виноскоп – Kurir.mk

Во Скопје концерти во рамки на 3. Скопски градски фестивал, домашни ѕвезди на Виноскоп и фолклорен фестивал

Тале Кристо — Sat, 07 May 2022 07:13:13 +0000

Во рамки на третото издание на Скопскиот градски фестивал, вечер во големата сала на Филхармонијата во 20 часот концерти ќе одржат Матија Дедиќ – најпознатиот хрватски и еден од водечките европски пиjанисти и композитор, и Квартетот Heller / Sasse / Gjakonovski / Kostadinovic составен од некои од најдобрите европски џез музичари меѓу кои и нашиот Мартин Ѓаконовски. Матија, кој е син на Арсен Дедиќ и Габи Новак, има настапувано со познати музички имиња меѓу кои Alvin Queen, Martin Drew, Ron Ringwood, Boško Petrović, Marc Murphy Band, Patrizia Conte, David Gazarov, Gianni Basso, Miles Griffith, Onder Fokan, Jean Louis Rassinfosse, Anca Parghel, Tomi Emanuel, Lenny White, Kendrick Scott, Jim Madison, Jeff Ballard, Vicente Archer, Buster Wiliams, Larry Grenadier, N.H.O. Pedersen, Ron Mcclure, Marek Patrman и Salvatore Maiore. Настапувал и со најпознатите балкански музичари меѓу кои Здравко Чолиќ, Влатко Стефановски, Џибони и Тамара Обровац. Како лидер има издадено десет албуми. Квартетот Heller / Sasse / Gjakonovski / Kostadinovic Quartet –ќе настапат по првпат заедно во овој состав на СГФ. Четворица музичари со исклучителни кариери, секој поединечно настапувал со врвни имиња од европската и светска џез сцена. На контрабас ќе настапи Ѓаконовски, кој се смета за најпознатиот македонски џез музичар, а кој живее и работи во Германија. Билети за концертите во Филхармонијата можат да се набават преку www.bileti.mk. Фестивалот е поддржан од Град Скопје. На плоштадот „Македонија“, пак, продолжува Дванаесеттото издание на „Виноскоп 2022“, кој на граѓаните им нуди богата музичка програма со домашни изведувачи и бендови, а за убавото расположение придонесуваат и македонските винарии кои што ќе ги зачинат музичките звуци со прекрасни македонски вина. Програмата започнува во 13 часот, а меѓу учесниците се Нина Јанева, ЗЏМ – Биг Бенд и Елена Поповска, Џафер, а за крај на вечерта ДЏ Гоце САФ Во Општина Сарај, продолжува Меѓународниот фолклорен фестивал „САРАЈ ФЕСТ“ кој ќе трае до утре. Овој меѓународен фестивал се организира по 12. пат во Сарај од културно уметничкото друштво „Дрита е Дервенит“ Сарај, во соработка со Општина Сарај и поддржан од Град Скопје. Учествуваат над 15 културно уметнички друштва од земјава и од странство, информираат од Град Скопје.

Градот Скопје ги поканува сите граѓани на фестивалот за македонско вино и музика „Виноскоп 2022“

Дарко Андоновски — Tue, 03 May 2022 14:33:33 +0000

По прекинот од две години на сите културни и музички манифестации поради ковид пандемијата, оваа година по дванесетти пат од 4-ти до 8-ми мај ќе се одржи „Виноскоп 2022”, кој патем не беше организиран ниту во изминатите четири години, иако за скопјани претставува еден култен и урбан настан каде што граѓаните можат да уживаат во музичките изведби и убавото македонско вино. На денешната прес конференција којашто се одржа во Град Скопје, организаторите на „Виноскоп 2022” ги промовираа музичките изведувачи и бендови кои што од 4 – 8 мај ќе настапуваат на скопскиот плоштад. Оваа година за прв пат манифестацијата ќе биде збогатена со зголемен број на винарии кои ќе ги понудат своите производи. Во наредните пет денови скопјани ќе можат да уживаат во навистина богатата програма којашто ќе биде на репертоарот на „Виноскоп 2022”, односно да се забавуваат со музиката на домашни изведувачи и бендови, а за убавото расположение ќе придонесат и македонските винарии кои што ќе ги зачинат музичките звуци со прекрасните македонски вина. Скопјани заслужуваат градот да има вакви убави културни манифестации и токму поради тоа Градот Скопје во наредниот период ќе стави акцент на ваквите настани, со цел подигнување на културолошкото ниво и забава достојна за граѓаните на градот Скопје, како и на сите гости од регионот кои што ќе го посетат овој преубав настан.

Шилегов ги прекрсти скопските фестивали „Виноскоп“, „Пиволенд“ и „Баскерфест“- еве како ќе се викаат

Катерина Бојаџиева — Mon, 05 Mar 2018 19:41:10 +0000

На денешната вонредна седница на Советот на Град Скопје е донесена одлука за промена на имиња на традиционалните манифестации. Со оваа одлука „Фестивал на виното Вино – Скоп 2018“ се преименува во „Вински фестивал“, проектот „Гурмански викенд во Скопје – Пиволенд“ ќе се вика „Пивски фестивал“, а познатиот „Баскерфест“ е преименуван во „Организирање на манифестација со улични изведувачи“. Градоначалникот Петре Шилегов појасни дека новите називи биле неопходни заради усогласување на називите на проектите во програмата со називите на проектите во Буџетот на Град Скопје за 2018 година.