САД ја изрекоа првата казна за вселенски отпад

Ивона Петрова — Tue, 03 Oct 2023 16:14:06 +0000

Американската влада ја изрече првата казна на компанија за вселенски отпад што орбитира околу Земјата. Би-би-си јавува дека федералната Комисија за комуникации (FCC) ја казнила компанијата „Dish Network“ со 150.000 долари затоа што не го оддалечила стариот сателит доволно далеку од другите што се уште се во употреба. Компанијата ја признала својата одговорност за сателитот EćoStar-7. Вселенскиот отпад се однесува на делови од вселенски летала и стари сателити што остануваат во орбитата околу Земјата, но повеќе не се користат и затоа ги изложуваат другите вселенски летала со ризик од судар. Компанијата„Dish Network“ требало да го оддалечи својот стар сателит на 300 километри од Земјата, но во 2022 година го поместила само за 120 километри, откако тој останал без гориво.

Кина повторно под критики за својот вселенски отпад

Тале Кристо — Wed, 27 Jul 2022 12:21:44 +0000

Остатоци од огромна кинеска ракета се очекува да паднат на Земјата следната недела, соопшти американската Вселенска команда, којашто ја следи нејзината траекторија. Ракетата „Долг марш 5-Б“, тешка 23 тона, го носеше лабораторискиот модул „Вентијан“ во Вселената и беше лансирана од островот Хајинан во неделата. Модулот потоа успешно се спои со Кинеската орбитална станица. Меѓутоа, откако ја заврши својата работа, ракетата почна неконтролирано да се спушта кон Земјината атмосфера, па не се знае каде ќе паднат остатоците. Овој неконтролиран лет е вкупно трет за Кина, која веќе е критикувана за лошото управување со вселенскиот отпад. – Тоа е метален предмет тежок 20 тони. Иако ќе се распадне кога ќе влезе во атмосферата, бројни парчиња, некои од нив – прилично големи, ќе паднат на површината, вели Мајкл Бајерс, професор на Универзитетот на Британска Колумбија и автор на неодамнешен труд за опасностите од вселенскиот отпад. Вселенскиот отпад претставува исклучително мал ризик за луѓето, но можно е поголемите парчиња да предизвикаат штета доколку паднат врз населени места. Бајерс смета дека поради зголемувањето на количината на вселенски отпад, тие мали шанси стануваат сѐ поголеми. Според проценките, можноста за паѓање на ракетни парчиња во Џакарта, Дака и Лагос е трипати поголема отколку во Њујорк, Пекинг или Москва. – Ризикот може целосно да се избегне со оглед на технологијата и плановите за мисии кои овозможуваат контролиран влез во атмосферата, обично преку оддалечените делови на океанот, наместо неконтролиран влез, вели Бајерс. Кина лани се најде на удар на критики за својот вселенски отпад, откако лансираше модул на слична ракета. Остатоците паднаа во Индискиот Океан близу Малдивите 10 дена по лансирањето. НАСА соопшти дека Кина не ги исполнува „стандардите за одговорност“. Од друга страна, Кинезите ги обвинија САД дека „шират страв“. Вселенскиот отпад, како на пр. – стари сателити и делови од летала вон употреба, влегува во атмосферата секој ден, но не се забележува бидејќи сѐ тоа согорува пред да падне на земја. Само големиот вселенски отпад претставува мала опасност за луѓето и инфраструктурата на копното и водата.

вселенски отпад – Kurir.mk

САД ја изрекоа првата казна за вселенски отпад

Кина повторно под критики за својот вселенски отпад