влезници – Kurir.mk

Сите ѕвезди на едно место: Почнува продажбата на билети за ракометниот спектакл на 3. јануари!

Ристе Здравков — Mon, 19 Dec 2022 14:36:55 +0000

Од денеска започнува продажбата на билети за ракометниот спектакл во кој на едно место ќе ги видиме нашите најголеми имиња. Имено на 3 јануари во спортскиот центар „Борис Трајковски“ ќе се одигра мечот меѓу ракометните ветерани и актуелните репрезентативци, меч кој ќе има хуманитарен карактер. На истиот ќе се појават многу наши легенди, асови кои оставија трага во ракометот во изминативе години, децении. Билети се во ограничен број и можат да се набават преку мрежата на МК Тикетс по цена од 250 и 300 денари. Приходите од продажбата на билетите, ќе бидат донирани на „СОС Детско село“ од Скопје. Покрај квалитетен ракомет, за време на настанот се предвидува и квалитетна забавна програма модерирана од Сашко Коцев, во која учество потврдија македонските уметници: Дац и Александар, Кики, Некст тајм и Меморија. Билетите може да се набават онлајн на овој линк, како и на продажните места на МК Тикетс на листата подолу: СКОПЈЕ – ЛИТЕРАТУРА: Рамстор Мол Ист Гејт Мол Скопје Сити Мол ТЦ Буњаковец Веро Џамбо ГТЦ Приземје Улица Македонија БИТОЛА: TOBACCO BROTHERS – Широк Сокак ЛИТЕРАТУРА 2 – Широк Сокак 40 ГОСТИВАР: TOBACCO BNB – Ул. ЈНА бр.1 ВОЈНА ПЕТ – Ул. Живко Брајковски 15 ТЕТОВО: ГРАНД ТОБАКО – Ул. 29 Ноември бр.107, локал бр.2 ТОБАКО МОНАКО – Ул. Илинденска 176 СТРУМИЦА: ТА САФАРИ – Ул. Благој Јанков Мучето бр.2 ЛИТЕРАТУРА – Ул. Благој Јанков Мучето бр.4 ОХРИД: ТА ВИС ПОЈ – Бул. Македонски Просветители бр.1 ВЕЛЕС: УНИСОН – Ул. Благој Ѓорев бр.9 РАДОВИШ: HALKIDIKI TRAVEL – Ул. Партизанска бр.43 ПРИЛЕП: Т.А. БРАН – Ул. Пере Тошев 75 КУМАНОВО: Кафе Бар АГОРА – Т.Ц. Гарнизон МАКЕДОНСКА КАМЕНИЦА: CLIFF OF MOHER – PUB Маршал Тито

Дополнителни 13.000 влезници за мароканските навивачи за полуфиналето

Дарко Андоновски — Wed, 14 Dec 2022 10:58:18 +0000

Фудбалската федерација на Мароко одлучи за вечерашното полуфинале против Франција бесплатно да им додели на своите навивачи дополнителни 13.000 влезници, кои организаторите на Светското првенство во Катар ги наменија за таа африканска репрезентација. Натпреварот е на програмата вечерва од 20 часот стадионот „Ал Бајт“, оддалечен 35 километри од центарот на Доха. Стадионот е со капацитет од 68.895 седишта, а се очекува мароканските фудбалери да имаат поддршка од околу 45.000 навивачи. Фудбалската федерација на Мароко најави дека во Катар од Казабланка денеска ќе слетаат 30 џамбо џети, а навивачите ќе можат да ги подигнат влезниците во мароканскиот конзулат во Доха.

Влезниците за Ф1 во Лас Вегас од 500 до 10.000 долари

Тале Кристо — Tue, 08 Nov 2022 10:37:41 +0000

Најевтиниот билет за Големата награда на Лас Вегас, која во рамки на Формула 1 ќе се вози на 18 ноември идната година, ќе чини 500 долари, а најскапиот 10.000 долари, соопштија организаторите на трката. Во соопштението се прецизира дека на навивачите кои ќе купат влезници по цена од 500 долари ќе им биде овозможена храна и безалкохолни пијалаци во неограничени количини, но ќе мораат да стојат покрај патеката. За место на трибините ќе биде потребно да се издвојат 2.000 долари за тридневната програма. Лас Вегас последен пат беше домаќин на трка во Ф1 пред повеќе од 40 години. Трката ќе се вози на прочуената патека „Стрип“ која минува покрај познатите градски хотели и казина, а е во должина од 6.12 километри со 14 свиоци.

Венеција воведува влезници за еднодневните посетители, еве колку ќе чинат

Ивона Петрова — Sat, 02 Jul 2022 09:49:03 +0000

Поради регулирање на огромниот број туристи, посетителите од следната година ќе мора да купат билет за влез во Венеција. Одредбата ќе се применува од 16 јануари, а беше усвоена со цел да се контролира бројот на посетители, особено во текот на сезоната, изјави туристичката аналитичарка Симоне Вентурини. Локалното население долго време го критикува градот поради масовниот туризам, кој создава огромен метеж околу најпопуларните венецијански знаменитости и го отежнува движењето низ тесните улички на градот. Пред пандемијата, не беше невообичаено над 100.000 посетители дневно да го посетуваат градот. Градските власти сега сакаат да ги регулираат еднодневните патници и посетителите со крузери кои, во најголем дел, не придонесуваат многу за локалната економија. Жителите на провинцијата Венето, луѓето родени во Венеција и секој кој резервирал сместување во градот нема да треба да купуваат билет. Цената на билетите ќе варира до максимум 10 евра по лице, а оние кои ќе резервираат порано ќе плаќаат пониска цена. Посетителите пред да пристигнат ќе треба да резервираат билети преку Интернет, додека оние кои ќе влезат во градот без билет ќе платат казна од 50 до 100 евра.

Повеќе од 23 милиони барања за влезници за Мундијалот во Катар

Ивона Петрова — Sat, 30 Apr 2022 16:32:54 +0000

Во последниот круг продажба на влезници за Светското фудбалско првенство во Катар, ФИФА прими дури 23.5 милиони барања за билети, што е десет пати повеќе од бројката со која се располага. Најмногу барања за влезници пристигнале од Аргентина, Бразил, Англија, Франција, Мексико, Катар, Саудиска Арабија и САД. Најбарана е влезницата за финале на 18 декември, а најголема побарувачка за групната фаза има за натпреварите Аргентина – Мексико, Аргентина – Саудиска Арабија, Англија – САД и Полска – Аргентина. Влезниците за Мундијалот во Катар се во просек за 30 отсто поскапи во споредба со Мундијалот во Русија 2018. Најскапиот билет за финалето чини 1.600 долари што е за 45 отсто повеќе отколку пред четири години.

Почна продажбата на влезници за машкото ракометно ЕП

Бошко Тасиќ — Wed, 01 Sep 2021 19:04:07 +0000

Од денеска стартуваше продажбата на влезници за натпреварите на машкото Европско првенство кои ќе се играат во Унгарија, додека во текот на следната седмица ќе биде отворена можноста за купување на влезници и за натпреварите во Братислава. Има две можности за купување на влезници, а тоа е поединечно или во пакет. Поединечно значи за секој натпревар може да се купи различен билет, додека во пакет одат сите три дена од првата фаза, а натпреварите се играат на 13, 15 и 17 јануари. Доколку влезницата се купува поединечно по натпревар тогаш најевтината чини околу 14 евра, додека најскапата која носи и најубаво место е 34 евра. Има опции и за 20 и 25,5 евра. Можноста за три влезеници во пакет за трите дена носи и поевтина цена кога ќе се соберат поединечно трите дена. Доколку купите пакет тогаш најевтиниот е 38 евра. Потоа има опција за 53,5 и 69 евра, додека најскапата варијанта е 92 евра. Македонија отвора на 13 јануари против репрезентацијата на Словенија од 18 часот. Два дена подоцна противник е Црна Гора исто така од 18 часот, додека на 17 јануари е последниот дуел против Данска. Тој се игра со почеток во 20:30 часот.

УЕФА ги активираше мобилните апликации на влезниците за ЕП

Магдалена Андонова — Thu, 03 Jun 2021 08:13:13 +0000

Европската фудбалска асоцијација (УЕФА) објави информација до сите кои добиле код за купување на билети за Европското првенство дека веќе се активни мобилните апликации за влезниците на натпреварите. Билетите можат да се преземат преку App Store и Google Play. Европското првенство почнува на 11 јуни и на него за прв пат ќе учествува македонската фудбалска репрезентација. „Црвено-жолтите“ во Букурешт ќе играат со Австрија (13 јуни) и Украина (17), дека во Амстердам ќе се соочат со Холандија (21 јуни). (МИА)

Барселона му донесе на Интер рекордни 5,8 милиони евра од продажба на влезници

Ивона Петрова — Tue, 06 Nov 2018 13:17:40 +0000

Во пресрет на вечерашниот дуел од Лигата на шампионите против Барселона, калчолигашот Интер заработи 5,8 милиони евра од продадени влезници што е нов рекорд во италијанскиот фудбал. Според последните информации кои доаѓаат од Милано, Интер продал 73,5 илјади билети. Претходниот рекорд по заработка од продадени билети беше поставен на натпреварот Рома – Ливерпул минатата сезона во елитното натпреварување. Кога станува збор за досегашната најголема заработка на Интер, таа изнесуваше 5,2 милиони евра од продадени билети за дербито од домашниот шампионат против Јувентус минатата сезона. Натпреварот Интер – Барселона се игра вечер во Милано со почеток во 21 часот. МИА