воз – Kurir.mk

Патнички воз Скопје- Неготино удрил во железен предмет на пруга, граѓаните патувале шест часа

Катерина Бојаџиева — Sun, 29 Oct 2023 12:03:28 +0000

Патничкиот воз Скопје - Неготино синоќа удрил во железен предмет кој испаднал на пругата од друг воз, при што патниците патувале шест часа. Како што објасни за МИА неготинецот Илија Стамков, поголемиот дел од возот останал во тунелот, само предниот дел каде што е кабината на машиновозачот бил излезен надвор. - Се беше во ред се додека машиновозачот кој има подолго искуство и возеше бавно во тунелот пред Велес, не го забележал предметот железо што наводно испаднал од друг воз и почна со кочење, но бидејќи возот има голема тежина удривме во железниот предмет, од кој што можевме да бидеме исфрлени од железничката пруга. Се слушнаа неколку удари, јас помислив дека можеби ќе бидеме исфрлени од пругата, но закочивме и поголемиот дел од возот остана во тунелот, само предниот дел каде што е кабината на машиновозачот беше излезен надвор од тунелот, рече Стамков. Возот застанал и според информациите на патниците, случајот бил пријавен кај надлежните и во полиција. Безбедноста била, како што им кажале, околу тоа дали ќе продолжи возот, бидејќи од ударот, не можело да се види дали има некое оштетување. - Полиција дојде, но тоа не значеше крај на нашите маки. Се изначекавме. Почнаа сите од возот да излегуваат и да се бунат, три пати испаднавме и се буневме, два пати не лажеа дека сега ќе тргнеме, сега ќе тргнеме. Испаднавме и почнавме во нервоза да се караме поостро и поостро. Благодарност до машиновозачот кој беше присебен и ни ги спаси животите на сите со неговата брза реакција и кочење. Стасав на железничка станица Неготино во 23 часот, а тргнав од Скопје околу пет часот, нагласи Стамков. Тој додаде дека додека возот стоел, неколкумина патници тргнале пеш по пругата до Велес. - Имаа среќа и не им се случи ништо лошо по патот, по таа темница по пруга. Кога тргнавме, ги качивме и нив по патот, рече Стамков. Тој изрази надеж дека во иднина нема да се случуваат вакви немили настани.

Втор ден не сообраќа возот на релација Велес-Прилеп-Битола и обратно

Катерина Бојаџиева — Thu, 12 Oct 2023 14:33:51 +0000

Пожар на стрништа покрај пругата ги изгоре праговите поради што втор ден не сообраќаат возовите Велес-Прилеп-Битола и обратно. Како што информираат за МИА од Железничката станица во Велес, во вторникот попладне изгорени се 160 прагови на пругата на Железничката станица Браилово близу Прилеп, по што од среда по полноќ возовите се оневозможени да сообраќаат. Од Македонски Железници информираат дека нивни екипи работат на санирање и обнова на праровите по што ќе бидат пуштени возовите но не посочуваат кога е рокот на санација на оштетената пруга. Претходно до вторникот вечерта возот само пет дена сообраќаше, а откако претходно исто така поради изгорени илјада прагови од пругата, возот на релација Велес-Прилеп Битола беше во прекин осум дена. Поради прекин на возот реагираат голем број на патници, најмногу студенти од Велес и околните населени места, кои студираат во Прилеп и Битола, а од кои некои имаат и месечни карти за воз, па сега се изложени на дополителни трошоци за патување со автобус.

ВОЗОТ ОД ПРИЛЕП ДО БИТОЛА СТОИ ВО МЕСТО – пожар го блокираше железничкиот сообраќај на овој патен правец

Дарко Андоновски — Mon, 18 Sep 2023 07:41:06 +0000

Регионалниот ЦУК Битола извести дека при пожарот во атарот с.Беранци, во Општина Могила, каде што гореле нискостеблеста вегетација и стрништа, пругата била оштетена на повеќе места. Информацијата е добиена од ТППЕ-Битола и веднаш дежурните од ЦУК ги информирале СВР-Битола и надлежните од „Железници на Република Северна Македонија транспорт АД – Скопје“. По брзата проверка на железничката пруга, од вчера попладне од 17.42 часот железничкиот сообраќај е во прекин на делницата помеѓу Битола и Прилеп, а патничкиот воз 643 е на станицата во Прилеп и не сообраќа. ЦУК примил известување од „ЖРС Македонија транспорт АД – Скопје“ дека другиот железнички (патнички и товарен) сообраќај се одвива нормално.

Продолжува прекинот на железничкиот сообраќај поради бојкот на вработените

Ивона Петрова — Sat, 26 Aug 2023 08:24:26 +0000

Железничкиот сообраќај во државава и денеска е во прекин поради бојкотот на машинскиот и извршниот персонал во ЖРСМ Транспорт. Причина за бојкотот, што почна вчера попладне, е неисплатениот втор дел од платата за јули годинава. Тони Димовски, претставник на машинскиот и извршниот персонал, за МИА изјави дека од стартот на бојкотот не сообраќаат ниту патничките ниту товарните возови. Досега, како што вели, не се реализирани предвидените сообраќања согласно со возниот ред на шест патнички и пет товарни возови. Димовски најави дека бојкотот ќе трае до исполнување на барањето, но и постигнување договор за редовна целосна исплата на платите. -Ова веќе на ништо не личи, речиси за секоја плата мора да правиме бојкот и затоа ќе бараме да почнеме преговори и да се постигне договор да прекине оваа пракса, рече Димовски. И на крајот на јули имаше прекин во железничкиот сообраќај исто така поради неисплатен втор дел од плата, а од истата причина и претходно во неколку наврати вработените ја бојкотираа работата.

ВИДЕО: Во еден момент ручате, во друг се поместувате да не ве удри воз! Дали би ја посетиле оваа необична улица?

Ристе Здравков — Wed, 09 Aug 2023 11:34:21 +0000

Во Ханој, главниот град на Виетнам, постои тесна улица, со ресторани и продавници, а необична е по тоа што низ неа минуваат возови. Доколку некогаш го посетите Ханој, главниот град на Виетнам, морате да ја видите тамошната славна „улица на возови“, која е токму тоа што си го замислувате. Улицата има сè што би очекувале – продавници, кафулиња, барови, но со масивен воз, кој вози по средината. Меѓутоа, доколку некогаш јадете таму, бидете подготвени да ве станат од масата, за да не завршите трагично. Дали би сакале во живо да ја видите оваа атракција?

Бројот на загинати во излетувањето на воз во Пакистан се искачи на 30, а 60 се повредени

Тале Кристо — Sun, 06 Aug 2023 15:49:40 +0000

Бројот на загинати во излетувањето на воз од шините во јужен Пакистан се искачи на 30, додека бројот на повредени на 60, а спасувачките операции се уште се во тек, соопштија денеска официјални лица. Возот патувал од Карачи до Равалпинди кога сите 10 вагони излетале од шините во близина на железничката станица Сархари во близина на Навабшах, во јужната провинција Синд. Полициски претставници потврдија дека досега се пронајдени 30 тела, додека 60 повредени се извлечени, од кои некои се во критична состојба. Велат дека бројот на загинати може да се зголеми бидејќи спасувачката операција продолжува. Локалната телевизија покажа дека спасувачките екипи извлекуваат жени, деца и постари патници од оштетените и превртените вагони. Официјални лица рекоа дека спасувачките тимови ги префрлиле повредените патници во блиската болница во Навабшах. Висок официјален претставник на железницата изјави дека поради несреќата биле прекинати железничките линии на главната железничка пруга. На патниците ќе им се обезбеди алтернативен аранжман за патување и медицинска нега. Министерот за железници Каџа Сад Рафик изјави дека несреќата може да биде предизвикана од механички дефект или последица на саботажа. Тој рече дека истрагата е во тек. Железничките несреќи често се случуваат на лошо одржуваните пруги во Пакистан, каде што комуникациските и сигналните системи од колонијалната ера не се модернизирани, а безбедносните стандарди се лоши.

Патниците револтирани, возот од Гевгелија за Скопје вечерва доцнеше два часа

Ивона Петрова — Tue, 01 Aug 2023 20:10:22 +0000

Возот кој попладнево во 16:55 часот тргна од Гевгелија и кој во Велес по возен ред пристигнува околу 18:50 часот, вечерва каснеше цели два часа и пристига дури во 21 часот. Како што информираа од Железничката станица во Велес причината за доцнењето било проширување на шините на железничката пруга како последица од високите температури на железничката станица Клисура. Поради доцнењето на возот голем број на патници на станиците во Градско и Велес револтирани реагираа до МЖ транспорт поради долгото чекање на возот. Тие информираат за МИА дека неделава овој воз Гевгелија –Скопје скоро секој ден доцни по 60-тина минути., а најмалку по 30-тина. Вечерва во Велес 60 минути каснеше и попладневниот воз кој од Битола оди за Скопје преку Велес, кој од станицата во Битола поаѓа во 18:24 часот. Револтираните патници кои редовно патуваат со возовите се жалат до Македонски железници транспорт бидејќи скоро секој ден возовите каснат најмалку пола до еден час, па дури и по неколку часа, поради што не можат навреме да стигнат на работа, на закажано на лекар и по други потреби.

Во Европа возните карти се до 30 пати поскапи од авионските: Што ја предизвикува разликата во цената?

Катерина Бојаџиева — Fri, 28 Jul 2023 06:37:01 +0000

Додека Европа страда од топлотен бран, а климатската криза се забрзува, многу патници поради загадувањето повеќе сакаат да патуваат со воз отколку со авион. Тие често се соочуваат со превисоки цени. Патувањето со воз на долги релации во Европа може да чини речиси 30 пати повеќе од летање, покажуваат податоците од нов извештај. Извештајот, составен од групата за еколошка кампања Гринпис, ги споредува цените на летовите и билетите за воз на 112 европски линии на девет различни датуми. Билетите за воз беа во просек двапати поскапи од летовите, додека патувањата со воз од Обединетото Кралство до Европа, кои вклучуваат одење со често скапиот Еуростар до континентот, во просек беа четири пати повисоки од цената на авионските карти. Истото важи и за Шпанија, која има брза железничка мрежа со четири конкурентни марки. Летовите биле поевтини од возовите на 71 отсто од анализираните линии. Имаше и шокантни поскапувања. Станува збор за патување во последен момент од Лондон до Барселона во мај, резервирано два дена пред патувањето, каде цената на возот беше 384 евра во споредба со 12,99 евра за лет на Рајанер, што го прави возот 29,6 пати поскап од авионот. Лондон до Барселона е третата најпопуларна воздушна линија во Европа, со 3,36 милиони луѓе кои патуваа во 2019 година, според Гринпис, кој додава дека префрлањето на тие летови на железница ќе заштеди 461.000 тони стакленички гасови, што е еднакво на годишните емисии на повеќе од 300.000 автомобили. „Зошто некој би одел со воз од Лондон до Барселона и би платил до 384 евра кога авионските билети се достапни за смешно ниската цена од 12,99 евра? Граѓаните заслужуваат да имаат пристап до чист, ефикасен и достапен транспортен систем кој не штети на климата, луѓето и нашата планета“, се вели во извештајот. Каде е најскапото возење со воз? Земјите со најскапи билети за воз во споредба со авионските билети се Велика Британија, Шпанија, Белгија, Франција и Италија. Во извештајот се вели дека возовите често се поевтини од летовите во централна и источна Европа, но времето на патување, врските, фреквенциите на возот и стандардите за услуги се „обично полоши отколку во западноевропските земји“. Некои железнички компании во Европа не продаваат билети повеќе од два или три месеци однапред, се вели во извештајот, давајќи им уште една предност на авиокомпаниите. Стандардната цена на билет не е целосна слика. Буџетските авиокомпании наплаќаат за седење, чекиран багаж, па дури и патни торби во некои случаи, додека летањето вклучува трошоци за патување до аеродром надвор од градот. Според Европската агенција за животна средина, авионите, кои се одговорни за околу 2,5 отсто од глобалното загадување на планетата, испуштаат во просек речиси пет пати повеќе стакленички гасови од возовите, а воздухопловството беше најбрзо растечки извор на емисии на стакленички гасови во Европа помеѓу 2009 и 2019 година, зголемувајќи се за 29 проценти во текот на деценијата. Сепак, податоците на Гринпис покажуваат дека во 2019 година втора најпопуларна рута во Европа била Единбург до Лондон, патување што може да се реализира за околу четири и пол часа со воз, иако по двојно повисока цена. Авиокомпаниите во ЕУ се ослободени од плаќање данок на керозин, додека железницата немаат слични ослободувања од извори на енергија. Лоби групата „Транспорт и животна средина“ за чист транспорт процени претходно овој месец дека владите на ЕУ губат 4 милиони евра на час од потенцијалните даноци за воздухопловство, вклучително и керозин, пишува Си-Ен-Ен. Нискобуџетните авиокомпании оперираат на 79 отсто од 112 анализирани линии. Буџетските превозници често се фалат дека имаат понови флоти и авиони кои се помалку штетни за животната средина, но нивниот експоненцијален раст ги прави главен дел од проблематичната експанзија на авијацијата, изјави за Си-Ен-Ен минатата година Матео Мироло, службеник за воздухопловна политика во Transport & Environment. Лорелеи Лимузен, активистка на на Гринпис за климатски промени во ЕУ, рече дека авиокомпаниите имаат „корист од неверојатните фискални предности“. „Авионите загадуваат многу повеќе од возовите, па зошто луѓето се охрабруваат да летаат? Авионските билети од десет евра се можни само затоа што другите, како работниците и даночните обврзници, ја плаќаат вистинската цена. За доброто на планетата и луѓето, политичарите треба да дејствуваат за да ја сменат оваа ситуација и да го направат патувањето со воз подостапна опција, инаку ќе видиме уште повеќе и повеќе жештини во Италија, како во Грција, рече таа. Групата ги повика владите на континентот да воведат долгорочни, достапни „климатски картички“ за јавниот превоз, вклучително и прекуграничниот. Тие сугерираат дека ова треба да се финансира со „постапно укинување на субвенциите на авиокомпаниите и праведен систем на оданочување заснован на емисиите на CO2“. „Овој извештај уште еднаш нагласува како неоправданите даночни олеснувања им дозволуваат на авиокомпаниите да нудат апсурдно евтини авионски билети, додека железничките оператори треба да плаќаат висока цена за енергија и железнички патарини“, рече Виктор Тевен, железнички координатор во организацијата „Transport & Environment“. „Владите мора да ги отстранат даночните ослободувања за авиокомпаниите, како што се даноците за гориво и ДДВ, како и да ги намалат железничките патарини. Секој час, европските влади губат четири милиони евра од даноци за воздухопловство кои би можеле да се реинвестираат во промовирање на поодржлив транспорт“, заклучи тој. Еуроактив

Скопјанец (63) допирал малолетничка во воз, па се самозадоволувал пред други патници

Ивона Петрова — Wed, 26 Jul 2023 08:33:25 +0000

Основното јавно обвинителство Скопје донесе Наредба за спроведување истражна постапка против 63-годишен скопјанец за кого постои основано сомнение дека сторил три кривични дела – Задоволување полови страсти пред друг од член 190 од Кривичниот законик, од кои едното полово дејствие го извршил пред дете кое наполнило 14 години. -На 24 јули, патувајќи со воз, во близина на Скопје, осомничениот во еден од вагоните се доближил и започнал да допира малолетно девојче родено 2006 година кое патувало со возот. Тоа вознемирено се преместило на друго седиште, по што осомничениот продолжил кон друг вагон. Таму седнал спроти други две жртви и започнал да се самозадоволува на јавно место. Оштетените видно исплашени си ги зеле своите работи, го напуштиле вагонот и го пријавиле. Во возот влегле овластени службени лица, кои го привеле осомничениот и го однеле во полициска станица, информираат од Обвинителството. Јавниот обвинител до судијата на претходна постапка од Основниот кривичен суд Скопје поднесе предлог за определување мерка притвор за осомничениот, бидејќи постојат околности што укажуваат на опасност од криење односно дека ќе се даде во бегство, постои оправдан страв дека ќе ја попречува истрагата со влијание врз сведоците и вештаците, како и особени околности кои го оправдуваат стравот дека ќе го повтори кривичното дело. Судот го прифати предлогот на обвинителството и на осомничениот му определи притвор во траење од 30 дена.

Камера сними воз во Србија како удира автомобил додека преминува пруга

Ристе Здравков — Thu, 06 Jul 2023 18:11:52 +0000

Снимката од несреќата на патот помеѓу Лозовик и Крњево се рашири на интернет и вознемири многумина. На снимката се гледа како автомобил минува на премин преку пруга, но во истиот момент доаѓа воз со голема брзина. Среќа во несреќа што автомобилот речиси премина, па возот го удри во задниот дел и иако го исфрли, патниците минале со лесни повреди.

View this post on Instagram

A post shared by 192.RS (@192_rs)