вселенска станица – Kurir.mk

Се очекува враќање на тројцата астронаути од кинеската вселенска станица

Катерина Бојаџиева — Fri, 15 Apr 2022 06:25:54 +0000

Тројцата космонаути после минати рекордни шест месеци на кинеската вселенска станица се подготвуваат за враќање на Земјата, јавија денеска кинеските медиуми. Од Кинеската вселенска програма не се соопштува кога точно ќе биде враќањето на кинеските космонаути, но се очекува тоа да се случи в сабота наутро, околу три часот по средноевропско време. Капсулата со тројцата космонаути е предвидено да слета во областа Донфенг во пустината Гоби. Екипажот на кинеската вселенска станица „Шенжу“ (магичен брод) минаа дури три месеци повеќе од нивните претходници. Тиа на својата мисија во вселената тргнаа на 16 октомври. За време на престојот во вселената имаа две прошетки во отворен космос, изведоа серија научни експерименти и вршеа подготвителни активности за натамошно проширување на вселенската станица. До крајот на оваа година кинеската вселенска програма планира да лансира уште два модула за својата станица.

Компанијата на Џеф Безос ќе гради вселенска станица

Ивона Петрова — Tue, 26 Oct 2021 07:36:28 +0000

Компанијата „Блу Ориџин“, сопственост на милијардерот Џеф Безос, соопшти дека планира да развие комерцијална вселенска станица што ја нарече „Орбитален гребен“, во која ќе учествива и американската компанија „Боинг“. Во соопштението од компанијата се наведува дека целта е орбиталната станица да се лансира во втората половина на оваа деценија. Британските медиуми јавуваат дека партнер во овој проект ќе биде „Sierra Space, кој е дел од Sierra Nevada Corp., а ќе биде поддржан од Redwire Space, Genesis Engineering Solutions и Државниот универзитет во Аризона. Вселенската станица „Орбитален гребен“ ќе се користи како „деловен парк со различна намена“, а проектот планира да обезбеди инфраструктура потребна за зајакнување на економската активност и отворање на нови пазари во вселената, соопштија „Blue Origin“ и „Sierra Space“. „Искусни вселенски агенции, високотехнолошки конзорциуми, суверени држави без вселенски програми, медиуми и туристички компании, претприемачи, спонзорирани пронаоѓачи и инвеститори кои размислуваат за иднината – сите имаат место на Орбиталниот гребен“, се наведува во соопштението на компанијата.

Како била направена дупката на рускиот „Soyuz“ во Меѓународната вселенска станица?

Ристе Здравков — Tue, 25 Dec 2018 14:38:51 +0000

Руски астронаут кој ја испитуваше мистериозната дупка на капсулата прикачена на Меѓународната вселенска станица, рече дека отворот бил избушен однатре и дека руските инспектори утврдуваат како се случило тоа. Космонаутот Сергеј Прокопјев рече дека во тек се испитувањата на примероците што тој и Олег Комоненко ги собраа за време на нивната вселенска прошетка на 12 декември. Прокопјев и уште двајца членови на вселенскиот екипаж на МВС се вратија на Земјата минатата недела по мисијата во станицата што траеше 197 дена. Дупката на руското летало „Soyuz“ што беше прикачено на МВС беше забележана на 30 август. Екипажот откри струење што предизвикуваше мало губење на притисокот во капсулата и ја затворија дупката. На денешната прес-конференција Прокопјев рече дека дупката била направена однатре и дека сега се истражува како настанала. Тоа што астронаутите и космонаутите ја идентификувале и поправиле дупката укажува дека екипажот во вселената е „подготвен за секакви ситуации“, рече тој. Дупката не претставувала опасност за Прокопјев и другите двајца астронаути – Серена Аунон Чанселор од НАСА и Александер Герст од Европската вселенска агенција - за време на нивното враќање на Земјата. Шефот на Руската вселенска агенција „Роскосмос“ Дмитриј Рогозин во септември изјави дека можно е дупката да била направена уште во текот на производството на капсулата или додека била во орбита. Тој не ги обвини директно членовите на екипажот на МВС, но неговата изјава предизвика одредена напнатост меѓу „Роскосмос“ и НАСА. Рогозин во меѓувреме ја ублажи неговата изјава и ги обвини медиумите дека му ги извртиле зборовите. Прокопјев ја отфрли идејата дека дупката ја направиле астронаутите и рече: „Не треба да имате такво лошо мислење за нашиот екипаж“.