вонземјани – Kurir.mk

Пентагон објави документи за можно присуство на вонземјани

Ивона Петрова — Thu, 16 Mar 2023 12:22:04 +0000

Пентагон објави нацрт-документ минатата недела, каде што се наведува дека вонземјани можеби го посетуваат Сончевиот Систем и испраќаат мали сонди за истражување, како што прави НАСА кога истражува други планети. Тој нацрт-извештај е напишан од Шон Киркпатрик - директор на Канцеларијата за решавање на аномалии од сите области (ААРО) на САД и Абрахам Лоуб - директор на Одделот за астрономија при Универзитетот Харвард. Во документот се наведува дека вештачки меѓуѕвездени објекти потенцијално можеби испраќаат бројни мали сонди за време на летот до Земјата. „Таа операција не се разликува многу од мисиите на НАСА. Тие таканаречени 'семиња од глуварче' може да се одвојат од мајчиното летало со гравитационата сила на Сонцето или со способноста за маневрирање“, велат стручњаците. Во 2005 година, американскиот Конгрес ја задолжи НАСА да пронајде 90 отсто од сите објекти блиску до Земјата поголеми од 140 метри, по што беа создадени телескопите „Пан-СТАРРС“. Во октомври 2017 година, се откри необичен меѓуѕвезден објект којшто подоцна го доби името „Оумуамуа“, што на хавајски јазик значи „извидник“. ААРО е формиран јули 2022 година и е одговорен за следење разни појави и тела, како на небото и во внатрешноста на Земјата, така и во вселената. „Со добар дизајн, таквите мали сонди можат да стигнат до до Сончевиот Систем или до Земјата, заради истражување, додека матичниот брод минува на одредено растојание Земја - Сонце, каков што беше случајот со 'Оумуамуа'. Астрономите не можат да откријат мини-сонди бидејќи тие не рефлектираат доволно Сончева светлина за телескопите да ги забележат“, додаваат авторите. Вселенското тело „Оумуамуа“ било во облик на пура, се појавувало и исправено, а патувајќи од Сонцето кон Земјата не покажувало трага, поради што некои научници веруваат дека тоа можеби е вештачко летало. Исто така, три години подоцна е откриен уште еден објект што не остава трага зад себе.

Се подготвува протокол за контакт со вонземјани

Ристе Здравков — Tue, 08 Nov 2022 12:57:01 +0000

Светот не е подготвен за можен контакт со вонземјани. Затоа, група експерти работат на протокол за контакт со вонземјани, првпат во последните 35 години. Групата ја сочинуваат експерти за право и научници, кои ќе направат протоколи кои треба да се следат доколку дојде до контакт со вонземен живот. Според Џон Елиот, компјутерски научник на Универзитетот во Сент Ендрус, Шкотска, експертите нема да размислуваат за можното влијание на вонземен живот врз нашата планета, туку ќе одат чекор напред и ќе се фокусираат на реакцијата на ваквата ситуација. Единствениот протокол за контакт со вонземјани досега бил составен од институтот за потрага по вонземна интелигенција СЕТИ во 1989 година. Протоколот бил ревидиран пред повеќе од една деценија. Според него, главниот совет за научниците во случај на контакт со вонземјани е да побараат насоки од Обединетите нации или друго тело. Во последниве децении идејата за наоѓање живот на друга планета станува актуелна поради повеќе научни достигнувања, како наоѓањето траги од вода на Марс и егзопланети слични на Земјата.

Кинески телескоп забележал знаци на вонземјани? Извештајот набрзо бил избришан

Ристе Здравков — Mon, 20 Jun 2022 17:53:29 +0000

Моќниот телескоп „Небесно око“ можеби забележал знаци на вонземјански живот, тврдат кинеските експерти во извештајот кој набрзо бил избришан. Џиновскиот радио-телескоп детектирал електромагнетни сигнали за живот на други планети, се вели во извештајот објавен во списанието Science and Technology Daily, кој официјално беше објавен од кинеското Министерство за наука и технологија. Тимови на истражувачи од Универзитетот во Пекинг се задолжени за понатамошно истражување на мистериозното откритие, пренесува „Universe Magazine“. „Имаше неколку случаи на можни сигнали и траги од вонземјански цивилизации надвор од Земјата“, се вели во извештајот. Сепак, извештајот брзо бил отстранет од веб-страницата на магазинот, пишува Тајм. Џанг Тонгји, главен научник на одделот за потрага по вонземски живот на Универзитетот, изјавил за списанието дека е можно да се работи за некои пречки во радио-сигналите. „Можноста за какво било мешање е исто така голема. Мора сè да провериме и ќе биде потребно време“, изјавил кинескиот експерт.

Дали постојат вонземјани? Ќе се изненадите кога ќе видите што пишува во извештајот на Американската влада за НЛО објектите!

Магдалена Андонова — Tue, 06 Jul 2021 18:25:07 +0000

Американската влада во петокот во многу очекуваниот извештај објави дека нема докази за постоење на вонземјани, но истовремено признавајќи дека десетици феномени на кои воочуваат пилотите се необјасниви. Голем извештај на американската влада за УАП, како што сега го нарекуваат а порано НЛО, тврди дека воените и разузнавачките аналитичари немаат докази за да го објаснат феноменот на мистериозни летечки објекти или дали станува збор за напредни копнени технологии, атмосферски настани или туѓа природа. Извештајот, доставен до Конгресот и објавен во јавноста, вклучува 144 опсервации за она што владата официјално го нарекува „неидентификуван воздушен феномен“ или УАП и датира од 2004 година. Извештајот е објавен од Кабинетот на директорот на Националната разузнавачка служба во соработка со работната група УАП предводена од морнарицата на САД. - УАП јасно го покренува прашањето за безбедноста на летот и може да претставува предизвик за националната безбедност на САД, се вели во извештајот, додавајќи дека феномените „веројатно немаат единствено објаснување“. - Во ограничен број на инциденти, УАП, наводно, се чини дека покажува невообичаени карактеристики на летот. Овие набљудувања може да се резултат на грешки на сензорите, измама или погрешна перцепција од набљудувачите и да бараат дополнителна ригорозна анализа, додаде тој. Извештајот вклучува неколку случаи на УАП кои се појавија порано при објавувањето на видео записите на американската морнарица од страна на Пентагон, кои прикажуваат енигматски авиони на источниот и западниот брег на САД, кои покажуваат брзина и маневрирање што ги надминува познатите технологии на авиони и нема видливи средства за погон. Висок американски функционер, запрашан за можноста за вонземски објаснувања, рече: „Ова не е целта на работната група, која ќе процени какво било барање вонземски живот ... За ова не сме одговорни. станува збор за извештаи, немаме јасни индикации дека има вонземско објаснување за нив - но ќе одиме во насока каде и да не однесат податоците “.

Откриени 29 планети на кои може да има вонземјани

Ивона Петрова — Thu, 24 Jun 2021 12:50:16 +0000

Научници утврдиле 29 планети на кои може да има вонземјани коишто би можеле да ја набљудуваат Земјата. Тоа, од вкупно 1.715 испитани и лоцирани ѕвездени системи од каде што вонземјаните би можеле да ја откријат, т.е. лоцираат Земјата последниве 5.000 години, пишува „Гардијан“. Луѓето со векови го гледаат небото прашувајќи се – дали има живот меѓу ѕвездите? И, додека ние замислуваме мали зелени суштества што личат на човекот, некој таму горе можеби гледа во нас. Во ново истражување, астрономите го стеснија кругот на блиските ѕвездени системи од кои може да се види животот на Земјата. Лиза Калтенегер, професорка по астрономија и директорка на Институтот „Карл Саган“ при Универзитетот „Корнел“ во Њујорк, смета дека еден начин да се пронајдат вакви планети е да се блокираат делови од светлината на ѕвездата домаќин. Илјадници планети се откриени надвор од Сончевиот Систем, а околу 70 отсто се забележани во мигот кога минуваат пред ѕвездата, блокирајќи дел од светлината што стигнува до телескопите на Земјаните. Идните опсерватории како вселенскиот телескоп НАСА, кој ќе биде лансиран оваа година, ќе бараат знаци на живот на „егзопланетите“ со анализа на составот на нивната атмосфера. За да утврдат кои ѕвездени системи во близина се во добра позиција за набљудување на Земјата, проф. Калтенегер и д-р Џеки Факрети, астрофизичарка од Американскиот музеј на природонаучна историја, го проучиле каталогот ѕвезди, и нивната позиција и движење, составен од Европската вселенска агенција, со помош на астрометричката опсерваторија „Гаја“. Така, тие идентификувале 2.034 ѕвездени системи на оддалеченост од 326 светлосни години од коишто можело да се забележи движењето на Земјата, од пред 5 илјадалетија до 5.000 години во иднина.

Кина од септември тргнува во потрага по вонземјани

Ивана Ефремовски — Wed, 03 Jun 2020 10:19:05 +0000

Кина наскоро ќе почне со потрагата по живот надвор од Земјата и, за таа цел, штотуку ја заврши изградбата на огромниот телескоп ФАСТ („Петстотиниметарски апертурен сферичен телескоп“). Неговата изградба почна во 2011 година, а официјално беше претставен во јануари годинава. Изградбата на телескопот чинеше 180 милиони долари. Главниот и одговорен лидер на проектот, проф. Жанг Тонџи истакнува дека потрагата нема да ги прекинува редовните научни мисии. И, иако има некои „интересни кандидати за вонземски сигнал“, професорот смета дека не сите примени сигнали ќе доаѓаат од живо интелигентно суштество. ФАСТ има дијаметар од 500 метри. Сместен е во областа Пингтанг, во провинцијата Гуижоу, јужна Кина, и треба да почне со барање вонземски сигнали во септември оваа година. Речиси 8.000 луѓе во круг од пет километри околу телескопот беа евакуирани (односно преселени), со цел непречено примање на сигналите. ФАСТ го собори рекордот на телескопот Аресибо во Порто Рико, чија „чинија“ има дијаметар од близу 300 метри. (МИА)

Сноуден ги пребарувал сите мрежи на ЦИА: Открива дали вонзејмани ја контактирале Земјата

Ивона Петрова — Fri, 25 Oct 2019 05:52:14 +0000

Едвард Сноуден, поранешниот работник во ЦИА и Националната безбедносна агенција кој е познат по откривањето на масовниот програм за прислушување, ги истражил длабочините на американските разузнавачки служби и може да потврди дали некои теории на заговор се точни или не, барем така тврдат светските медиуми за него. Сноуден, кој сега живее во Русија, имал пристап до некои од нејстрого чуваните тајни, па тргнал во потрага по одговори на некои прашања кои сакаа да ги знае целиот свет. Се утврдило дека американската влада сепак не е свесна за постоењето на било која форма на интелигентен, вонземски живот. -Колку што јас можам да кажам вонземјани никогаш не ја контактирале Земјата или барем не американските разузнавачи. Имав пристап до мрежите на НСА, ЦИА, војската, сите тие групи. Не можев ништо да најдам. Ако е тоа скриено, а може да биде, тогаш е тоа проклето добро скриено, дури и од луѓето кои се внатре, пишува Сноуден во своите мемоари „Permanent Record“. Тој проверил и дали навистина Американците слетале на Месечината. -Ако тоа се прашувавте - да, човекот навистина слетал на Месечината. Климатските промени се вистините, теоријата на завера за трагите на авионите, не е, наведува тој.

Дали вонземјани ја имаат посетено Земјата?

Ристе Здравков — Thu, 06 Dec 2018 08:49:24 +0000

Научници на НАСА сметаат дека вонземјани најверојатно веќе ја имаат посетено Земјата, но дека луѓето не ги забележале бидејќи се „неверојатно мали“. Доктор Силвано П. Коломбано, научник на НАСА, смета дека вонземјаните изгледаат многу поразлично од луѓето и која било друга форма што ни е позната нас, како и дека имаат технологија што ние не можеме ни да ја замислиме. Тој исто така вели дека вонземјаните имаат способност за интерстеларно патување низ вселената. Ваквата изјава следи откако НАСА почна да го скенира универзумот за цивилизации како дел од програмата „Потрага по вонземска интелигенција“. „Едноставно сакам да го истакнам фактот дека можеби, ако успееме да ги најдеме или тие нас (ако веќе нѐ немаат најдено), дека можеби ја немаат нашата структура и градба“, вели Коломбано. Тој смета дека денес научниците се премногу фокусирани на тоа да најдат знаци на современа технологија на други планети, а ризикуваат да ги пропуштат сигналите на цивилизации што се многу постари од Земјата.

Бисикало: Можно е да има вонземјани, но не сакаат да остварат контакт со нас

Ристе Здравков — Fri, 12 Oct 2018 12:21:31 +0000

Директорот на Институтот за астрономија при Руската академија на науките, професор Дмитриј Бисикало оцени дека е можно да постојат вонземни цивилизации, кои не сакаат да остварат контакт со нас. - Мислам дека постојат вонземни развиени цивилизации слични на нашата. И тоа, веројатно се повеќе. Во 1960 година астрономот и астрофизичар Френк Дрејк од калифорнискиот Универзитет на Санта Круз изведе формула што овозможува да се пресмета бројот на вонземните цивилизации, со кои можеме да оствариме контакт. Според таа формула, тие се многубројни, изјави професорот. Тој натаму истакнува дека главната причина зошто досега не сме виделе вонземјани е, тоа што тие не сакаат да ги видиме. Бисикало наведе дека тоа можеби е поврзано со кусиот животен век кај нив.

Босанец продава југо за борба против вонземјани

Предраг Кукиќ — Wed, 12 Sep 2018 15:19:27 +0000

Државјанин на Босна и Херцеговина го привлече вниманието на јавноста, откако во оглас го понуди својот автомобил. Станува збор за заставиниот модел „југо 45“, кој е прекриер со алуминиумска фолија и на кровот има „сателит“, а според сопственикот поради необичниот дизајн автомобилот е невидлив за вонземјани. Во описот се наведува дека возилото е изработено во ограничена серија и е специјализирано за борба со непознати вселенски објекти. Воедно се наведува дека има 1.066 коњски сили, а дека максималната брзина не е позната. Од стандардна опрема се наведува дека поседува десен ретровизор, резервно тркало, амбиентално осветлување со 1.000 бои, ауспух, пакет опрема за полиција, светлечко радио и друго. - Освен тоа, возилото тешко се забележува на патиштата и може да се користи за други намени, најчесто прељуба, стои во огласот. Од дополнителната „опрема за вселената“ возилото поседува сателитски комуникатор за сите фрекфенции, локатор за различни оддалечености, вклучително во светлосни години, како и фолија која го прави невидлив за вонземските радари и е непробојна за нивните ласери. Со возилото следуваат и вселенски одела. Почетната цена е 999 конвертибилни марки (околу 510 евра), а возилото наводно се наоѓа во Бања Лука. (МИА)