винска култура – Kurir.mk

Следува уште една ноќ за паметење во Скопје

Super Admin — Thu, 22 Jun 2023 08:57:58 +0000

Време е за уште едно, возбудливо петто издание на винско-музичко-модниот настан „Вино на штикли“ кој ќе се одржи на 29. Јуни (четврток) со почеток од 19:00 до 00:00 часот во винскиот бар и ресторан Форца во Скопје. Радосно го најавуваме и ги покануваме винските љубители да ни се придружат на еден од омилените вински летни настани на кој се слави виното и неговата магија. Уживањето ќе го доведеме до совршенство со пријатна и опуштена атмосфера од музичкиот репертоар на македонската поп ѕвезда Викторија Лоба заедно со својот придружен бенд, гастрономски „зачинето“ со вкусна храна и естетски нијансирани со шармантен и елегантен моден стил на гостите. „Вино на штикли“ и оваа година повторно ќе биде место каде што нашите уметници-винари ќе ги донесат и покажат своите најдобри вина и нетрпеливо ќе ги очекуваат Вашите коментари, критики и пофалби. „Вино на штикли“ е елегантен вински настан на кој виното, надополнето со модата и музиката ќе покаже нов сјај и уникатност. Во цената од 1200 денари е вклучена бесплатна дегустација на над 150 различни вина од 25 македонски и странски винарии кои ќе бидат спарени со вкусните закуски на винскиот бар и ресторан Форца. Најважно од сè е да си набавите влезница на време, бидејќи влезниците за „Вино на штикли“ ќе бидат во ограничен број и истите може да се купат само по електронски пат (online) на следниов линк: vinonastikli.mk Придружете ни се на „Вино на штикли“ и споделете ја Вашата винска, гастрономска и модна страст! И не заборавајте. Со виното е исто како со страст: треба да се пробаат сите вина, од некое се доволни само неколку голтки, а некое треба да се испие до крај.

Вранецот во првите три сортни вински натпревари

Super Admin — Tue, 16 May 2023 08:42:01 +0000

На јубилејниот 30-ти натппревар Конкур Мондиал де Брисел / Concours Mondial de Bruxelles - CMB, кој се одржа во Пореч, Хрватска, беше објавено подготвувањето на трите нови интернационални вински натпревари кои ќе бидат посветени на моновариетни и купажни вина од една избрана винска сорта. Најавените натпревари од овој тип се отворени за учество на сите производители во светот кои произведуваат вина од наведената сорта. Извршниот директор на најпопуларното винско натпреварување г-от Куантан Хаво / Quantin Havaux пред околу 400 вински судии, главно реномирани вински новинари, вински критичари од сите четири страни на светот, покрај останатите новитети, ги најави и првите три сорти за кои веќе се отпочнати подготовки за реализирање на натпреварите, како и подготвките за нивно интернационално промовирање. На огромно задоволство на сите, а особено на судиите од Балканот, помеѓу првите три сорти се појави и една од „балканската винска градина“, сортата Вранец. Вранецот е сорта која одлично ја пренесува експресијата на поднебјето, која нуди високо квалитетни органолептички карактеристики, сорта oд која може да се добие широк спектар на вински стилови и конечно сорта која може да созрева во шише со децении, зголемувајќи го својот раскош на ароми и вкусови. Конкур Мондиал де Брисел / Concours Mondial de Bruxelles – CMB е вински натпревар кој поради неговата популарност и експоненциален раст на учесници и на вински критичари ангажирани буквално од секое “ќоше” на планетата, природно се подели на неколку помали настани со цел да се задржи фокусот на квалитетот во оценувањето на вината. Позади овој натпревар стои искусна белгиска компанија, Винопрес. Компнијата повеќе од три децении работи во делот на маркетинг и комуникации. Самата компанија има соработка со преку 800 соработници, главно реномирани вински новинари и критичари ширум светот, што ја позиционира како главна порта за промоција на вина, сорти и виногорја, во светот. Влегувањето на сортата Вранец во протфолиото на натпревари на Конкур Мондиал де Брисел, значи голема светска промоција на вината, регионите и земјите кои се тесно поврзани со оваа сорта, но исто така отвора можност за приклучување на други значајни вински сорти во насока на севкупно презентирање на се повеќе популарниот балкански вински полуостров. До сега ниту еден интернационален натпревар надвор од балканот не посветил толку внимание кон вината од сортата вранец, кои се за останатиот дел од светот најчесто непознати.

„Објавувањето на проектот Вранец Селекција / Vranec Selection побуди изнвонреден интерс кај винските судии од целиот свет, искажувајќи го својот интерес за учество на најавениот натпревар“, изјави организаторот. Објавувањето на земјата, домаќинот и датумот на овој настан се очекува кон средината на Јуни 2023.

ГОЛЕМА ВИНСКА ПРОЛЕТ GrandVin 2023 Spring Edition

Super Admin — Mon, 03 Apr 2023 11:06:46 +0000

Одберете го вашето ново вино, зголемете го винското искуство. Македонската асоцијација на сомелиери (МАСОМ) е домаќин на првото пролетно издание на GrandVin, салон кој ги промовира македонските производители на вина и јаки алкохолни пијалоци, и ја поттикнува македонската винска култура. Настанот ќе се одржи на 8 април 2023 година, од 12 до 20 часот, во хотел Мериот. Посетителите ќе можат да уживаат во над 400 вина од 50 винарии, додека за љубителите на посилната „капка“, на павилјонот „Masters of Distilleries“ ќе има 15 внимателно избрани македонски дестилерии. Земја гостин на овој настан е Албанија, од каде доаѓаат шест албански винарии по препорака од Албанската Асоцијација на Сомелиери, давајќи им на посетителите единствена можност да ги искусат нивните уникатни и богати вкусови.

„Возбудени сме што наидовме на голем интерес кај винариите да ги изложат нивните вина од последната берба кои за пошироката јавност се од скоро или допрва ќе бидат достапни“, вели организаторот. „Освен тоа, среќни сме што токму Албанија ќе биде земја-гостин бидејќи има долга традиција на производство на вино, со што ја засилуваме сликата на балканскиот вински полуостров во светот. Овој настан ќе претставува шанса за посетителите да искусат нешто ново и уникатно“, додаваат од МАСОМ.

На сите посетители им претстои ден исполнет со врвни вина, вкусна храна и нови откритија во винскиот свет. Влезници за настанот на https://www.karti.com.mk/grand-vin-spring-edition.nspx

Престижен вински салон „Винодонија“ на 25-ти и 26-ти ноември во „Мериот“

Super Admin — Mon, 14 Nov 2022 11:16:27 +0000

Шестото издание на престижниот вински салон „Винодонија“, годинава во елегантната атмосфера на хотелот „Мериот“ на 25-ти и 26-ти ноември во Скопје ќе ги собере сите вљубеници на оваа божја напивка. „Винодонија“ стана традиција иако многумина ја нарекуваат - рај за хедонисти, бидејќи ја негува винската страст, промовира добри вина, настан што освен едукативен карактер со години ја потврдува својата цел: подигнување на винската свест и развој на нашата винска култура. „Винодонија“ е настан полн со можности, гостите ќе може да дегустираат вина од околу 60 винарии, со импресивна бројка од над 450 етикети на вино. „Винодонија“ по правило ќе понуди едукативен пристап кон виното: за два дена ќе се случат 5 работилници и мастер клас дегустации насловени по земјите и предизвиците: „Запознај ја винската Унгарија“, „Запознај ја винската Хрватска“, „Основи на спарување на вино и храна“ и „Во светот на винските меурчиња“. Гостите што за својот викенд - избор на 25-ти и 26-ти ноември ќе ја сакаат „Винодонија“ ќе имаат можност за нови вински информации, директно од енолозите и луѓе вклучени во производството на вино, со што ќе се запознаат најновите стилови и трендови во оваа индустрија. Се разбира, виното со својата уникатност се надополнува со добрата храна: во рамките на салонот ќе можат да се вкусат и гастрономски деликатеси од околу 15-тина гастрономски брендови од Македонија. И уште еден адут на „Винодонија“ кој ќе го комплетира возвишениот вкус на виното ќе биде настапот на џез бендот на македонскиот реномиран музичар Георги Шаревски. Ве очекуваме на 6-тата „Винодонија“.

SuperWine 9.0 – На брановите на големите вина!

Super Admin — Mon, 27 Jun 2022 14:44:44 +0000

Деветтото издание на еден од највозбудливите вински настани во Југоисточна Европа - SuperWine ќе се одржи во сабота, 2 јули 2022 година од 20 часот на луксузното пристаниште за јахти Порто Монтенегро, во Тиват, Црна Гора. Според прелиминарната листа на винарии-изложувачи, пред нас е најдобриот SuperWine досега. Подготовките за претстојниот SuperWine ги одбележа голем интерес од реномирани вински куќи. Годинешната, според сите оценки, најатрактивна винска програма на настанот SuperWine, традиционално ќе биде „засилена“ со настап на диџеј, како и богата придружна гастрономска програма. Списокот на винарии-учесници изгледа волшебно. Еве само дел од великаните на регионалната и светската винска сцена кои доаѓаат во SuperWine со нивните супер вина - Monteverdi, Bertani, Jean Durup, DAOU Family Estates, Arthur Metz, Kovačević, Masciarelli, TEMET, Keković, Fontanafredda, MASI, Ražnatović, Đukić, 13. Jul Plantaže, Bikicki, Henkell x Freixenet, Jungić, PASQUA, Vinarija 100 žena, Monterosso и многу други. Најголемите вински изненадувања оставени се како „шлаг на торта“ за самиот крај, а комплетната листа на учесници може да ја погледнете на веб-страницата superwine.rs. Влезниците за SuperWine 9.0 ќе бидат достапни на лице место (Buddha-Bar Beach во Порто Монтенегро) на денот на настанот по цена од 40 евра, како и во претпродажба преку апликацијата Wine Drop Club, по цена од 35 евра.

„Вино на штикли“ на 23 јуни: Најавуваме ноќ за паметење во Форца

Super Admin — Mon, 13 Jun 2022 11:42:36 +0000

По пауза од две години, на 23 јуни (четврток), од 19 часот па се до полноќ, во винскиот бар и ресторан „Форца“ по 4-ти пат ќе се случува единствен настан „Вино на штикли“ кој на едно место ќе ги собере - најдобрите вина, жени на штикли (со што се потенцира дрес кодот за оваа посебна ноќ) и секако, мажи со вкус. Ова е вистинско место за вашите најдобри штикли бидејќи ве очекува фантастично модно изненадување. Виното и жените се најопеаните нешта на светот, а кога на ова ќе се надодадат вкусните специјалитети на ресторанот Форца, настапот на поп ѕвездата Викторија Лоба заедно со својот придружен бенд, која за оваа вечер има специјален репертоар, навистина се работи за настан што не се пропушта. Внимавајте: во цената од 1200 денари е вклучена бесплатна дегустација на над 100 различни вина од 15 македонски и странски винарии кои ќе бидат спарени со вкусните закуски на ресторан Форца. Најважно од сè е да си набавите влезница на време, бидејќи бројот на гостите е ограничен. Влезниците се продаваат единствено во Форца, а сите патишта на 23 јуни ќе водат кон овој популарен скопски локал. П.С. И не заборавајте. Со виното е исто како со страст: треба да се пробаат сите вина, од некое се доволни само неколку голтки, а некое треба да се испие до крај. Се гледаме! Резервирајте на 078 445 068.

Wine Garden 2022 – Винска оаза во најубавата градина во Белград

Super Admin — Wed, 01 Jun 2022 16:21:16 +0000

Омилениот регионален вински настан Wine Garden, кој се одржува по четврти пат, и оваа година на 11-ти и 12-ти јуни ќе ги собере љубителите на виното и природата во ботаничката градина Јевремовац, а рекорден број винарии ќе ја претстават својата понуда пред посетителите. Бројот на винарии и посетители се зголемува од година во година, така што годинава ќе учествуваат рекордни 70 винарии. Покрај вината од најпознатите винарии во Србија, со свои вина ќе се претстават и гости од Македонија, Босна и Херцеговина, Хрватска, Словенија, Црна Гора, а ќе бидат понудени и вина од Франција, Италија и Шпанија, додека посебно внимание ќе привлечат вината од Молдавија и Португалија. Тоа ќе биде вистински вински пикник каде посетителите ќе можат бесплатно да ги дегустираат сите понудени вина, а уживањето ќе биде зачинето со музичка програма која ќе биде распоредена на дури пет пунктови. Покрај стотиците различни етикети за вино, место во градината тој викенд ќе заземат и производители на сирења, сувомеснати производи и други вкусни гурмански закуски. Wine Garden е единствениот вински настан во регионот каде од година во година се бара карта повеќе! Иако Ботаничката градина се простира на над 5 хектари, поради амбиентот и комфорот, бројот на посетители ќе биде ограничен, затоа набавете си карта навреме. Влезниците се пуштени во продажба на сите продажни места во Србија и преку онлајн сервисот tickets.rs по цена од 1.200 српски динари по ден, со вклучена чаша за дегустација. Портите на Ботаничката градина за посетителите на Wine Garden ќе бидат отворени двата дена од 14 до 21 часот.

„Slow Wine салон 2021“ – настан кој ги слави малите семејни винарии и дава придонес кон едукацијата и градењето на македонската винска култура

Super Admin — Fri, 03 Dec 2021 10:07:52 +0000

„Slow Wine салон 2021“ е дводневен настан кој ќе се одржи на 3-ти и 4-ти декември 2021 во Битола во организација на „Слоу Фуд Македонија“ со локална поддршка на „Слоу Фуд Битола“. Салонот има за цел презентација и промоција на производители на вино, кои ќе ни ги презентираат нивните вински приказни и ќе ни понудат на дегустација вина направени со страст. На третото издание на винскиот салон „Slow Wine салон 2021“ ќе се претстават преку 30 производители, 5 дестилерии и 10 производители на деликатесни производи кои ќе бидат понудени за дегустација на големиот број на љубители на виното и храната. На винскиот салон ќе му претходи промоција на првото македонско издание на „Slow Wine 2021“ која ќе се одржи на 3-ти декември со почеток во 18 часот во Кино Манаки. Се работи за концепт граден низ годините на развој на Слоу Фуд движењето кое од самите почетоци негува култ кон виното, последниве години го преточува во независен вински водич. Придонесот на Слоу Фуд во развојот на винската култура преку поддршка, едукација и промоција на малите семејни винарии, кои како нов бран надоаѓаат на винската сцена е од врвно значење во промоцијата на локалното поднебје, зачувувањето на локалниот биодиверзитет во лозјата, традиционалните техники на производство на вино и зачувувањето на животната средина. Настанот е можност да им се даде видливост на младите винари, малите винарии и нивните уникатни вина. Во сабота на 4-ти декември Офицерскиот дом Битола за првпат ширум ќе ги отвори вратите за сите кои го негуваат култот кон виното, производители и љубители на овој божествен пијалак и ќе се претвори во своевиден „храм на виното“. Ова е еден од првите јавни настани кои ќе се одржат по реконструкцијата и пуштањето во употреба на Офуцерскот дом во Битола и претставува извонредна можност да се почувствува неговата убавина и амбиент збогатен со содржините од програмата на Slow Wine 2021. Ограничен број на влезници за настанот ќе може да се купат онлајн: https://mktickets.mk/event/swbt/ Овој настан е од голема важност во едукацијата и градењето на винската култура, кон посреќна иднина во нашата земја.

Програма Slow Wine 2021, Вински салон Битола

03.12 2021, петок, Кино Манаки

18-19ч. – Промоција на водичот Slow Wine 2021
19-20ч. – Коктел
20-21ч. – Проекција на филм: Момчињата од Бароло

04.12 2021, сабота, Офицерски дом

16-23ч. – Вински салон со 30 винарии, 5 дестилерии и 10 производители на деликатесни производи.

* Настанот ќе се одржи во согласност со Covid-19 протоколот на Министерството за здравство. Задолжително треба да се покаже сертификат за двојна вакцинација, негативен PCR тест или сертификат за прележан Covid-19 во последните 30 дена. Носење на маска е задолжително.

Прво македонско издание на Slow Wine 2021

Првото македонско издание на Slow Wine 2021, концепт граден низ годините на развој на Слоу Фуд движењето кое од самите почетоци негува култ кон виното, последниве години го преточува во независен вински водич. Slow Wine, преку водичот, усвојува нов пристап на вреднување и промоција на виното и го разгледува неговиот квалитет од аспект на уважување на биодиверзитетот и традиционалното производство. Идејата на Slow Wine е да ги презентира уникатните приказни за винарите, нивната страст и поврзаност со земјата, лозјата, локалните вински сорти грозје и пејзажите, традицијата и технологијата на вино, со фаворизирање на оние кои спроведуваат еколошки одржливи практики на одгледување винова лоза и производство на вино. Во првото македонско издание на Slow Wine 2021 преставени се 7 винарии и 27 вина од локални, регионални и интернационални вински сорти кои се одраз на македонскиот тероар. Oваа публикација е посветена на македонските винарии кои како нов бран се појавуваат во последниве години на винската сцена. Изборот на вина е направен врз основа на посети на винариите, разговори со винарите и сесии на сензорно оценување, благодарение на нашиот тим на експерти за вино, здружен во Slow Wine комитет. Водичот ги пренесува новитетите од винариите, кои ќе им помогнат на љубителите на вино да направат посвесен избор. Ова е само прв чекор, во следните изданија идејата е водичот да се проширува со нови винарии и вина. Првото македонско издание на Slow Wine 2021 ќе биде промовирано овој петок, 3-ти декември 2021, во Битола, на винскиот салон Slow Wine 2021 кој се одржува по трет пат, а оваа година под Slow Wine концептот. Уредници: Слободен Чокревски и Николче Николовски Автор на текст: Ивана Симјановска Членови на Slow Wine комитет: Слободен Чокревски, проф. д-р Виолета Димовска; проф. д-р Горан Миланов, Ивана Симјановска; Александар Вучковски; Дејан Донев; Илија Малинковски; Марија Николовска; Петар Величковиќ; Трајан Димкоски; Лазар Плетварски; Елена Богева; Mилица Плетварска; Кире Петров; Горан Колев; Страшко Милошевски; Николче Николовски; Васко Марковски; Александар Клинчаров; Насловна страница и илустрации: Рената Атаин (2021) Дизајн: ОРТОГРАФ графичка работилница Уредување: Жарко Стојановиќ Фотографии: Петкамен Издавач: Slow Food Macedonia © 2021 [email protected] / www.slowfood.mk

Успешно одржано првото летно винско дружење „Summer Wine 2021 Skopje“

Super Admin — Wed, 07 Jul 2021 07:31:59 +0000

На 4-ти Јули 2021, со чашка полна допадливи ароми и освежителни овошни вкусови, гостите и учесниците на настанот „Летно вино“ го започнаа овогодишното винското лето. Во прекрасна атмосфера на терасата на ресторан Воденица-Мулино се претставија следните македонски винарии: Стоби, Тиквеш, Бовин, Камник, Лазар, Шато Сопот, Подрум Попови, Венец, Сковин, Попов, Пуклавец Македонија и Брзанов. Посетителите исто така имаа можност да ги вкусат и вината на винаријата Звонко Богдан од Србија, словенечките вина од Пуклавец Фемили Вајнс, италијанските вина на увозникот Винум-МКД, како и француските вина од Шато де Гурдон на винаријата Тиквеш. Вината ја следееа и внимателно одбраната храна од спонзорите Тинекс деликатесен и Рудине во соработка со реномираниот ресторан Воденица-Мулино, додека за рехидрирање на посетителите се погрижи Горска со своите производи. Во склоп на настанот, организаторот Македонската асоцијација на Сомелиери – МАСОМ додели сертификати на 20 кандидати кои успешно го положија првото ниво од сомелиерските обуки. „Во светот на вината, нашиот вински регион го препознаваат по црвените вина, но тоа е само една страна од медалот. Повардарието, нашата винска артерија има и друга страна, мирните бели и розе вина, како и пенливите. Се надеваме дека со овој настан успеавме да ја откриеме и втората страна на медалот кој се повеќе почнува да блеска.“ - изјавија од МАСОМ. Дел од атмосферата на настанот: http://www.masom.net/gallery-summer-wine.html

Летно винско дружење – Summer Wine 2021

Super Admin — Tue, 29 Jun 2021 13:27:03 +0000

Во склоп на планираните активности на Македонската Асоцијација на Сомелиери – МАСОМ, на 04 Јули 2021 (недела) ќе се оддржи летно винско дружење на кое ќе се претстават македонските винарии. Настанот ќе се оддржи на отворено на терасата на реномираниот ресторан Воденица – Мулино лоциран во центарот на Скопје. „Летно Вино“ или Summer Wine е еднодневна манифестација која за првпат кај нас се оддржува во летниот период со тенденција да прерасне во традиционална манифестација. Самиот настан има за цел да даде фокус на новите вина од новите берби кои се или штотуку ќе бидат лансирани на пазарот, со фокус на освежителните, овошно водени вина. Настанот е планиран да се оддржи во времетраење од 17:00 до 23:00 часот, а посетителите ќе имаат можност да дегустираат преку 150 вина придружувани со голем избор на закуски од ресторанот Воденица. Настанот ќе се оддржи на отворено во склоп со актуелните Ковид препораки поради што бројот на влезници ќе биде лимитиран. Посетителите ќе имаат можност да купат влезници на самиот настан како и онлајн на следниот линк: https://www.karti.com.mk/summer-wine.nspx