воено присуство – Kurir.mk

Франција ќе го зголеми своето воено присуство на источното крило на НАТО со тенкови и оклопни возила

Тале Кристо — Tue, 11 Oct 2022 19:12:59 +0000

Франција планира да го зајакне своето воено присуство на источното крило на НАТО со оклопни возила и тенкови во Романија во ноември и пешадиска чета во Естонија следната година, јавија француските медиуми. -Одлуката на претседателот Емануел Макрон за зајакнување на одбранбеното присуство во Источна Европа ја зеде предвид ситуацијата на источното крило на НАТО и жестоките борби во Украина, изјави министерот Себастиен Лекорну пред комисијата за одбрана во францускиот Сенат. Франција е земја учесничка во мисијата на НАТО во Романија, која вклучува 350 француски војници, како и воен персонал од Белгија и Холандија. Воени извори велат дека Париз се подготвува да го удвои своето сегашно присуство во земјата во ноември со десетина оклопни возила и исто толку тенкови Леклер. -Ќе продолжиме да го зајакнуваме нашето одбранбено присуство во Литванија, посочи Лекорну, прецизирајќи дека тоа ќе се постигне со испраќање борбени авиони Рафал, кои ќе обезбедуваат воздушно надгледување. Тој додаде дека пешадиска чета опремена со воени возила Грифон ќе пристигне во Естонија во 2023 година, што ќе го зголеми француското присуство во земјата за дополнителни стотина луѓе. Досега во балтичката држава во рамките на партнерството на НАТО се стационирани триста француски воени лица.

Бајден и Меркел бараат од Русија да го намали военото присуство на украинската граница

Тале Кристо — Thu, 15 Apr 2021 06:17:54 +0000

Американскиот претседател Џо Бајден и германската канцеларка Ангела Меркел во вчерашниот телефонски разговор се согласија да побараат од Русија да ги намали воените трупи на украинската граница, каде се зголемени тензиите. Двајцата лидери се согласија да се побара од Русија да ги намали „своите неодамнешни воени зајакнувања“ на источната граница на Украина, со цел да се овозможи „деескалирање“ на ситуацијата, истакна во соопштение портпарол на германската канцеларка. Претходно, германската министерка за одбрана Анегрет Крамп-Каренбауер ја обвини Русија за „провокација“ околу украинското прашање, додавајќи дека внимателно ја следат ситуацијата. Москва распореди десетици илјади војници на границата со Украина, која има желба да се приклучи кон НАТО. Министрите за одбрана на 30 земји од НАТО вчера на видеоконференциска врска со американскиот државен секретар Ентони Блинкен, кој допатува во седиштето на Алијансата во Брисел, разговараа за тензиите меѓу Русија и Украина.

САД го намалува военото присуство во Авганистан

Тале Кристо — Thu, 08 Oct 2020 06:53:42 +0000

САД на почетокот на идната година ќе го намали военото присуство во Авганистан на 2.500 војници, изјави советникот на американскиот претседателза национална безбедност Роберт О’Брајен. Според договорот од 29 февруари помеѓу САД и талибанците,американските војици треба да заминат од Авганистан до мај 2021 година,а талибанците треба да ги запрат терористичките напади, а потоа да се договорат со Владата во Кабул за поделба на власта. Американскиот претседател Доналд Трамп на почетокот од годината најави дека до ноември ќе бидат повлечени од 4.000 до 5.000 војници. – Кога претседателот Трамп стапи на должност во Авганистан имавме околу 10.000 војници. Сега се околу 5.000, а на почетокот на идната година ќе бидат 2.500, посочи О’Брајен. Војната во Авганистан е најдолга што САД ја воделе во странство, во која загинаа околу 2.400 американски војници, а илјадници се повредени.

САД го разгледуваат барањето за постојано воено присуство во Полска

Ивона Петрова — Tue, 18 Sep 2018 18:41:47 +0000

Американскиот претседател Доналд Трамп денеска соопштио дека САД го разгледуваат барањето за постојано воено присуство во Полска, како и програмата за визна либерализација за земјата. - Полска е подготвена да даде многу голем придонес за Соединетите Американски Држави да дојдат и воспостават присуство во Полска, и тоа е секако нешто за што ќе разговараме, изјави Трамп пред средбата во Белата куќа со полскиот претседател Анджеј Дуда. Трамп наведе дека „знае оти на Посла таа идеја многу и се допаѓа“, и додаде дека САД тоа многу сериозно го разгледуваат. Американскиот претседател Доналд Трамп заедно со сопругата Меланија денеска во Белата куќа му беше домаќин на претседателот на Полска Анджеј Дуда и неговата сопруга, по што следуваше средба меѓу двајцата лидери. Белата куќа во соопштение инфомира дека трговијата, воените и безбедносни прашања биле главните теми за кои разговарале американскиот и полскиот претседател. Двете држави, кои се и НАТО сојузници, ја делат и загриженоста за безбедноста предизвикана од зголемената воена активност на Русија, поради што Полска бара зголемено присуство на американски трупи на своја територија. МИА