и треба млади дипломати да се наградуваат и да напредуваат во своја дипломатска кариера меѓутоа не на начин на газење на останатите колеги кои што се со години таму“, заклучи Трајков. Таа посочи дека МНР е институција во која што владее голема неправда, има и унапредувања кои што се случуваат преку ноќ. „Ние сега се соочуваме со амбасадор на едно од најстратешките места во светот, кој што не оди на работа, Њујорк, мисијата на ОН на Македонија при Њујорк. Според информациите кои што ги има и нашиот синдикат и тоа што излезе во јавност пред одреден период е дека човекот не е заинтересиран за работата, не оди на работа едноставно“, рече таа.

Трајков: Македонија беше пример за одлично организирана економска дипломатија и тоа се чувствува и денес, но за жал актуелната власт тоа го сведе на минимум

Ристе Здравков — Sun, 09 Apr 2023 09:51:32 +0000

На денешната панел дискусија на тема „Катастрофална меѓународна промоција на Македонија“, свое обраќање имаше и доц. д-р Викторија Трајков, професор и стратешки соработник за меѓународна соработка на претседателот на ВМРО-ДПМНЕ, Христијан Мицкоски. Таа зборувајќи за важноста од економската дипломатија за промоција на земјата и привлекување на странски директни инвестиции истакна дека Македонија во минатото беше пример за една одлично организирана економска дипломатија чии бенефити се чувствуваат и денес особено во помалите градови каде благодарение на ваквата стратегија се отворија многу капацитети и фабрики кои сведочат за едно убаво време, за разлика од актуелната влада која таквото делување го сведела на минимум. „Кога станува збор по дефиниција што би значела економска дипломатија самиот збор кажува дека тоа би требало да биде поддршка и промоција на економските капацитети на една држава која што секако се прави преку Министерството за надворешни работи кои што би требало преку своите дипломатско конзуларни преставништва да биде тој водач кој што ќе дава навигација како би се одвивала целата таа економска промоција. Но, исто така она што е многу важно е суштината на економската дипломатија да си го промовира она што дома се прави, значи домашното производство да го промовира на втори, трети пазари итн. МНР можеби е сегмент, но игра доста клучна улога во целата економска дипломатија, меѓутоа она што треба целосно да се направи е една државна стратегија за тоа како ќе се однесува самата држава во светот и како самата држава би се промовирала и на кој начин би се промовирала. Ние бевме сведоци на една одлична економска дипломатија, односно на еден одличен економски пакет за тоа како една држава треба да биде промовирана во светот која што за жал во последните години оваа влада е сведена на минимум. Разликата може да се направи, граѓаните тоа го гледаат, не е дека некој треба посебно да знае по дефиниција што би значела економска дипломатија, туку дали има работни места или нема работни места и дали сиромаштијата и нивото на сиромаштија се крева или паѓа“, истакна Трајков и додаде: „Мислам дека бенефитите на економска дипломатија и таа меѓународна промоција од претходно ја чувствуваме и денес, особено во помалите градови каде што се отворија многу капацитети. Сѐ уште тие фабрики сведочат за едно убаво време, една убава стратегија и доста памета меѓународна стратегија за промоција на Македонија, а со тоа и бенефитот кој што го добива самиот граѓанин да има соодветно работно место“.

Трајков од ВМРО-ДПМНЕ: Само со стабилна влада ќе имаме стабилна национална политика која ќе ги застапува националните интереси

Дарко Андоновски — Sat, 03 Dec 2022 17:15:51 +0000

Денес се одржа панел дискусија на тема „Политиката во време на војна, политичката улога на Западен Балкан во војната во Украина“, каде како дискутанти беа поканети: Владимир Ѓорчев, член на ИК на ВМРО-ДПМНЕ, проф.др. Владимир Божиновски, доц. д-р Викторија Трајков, професор на УТМС и стратешки соработник за меѓународна соработка на Претседателот на ВМРО-ДПМНЕ и Ирина Шатохина, вице претседавач на ЕДС. Трајков зборуваше за украинската криза, која како што кажа мора и може да се реши само преку решавање на балканското прашање. - За да се реши Балканското прашање, Македонија треба да има стабилна и стручна владеачка гарнитура која ќе работи за интересите на својот народ а не коруптивна, скандалозна и дисфункционална. Само со стабилна Влада може да создадеме стабилна држава која ќе извезува во НАТО и ЕУ надворешна политика која ќе ги застапува националните интереси, волјата на народот и успешно меѓунароно претставување. Во моментот имаме се спротивно на горенаведеното, кажа Трајков. Таа рече дека врска со агресијата на Русија над Украина, ставот на ВМРО-ДПМНЕ е веќе истакнат од претседателот Мицкоски во повеќе наврати е јасен и непроменет! - Строго ја осудуваме секоја агресија врз невини луѓе и цивилно население, кое заради политички и геостратешки претензии ги губат своите домови, деца страдаат за своите родители, се губат животи, наместо да се размислува за раст и развој на социо-економски план во 21 век, заклучи Трајков.

Трајков: Дали има поголем срам да не се спротивставиш на соседска прегратка која ти го одзема здивот и сака да те претвори во историски артефакт?

Магдалена Андонова — Sat, 29 Oct 2022 11:43:14 +0000

Дали има поголем срам да не се спротивставиш на соседска прегратка која ти го одзема здивот и сака да те претвори во историски артефакт? Најголемиот парадокс е што токму партијата што ја претставуваш, како историски наследник на сојузот на комунисти, создаде цели генерации врз основа на непријателство кон Бугарија? Ако Маричиќ не бил должен да оди (како што самиот изјави) во Благоевград а е платен од данокот на секој чесен Македонец, каде е Премиерот кој не води и на крај имаме ли ние Претседател на државата кој се заколнал дека ќе ги брани моите/нашите македонски интереси, запраша Викторија Трајков во својот Фејсбук статус. Таа напиша дека е Македонка, зборува македонски јазик и нејзиниот прв интерес е одбрана на македонските интереси секаде и во секоја прилика! - Но очигледно, не знаеме сите кои сме! Или пак сегашните водачи лутаат од лево кон десно, во ограничениот капацитет на сопствениот ум и таму ги сместувaaт народот и нацијата кои ги водат, додава Трајков во својата објава.

ВО НОРДИСТАН СЕ Е ДОЗВОЛЕНО

Викторија Трајков — Fri, 09 Apr 2021 19:01:53 +0000

Зборовите морал, етика, идентитет, традиција, култура, општествена одговорност, дедовина, припадност... загубија секаква вредност. За жал, последните неколку години како да исчезнале од македонскиот речник но и од животот на сите кои живеат тука. Се прашувам, како ги воспитувате децата по дома? Или вашите внуци, сестри, браќа? Сигурна сум дека поголемиот дел од вас, не ги воспитуваат во духот на омразата и посакување нечија смрт. Неколку години, по социјалните медиуми, за жал постојат ликови (намерно или ненамерно), кои мразат се што е живо. Инспирирана од последниот пост на еден „Љоко Писател„ на кој сме сведоци дека последните години толку многу омраза истури при секое негово „пишување“, почнав да размислувам дури и на тоа дека некој намерно ја протежира неговата луцидност. За да посакуваш нечија смрт како таа на пратеник и лидер на опозиција, да навредуваш: жени, девојки, мајки, да си против своите сонародници истурајќи еден тон омраза, не може да биде ништо друго освен тешка психичка состојба. Но, ајде ќе речеш, хартија трпи или по ново статус на ФБ трпи се, но каде е санкционирањето? Каде се сите оние посебни институции кои беа задолжени за спречување на говорот на омраза? Дали е тоа дел од една ПР стратегија на еден политички тим? Не би сакала да верувам, дека е така. Говорот на омраза на политичка основа многу тешко е да се екстрахира од личните дискредитации и објективните критики упатени на сметка на политичките партии и нивните претставници. Во конкретниот пример, говорот на омраза се преклопува со говор на омраза на верска, етничка и расна основа. Многу често дисквалификациите, дискредитациите и навредите упатени кон политичките лидери се проектираат врз целиот политички субјект, неговите членови и симпатизери. ПР кампањите кои генерираат ваков тип на говор на омраза многу често се систематски организирани, а се со цел да се промовираат сопствените цели и дискредитира политичкиот противник. Зарем никој не размислил дека особено во услови на интензивна политичка мобилизација (избори, пописи и сл.) политичкиот говор на омраза може да ескалира со насилство? Очигледно, не. Зарем малку ни е сета оваа политичка и здравствена сага? Зарем малку ни се изгубените животи предизвикани од колапсот на здравствениот систем во државата? Малку ли ни е секојдневното вреѓање на нашата интелегенција од страната на властодржците на секое поле? Одговорот е едноставен - сме им дозволиле. И се додека „наведната глава, сабја не ја сече“, некој ќе поттикнува омраза меѓу нас, ќе си дозволува својата инфантилност да ни ја прикаже како нормална, а нивната слабост ќе ја демонстрираат со навреди и омаловажувања. Се додека, главните ПР-џии на оваа Влада, не разберат дека ако се качиле до врвот, не значи дека победиле. Јас како академски граѓанин одбивам да го прифатам „новото нормално“. Нормално не е ништо а ненормално е се. колумна на доц.д-р Викторија Трајков

СЕ БАРА МАКЕДОНСКИОТ ДА ВИНЧИ ДА ЦРТА ВО ФЗОМ

Викторија Трајков — Sun, 21 Feb 2021 13:26:27 +0000

Такви кои не влегле во библиотека, а дома ја немаат! Крахот на македонското образование за кои сме сведоци секојдневно, најавуваната божем реформа и несоодветниот кадар по институциите, ме тераат на размислување дали знаат што прават? или пак, прават што сакаат. Трето, нема. Ментално некадарни на раководни функции која не им била ни во најлудите соништа и за која никој не ги подготвил за да знаат што да прават односно кои им се обврските кон народот. Македонија “ја водат” генијалци со минусно салдо интелект! Такви кои не влегле во библиотека, а дома ја немаат! “Друштво” на компромитирани ликови кои целата земја ја прилагодија само за својот џеб. На „другата“ страна имате останат македонски народ, кој е паметен, мудар и доволно свесен за тоа што му се случува. Но, колкава е силата на тој паметен народ и зошто се повлекува кога ќе дојде во контакт со гореспоменатите. Па кој би сакал кога ќе отиде во ФЗОМ да реши некој административен проблем за пензијата на баба му, од советникот да слуша предавање за масло на платно? Деновиве, исто така, излезе оглас дека во Генералниот секретаријат на Влада се бара државен советник за плата од близу 40.000 денари со завршен факултет за кинезиологија!? Па добро, можеби на некој му се укочил вратот па ќе бара чаре за својата болка во Влада. Иронично кажано, секако. Имам впечаток дека веќе станавме земја на експерти за секоја тема без разлика за што сме учеле ако воопшто сме се запишале да учиме. Тоа е исто како она, најубав и најпаметен на мајка!? Земја на машки стринки кои наместо обуки и професионални усовршувања, размислуваат каде да се сместат без разлика дека автомеханичар не може да биде хирург и обратно. Не така ретко сме сведоци на вести каде се случува негувателка да има вербален испад во градинка, се случува дете да е изгорено со кафе во градинка, се случува дете само да замине од градинка, се случува дете да остане заклучено во градинка… Се случува и ќе се случува. Сѐ додека не се свестиме и додека не признаеме дека системот не ни функционира, не се вработуваат соодветни кадри на соодветни места, кај нас само нешто ќе се случува. Нема да го наградиме Дамјан од Штип зошто ги победил поголемите, ама ќе го вработиме Никола како советник за национални прашања, зошто има партиска книшка иако истиот тој Никола има завршено градежен факултет. За иронијата да биде поголема, Никола ќе му биде шеф на некој кој мака мачел да заврши факултет надевајќи се дека паметот ќе му се вреднува. Скоро идентично со тоа, денес си министер за социјала, па за економија, па за образование и да не ве чуди, утре министер за екологија, на пример. Иако ни беше ветено во 2017 година, дека со животот за сите нестручните и нечесните кадри нема да останат во институциите, до ден денес, не само што има нестручни и нечесни, туку истите постојано и се наградуваат за својот „успех“. За жал, станавме нација на искажување револт само на социјални мрежи каде храбри македонски мажи под псевдоними повикуваат на револуција. Време е за рестартирање на системот зошто повеќе од очигледно е дека „правиот пат“ не води кон длабока бездна.

ДАМЈАН ПИТАГОРА ОД ШТИП

Викторија Трајков — Sun, 07 Feb 2021 10:47:02 +0000

Кога моќта и незнаењето стануваат правило за лансирање на министерска функција, резултатот е водечко место во „одлив на мозоци“... Деновиве бевме сведоци на еден маестрален натпросечен ум, дете на кое Бог му подарил талент за решавање математички задачи. Но, исто така бевме сведоци и на еден банален одговор на Министерството за образование и наука, каде истото тоа дете, се одбива од наградување за успехот, заради тоа што бил основец а е најдобар за задачи за средношколци!? Без никаква логика едно дете нема да биде наградено барем еднократно? Чисто за сатисфакција, за да знае дека секој труд вложен во себе и за оваа држава се наградува. Која друга држава во светот одбива да ги награди талентираните и натпросечните ученици? Одговорот е - никоја! Но, заклучокот е дека се работи за приоритети. Денес, приоритет се проекти со невладини за непостоечки обуки, нови задолжувања на овој напатен народ, набавка на апетисани кои чинат небројни просечни македонски плати, и на крај, за лудилото да биде уште поголемо не убедуваат дека „се било до перцепцијата“. Вистината наспроти перцепцијата која се обидуваат да ни ја претстават изгледа вака: во случајов, станува збор за убаво македонско дете кое не е дете како ќерката на еден владин функционер за да добие стипендија за студии во Холандија или пак 113.000 долари за студии во Англија. И така, лондонски Економист не рангира на високото 8-мо место како земја со најголем број на “одлив на мозоци” во светот. Додека современите земји од петни жили се трудат да вложат во оние кои учат и секојневно напредуваат во своите области, ние ги избркавме. Патот прав, изгледа има многу лоша кривина! Тргнав да истражувам што ветиле двете најголеми партии во програмите на последните избори. Да го видам делот токму за вакви случаи како Дамјан. СДСМ ветиле живот за сите, а живееме живот за одредени. ВМРО-ДПМНЕ во својата „Обнова“, за деца како Дамјан ветиле стипендија до 300.000 денари за академска година, кога учениците ќе постигнат резултати на светска олимпијада, меѓународен, државен или општински натпревар во знаење. Исто така, годишни стипендии за првенци на генерација во државните училишта и еднократна помош за првенци на клас. Голема штета што ние како народ, не читаме целосно што ни се нуди и за што го искористуваме своето право на глас. Штета што не ги читаме малите букви и скриените пораки. Се задоволуваме со празни флоскули, несогледувајки дека таму во тој т.н „живот“ и нема што да се прочита. Цената ја плаќаме ние, и секоја наша идна генерација. Губејќи не само вакви „мозоци“ туку се покажа и дека го изгубивме и коренот. Доста е политика, лажни ветувања, криминал, корупција и најважно од се- кратење на пари од Буџетот за наука и истражување заради задоволување на предизборни апетити! На Македонија и требаат сите со “мозок” а не едноклеточни амеби! Наука и само наука! Дамјан, големо ти е името. Сакај ја Македонија. Ќе дојдат подобри денови, кога таквите како тебе ќе бидат столбови на оваа држава. За многу брзо! доц. д-р Викторија Трајков