Воислав Шешељ – Kurir.mk

Твитер го блокираше профилот на Шешељ поради говор на омраза

Ивана Ефремовски — Tue, 11 Feb 2020 08:07:58 +0000

Социјалната мрежа Твитер го суспендираше профилот на лидерот на српските радикали, Воислав Шешељ поради, како што велат, кршење на правилата на Твитер.

Шешељ во последните неколку дена на таа социјална мрежа за неистомислениците и политичките противнци пишуваше коментари кои, според реакциите на други корисници, имале елементи на говор на омраза.

Опонентите на Шешељ пак, го поздравија суспендирањето и се заблагодарија на сите оние кои во последните 24 часа го пријавувале неговиот профил.

Српскиот министер Лајиќ си поднесе пријава против себе

Ивона Петрова — Tue, 15 Jan 2019 07:47:08 +0000

Српскиот министер за трговија Расим Љајиќ поднесе пријава против себе до Јавното обвинителство за организиран криминал во Белград, откако лидерот на опозициската Српска радикална партија (СРС), Воислав Шешељ го обвини дека е „шеф на нарко картел“. Љајиќ во изјава за белградскиот весник „Блиц“ нагласи дека решил самиот да си поднесе пријава против себе, бидејќи „му е доста да трпи клевети на негова сметка“. Според „Блиц“, бидејќи никој од надлежните органи не реагирал на обвинувањата на Шешељ, а ниту самиот лидер на радиклаите не поднел никаква пријава, Љајиќ отишол во Обвинителството за организиран криминал и побрал да бидат истражени сите обвинувања против него. Шешељ во обраќање во срспкото Собрание го обвини Љајиќ дека е „шеф на еден од најголемите нарко картели“ и дека полицијата има оперативни сознанија против него во врска со ваквите активности. Обвинувањата против српскиот министер за трговија, Шешељ ги повтори во неколку наврати, а ги наведува и во неговата книга „Новопазарскиот крал на херонот Расим Љајиќ“. МИА

Што му одговори Колинда на Шешељ?

Катерина Бојаџиева — Thu, 19 Apr 2018 15:16:15 +0000

Газењето на хрватското знаме е израз на немоќ на предводникот на поразената злосторничка политика, што му донесе многу зло на хрватскиот народ, вклучувајќи ги и Хрватите во Војводина. Нему, и таквите како него, најголема казна им е постоењето на независна Хрватска и целосниот неуспех на проектот „Голема Србија’“, се вели во соопштението на кабинетот на претседателката, Колинда Грабар Китаровиќ. Грабар Китаровиќ ја поздрави реакцијата на највисоките функционери во Србија и изрази надеж дека настанот нема да го расипе напредокот во односите помеѓу Србија и Хрватска, постигнат во последните неколку месеци. Српската радикална партија претходно соопшти дека Воислав Шешељ во Собранието на Србија ја пцуел хрватската делегација и газел по нивното знаме. Во соопштението се наведува дека Шешељ околу 12 часот влегол во зградата на Собранието на Србија, а со него бил и пратеникот Филип Стојановиќ. „Кога на влезот во Собранието, го здогледал хрватското знаме, се затрчал, го фрлил на подот и се обидел да го искине, а потоа тој и Филип Стојановиќ го газеле знамето. Пет членови на обезбедувањето не биле во можност да им го одземат националниот симбол на Хрватите“- стои во соопштението. Двајцата потоа влегле во предворјето, каде била делегацијата на Хрватска, при што Шешељ им упатил низа пцовки на присутните. Шешељ е осуден од страна на Хашкиот трибунал на 10 години затвор, за злосторства против човештвото, извршени над Хрвати во селото Хртковци. По инцидентот имаше осуда во двете земји.

Реакции во Србија и Хрватска на инцидентот на Шешељ: Од осуда, до релативизација

Катерина Бојаџиева — Thu, 19 Apr 2018 13:36:01 +0000

Српскиот државен врв остро го осуди вчерашниот инцидент што го предизвика лидерот на Српската радикална партија (СРС), Воислав Шешељ во Собранието на Србија, газејќи го знамето на Хрватска и пцуејќи ја и навредувајќи ја хрватаската парламентарна делегација. Српскиот претседател Александар Вучиќ порача дека таквото однесување е „нешто недопустливо“ и дека тоа е „лоша порака што се праќа до народ“. Тој меѓутоа забележа, дека „Србите и во тоа се разликуваат од Хрватите“, нагласувајќи дека пред и по неговата посета на Хрватска „и во Загреб беа запалени неколку српски знамиња“ - Хрватски пратеник ме бркаше по улици и ме нарекуваа четник, по што јас сепак не ја прекинав посетата, нагласи Вучиќ. На оваа изјава реагираше хрватскиот премиер Андреј Пленковиќ, кој нагласи дека очекува Србија строго и недвосмислено да го осуди вчерашниот инцидент со Шешељ и дека продолжувањето на односите со Србија ќе биде „во контекст на таа осуда“. Претседателот на Хрватскиот сабор, Гордан Јандроковиќ пак изјави дека официјален Белград го „релативизирал инцидентот“. - Може да се полемизира со начинот на кој тие го осудија овој настан, бидејќи се обидоа да го релативизираат, изјави Јандроковиќ. Поранешната хрватска премиерка Јадранка Косор оцени дека Србија „не ги презела сите мерки за да го спречи инцидентот со Шешељ“ и дека српскиот претседател Вучиќ во неговата оценка го „релативизирал настанот“. Во врска со инцидентот денеска се огласи и самиот Шешељ, кој најави дека на 6 мај ќе одржи митинг во местото Хртковци во Војводина, каде ќе држи говор, исто како и пред 26 години, кога по неговиот настап мнозинското хрватско население во местото беше малтретиранио и протерано од Србија. За ова, според правосилната судска пресуда во Хаг, Шешељ е осуден за воени злосторства на 10 години затвор. Во полемиката за инцидентот на Шешељ и највата за негови нови акции, се вклучи и српската опозиција. Пратеникот на Демократската партија (ДС), Балша Божовиќ изјави дека ако државните власти не го забранат најавениот митинг на СРС во Хртковци, неговата партија ќе биде принудена тоа да го стори сама и да ги заштити луѓето на кои „Воислав Шешељ повторно им се заканува со насилство и протерување“.

Шешељ: Пресудата е противправна, ќе преземам мерки против неа

Матеја Петровски — Thu, 12 Apr 2018 07:17:01 +0000

Лидерот на Српската радикална партија (СРС) Воислав Шешељ оцени дека вчерашната пресуда која против него ја донесе Жалбениот совет на Механизмот на кривични судови во Хаг е противправна и додаде дека ќе преземе одредени мерки против неа. Тој изјави дека ќе поднесе барање за преиспитување на правосилната пресуда во Хаг. Шешељ тврди дека според англосаксонското право, Жалбениот совет не можел првостепената ослободувачка пресуда да ја преиначи во пресуда со која се осудува, туку дека можело само да бара повторно судење. -Тие можеа да ја укинат пресудата и да ја вратат на повторна постапка, вели лидерот на радикалите и додаде дека второстепената пресуда против него ја донеле оние кои „никогаш во животот не го виделе“.

Тој изјави за Н1 дека сите злосторства за кои Хаг го товари би ги повторил доколку би имал можност.

Шешпељ изјави дека е „многу горд на сите припишани воени злосторства и злосторства против човештвото и оти е подготвен во иднина повеќекратно да ги обнови“.

Жалбениот совет во Хаг делумно вчера го прифати барањето на Обвинителството и го осуди Воислав Шешељ на 10 години затвор. Но, Шешељ нема да оди во затвор бидејќи во притворот во Хашкиот трибунал за време на судењето помина вкупно 11,5 години. Шешељ со првостепената пресуда ослободен е од сите обвиненија на Хашкиот трибунал. Со првостепената пресуда на судскиот совет на Хашкиот трибунал донесена на 31 март 2016 година, Шешељ беше ослободен по сите девет точки од обвинението, кое го товареше дека со говор на омраза поттикнуваше и ги поддржуваше воените злосторства во Хрватска и во Босна и Херцеговина, како и за протерување на Хрватите од Војводина. На таа пресуда жалба поднесе Хашкото обвинителство, а Шешељ поднесе пишан одговор на жалбата. (Миа)

Шешељ: Пресудата ја донесoа луѓе кои никогаш во животот не ме виделе

Даниел Василев — Wed, 11 Apr 2018 14:36:45 +0000

Лидерот на Српската Радикална Партија, Воислав Шешељоцени дека пресудата против него е противправна. Тој додаде дека ќе преземе одредени мерки против неа. Шешељ за агенцијата Бета рече дека пресудата е противправна од формална причина зашто, како што рече, по англосаксонското право не може да се преиначи ослободителна пресуда за време на жалбена постапка. -Тие можеле да ја укинат пресудата и да ја вратат во повторна постапка, рече лидерот на радикалите, додавајќи дека второстепаната пресуда против него ја донеле оние кои никогаш во животот не го виделе.

Хаг: Шешељ осуден на 10 години затвор, кои веќе ги одлежа

Катерина Бојаџиева — Wed, 11 Apr 2018 13:22:23 +0000

Жалбениот совет на Механизмот на кривични судови во Хаг делумно го прифати барањето на Обвинителството и го осуди лидерот на Српска радикална партија (СРС), Воислав Шешељ на 10 години затвор. Но, Шешељ нема да оди во затвор бидејќи во притворот во Хашкиот трибунал за време на судењето помина вкупно 11,5 години. Жалбениот совет донесе одлука дека Шешељ е виновен по точките еден, 10 и 11 од обвинението односно за прогон, протерување и присилно преместување на населението. Шешељ со првостепената пресуда ослободен е од сите обвиненија на Хашкиот трибунал. Со првостепената пресуда на судскиот совет на Хашкиот трибунал донесена на 31 март 2016 година, Шешељ беше ослободен по сите девет точки од обвинението, кое го товареше дека со говор на омраза поттикнуваше и ги поддржуваше воените злосторства во Хрватска и во Босна и Херцеговина, како и за протерување на Хрватите од Војводина. На таа пресуда жалба поднесе Хашкото обвинителство, а Шешељ поднесе пишан одговор на жалбата.

Утре нова пресуда за Шешељ, тој вели: „Ќе ја преспијам“

Ивона Петрова — Tue, 10 Apr 2018 08:38:53 +0000

Претседателот на Српската радикална партија, Воислав Шешељ утре од судот во Хаг ќе ја слушне второстепената пресуда. На страната на судот е соопштено дека пресудата ќе се изрече во 14 часот. Судскиот совет на Хашкиот трибунал на 31 март 2016 година го ослободи Шешељ по сите девет точки од обвинението, кој се товареше за здружен злосторнички потфат, злосторства против човештвото, убиства, говор на омраза, депортација и други злосторства против Хрватите и муслиманите во Хрватска, БиХ и Војводина. обвинителството се жалеше и бараше казна од 28 години затвор или повторување на судењето. Судскиот совет со кој претседава судијата Теодор Мерон може да го прифати предлогот, да одреди друга казна или да ја потврди првостепената пресуда. За дел од српските медиуми, Шешељ изјавил дека пресудата ќе ја преспие. -Ете колку ми е грижа за нив. Ма воопштво не ме интересира што ќе кажат таму. Пресудата ми паѓа во незгодно време, бидејќи тогаш ја имам попладневната дремка и не ми паѓа на памет да ја слушам пресудата. Сеедно ми е каква ќе биде. Доброволно не одам никаде, па ни во Хаг. Мојата судбина е да го бранам српскиот народ, вели Шешељ.