Владимир Рендевски – Kurir.mk

Мизрахи до Рендевски: Ако земеме во предвид дека негирање на долгот и аферите врзани со Онкологија започнале уште масовно од 2019-та, како е можно сите контролни механизми да потфрлат

Тале Кристо — Wed, 25 Oct 2023 12:38:41 +0000

„Првиот дел од прашањето е дали Вие нешто знаевте за случувањата на Онкологија? Иако да сте имале ингеренции доколку министерот тоа го дозволува. Дали Вие низ окуларите на министерството чувте нешто за пациентите, за биолошката терапија, за што се случува во Онкологија“, го праша пратеничката Рашела Мизрахи поранешниот заменик министер Владимир Рендевски на денешната седница на Анкетната комисија за скандалот во ЈЗУ Универзитетска клиника за радиотерапија и онкологија. „Вториот дел од прашањето или второто прашање ако сакате за мене е многу побитно, во оваа држава постои Закон за Влада, органи на Управа, па Закон за здравствена заштита, Закон за здравствено осигурување, без разлика какво е нашето мислење за истите, сите укажуваат на фактот дека министерот за здравство е должен да знае за се што се случува и тоа дали преку свој тим или не, меѓутоа тој како лик е должен да знае што се случува во здравствениот систем во државата пропишано преку законски одредби. Со што ќе ги користи контролните механизми на министерството за здравство, на Државниот здравствен санитарен инспекторат, на ФЗОМ, на МАЛМЕД. Ако земеме во предвид дека негирање на долгот и аферите врзани со Онкологија започнале уште масовно од 2019-та година, а кулминирале со еден Извештај од 2021, иако е дискутабилно дали запреле и тогаш, како е можно сите контролни механизми да потфрлат. И да функционира на начин на кој што функционира без раководители, со дистрибуција на медикаменти за кои што не знаеме каде завршуваат, со завршни листи на медикаменти за кои што не знаеме за влез и излез, се во тотален хаос без стручен колегиум“, рече пратеничката. Мизрахи додаде дека министерството за здравство има направено 5 рамковни договори за набавка на медикаменти. И тоа со листа на медикаменти кои што е дискутабилна. „Единствен логичен заклучок за мене е дека министерот за здравство знаел и го уредил ова на начин на кој што сите контролни механизми ќе ги затворат очите и Онкологија ќе прави тоа што треба да направи, под насока одозгора. А, не под насока на пациенти“, нагласи Мизрахи.

Собранието ги констатира оставките на Тупанчевски, Нуредини, Рендевски и Нухиу

Тале Кристо — Mon, 13 Feb 2023 11:16:54 +0000

Собранието на Република Македонија денеска ги констатира оставките на министерот за правда Никола Тупанчевски и на министерот за животна средина Насер Нуредини, како и на замениците министри за здравство Владимир Рендевски и за правда Агим Нухиу. Како што соопшти претседателот на Собранието Талат Џафери, Тупанчевски, Нуредини, Рендевски и Нухиу одлучиле да не ги образложат оставките пред пратениците. -Констатирам дека на Тупанчевски, Нуредини, Рендевски и Нухиу им престануваат функциите, истакна Џафери. Пред почетокот на 103. седница, пратениците им оддадоа почит на настраданите во земјотресите во Турција и Сирија со едноминутно молчење.

Рендевски: Високиот процент на антитела кај граѓаните не значи дека е постигнат колективен имунитет

Ивона Петрова — Tue, 22 Mar 2022 11:37:17 +0000

Податоците од анализата од ковид тестирањето односно скринингот што го спроведе Министерството за здравство покажуваат дека кај испитаниците кои не се вакцинирани степенот на присуство на антитела се движеше од 75 до 76 проценти, додека кај испитаниците кои се вакцинирани нивното присуство на антитела е 85-86 проценти, што укажува дека голем број од тие кои не се вакцинирани против Ковид-19, или прележале или дошле во контакт со вирусот, меѓутоа тоа не значи дека е постигнат колективен имунитет, изјави за МИА заменик-министерот за здравство Владимир Рендевски. Тој посочи дека за тоа дали сме дојдени до колективен имунитет одлучува Комисијата за заразни болести врз база на анализите. Сепак, појасни Рендевски, најрелевантен параметар се анализите на бројот на новозаболени, починати и хоспитализирани и врз основа на тоа се препорачуваат епидемиолошките мерки. – Во поглед на актуелната епидемиолошка состојба и моменталните епидемиолошки мерки се во корелација со одредени варијабли кои се испитуваат во последните шест недели и се предмет на испитување во останатите европски земји. Тоа се бројот на новозаболени, починати и хоспитализирани, односно оптовареноста на здравствениот систем. Врз основа на овие варијабли постои посебен алгоритам кој го одредува епидемиолошкиот ризик односно епидемиолошката состојба во секоја земја. Врз основа на таа актуелна епидемиолошка состојба постојат предлог епидемиолошки мерки. Анализите во државава покажуваат дека во однос на овие три параметри моментално се наоѓаме во зелена фаза и според тоа се имплементираат соодветни епидемиолошки мерки кои се во корелација со зелената фаза. Анализите се следат на дневно и на неделно ниво и во зависност од одредено намалување или зголемување на овие параметри така би се планирале и идните епидемиолошки мерки, истакна Рендевски. Тој потенцира дека вакцинацијата против Ковид-19 е столб за подобрување на имунолошката состојба. – Затоа вчера започна караванот за вакцинација против Ковид-19 и во тој поглед мора да делуваме првенствено на повозрасните пациенти и пациентите со коморбидитети, а понатаму и на останатите пациенти кои се вакцинирани со две дози, а поминал подолг период од три месеци од последното вакцинирање. Практично да се даде и иницијатива за бустер доза кај овие пациенти, изјави за МИА заменик-министерот за здравство Рендевски.

Рендевски: За недела дена би требало да почнат разговорите со работните групи за подобрување на состојбите во примарното здравство

Ивана Ефремовски — Fri, 04 Mar 2022 14:57:05 +0000

Наскоро се очекува да почнат со работа веќе формираните работните групи за подобрување на состојбите во примарното здравство. Ова денеска за МИА го изјави заменик-министерот за здравство Владимир Рендевски, кој рече дека изутрината имале состанок со приватните стоматолози специјалисти и дека уште од нивна страна требало да се доинкорпорираат членови во тимовите за преговорите да одат синхронизирано. -Има позитивна клима и во Министерството за здравство. Исто така вчера имавме средба и со министерот и со премиерот. Навистина сме расположени како Влада овие проблеми на примарната здравствена заштита да ги решиме долгорочно и убеден сум дека во добар правец ќе одат преговорите, истакна Рендевски. Тимовите, појасни тој, се доекипираат од страна на стоматолозите, останатите стручни служби ќе бидат инкорпорирани. -Се надевам за неколку дена до недела дена би требало првите разговори да ги започнеме. Голем дел од барањата навистина се издржани и лесно применливи. Одредени работи кои се во поглед на финансирањето навистина ќе се најде модус како на оние најзагрозени медицински тимови да се помогне некако и финансиски, така што верувам дека навистина ќе има решение и самите колеги ќе се задоволни и квалитетот на здравствена заштита да се подигне, да имаат благодет и самите пациенти, истакна Рендевски. Кога еднаш е отворен Законот за здравствена заштита, посочи тој, сите решенија да одат заедно. Потенцира дека во тимовите се и правници, претставници од Фондот за здравствено осигурување, бидејќи, како што рече, секое одредено решение мора да кореспондира и со Законот за здравствена заштита и со регулативната во Фондот. -Покрај добрата намера што ја имаме, имаме слух за проблемите на колегите. Сепак се тоа подзаконски акти, закони и решенија кои мора да не се косат со правната регулатива. Тимовите ќе почнат да работат. Се слушнав вчера со претседателката на Здружението на приватни лекари, д-р Лилија Чолакова Дервишова. Има таму проблеми кои за жал се останати од 2006 година, некои правилници за одредени партиципации, така што треба многу внимателно и темелно да се пристапи за да работите бидат применливи и одржливи да не бидат месец за месец или краткорочни и да бидат во интерес на колегите и на пациентите, рече Рендевски. Во врска со тоа што матичните лекари денеска ги примаат само итните случаи и не работат со пациенти закажани преку „Мој Термин“, тој рече дека ги разбира наталожените проблеми, меѓутоа со ултиматиуми и со датуми не се постигнува ништо. -Самите проблеми знаат од кога датираат тие проблеми. Ние како Кабинет, како Министерство две до три недели сме само тука и навистина со цела енергија, со искрена намера пристапивме кон решавање, така што очекувам дека работите ќе одат во добар правец и апелирам до колегите дека работите ќе бидат решени, додаде Рендевски и најави дека повторно ќе има средба со претставници на Здружението на приватни лекари, коморите, останатите здруженија, Фондот и правен тим од Министерството. (МИА)

Владимир Рендевски предложен за заменик министер за здравство

Ивона Петрова — Thu, 27 Jan 2022 06:46:55 +0000

Директорот на Клиниката за неврохирургија Владимир Рендевски е предлогот на СДСМ за заменик министер за здравство. Тој е предложен од лидерот Димитар Ковачевски, а предлогот e усвоен на вчерашната седница на Централниот одбор на партијата. Владимир Рендевски е доцент по хирургија и неврохирургија на катедрата на Медицинскиот факултет во Скопје, докажан хирург на Универзитетка клника за неврохиругија кој има објавено над 70 стручни трудови, велат од СДСМ.

Директорот на Неврохирургија се заразил со морбили и лежи на Инфективна

Ивана Ефремовски — Fri, 03 May 2019 17:24:37 +0000

И директорот на Клиниката за неврохирургија, Владимир Рендевски е меѓу заболените од мали сипаници, кои се лекуваат на Клиниката за инфективни болести во Скопје. -Веќе трет ден сум на Клиниката за инфективни болести. Денес сум малку подобар, инаку бев со висока температура и со треска. Минатата недела имаше и други два-тројца вработени кои заболеа и тие не се на работа. Секојдневно сме во контакт со пациенти од различни делови на земјата, доаѓаат и амбулантски ги прегледуваме, затоа и апелот до сите што не се вакцинирани да се вакцинираат, рече Рендевски. Целата вест прочитајте ја на „СДК“.