Жаир Болсонаро – Kurir.mk

Суд во Бразил му забрани на поранешниот претседател Болсонаро да се кандидира за функција до 2030 година

Тале Кристо — Fri, 30 Jun 2023 18:35:51 +0000

Судски совет денеска изгласа дека поранешниот бразилски претседател Жаир Болсонаро нема право да се кандидира за функција до 2030 година, бидејќи судиите заклучија дека тој ја злоупотребил својата моќ и неосновано го доведе во прашање електронскиот систем на гласање. Одлуката со која на 68-годишниот Болсонаро ќе му биде забрането да се кандидира до 2030 година, значи дека му е лишена шансата за каква било политичка иднина и можноста да се врати на власт. Четворица од седумте судии на највисокиот изборен суд во земјата се согласија дека Болсонаро ги злоупотребил своите овластувања користејќи владини комуникациски канали за да ја промовира сопствената кампања и да фрли сомнеж врз гласањето. Случајот се фокусира на состанокот на 18 јули 2022 година, кога Болсонаро ги искористи владините службеници, државната телевизија и претседателската палата во Бразилија за да им каже на странските амбасадори дека електронскиот систем за гласање во земјата е наместен. Експертот за изборно право Марлон Реис рече дека Болсонаро ја злоупотребил моќта на својата позиција со свикување на состанокот, бидејќи ги користел владините службеници и владините згради за да победи на изборите и ги идентификувал интересите на земјата со оние на неговата кампања. Болсонаро ќе може да поднесе жалба до Врховниот суд. Тој, исто така, се соочува со други правни проблеми, вклучително и кривична истрага.

Бразилската полиција упадна во домот на Болсонаро – уапсени три лица од неговото најблиско опкружување

Тале Кристо — Wed, 03 May 2023 14:33:03 +0000

Бразилската полиција изврши претрес во куќата на поранешниот бразилски претседател Жаир Болсонаро и уапси еден од неговите најблиски соработници. Потполковникот Мауро Сид Барбоса, опишан од бразилскиот печат како „десната рака“ на Болсонаро, е уапсен заедно со уште пет лица. Покрената е истрага поради наводно фалсификување документи за вакцинација против коронавирусот. Гардијан пренесува дека полицијата извршила претрес на неколку адреси во Бразилија и Рио де Жанеиро. Приведени се и двајца од обезбедувањето на Болсонаро. Мобилните телефони на Болсонаро и неговата сопруга Мишел се одземени, а Болсонаро наводно одбил да им ја даде лозинката на полицајците. Инспекторите веруваат дека голем број официјални записи за вакцинација биле фалсификувани во базата на податоци на Министерството за здравство за да се изготват лажни сертификати за вакцинација за да се овозможи меѓународно патување, вклучително и во САД. Наводно, меѓу фалсификуваните записи се и оние на Болсонаро и неговата 12-годишна ќерка Лаура. Лажните податоци најверојатно биле вметнати во базата на податоци меѓу ноември 2021 и декември минатата година. Болсонаро беше поразен на претседателските избори од Лула да Силва минатиот октомври. За време на неговиот мандат, Болсонаро се соочи со меѓународни критики за неговото несовесно и антинаучно справување со пандемијата. Во Бразил, повеќе од 700.000 лица починаа од коронавирусот, а екстремно десничарскиот политичар постојано ги поткопуваше напорите за сузбивање и вакцинирање против болеста. Неколку пати повтори како одбива да се вакцинира. Лула да Силва минатата недела рече дека Болсонаро треба да биде изведен пред суд за неговите постапки за време на пандемијата.

Лула да Силва: Болсонаро е „мозокот“ на нападот на владините згради на 8 јануари

Ивона Петрова — Fri, 03 Feb 2023 07:38:08 +0000

Бразилскиот претседател Луис Инасио Лула да Силва изјави дека е сигурен дека неговиот претходник Жаир Болсонаро е „мозокот“ на нападот на владините згради на 8 јануари во главниот град на Бразил. Лула да Силва додаде дека на овој начин Болсонаро сакал да изврши државен удар. „Денес сфаќам и го кажувам јасно и гласно: овој граѓанин (поранешниот претседател Болсонаро) го подготви државниот удар“, изјави актуелниот бразилски претседател во интервју за бразилската телевизија „Рете ТВ“. На 8 јануари, илјадници поддржувачи на Болсонаро, незадоволни од победата на Лула да Силва на претседателските избори изгубени од лидерот на екстремната десница, упаднаа во владините згради во Бразил, во претседателството, Врховниот суд и Конгресот и предизвикаа материјална штета. Бразилскиот судија одлучи да го вклучи поранешниот лидер, кој на крајот на декември од Бразил замина на Флорида, во истрагата која има за цел да открие кој стои зад овие дејствија. „Сигурен сум дека Болсонаро е активно вклучен во ова и се обидува сè уште да биде вклучен“. Тие сакаа да го направат овој хаос уште на 1-ви јануари, но сфатија дека нема да можат да го направат тоа бидејќи имаше многу полиција и многу луѓе на улиците“, рече Лула да Силва.

Болсонаро хоспитализиран во САД со болки во стомакот

Катерина Бојаџиева — Mon, 09 Jan 2023 19:24:45 +0000

Поранешниот претседател на Бразил, Жаир Болсонаро е хоспитализиран во Орландо во американската сојузна држава Флорида поради силни стомачни болки, објавија денеска бразилските медиуми без да наведат извори. Болсонаро, поранешен екстремно десничарски претседател, го напушти Бразил два дена пред крајот на неговиот мандат за да ја избегне инаугурацијата на новиот претседател на 1 јануари, левичарот Луис Инасио Лула да Силва. Поранешниот претседател на Бразил бил примен во болницата во Орландо поради „тешки стомачни болки“, пишува весникот „Глобо“, еден ден откако приврзаниците на Болсонаро упаднале во државните институции во Бразил. Болсонаро, кој негираше вмешаност во нападот, има 67 години и има сериозни последици од прободувањето со нож во септември 2018 година. Беше избоден за време на претседателската кампања и изборите на кои победи. Оттогаш, Болсонаро има здравствени проблеми. Неколку пати бил итно хоспитализиран, а од 2018 година шест пати бил опериран.

Болсонаро: Уништувањето јавни објекти не е во согласност со правото на протест

Ивона Петрова — Mon, 09 Jan 2023 07:02:01 +0000

Поранешниот бразилски претседател, Жаир Болсонаро, чии приврзаници вчера упаднаа во Националниот конгрес, претседателската палата и Врховниот федерален суд, на Твитер напиша дека „нападите и уништувањето јавни објекти“ е во спротивно правото на мирен протест. Во друг твит Болсонаро, кој се наоѓа во во САД, ги отфрли „недокажаните обвинувања“ на неговиот наследник Лула, дека за „фашистичкиот вандализам“ е виновна реториката на неговиот претходник. И партијата на поранешниот претседател ги осуди постапките на неговите приврзаници, јави ДПА. „Денес е тажен ден за бразилската нација. Денешните настани во Бразил се срам за сите нас, тие не ја претставуваат нашата партија, тие не го претставуваат Болсонаро“, изјави лидерот на Либералната партија, Валдемар Кошта Нето.

Приврзаници на бразилскиот претседател Болсонаро се обидоа да упаднат во зградата на сојузната полиција

Ивона Петрова — Tue, 13 Dec 2022 07:07:03 +0000

Поддржувачи на екстремно десничарскиот бразилски претседател Жаир Болсонаро денеска се обидоа да упаднат во седиштето на федералната полиција во главниот град на земјата на денот кога официјално беше потврдена изборната победа на левичарскиот лидер Луис Инасио Лула да Силва. Според западни медиуми, приврзаници на Болсонаро се судрија со полицајците пред седиштето на федералната полиција. Полицијата употреби шок-бомби и солзавец за да ја растера толпата. Поддржувачите на Болсонаро запалија автобуси и автомобили во областа. Според судијата што го нареди апсењето, избувнувањето на насилството доаѓа откако приврзаник на Болсонаро беше приведен поради наводно организирање „антидемократски дејствија“ придружени со насилство. Федералниот изборен суд синоќа официјално го прогласи Лула да Силва за победник на претседателските избори. По неколку месеци неосновани тврдења дека бразилскиот изборен систем е подложен на измами, Болсонаро ниту го призна поразот, ниту формално го блокираше предавањето на власта на Лула да Силва.

Болсонаро ги оспори резултатите од претседателските избори во Бразил

Ивона Петрова — Wed, 23 Nov 2022 06:54:28 +0000

Бразилскиот претседател во заминување, Жаир Болсонаро, ги оспори резултатите од минатомесечните претседателски избори, што ги загуби од левичарскиот кандидат Луис Ињасио Лула да Силва, поради нерегуларности на некои избирачки места, се наведува во жалбата поднесена до федералниот Изборен суд. Британските медиуми пренесуваат дека претставници на десничарската коалиција на Болсонаро, која ја поднесоа жалбата, изјавија дека нивната ревизија на пребројувањето на гласовите открила дефекти во некои од постарите гласачки машини што се користат во Бразил. -Имаше знаци на сериозни дефекти на неколку постари модели на гласачки машини што предизвикуваат сомнежи и го оневозможуваат потврдувањето на добиените резултати, изјавија од коалицијата на Болсонаро. Оттаму додаваат дека поради ова гласовите од тие модели на машини за гласање мора да се „поништат“, пренесуваат британските медиуми. Болсонаро ја загуби изборната трка со тесна разлика, освојувајќи 49,1 отсто од гласовите, додека Лула да Силва доби 50,9 отсто. На едни од најнеизвесните претседателски избори од враќањето на бразилската демократија во 1985 година, Болсонаро загуби на избори првпат во неговата 34-годишна политичка кариера, на кои, меѓудругото, победи во седум трки за место во Долниот дом на Конгресот – бразилскиот Парламент, додаваат британските медиуми.

Болсонаро ги повика демонстрантите да прекинат со блокадите на патиштата, но и да продолжат со протестите

Тале Кристо — Thu, 03 Nov 2022 14:43:49 +0000

Бразилскиот претседател, Жаир Болсонаро, кој загуби од левичарскиот претставник Луис Игнасио да Силва на неодамнешните избори, апелираше до илјадниците демонстранти незадоволни од изборните резултати да ја прекинат блокадата на патиштата и да најдат други начини на протест, притоа поздравувајќи ги собирите на кои се повикува на воена интервенција за негово останување на власт. Демонстрантите вчера во Рио де Жанеиро побараа од армијата да го задржи Болсонаро, независно што веќе од неговата админстрација се испратени сигнали за подготвеност за трансфер на власта. Болсонаро рече дека блокирањето патишта не е дел од „легитимните” протести и ги повика демонстрантите да изберат други начини на изразување на нивното незадоволство, јавува „Би-Би-Си“. Поддржувачите на претседателот се собраа пред зградата на Источната воена команда во Рио де Жанеиро, не прифаќајќи ги изборните резултати според кои Болсонаро загуби од Да Силва во многу неизвесен и тензичен изборен натпревар, освојувајќи 49,1 отсто од гласовите на гласачите во вториот круг на изборите, во споредба со Да Силва кој освои 50,9 отсто. Во меѓувреме бразилските возачи на камиони кои го поддржуваат Болсонаро продолжуваат да блокираат голем број патишта ширум земјата во знак на протест против неговиот изборен пораз, иако Врховниот суд им нареди да ја прекинат блокадата на снабдувањето со храна и гориво. „Знам дека сте вознемирен. И јас сум. Но, мораме да ја држиме главата горе. Сакам да упатам апел, расчистете ги патиштата. Блокирањето на патиштата е спротивно на правото на слободно движење загарантирано со нашиот Устав“, изјави Болсонаро во видеото објавено синоќа на Твитер. Тој сепак ги охрабри демонстрантите да изнајдат други начини да демонстрираат и ги поздрави различните собири за негова поддршка, вклучително и оние кои повикуваат на воена интервенција за негово задржување на власт. Болсонаро завчера рече дека „ќе продолжи да ги исполнува сите обврски согласно Уставот“, но во кусото обраќање не го призна поразот, ниту пак ги оспори изборните резултати. Шефот на Кабинетот на претседателот, Чиро Ногеира, изјави дека во име на Болсонаро ќе соработува со новите власти и оти чека преодниот тим на Лула да Силва да го започне трансферот на власта.

Болсонаро не го призна поразот на претседателските избори во Бразил, но покренал трансфер на власта

Тале Кристо — Tue, 01 Nov 2022 21:40:18 +0000

Бразилскиот претседател Жаир Болсонаро денеска не го призна поразот на изборите, но сепак го овластил началникот на Генералштабот на бразилската армија да го покрене процесот на трансфер на власта. Во кусото обраќање, прво од поразот на изборите пред два дена, Болсонаро воопшто не ги спомна изборните резултати, но истакна дека ќе продолжи да ги почитува правилата на Уставот. Болсонаро ја загуби неделната изборна трка со тесна разлика, освојувајќи 49,1 отсто од гласовите наспроти 50,9 отсто колку што освои противкандидатот на левицата Лула да Силва. Тоа беше најтешката претседателска трка од враќањето на бразилската демократија во 1985 година, и првпат Болсонаро да загуби избори во неговата 34-годишна политичка кариера, вклучувајќи ги тука и седумте трки за мандат во Долниот дом на бразилскиот Парламент. Слично на поранешниот американски претседател Доналд Трамп кому Болсонаро отворено му се восхитува, сега веќе поранешниот екстремно десничарски претседател постојано ја доведува во прашање веродостојноста на изборниот систем, без притоа да обезбеди каков било доказ дури и кога тоа ќе го наложи судот. Изминатите денови неговите поддржувачи блокираа стотици платишта низ Бразил, а Врховниот суд денеска и нареди на полицијата веднаш да ги отстрани блокадите. Полицијата соопшти дека досега отстранила 306 блокади, но дека се уште има повеќе од 260 блокирани сообраќајници. Стравувањата од ескалација на ситуацијата се зголемуваат, кога левичарското „Движење без земја“, инаку клучен сојузник на Да Силва, упати повик до своите активисти да организираат демонстрации и да ги блокираат патиштата. Болсонаро ужива широка поддршка од полициските сили, а Работничката партија на Да Силва го обвини Болсонаро дека во кампањата ја ангажирал полицијата да создава сообраќаен метеж и да ги одвраќа луѓето да гласаат на денот на изборите. Видео-снимки објавени преку социјалните мрежи покажуваат дека имало случаи властите да запираат автобуси.

Нејмар го поддржа Болсонаро во претседателската трка

Магдалена Андонова — Fri, 30 Sep 2022 07:28:45 +0000

Бразилската фудбалска суперѕвезда Нејмар во видео објавено на ТикТок му даде поддршка на актуелниот шеф на државата Жаир Болсонаро, три дена пред претседателските избори во Бразил. Напаѓачот на ПСЖ кој има повеќе од осум милиони претплатници на ТокТок и речиси 180 милиони на Инстаграм, во видеото ги повика бразилските гласачи да гласаат за Болсонаро и да го заокружат бројот 22 на гласачкото ливче. Болсонаро веднаш го сподели видеото на Нејмар на својот Твитер профил. Пред еден месец, бразилскиот претседател, исто така, на Твитер објави негова фотографија со фудбалска топка која му ја подари Нејмар. Последните анкети во Бразил покажуваат предност на поранешниот левичарски претседател Лула да Силва. За него според анкетите в недела ќе гласаат 47 отсто од избирачите, додека десничарот Болсонаро може да се надева на поддршка од 33 отсто. (МИА)