ж – Kurir.mk

Топлотниот бран во Мексико усмрти најмалку сто луѓе

Дарко Андоновски — Fri, 30 Jun 2023 07:43:41 +0000

Најмалку сто луѓе починаа во изминатите две недели во Мексико поради топлото време. Температурата на воздухот во некои делови од земјата се искачи приближно до 50 степени Целзиусови, соопшти Министерството за здравство. Тринеделниот топлотен бран овој месец ја оптовари електричната мрежа со рекордна потрошувачка, а во некои области е прекината и наставата. Повеќе од две третини од смртните случаи се случиле во периодот од 18 до 24 јуни, а останатите претходната недела. Во истиот период минатата година регистриран е само еден смртен случај предизвикан од топлото време. Околу 64 отсто од смртните случаи се случиле во северната држава Нуево Леон, која граничи со Тексас. Изминатите денови температурата на воздухот се намали откако почна сезоната на дождови, но во северниот дел на Мексико сè уште преовладува топлото време. Во градот Акончи, мексиканската државата Сонора пред два дена измерени се рекордни 49 степени Целзиусови.

Молдавија забрани истакнување на руските воени симболи „Z“ и „V“

Магдалена Андонова — Thu, 14 Apr 2022 17:54:49 +0000

Молдавскиот Парламент денеска усвои закон со кој се забранува истакнување на руски воени симболи и се предвидуваат казни за прекршителите. Законот забранува истакнување на буквите „Z“ и „V“, кои руските сили ги користат за време на инвазијата врз Украина, како и рускиот воен симбол „Георгиевска лента“ (црно-портокалова лента), пренесува Бета повикувајќи се на руски медиуми. За јавно истакнување на овие симболи во Молдавија е предвидена казна од 250 до 500 долари. Пратениците наведоа дека законот е усвоен во контекст на рускиот напад врз Украина. Пратениците на Блокот на комунисти и социјалисти беа против донесување на Законот, и тие во знак на протест не присуствуваа на гласањето. Проруските граѓани на Молдавија во петокот демонстрираа во Кишињев против усвојувањето на законот, предводени од поранешниот проруски претседател Игор Додон. Додон рече дека на 9 мај ќе излезе на улица со „Георгиевска лента“, „заедно со десетици илјади луѓе кои ќе го прослават Денот на победата над фашизмот“ во Втората светска војна. Лентата е дел од високите воени одликувања што ги доделувале Руската империја и Советскиот Сојуз, а ги доделува и Руската Федерација. Како симбол, тој доби значење во Русија во 2005 година, како одговор на „Портокаловата револуција“ во Украина. Во Русија „Георгиевска лента“ ја носат и граѓани како патриотски симбол и како јавен симбол на поддршка за Владата, а во Украина и балтичките држави Естонија, Летонија и Литванија, лентата се смета за симбол на рускиот национализам и сепаратизам. (МИА)

ФОТО: Што значи симболот „З“ на руските тенкови и воената опрема?

Ристе Здравков — Thu, 24 Feb 2022 12:46:07 +0000

Мистериозна буква „З“ која се гледа на руските тенкови и вооружени автомобили би можела да означува „нема назад“. Повеќе теории за значењето на симболот беа споделени после инвазијата на Путин и од снимките кои се појавија од тенковите со буквата. Руските сили беа видени пред украинската граница денови пред нападот. На објавените снимки на интернет се гледаат тенкови, самоодна артилерија, ракетни фрлачи, камиони за снабдување кои се движат на дистанца од 6 до 25 милји од украинската граница. Сите се обележани со сличен симбол со буквата „З“ во коцка. Извори од армијата велат дека симболот покажува дека војската е спремна за напад. Извор во Киев за „The Sun“ изјавил дека симболот значи дека последните подготовки се при крај. Рускиот аналитичар Роб Ли има теорија дека симболот реферира на контингенти на инвазивните сили во украинските региони. „Изгледа дека руската војска остава маркери близу границата, во овој случај буквата „З“ на нивните возила за да ги идентификува различните работни групи или ешалони“, напиша тој на Твитер. Други теории кои што кружат онлајн се дека симболот е кратенка од „Одредот на Зоро“, името на инвазивните сили, или пак е тајно име за нова единица. Дел од мистеријата е и фактот што буквата „З“ е на латиница а не е на кирилична азбука која се користи во Русија и Украина. Поранешниот офицер Дејвид Кајм смета дека „З“ би можело да го означува името на украинскиот претседател Володимир Зеленски. Вели дека информацијата ја добил од групата Вагнер, која е брутална паравоена организација која Путин ја користи за црни операции во странство. Кајм додава и дека некои извори во армијата веруваат дека „З“ означува „нема назад“.

Четвртиот бран на пандемијата е „бранот на невакцинираните“

Дарко Андоновски — Wed, 08 Sep 2021 16:10:27 +0000

Осумдесет и шест проценти од сериозно болните пациенти со Ковид-19 во најнаселената германска покраина Северна Рајна-Вестфалија не се вакцинирани. Одбивањето на имунизација на некои Европејци е во основата на четвртиот бран на инфекцијата, се наведува во анализа на Дојче веле. Поради драстично растечката инциденца на невакцинирани против коронавирус, медицинските лица и политичарите во Германија предупредуваат на претстојниот „бран на невакцинирани“. – Четвртиот бран е во тек. Тој ќе биде поспецијален бидејќи ќе влијае на невакцинираните луѓе. Луѓето треба да бидат свесни дека оние кои не се вакцинираат, кога било ќе се заразат. Некои од овие луѓе ќе се разболат, понекогаш со опасност по животот, изјави шефот на Универзитетската клиника во Есен, професор Јохан Вернер. Минатата недела, министерот за здравство на Северна Рајна-Вестфалија, Карл-Јозеф Лауман истакна дека 86 отсто од сериозно болните пациенти со коронавирус, кои се хоспитализирани во покраината, не биле вакцинирани. Локалните здравствени власти испитуваат дали е можно да се води посебна статистика за морбидитетот кај неимунизираните лица. Според достапните информации, инциденцата кај вакцинираните е значително помала. Портпарол на Министерството за здравство на Северна Рајна-Вестфалија рече дека веќе може да се зборува за „пандемија меѓу невакцинираните“. Во јули и август бројот на лица заразени со коронавирус на Универзитетската клиника во Есен, која е еден од најголемите германски центри за лекување на Ковид-19, значително се зголеми. Три четвртини од вкупно 142 пациента не биле вакцинирани во овој период, а половина од нив биле на возраст под 50 години. Покрај 75 проценти од 142-те лица за кои станува збор, кои биле хоспитализирани во јули и август и кои не биле вакцинирани, 11 проценти биле вакцинирани со само една доза, а 13 проценти биле целосно вакцинирани. Директорот на Универзитетската клиника во Есен, исто така, вели дека зголемениот број ковид-пациенти примени во болницата ќе има негативно влијание врз грижата за сите други пациенти.