забрането пушење – Kurir.mk

Доколку сте пушач и планиравте одмор во Барселона ова мора да го знаете – дадена е строга забрана, ќе се плаќа и казна за непочитување!

Магдалена Андонова — Fri, 01 Jul 2022 10:30:51 +0000

Градот Барселона од денеска ја спроведува новата одлука за забрана за пушење на плажите во ова туристичко место. Последниве три месеци граѓаните беа предупредени за оваа нова мерка, која не дозволува цигари на 10 градски плажи. Градот минатото лето направи проба со забрана на четири плажи, па забележано е значително намалување на бројот пушачи на плажите, иако тие што ја прекршиле мерката не биле казнувани. Барселона е првиот поголем град во Шпанија којшто го забрани пушењето на плажите, но и други градови низ целата земја се стремат кон тоа. Истражување спроведено од Градскиот совет на административното средиште на Каталонија покажа дека повеќе од 80 отсто од жителите поддржуваат забрана на пушење на плажите. Пушењето не само што му штети на здравјето на луѓето, туку може да влијае лошо и на животната средина. Догорчињата од цигари се распаѓаат со децении. Истражувањата покажаа дека отпадот од цигарите е најзастапен отпад на плажите на Западното Средоземје, што претставува 25 отсто од сите собрани предмети. Во Барселона казните за прекршување на новата забрана ќе чинат 30 евра. (МИА)

Австрија забрани пушење во сите угостителски објекти

Дарко Андоновски — Thu, 04 Jul 2019 11:42:43 +0000

Австрискиот парламент, на летната сесија, последна пред предвремените избори, по долгата и емотивна дебата, донесе одлука за забрана за пушење во сите угостителски објекти и објекти каде што се консумира храна. Одлуката ќе стапи на сила на 1 ноември. Забраната важи и за фестивали организирани од клубови кои претходно биле исклучени од забраната, а пушењето ќе биде дозволено само во кафулиња и слични простори на отворено. Не се забранува само пушење „класични цигари и пури”, туку и електронски цигари. Само Партијата на слободата на Австрија (ФПО), која секогаш се спротивставува на оваа забрана, гласаше против законот.

Каталонија забранува пушење во автомобили, на стадиони и на автобуски станици

Катерина Бојаџиева — Tue, 11 Jun 2019 07:50:23 +0000

Владата на шпанската област Каталонија планира да го забрани пушењето во приватните автомобили, на стадиони и автобуски постојки, а новите закони може да влезат во сила следната година. Забраната ќе важи не само за обичните цигари, туку и за електронските и други средства за пушење тутун. Новите правила се последица на наглото зголемување на бројот на пушачи во Каталонија. Од 1990 до 2017 година нивниот број беше намален на 24 отсто, но минатата година се зголемил на 25,6 проценти. Заострувањето на правилата за пушење се применува во сите земји од ЕУ. Се забранува пушење на јавни места, се воведуваат нови акцизи на тутунските производи. Париз го забрани пушењето во десетици паркови и градини, а Грција на некои плажи.