влатко андоновски – Kurir.mk

Андоновски поднесе оставка од селекторското место на САД

Ивона Петрова — Thu, 17 Aug 2023 08:09:40 +0000

Селекторот на женската фудбалска репрезентација на САД Влатко Андоновски поднесе оставка, јави Асошиетед прес повикувајќи се на лице запознаено со одлуката. Македонецот реши да ја напушти функцијата поради раната елиминација на Светското првенство кое е во тек. Американките кои ја бранеа титулата, на Мундијалот во Австралија и Нов Зеланд беа елиминирани во осминафиналето, порано од кога било досега. Четирикратните шампиони на турнирот не беа во препознатливата форма. Во групата го победија Виетнам и ремизираа со Холандија и Португалија, по што едвај се пласираа во нокаут фазата. Претходно САД на Мундијалите никогаш не завршиле полошо од трето место на Светското првенство. Четириесет и шестгодишниот Андоновски беше именуван за селектор на Соединетите Американски Држави во октомври 2019 година. Под негово водство Американките забележаа 51 победа, пет нерешени и девет загубени натпревари.

Македонецот, кој е селектор на САД, направи потег што го воодушеви светот

Ристе Здравков — Thu, 30 Jun 2022 10:39:18 +0000

Македонскиот стратег Влатко Андоновски, селекторот на женската фудбалска селекција на САД, направи потег што ќе остане во историјата на американскиот женски фудбал. Тој дозволи настап на фудбалерка со физички недостаток. Тој на мечот против Колумбија и даде шанса за настап и тоа како стартер на Карсон Пикет, фудбалерката која има вроден физички недостаток, родена е без дел од левата рака. Репрезентацијата на САД победи со 2:0, а Андоновски доби огромни пофалби за оваа постапка.

Last night, reigning #FIFAWWC champions @USWNT continued their 2023 qualifier preparations with a victory over Colombia.

The match was significant beyond the score. @Cars_Pickett16 became the first-ever player with a limb difference to earn a #USWNT cap. pic.twitter.com/zJ1kGVkyaL
— FIFA.com (@FIFAcom) June 29, 2022

Девојките на ЖФК Кул на средба со селекторот на светските прваци во женски фудбал, Македонецот Влатко Андоновски

Магдалена Андонова — Thu, 10 Sep 2020 17:13:16 +0000

Младите фудбалерки од фудбалската школа ФК Кул од Скопје имаа несекојдневна можност да поразговараат и да добијат совет од селекторот на Светскиот шампион во женска конкуренција, Македонецот Влатко Андоновски. За време на дружењето во Градскиот парк во Скопје, Андоновски се запозна со талентираните девојки и им ги презентираше искуствата од досегашната работа со селекцијата на САД. Во оваа пригода, Андоновски на девојчињата им подели совети за тоа како се развиваат и напредуваат фудбалерките во САД, кои долги години доминираат во светот на женскиот фудбал. Таквите совети ќе бидат голем поттик за девојките од ФК Кул кои, пак, во иднина посакуваат да бидат дел од репрезентацијата на Македонија, нешто за што селекторот им посака успех во понатамошната спортска кариера. Од Работнички и Вардар до шампион во САД Влатко Андоновски е поранешен дефанзивен фудбалер на Работнички, Македонија ЃП и Вардар, по што се сели во САД, каде што настапува во неколку клубови во мал фудбал. Во 2010 година преминува во тренерските води. Прво како асистент и тренер во мал фудбал, а од 2013 година преминува во женскиот фудбал. По шест години работа во ФК Канзас сити и ФК Рејн, Андоновски се докажува во струката и во 2019 година добива шанса да го преземе кормилото на актуелниот женски светски шампион, репрезентацијата на САД. Со Американките, Андонвски годинава стана шампион на „Ши Биливс“ (SheBelieves) Купот на кој учествуваа и селекциите на Шпанија, Англија и Јапонија. Посветени на младоста и развојот Фудбалскиот клуб Кул постои 12 години, основан е на 28 Септември 2007 година. Во својата работа е посветен на младите категории на деца. Од основањето на клубот до денес бројот на членови постојано се зголемува, а во моментов во него има околу 350 момчиња и девојчиња, има 12 тренери, 1 медицинско лице и 2 технички лица.

ФФМ му честиташе на Андоновски: Убаво е кога добри работи им се случуваат на луѓе кои се чесни кон својата работа

Ивона Петрова — Fri, 25 Oct 2019 11:11:42 +0000

Фудбалската федерација на Македонија му честиташе на Влатко Андоновски кој е именуван за нов селектор на американската женска фудбалска репрезентација која е актуелен светски првак. -Баш е убаво кога добри работи им се случуваат на луѓе кои се чесни кон својата работа, кои не калкулираат и знаат што сакаат во животот! Нашиот Влатко АНДОНОВСКИ стана селектор на светскиот првак - женската репрезентација на САД. Влатко е голем господин, честитки!, стои во објавата на ФФМ.

Влатко Андоновски нов селектор на светските шампионки во фудбал

Ивона Петрова — Fri, 25 Oct 2019 09:04:54 +0000

Актуелните светски фудбалски шампионки добија нов селектор. Македонскиот фудбалски стратег Влатко Андоновски ќе ја предводи селекцијата на САД во женски фудбал. Андоновски има работено како прв тренер во два врвни клубови во американската лига, Канзас Сити од 2013 до 2017 (освои две титули во 2013 и во 2014 година) и Сиетл од 2018 до 2019 година. Во овој период тој соработуваше со бројни ѕвезди од американскиот национален тим, а главната препорака ја имаше од капитенот на САД, Меган Рапиноу, чиј тренер беше во екипата на Сиетл.

Sports Illustrated: Vlatko Andonovski is set to be presented as the new USWNT coach on Monday in New York City. Story: https://t.co/vvFoBRX84X
— Grant Wahl (@GrantWahl) October 24, 2019