загинување – Kurir.mk

18 години од смртта на претседателот Трајковски

Дарко Андоновски — Sat, 26 Feb 2022 08:07:21 +0000

Во Скопје и во Ротимље денеска ќе биде одбележана 18-годишнината од смртта на поранешниот претседател Борис Трајковски кој заедно со членови од неговиот Кабинет загина во авионска несреќа во близина на Мостар. На гробот на Трајковски и на вечните почивалишта на загинатите членови на делегацијата на градските гробишта во Бутел, како што е најавено, цвеќе ќе положи претседателот на државата Стево Пендаровски, а делегации од Кабинетот на Претседателот ќе положат цвеќе и пред спомен-обележјето на местото на несреќата во Ротимље, Босна и Херцеговина и на гробот на еден од членовите на делегацијата, во Велес. Во авионската несреќа, што се случи на 26 февруари 2004 година, загинаа претседателот Борис Трајковски и осумчлена делегација која патуваше на Меѓународна конференција во Мостар. Покрај претседателот Борис Трајковски, животот го загубија портпаролот Димка Илкова Бошковиќ, советниците Ристо Блажевски и Анита Лозановска, претставникот на Министерството за внатрешни работи Миле Крстевски, телохранителите Аце Божиновски и Борис Велиновски, како и пилотот и копилотот на авионот.

Сто и седумнаесет години од загинувањето на Гоце Делчев

Ивона Петрова — Mon, 04 May 2020 05:44:14 +0000

Револуционерот Делчев на денешен ден во 1903 бил убиен од турската војска во селото Баница, на пат кон Сер. Визионерот кој пред повеќе од еден век го разбра светот како поле за културен натпревар на народите е роден на 4 февруари 1872 година во Кукуш, во семејството на Султана и Никола. Се школувал во гимназијата во Солун и на Воената академија во Софија. Учителствувал во Штип, а како член на Централниот комитет на ТМОРО работел на создавање мрежа на бази, комитети и комитски чети на Организацијата. Учествувал на Солунскиот конгрес на ВМРО (1896), а до 1901 година бил задграничен претставник на ВМРО во Софија. По убиството во 1903-та, неговите посмртни останки се чувале во Баница, до 1917 година, кога биле пренесени во Ксанти, а потоа во Софија. До 1923 година, ковчежето со коските се чувало во домот на Михаил Чаков. Останките на Делчев на 11 октомври 1946 година биле пренесени во црквата „Свети Спас“ во Скопје.

Осумнаесет години од загинувањето на армиските резервисти кај Љуботенски бачила

Дарко Андоновски — Sat, 10 Aug 2019 07:05:16 +0000

По повод 18-годишнината од загинувањето на осумтемина армиски резервисти кај месноста Љуботенски бачила, делегација од кабинетот на Претседателот на Република Северна Македонија, денеска ќе положи цвеќе на спомен-обележјата во селата Волково и Љубанци. Делегацијата ќе положи цвеќе и на споменикот во касарната „Илинден“ во Скопје. На 10 август 2001 година, воено товарно возило на Армијата на патот кај месноста Љуботенски бачила нагази на две противтенковски мини. Животот го загубија Томе Бадаровски, Гоце Чанкуловски, Бранко Јанев, Томислав Настевски, Марјанчо Бошковски, Ивица Златевски, Томе Димовски и Раде Јанковски, сите припадници на резервниот состав на Армијата од гарнизонот Скопје.

Осумнаесет години од загинувањето на 10-те армиски резервисти кај Карпалак

Дарко Андоновски — Thu, 08 Aug 2019 06:38:39 +0000

Со положување цвеќе во месноста Карпалак, каде што во 2001 година во заседа загинаа десет воени резервисти од Прилеп, денеска ќе бидат одбележани 18 години од трагичниот настан. Одбележувањето почна вчера со оддавање почит на бранителите во прилепската касарна „Мирче Ацев“. Во Прилеп и во населените места денеска од 7:30 часот ќе се положи цвеќе и ќе им биде оддадена почит на загинатите на нивните вечни почивалишта во Прилеп и во населените места. Во 10 часот ќе се одржи панихида за загинатите во црквата „Света Петка“ во прилепската населба Точила, а од 13 часот е централното чествување пред споменикот „Карпалак“ во центарот на Прилеп. На 8 август 2001 година на патот Скопје – Тетово во близина на селото Групчин, кај месноста Карпалак од заседа беше нападнат конвој на Армијата. Притоа загинаа десет армиски резервисти: капетан Нане Наумоски, поручник Сашо Китановски и воените обврзници Горан Миновски, Ердоган Шабановски, Љубе Грујоски, Бранко Секулоски, Дарко Велјановски, Пеце Секулоски, Веби Рушитовски и Марко Деспотовски, сите од Прилеп и Прилепско. Најмладата жртва во масакрот беше 21-годишниот Шабановски, а највозрасен Наумоски, кој загина на 48 години.

17 години беа пријатели на 17-ти пред еден месец заминаа во смрт: Синот на музичарот Мирсад со емотивна порака еден месец по трагедијата

Дарко Андоновски — Sun, 17 Mar 2019 13:50:23 +0000

Пред точно еден месец во тешка сообраќајна несреќа настрадаа музичарот Мирсад Кериќ и српскиот пејач Шабан Шаулиќ, а по тој повод синот од Мирсад напиша емотивна порака на Фејсбук. Мирсад Кериќ бил голем пријател на Шабан Шаулиќ 17 години, а потоа во Германија се случи тешка сообраќајна несреќа, во која двајцата ги изгубија своите животи. Од тешката сообраќајна несреќа која се случи пред еден месец, семејството Кериќ никако не може да ја победи болката за изгубениот татко, сопруг и син. Синот од Мирсад Кериќ на својот Фејсбук профил напиша емотивна порака во која ќе ви го стопи срцето: -Тато денеска е месец дена од кога те нема... Недостигаш. Но, ти засекогаш ќе останеш во нашите срца. Најдобар татко во светот, напиша неговиот син Денис.

Седумнаесет години од загинувањето на бранителите кај Љуботенски Бачила

Дарко Андоновски — Fri, 10 Aug 2018 05:33:25 +0000

Македонија денеска одбележува седумнаесет години од загинувањето на осуммината припадници на Армијата на Република Македонија кај месноста Љуботенски Бачила во 2001 година. На 10 август 2001 година, воено товарно возило на АРМ на патот кај месноста Љуботенски Бачила нагази на две противтенковски мини. Животот го загубија Томе Бадаровски, Гоце Чанкуловски, Бранко Јанев, Томислав Настевски, Марјанчо Бошковски, Ивица Златевски, Томе Димовски и Раде Јанковски, сите припадници на резервниот состав на АРМ од гарнизонот Скопје.

Седумнаесет години од загинувањето на 10-те бранители на Карпалак

Дарко Андоновски — Wed, 08 Aug 2018 07:32:15 +0000

Со положување цвеќе пред спомен-плочата во месноста Карпалак и во комплексот „Карпалак“ во Прилеп денеска ќе бидат одбележат 17 години од загинувањето на 10 – те бранители на Карпалак во 2001 година. Кај месноста Карпалак и пред комплексот во центарот на Прилеп венци ќе положат собраниска делегација во состав Кети Смилевска и Татјана Лалчевска и заедничка делегација од Министерството за одбрана и Армијата на Република Македонија предводена од државниот секретар, Драган Николиќ и директорот на ГШ на АРМ, генерал-мајор Зоран Милески. Цвеќе ќе положат и претставници од здружението „Карпалак“ и од општина Прилеп кои оваа година се организатори на одбележувањето во чест на делото на загинатите прилепски бранители. Вчера делегации на семејствата на загинатите, на преживеаните бранители на Општината, на општинскиот совет и на АРМ, положија цвеќиња пред спомениците во кругот на касарната „Мирче Ацев“, како и пред спомен плочата на загинатите бранители во селото Лениште. Централното чествување ќе се одржи денеска во 13 часот пред спомен плочата кај споменикот „Карпалак“ во центарот на Прилеп. Бројни владини, собраниски, општински, како и делегации од институции, претставници на семејствата на бранителите, политички партии, здруженија и граѓани ќе положат свеќи цвеќиња и ќе им оддадат достојна почит на загинатите прилепчани. На 8 август 2001 година на патот Скопје - Тетово во близина на селото Групчин кај месноста Карпалак од заседа беше нападнат конвој на Армијата на Република Македонија, при што загинаа десет армиски припадници: Нане Наумоски (48), резервен капетан, Сашо Китановски (40), резервен поручник, Горан Миновски (29), воен обврзник, Ердоган Шабановски (21), воен обврзник, Љубе Грујоски (32), воен обврзник, Бранко Секулоски (43), воен обврзник, Дарко Велјановски (27), воен обврзник, Пеце Секуловски (31), воен обврзник, Веби Рушитовски (26), воен обврзник и Мирко Деспотовски (27), воен обврзник, сите од Прилеп и Прилепско.