воен буџет – Kurir.mk

Јапонија одобри двојно зголемување на воениот буџет до 2027 година

Ивона Петрова — Fri, 16 Dec 2022 11:08:58 +0000

Јапонската влада денеска одобри радикална ревизија на одбранбената доктрина, која предвидува двојно зголемување на воениот буџет од околу еден на два отсто од БДП до 2027 година. Тоа е најголемата ревизија на одбранбената политика на Јапонија во последните неколку децении, која предвидува и обединување на нејзината воена команда и зголемување на досегот на нејзините ракети. Мерките се преземени во обид Јапонија да се спротивстави на воената моќ на Кина, за која Токио вели дека е „стратешки предизвик без преседан“ за нејзината безбедност. Иако јавното мислење во Јапонија ги поддржува промените, тоа е голем пресврт за земјата чиј пацифистички Устав, усвоен ден по поразот на крајот на Втората светска војна, во принцип ѝ забранува на земјата да има вистинска армија. Меѓутоа, за креаторите на доктрината во Токио овој преглед повеќе ја претставува последната фаза во бавната и постепена нормализација на позицијата на Јапонија за прашањето на одбраната и националната безбедност, оцени Џејмс Брејди, потпретседател на Институтот Тенео.

Членките на НАТО ги зголемуваат воените буџети

Ивона Петрова — Thu, 15 Mar 2018 17:39:39 +0000

Државите членки на НАТО веќе трета година по ред зголемуваат издвојувања за одбрана, но и понатаму, кај голем дел од нив тоа е под зацртаната цел од два отсто БДП, покажува годишната анализа објавена од Алијансата. Според извештајот, лани Велика Британија. Полска, Грција и Естонија ја исполниле или надминале целта од два отсто БДП, наменети за одбрана. Оваа година според најавите, се очекува во тој клуб да влезат Летонија, Литванија и Романија. Кога се гледа по глава на жител, Хрватска за одбрана во 2016 година издвојувала 178 долари, а во 2017 – 190 долари. Помалку од неа издвојуваат Албанија, 54 долари, Црна Гора 123 долари, Бугарија 128 долари и Унгарија 165 долари. Најмногу издвојуваат САД – 1.896 долари, потоа Норвешка 1.481 долар, Велика Британија 896 долари, Франција 760 долари. Вкупно, Европските членки на НАТО и Канада за одбрана во 2017 година издвојувале 1,45 отсто БДП, а САД 3,57 отсто.

Кина го зголеми воениот буџет на 173 милијарди долари

Ивона Петрова — Mon, 05 Mar 2018 07:17:33 +0000

Кинеското Министерство за финансии денеска соопшти дека оваа година воениот буџет е зголемен за шест проценти и изнесува 173 милијарди долари. Овогодишниот буџет е поголем во однос на минатогодишниот за околу 10 милијарди долари, со што воениот буџет на Кина стана втор по големина буџет во светот, веднаш по воениот буџет на САД. Заменик - министерот за надворешни работи на Кина Џанг Јесуи изјави дека „умерениот“ пораст на потрошувачката за обрана на Кина во последните неколку години има за цел да ги надомести пропустите од минатото, а кинеската армија нема да се заканува никому

Франција го зголемува воениот буџет

Ивона Петрова — Thu, 08 Feb 2018 10:42:28 +0000

Француската Влада планира да го зголеми воениот буџет во периодот 2019 – 2025, кој збирно ќе изнесува 295 милијарди евра. Нацрт-законот за воен буџет, што е претставен денеска на седница на Владата, предвидува сума од 295 милијарди евра за општи одбранбени трошоци во тој период. Воениот буџет од 34 милијарди евра во 2018 година, до 2022 годишно ќе биде зголемуван за 1,7 милијарди евра. Од 2023 година до 2025 година зголемувањето ќе изнесува по три милијарди евра. Тие пари се наменети за модернизација на оружје, подобрување на одбраната од кибер криминал и за разузнавањето. Претсеателот Емануел Макрон ветува дека ќе се зголемат воените издвојувања за два отсто БДП до 2025 година, согласно барањата на НАТО од сите членки.