Влодомир Зеленски – Kurir.mk

Зеленски: Украина со сигурност ќе одговори за руските напади врз Одеса

Дарко Андоновски — Sun, 23 Jul 2023 08:47:53 +0000

Украинскиот претседател, Володимир Зеленски, денеска изјави дека Украина сигурно ќе им одговори на руските терористи за нападите што ги извршија врз Одеса, пренесе Укринформ. Зеленски ова го кажа на својот канал на Телеграм, каде што објави и фотографии на кои се прикажани последиците од последниот масовен ракетен напад врз градот. „Ракети против мирни градови, против станбени згради, против катедрала... Не може да има оправдување за руското зло. Како и секогаш, ова зло ќе изгуби. И сигурно ќе има одмазда за руските терористи за Одеса. Тие ќе ја почувствуваат оваа одмазда“, напиша Зеленски. Тој појасни дека им се дава помош на сите погодени од овој терористички напад, еден од многуте во последните денови. Зеленски изрази благодарност и до сите кои им пружаат помош на жителите на Одеса, како и до сите кои се со Одеса во своите мисли и молитви. „Ќе се справиме со ова. Ќе го вратиме мирот. А за тоа мора да го победиме руското зло“, напиша украинскиот претседател. За време на последниот ракетен напад, во текот на ноќта, руските сили го погодија регионот Одеса со најмалку пет типа ракети - „Калибар“, „Оникс“, Х-22, „Искандер-К“ и „Искандер-М“, потсетува Укринформ. Според првичните податоци, за кои потврди гувернерот на областа, Олех Кипер, во ночешните напади загинало едно лице, а 22 се повредени.

Зеленски ги предупреди граѓаните кои се враќаат во Херсон на мини

Дарко Андоновски — Thu, 17 Nov 2022 08:35:42 +0000

Украинскиот претседател Володимир Зеленски издаде предупредување до лицата кои се враќаат назад во ослободениот Херсон и други ослободени региони, да не влегуваат во подрачјата пред да бидат проверени од деминери. – Уште еднаш ќе повторам за сите на деокупирано подрачје: Бидете многу внимателни! Русија сака да убива и откако побегна од нашата земја. Затоа мора да бидете многу внимателни, нагласи Зеленски. Тој ги повика граѓаните да пријават сè што ќе им биде сомнително. – Доколку зградата сè уште не е прегледана од деминери, немојте да влегувате во неа. Доколку патот сè уште не е проверен, ве молиме да го заобиколите, додаде претседателот на Украина.

Зеленски: Украина „се уште е подготвена“ за разговори со Русија

Дарко Андоновски — Sat, 09 Apr 2022 13:19:26 +0000

Украина е „се уште подготвена“ да ги продолжи преговорите со Москва, кои се во застој по откривањето на злосторствата во Буча и другите области во близина на Киев, изјави денеска украинскиот претседател Володимир Зеленски. „Подготвени сме да се бориме и да гледаме паралелно да ја завршиме оваа војна преку дипломатија“, рече Зеленски на прес-конференцијата со австрискиот канцелар Карл Нехамер, кој ги посети главниот град и Буча.

Пропадна нов обид за атентат врз Зеленски

Дарко Андоновски — Mon, 28 Mar 2022 11:57:18 +0000

Украинскиот весник „Киев пост“ објави дека пропаднал новиот обид за атентат на претседателот на Украина, Володимир Зеленски. Весникот пишува дека недалеку од границата со Словачка и Унгарија е уапсена воена група од 25 лица предводена од руски специјални служби. „Киев пост“ тврди дека целта на групата била да го ликвидира Зеленски. Украинците веќе во неколку наврати тврдеа дека имало обид за атентат врз Володимир Зеленски.

Зеленски ја повика Шведска да помогне во обнова на Украина

Дарко Андоновски — Thu, 24 Mar 2022 13:44:13 +0000

Украинскиот претседател Володомир Зеленски денеска ја повика Шведска да помогне во обнова на Украина, еден месец откако ја нападна Русија. „Сега е веќе цел месец. Не сме виделе вакви разурнувања од Втората светска војна. Видете што и направи руската војска на нашата земја“, изјави Зеленски пред пратениците во шведскиот парламент преку видео врска. Зеленски, рече дека едномесечното руско бомбардирање на Украина е слично со тоа што светот го виде во Сирија. Додаде дека десет милиони жители на Украина се раселени и ги повика „шведските компании и државата да дојдат и помогнат во обнова“ на земјата. Во своето обраќање пред шведските парламентарци, Зеленски, предупреди на можноста Русија да употреби нуклеарно и хемиско оружје.

Зеленски се обрати пред израелскиот Парламент: Можете да им помогнете на Украинците

Дарко Андоновски — Sun, 20 Mar 2022 17:36:09 +0000

Украинскиот претседател Володимир Зеленски денеска се обрати преку видеоконференциска врска пред израелскиот Парламент, објави Би Би Си. Тој веќе разговараше и со други пратеници низ светот, вклучително во Велика Британија и САД, барајќи поддршка. Зеленски повлече паралели меѓу руската инвазија врз Украина и Втората светска војна. Тој истакна дека инвазијата „не е воена операција“. – Тоа е војна од целосен обем чија цел е уништување на нашиот народ, уништување на нашите деца, семејства, државност, градови, култури и се што ги прави Украинци. Затоа имам право да ја повлечам оваа паралела во историјата. Нашите војни за опстанок и Втората светска војна, нагласи Зеленски во своето видео обраќање. Зеленски им кажа на израелските пратеници дека нацистичката партија, позната како НСДАП, била основана во Германија пред 102 години на 24 февруари, истиот датум кога оваа година Русија ја нападна Украина. – Тие повторно ги кажуваат овие зборови – „конечното решение“ – во однос на нас, украинската нација… беше кажано на состанокот во Москва, рече Зеленски, кој е Евреин, а некои од неговите роднини загинаа во Холокаустот. Тој го повика Израел да му помогне на отпорот на украинскиот народ против руската војска. Зеленски го повика Израел да и даде оружје на Украина и праша зошто не воведе санкции кон Русија. Според него, Израел ја има најдобрата воздушна одбрана во светот и вели „дефинитивно можете да му помогнете на нашиот народ, да ги спасите животите на Украинците“. Украинскиот претседател, исто така, ја цитираше починатата израелска премиерка Голда Меир, во неговото видео обраќање, со зборовите „ние сакаме да живееме, но нашите соседи сакаат да не видат мртви“. „Остануваме, подготвени сме за компромис“, додаде тој. Тој правеше директна паралела помеѓу сегашната Украина и историјата на Израел, соочени со арапското непријателство.

Ердоган му понуди на Путин да организира средба со Зеленски

Тале Кристо — Thu, 17 Mar 2022 15:25:49 +0000

Турскиот претседател, Реџеп Тајип Ердоган повторно му понуди на рускиот претседател Владимир Путин да организира средба меѓу него и украинскиот лидер Володимир Зеленски во Анкара или Истанбул, соопшти кабинетот на Ердоган по неговиот денешен телефонски разговор со рускиот претседател. Претседателот на Турција истакна дека може да биде неопходна средба на ниво на национални лидери за да се постигне консензус и ја повтори својата понуда да биде домаќин на претседателите на Русија и на Украина во Истанбул или Анкара, соопшти кабинетот на Ердоган. Во соопштението се наведува дека Ердоган му рекол на Путин оти за договор околу одредени прашања може да биде потребна средба на лидерите. Ердоган истакна дека трајниот прекин на огнот може да доведе до долгорочно решение, се додава во соопштението.

Зеленски: Ги продолжуваме преговорите со Русија, чекам средба со Путин

Дарко Андоновски — Mon, 14 Mar 2022 10:02:19 +0000

Украинскиот претседател Володимир Зеленски за време на синоќешното обраќање до нацијата истакна дека неговата делегација има „јасна задача“ да направи се што може за да обезбеди средба меѓу двајцата претседатели. – Тие мора да сфатат дека ова е комплицирана приказна, како и тежок, но исклучително неопходен пат, изјави Зеленски. Преговорите меѓу Русија и Украина продолжуваат денеска, а ќе се одвиваат во форма на видео конференција, потврди портапоролот на Кремљ, Дмитриј Песков, кој воедно е и член на рускиот преговарачки тим. Михаил Подољак, еден од украинските преговарачи и советник на украинскиот претседател еленски, ја потврди изјавата на Кремљ, јави Би-Би-Си. – Четвртата рунда преговори меѓу Украина и Русија, која се одржува денеска, ќе се фокусира на постигнување договор за прекин на огнот, повлекување на војниците и безбедносни гаранции за Украина, истакна Подољак. Тој напиша на социјалните мрежи дека „позицијата на Украина останува непроменета во инсистирањето за прекин на огнот пред да се одржат евентуални разговори за натамошните односи“.

Џонсон разговарал со Зеленски: Го пофалил украинскиот претседател и украинскиот народ за нивната храброст

Магдалена Андонова — Sun, 13 Mar 2022 19:48:59 +0000

Британскиот премиер Борис Џонсон попладнево разговараше со украинскиот претседател Влодомир Зеленски. - Џонсон ги пофали претседателот Зеленски и украинскиот народ за нивната храброст, рече портпаролот на Џонсон. Премиерот потоа додаде дека варварските постапки на Путин не се тест само за Украина, туку и за целото човештво. – Во телефонски разговор лидерите ги осудија убиствата на Брент Рејно и голем број невини жртви, како и киднапирањето на градоначалниците на Днепрорудна и Мелитопол – пишува во соопштението. Џонсон му рекол на Зеленски дека Велика Британија продолжува да дава голема поддршка на Украина. Тој рече дека Британија ќе продолжи да бара повеќе опции за зајакнување на самоодбраната на Украина, работејќи со своите партнери. – Премиерот рече дека Обединетото Кралство ќе продолжи да стои зад Украина во сите нејзини напори конечно да стави крај на овој катастрофален конфликт – изјави портпаролот на Џонсон.