владимир нелоски – Kurir.mk

Нелоски: Предложивме финансиска помош за ФК Вардар за делење на плати, Арсовска е против помошта

Магдалена Андонова — Mon, 14 Nov 2022 14:18:41 +0000

Владимир Нелоски, советник во советот на Град Скопје на денешната седница на советот ги повика советниците од сите политички партии да го прифатат предлогот амандманот за финансиска помош од 15 милиони денари поднесен од советничката група на ВМРО-ДПМНЕ бидејќи фудбалскиот клуб се наоѓа во тешка финансиска состојба и овие средства ќе помогнат на клубот, укажувајќи дека вината треба да се бара во претходното раководство на Град Скопје кој немал слух за изнаоѓање на решенија се со цел клубот да не дојде во ваква состојба како што е денес. - ФК Вардар е Скопје, ФК Вардар е во многу големи проблеми, и да не е во сопственост на градот, но состојбата во која што се наоѓа можеме да бараме вина во претходното раководство на градот и немањето слух да преземе чекори за да не дојде клубот во оваа состојба во која се наоѓа, односно во втора лига со милионски долгови итн, посочи тој. Нелоски изјави дека фудбалерите веќе 4 месеци немаат земено плата и мора да се изнајде системско решение за во иднина да не се случува ова. - Но, ФК Вардар во овој момент се бори против сите околности во кои што се наоѓа и е прв на табелата во втората лига. И итноста на оваа точка и барањето на финансиска помош на ФК Вардар произлезе од тоа што пред некоја седница овде имаше дебата за вработените во ЈСП Скопје кои што немаа земено плата за претходниот месец, а фудбалерите на ФК Вардар немаат земено плата 4 месеци и треба да земат. И мора да се најде системско решение, додаде Нелоски. - И ќе бидам прв кој што ќе повика за било каква помош или било кој чекор во интерес на ФК Вардар бидејќи 12 години бев дел од тој клуб, нагласи Нелоски и додаде дека и во 2010 година фудбалскиот клуб се соочил со ваква криза меѓутоа тогашното раководство на градот под раководство на ВМРО-ДПМНЕ интервенирало и клубот не само што излезе од безизлезната состојба туку и година дена потоа стана шампион. Според Арсовска ова е неприфатливо бидејќи со таа помош ќе се наполнат туѓи џебови или ќе се исплатат извршителите, посочувајќи дека нејзина молба е да се изнајде соодветно решение и ФК Вардар да се врати под ингеренции на градот, а институциите да испитаат што конкретно се случувало во клубот. Но, мнозинството советници го прифатија амандманот на советничката група на ВМРО-ДПМНЕ кој предвидува доделување на финансиска помош од 15 милиони денар за ФК Вардар.

Нелоски до Арсовска: Повторно се занимавате со медарство, пчеларство, но, од оние информации кои што ги имам јас не сте толку храбра кога давате исказ каде што кривично ќе одговарате ако дадете лажен исказ

Дарко Андоновски — Wed, 19 Oct 2022 14:07:16 +0000

„Се кажаа многу работи на оваа говорница, но за жал не сите беа вистинити. Кога збориме зашто некој оди по улици, денес истиот тој човек не беше да отвори гранапче, туку беше на место каде што ќе биде започнат со градба заедно со градоначалникот на Кисела Вода еден современ пазар којшто граѓаните на Кисела Вода го бараат долги години. Тоа е така затоа што градоначалничке на политичарите нам ваквите работи ни се светост. За разлика за жал на Вас и на тие околу Вас што не ви се баш приоритет. И токму затоа и Мицкоски, и Галески, и Андоновска, и Андоновски, и Нелоски, сите ќе отидеме секаде каде што сме ветиле нешто дека ќе го направиме, кога ќе започнеме да го правиме тоа нешто или пак кога ќе го завршиме, бидејќи ќе повторам Програмата пред која што сме излегле како советници, градоначалници, и се останато, и како партија имаме обврска да ја исполниме“, истакна Владимир Нелоски, советник во Советот на Град Скопје од редовите на советничката група на ВМРО-ДПМНЕ. Нелоски додаде дека токму затоа ќе одат бидејќи ќе има со што да се пофалат. „Можеби вас ви е криво бидејќи кога одите не може да најдете друштво за да отидете на некој од тие проекти, кои што за жал ги има се уште во мал број. Се надевам дека ќе се зголемат. Во однос на директорот на ЈСП, ви благодарам што признавте пред јавноста дека јас како човек, но и ВМРО-ДПМНЕ како партија има широкоградост кога се работи за граѓаните на Скопје, и интересите на граѓаните на градот Скопје, и дека не не интересирало некој дали е од одредена политичка партија се додека е тој професионалец. Да, немаме никаков проблем со ниеден човек, доколку е професионалец и си ја врши својата работа. Но, истиот тој директор Александар, има телефонски број од тие што биле пред него и тие што сега во моментов седат на 500-тини метри од нас во влада. Требаше да чекаме толку за да реагираме? Зашто не ги побараат своите сопартијци истиот тој директор пред четири месеци кога гледаше дека е алармантна ситуациајата“, запраша советникот. Тој и се обрати на градоначалничката при што рече: - „Повторно се занимавате со медарство, пчеларство и се останато. Но, од оние информации кои што ги имам јас не сте толку храбра кога давате исказ каде што кривично ќе одговарате ако дадете лажен исказ. Како што сте храбра сега на оваа говорница, да велите за некој дека е криминалец, а без да имате еден единствен доказ кој што го потврдува тој криминал. Вашето сомневање поради тоа што некој не комуницира со Вас градоначалничке не е криминал“. „Ова претпријатие и Градот Скопје бидејќи се зборува за матни ликови тука на говорница, можеби едно од причините за финансиската состојба и неможноста на Градот да му помогне на ЈСП е тоа што поради не знам кои причини за првпат можеби во историјата на Градот Скопје законската обврска за пресметка на комуналии која што еобврска на Градот да биде пресметана и да биде дадена на инвеститорите кои што сакаат да инвестираат се држи по не знам колку месеци. Зашто? И јас се прашував додека не дознав дека одредени инвеститори биле посетувани до луѓе блиски до Градот за да им се понудат за помош за да им бидат убрзани пресметките за комуналии. Нешто кое што ниеден градоначалник и ВМРО-ДПМНЕ, и СДСМ, и независен во историјата на Градов не го оспорувал и не го кочел“, рече Нелоски.

Нелоски: Колку чини тревникот среде плоштад на Шилегов?

Магдалена Андонова — Thu, 10 Mar 2022 18:49:57 +0000

На денешната седница на Советот на Град Скопје, советникот од ВМРО-ДПМНЕ, Владимир Нелоски упати три прашања до градоначалничката на Град Скопје каде запраша дали тревникот на плоштадот има буџетски импликации врз буџетот на Град Скопје? Во врска со тревникот на плоштадот, Нелоски запраша дали тревникот има буџетски импликации врз буџетот на Град Скопје и дали имаме информации за колкава вредност станува збор за тој тревник и дали таа вредност е реална на тој тревник? Нелоски запраша дали во градската администрација има некои податоци или информации за било каква направена јавна набавка за тревникот на плоштадот? Доколку нема направено јавна набавка, тогаш дали има донесено некаква одлука за законска донација на Советот на Град Скопје. Нелоски во однос на второто прашање во врска со порталот за Град Скопје кој го набавил претходното раководство запраша дали тој портал постои и доколку постои дали тој е функционален целосно или има недостатоци? Со оваа најверојатно лоша и криминална набавка ме интересира и колку буџетот на Град Скопје е оштетен? Во упатеното трето прашање Нелоски запраша дали има интерес од граѓаните за оваа отвореност на Градот Скопје и колку барања на граѓаните до сега се решени преку овие платформи? Нелоски посочи дека градот Скопје стана отворен град и достапен за граѓаните каде отвори и канцеларија за граѓаните и комуникација со граѓаните кои можат да ја направат 24 часа во секое време.

Нелоски: Во ЈП Дрисла се трошело како да нема утре, работата на претпријатието мора да се стави на анализа и ревизија

Дарко Андоновски — Thu, 09 Dec 2021 15:43:53 +0000

Во ЈП Дрисла се трошело како да нема утре, директорот трошел како да се спремал дека ќе ја напушти функцијата бидејќи и од најголеми ставки до најситни ставки разликите на сумите се фрапантни. Целокупното работење на претпријатието треба да биде анализирано и ставено на предмет на ревизија за да не се дозволи повеќе да има фрапантни расходи во трошоците, изјави советникот од ВМРО-ДПМНЕ во Советот на Град Скопје, Владимир Нелоски. Нелоски во своето обраќање на денешната седница на Советот ги соопшти огромните разлики во трошоците и неразумното трошење на ЈП Дрисла. - Само за потрошен материјал за одржување за 2020 година потрошиле 3,4 милиони денари, додека во 2021 потрошиле 6,4 милиони денари. Трошоци а резервни делови материјали гуми сумата се зголемила 3 пати, трошоците за ситен инвентар се зголемиле околу 2,5 пати, од 14, на 3,5 милиони денари. Одржувањето на веб страната има зголемување за 6 пати за одржување, за тековно одржување на објект двојно повеќе поголеми трошоци. Трошоци за софтверот е зголемен 3 пати, додека пак хардверот само 20% повеќе во однос на 2020 година., рече Нелоски. Тој посочи дека за Да се продолжат недоследностите ова претпријатие за трошоци за интелектуални услуги има потрошено двојно повеќе од планираното, а за правни адвокатски и нотарски услуги, исто така двојно повеќе а повисоки се и судските трошоци. - Кога сме кај вработувањата во ова претпријатие се драстично зголемени, а само по основ на бруто плати споредено со минатата година потрошени се повеќе 5 милиони денари, а трошоците за привремени вработувања се зголемиле од 4,8 на 6,4 милиони денари, изјави Нелоски.

Нелоски: Како Петре Шилегов како градоначалник успеа да гради зграда дивоградба среде Скопје со неоткупено дворно место, да купи две возила ауди и хациенда во Маврово додека е на функција?

Ристе Здравков — Thu, 21 Oct 2021 12:36:04 +0000

Претседателот на ГК на ВМРО-ДПМНЕ, Владимир Неловски реагираше на прес-конференцијата на Петре Шилегов. Во продолжение ви ја пренесуваме интегрално неговата прес-конференција: Шилегов сака да зборува за неговата имотна состојба. Тогаш ајде да зборуваме јавно. Шилегов како градоначалник на градот Скопје пријавил дека поседува: • Стан од 68 квадрати во Скопје; • Втор стан од 64 квадрати исто така во Скопје; • Потоа трет стан од 72 квадрати исто во Скопје; • Четврт стан од 87 метри квадратни исто така во Скопје; • Една куќа во Тафталиџе од 306 квадратни метри во која што деновиве гледаме дека се прави и лифт; • Втора куќа во Маврово од околу 300 квадрати; • 8 милиони денари златен накит; • 3 милиони денари уметнички слики; • Хартии од вредности. Главното прашање е како Петре Шилегов со чиновничка плата успеа да стигне до четири стана, две куќи, злато и уметнички слики вредни неколку стотици илјади евра. Како Петре Шилегов како градоначалник успеа да гради зграда среде Скопје дивоградба и со се разбира неоткупено дворно место? Како Шилегов има вилает од 300 квадратни метри на два ката, во Маврово додека е градоначалник на Скопје? Потоа како успеа да купи коли од марката ауди и да не ги пријави во имотниот лист? Ова се прашањата кои даваат одговор на дилемата колку Петре Шилегов е чесен. Ако навистина е чесен како што тврди, го повикуваме јавно Шилегов да каже кои се компаниите кои во овој момент му ја градат зградата во Скопје, и јавно да објави документ дека тој лично им платил? И тоа не се, На само два дена пред изборите Шилегов склучил договор во четири очи со 3 кафеани за услуги од над 30 илјади евра. На Шилегов сите знаеме дека приоритет му се кафеаните, наместо Скопје. Објаснувањето на Шилегов дека тоа преставувало континуитет во неговото работење е нешто за кое што единствено не излажа. Ние се согласуваме со тоа. Шилегов од кафеана не е излезен, за тоа за жал го плаќаат граѓаните, додека градоначалник на градот Скопје е кој што назадува. Шилегов треба да одговори на каков начин стигна со чиновничка плата до 4 стана, 2 куќи, и злато и слики вредни неколку стотици илјади евра? Ова прашање ќе си го постават сите граѓани на 31-ви кога ќе отидат на своите гласачки места да го дадат својот глас и се разбира да го казнат Петре Шилегов.

Нелоски: Ги повикувам скопјани да дадат поддршка за Арсовска која ќе работи чесно и одговорно за Град Скопје да биде модерно место за живеење

Катерина Бојаџиева — Wed, 20 Oct 2021 18:29:45 +0000

Знам дека граѓаните на Град Скопје ќе ја поддржат Данела Арсовска бидејќи скопјани се подготвени и очекуваат модерно Скопје, рече Владимир Нелоски, претседател на Градскиот Комитет во интервју во емисијата Само вистина на ТВ Канал 5. Нелоски посочи дека ВМРО-ДПМНЕ победи на Советничката листа за Град Скопје, укажувајќи дека во моментот има преговори за составување на поголемо мнозинство во советот. -Да не заборавиме уште една многу важна работа за функционирањето на градот тоа е Советот. ВМРО-ДПМНЕ победи на советничката листа и во овој момент имаме сериозни преговори за составување на мнозинство во советот, кажа тој. Нелоски нагласи дека ветуваат одговорни и чесни политики кон граѓаните а не како до сега посочувајќи ги примерите на директорот на Водовод кој најмувал фирми без спроведување на постапка, како и Петре Шилегов кој ја продал градската куќа за да стави два сантима асфалт. Граѓаните ќе се одлучат да ја поддржат Данела затоа што им е потребно зелено Скопје, потребно им е расчистување на воздухот не онакво какво што велеше Петре Шилегов во 2017тата година, да падне ВМРО-ДПМНЕ и ќе има чист воздух. Не ние не го велиме тоа, но велиме дека ќе ги спроведуваме мерките кои што ќе ги ветиме за да се намали постепено загадувањето на воздухот, ветување решавање на многу сообраќајни решенија, за разлика од Петре Шилегов кој се фали со подземниот булевар кај Лимакс, тоа е проект кој што доаѓа од режимот а кој што Дарко Каевски го критикува, проект кој Коце Трајановски го започна, подвлече Нелоски и додаде: „Ветуваме политики кои ќе бидат чесни кон граѓаните, ќе работиме чесно и одговорно. Нема да правиме како што видовме што правел директорот на Водовод и кандидат за градоначалник на општина Карпош кој најмувал фирми без одредени постапки, нема да правиме како Петре Шилегов да ги користиме парите заштедени од граѓаните за да ја продаде градската куќа и парите да ги потроши на два сантима асфалт“.

Нелоски до Каевски: Поразот на локалните избори е последица на неработењето и лошите политики на власта

Дарко Андоновски — Wed, 20 Oct 2021 17:34:00 +0000

Првиот круг од локалните избори евидентно покажа дека власта повеќе ја нема поддршката од граѓаните и дека граѓаните се подготвени за промени и конечно победи, најпрво во општините, а потоа и на централно ниво, вели Владимир Нелоски, претседател на Градски Комитет на ВМРО-ДПМНЕ во вечерашното гостување во емисијата Само вистина на Канал 5 телевизија. Нелоски потенцираше дека ваквиот резултат е пред се последица не само од неработењето на локалните власти на СДСМ, туку и поради лошите политики на централно ниво. -Резултатот од овие избори е последица не само од неработењето на локалната власт, туку и од сите останати лоши политики кои беа носени од страна на централната власт. Не би се согласил со Каевски дека СДСМ ја сфатиле пораката и не би се согласил дека народот им дал порака. Народот им даде порака во 2019тата година кога нивниот лидер мавташе со метли, ветуваше промена на позиции, директори и за сите оние кои што не работат чесно, но не видовме ништо од тоа и токму затоа граѓаните во неделата им го дадоа најпрво жолтиот картон кој што ќе го потврдат на 31ти октомври и СДСМ конечно ќе го доживее поразот кој што го заслужува, додаде Нелоски. Според него на овие избори најголем победник е ВМРО-ДПМНЕ споредувајќи ги резултатите од минатата година на предвремените парламентарни избори и сега на локалните избори, додавајќи дека во скопските општини како и на ниво на Град Скопје, ВМРО-ДПМНЕ или си го задржало гласачкото тело или пак го зголемило, што не е случај со СДСМ која што има доста намалување во однос на минатите години. -Во однос на гласовите, не знам која аналитика ја гледал Каевски, но ако ги погледнеме гласовите во Градот Скопје и во скопските општини, еве на пример Кисела Вода, ВМРО-ДПМНЕ ги зголеми своите гласови за 1000 до 2000, додека пак СДСМ опадна за 5000 до 6000 гласови. Потоа доколку го земеме Аеродром, ВМРО-ДПМНЕ од претходните избори во 2020 година ги зголеми своите гласови за 4000 до 5000, додека СДСМ го намали за 2000 до 3000 гласови. Истото е и во Центар, ВМРО-ДПМНЕ остана на истото гласачко тело од минатата година, додека пак СДСМ падна за некои 2000 до 3000 гласови. Така е горе доле и низ цела држава. -Граѓаните на овие избори конечно одбраа, се одважија и избраа промени, победи и најважно од се проекти, истакна Нелоски. Нелоски, ја искоментира и изјавата на Зоран Заев кој ги нарече граѓаните зло затоа што не му ја дале него поддршката, прашувајќи го Каевски дали како млад човек ќе им се извини на граѓаните за изјавата на Заев, укажувајќи дека СДСМ мора да излезе од матрицата на надменост и арогантност. -Јас бев фрапиран кога премиер на Република Македонија, без разлика дали е претседател на политичка партија, тој е премиер на сите граѓани. Тој премиер пред неколку дена кажа дека 400.000 протесни гласа на изборите биле зло. Сега јас на Дарко морам да му поставам прашање дали ќе се извини на граѓаните бидејќи неговиот претседател 400.000 граѓани на Македонија ги нарече зло. Значи потребно е СДСМ конечно да излезе од таа матрица, на надменост, на арогантност, на понижување на сите неистомисленици, порача Нелоски.

Нелоски: Ќе заврши и вториот круг и ќе изгуби, а Петре уште ќе чита пресови со проектите на Коце

Катерина Бојаџиева — Fri, 08 Oct 2021 12:09:21 +0000

Ќе заврши и вториот круг и ќе изгуби, а Петре уште ќе чита пресови со проектите на Коце Трајановски. Петре Шилегов е најдобриот препишувач, најпрвин ги копираше проектите на Данела, па половично презентирани ги претставуви како свои, а потоа отиде и чекор понатаму па почна да се фали со проектите на Коце Трајановски и ВМРО-ДПМНЕ, истакна Владимир Нелоски, претседател на Градски комитет. -Имено, се наоѓаме пред станбено деловниот комплекс на „Лимак“, инвестиција која ја потпишаа и договорија Владата на ВМРО-ДПМНЕ и Коце Трајановски уште во 2012-та година. Со оваа инвестиција инвеститорот се обврзува да направи подземна сообраќајница под целиот комплекс во должина од 800 метри. Подземната сообраќајница е само еден дел од проектот на подземна сообраќајница кај Јужен булевар, ВМРО-ДПМНЕ своевремено распиша тендер за проектирање на подземна сообраќајница од делот каде завршува подземната која ја гради „Лимак“, па до турбо кружниот тек кај Католичка црква со кружен тек на две нивоа кај Нова Македонија и кон Кисела Вода, од катната гаража до Рампа, каде треба да има исто така два кружни тека. Шилегов не ги продолжи проектите за подземната сообраќајница кои што беа под ингеренции на Градот Скопје и која е обврска на Градот Скопје, туку се фали со привршување на подземната сообраќајница на делот кој е обврска на „Лимак“, инвестиција која што е донесена од ВМРО-ДПМНЕ. Шилегов продолжи и со презентација на турбо кружниот тек кај Момин поток, исто така проект на Коце, и таман помисливме дека Петре завршил, еве го денес повторно со уште еден проект од Коце, го копира Луна паркот, кој до сега ќе беше изграден да не беше тој, а не е направен се разбора токму поради Шилегов. Петре, наместо да се фалиш со туѓи проекти, кажи до каде се другите два дела на подземната сообраќајница кај Јужен булевар, или до каде е тунелот под Кале, проекти кои што ти треба да ги изградиш, најверојатно не ги споменуваш затоа што си не си способен ниту еден од нив да реализираш?! Доколку не знаеш не се мачи да одговориш, и така ти остануваат уште неколку денови како градоначалник, а потоа деталната ревизија на твоето работење ќе ги даде сите одговори, кои ти одбегнуваш веќе подол период да ги дадеш, додава Нелоски.

Нелоски: Не е Филипче виновен, продужниот кабел е!

Ристе Здравков — Tue, 05 Oct 2021 17:13:32 +0000

Членот на ВМРО-ДПМНЕ, Владимир Нелоски на Фејсбук испрати порака до актуелната власт апропо денешната одлука на Зоран Заев за неприфаќање на оставките на министерот и заменик министерот за здравство Венко Филипче и Илир Хасани. Не е Филипче виновен, продужниот кабел е! Уште еден доказ дека не сметаат за малоумни!!! П.С. За 12 дена ќе имаме можност сами да ги повикаме на одговорност, затоа драги пријатели памет во глава ... напиша на Фејсбук Нелоски

Нелоски: Ќе предложиме закон за формализирање на трговијата и чувањето на криптовалути, за тргување без ДДВ, и 0% данок на добивка и доход до крајот на 2023 година за инвеститорите

Магдалена Андонова — Thu, 22 Jul 2021 10:57:33 +0000

Светот оди со големи чекори напред со големи чекори. Дигиталните технологии се иднината, а Македонија со Зоран Заев е заглавена во криминал и корупција. ВМРО-ДПМНЕ има концепт за развој на државата, концептот наречен – Македонија за сите луѓе, кој ќе значи повеќе пари и за граѓаните и за државата. Моментално во светот во подем е тргувањето со криптовалути. Пазарната вредност на криптовалути денес е 2.5 трилиони долари. Тоа е многу повеќе од пазарните вредности на Фејсбук, Епл, ЈП Морган, Волмарт и други светски гиганти, изјави на денешната прес конференција, Владимир Нелоски, претседател на Градски комитет на ВМРО-ДПМНЕ. - Напредните држави како САД и Германија се далеку напред во оваа област. Пеј Пал во САД овозможува срамнување на финансиски трансакции преку криптовалути. Додека пак во Германија е направен закон со кој се овозможува трговија и чување на криптовалути. Денеска повеќе од 40 банки во Германија имаат платформа преку која се овозможува трговија и чување на криптовалутите, а со тоа неколку десетици милијарди евра завршуваат во нивниот буџет годишно. Време е да го фатиме чекорот со напредните држави. И токму затоа ВМРО-ДПМНЕ преку пратеничката група во Собранието од позиција на опозиција ќе предложи закон во Собранието со кој што ќе се дозволи трговија и чување на криптовалутите во Македонија. Со тоа ќе им овозможиме на младите и на сите луѓе да инвестираат и да вложат пари и тие пари да завршат во економијата, се разбира домашната економија и да претставуваат додадена вредност на нашата економија, истакна тој. - Законското решение ќе опфаќа низа поволности во вид на даночни ослободувања: Трговија со криптовалути без ДДВ; 0% данок на добивка и персонален данок на доход за тие кои што ќе тргуваат со криптовалути најмалку до крајот на 2023 година. Со ова законско решение ќе ја формализираме трговијата и чувањето на криптовалути. Ќе внесеме сигурност во правниот промет и кај граѓаните кои веќе тргуваат со криптовалути, но не можат тоа да го сторат во Македонија. Ова законско решение и овој пристап ќе донесе најмалку половина милијарда евра во македонскиот буџет. Да одиме кон иднината, а не пасивно да ја чекаме. Да направиме од Македонија лидер во регионот во трговија со криптовалути. Да се свртиме кон новите технологии и дигитализацијата и да креираме додадена вредност за економијата, посочи Нелоски. Тој вели дека ова е само прв чекор во пошироката визија на ВМРО-ДПМНЕ за дигитална револуција. Криптовалутите се само првиот и најочигледен производ на користењето на Blockchain технологијата, или Distributed Ledger Technology, како поширок опфат (Блокчејн е една од ДЛТ технологиите). - Блокчејн технологиите носат огромни придобивки во сите сфери од организацијата на работењето на фирмите во сите сектори: ги подобруваат и прават поефикасни процесите на идентификација на клиентите, водење на набавите, складирање, продажба, водење на залихите, извршување на меѓународните плаќања итн. Фирмите стануваат поефикасни, поконкурентни. Истото се однесува и на процесите во јавните институции. Ова е иднината, а моментот за македонското општество да почне со примена на блокчејн технологиите е сега. Време е за поинаков пристап. Време е за Македонија за сите луѓе, додаде Нелоски.