закон за амнестија – Kurir.mk

Милошоски: Законот за амнестија нема хумана цел туку политичка, затоа ВМРО-ДПМНЕ ќе го блокира

Ивона Петрова — Fri, 06 Oct 2023 19:47:48 +0000

„Предлог законот за амнестија ние кажавме дека и тоа што го најавивме како можен бојкот на Собранието, не е одлука но сега за сега најава доколку овој предлог закон се стави во процедура со европско знаменце. Штом нема да се носи со европско знаменце иако оваа власт не знае што прави бидејќи сме имале вакви слични ситуации. Ако се сеќавате на измени на законот за игри на среќа и лотарии прво влезе без европско знаменце во Собранието, а тоа беше пред отприлика година дена за сега да гледаме дека влегува со европско знаменце“, истакна Антонијо Милошоски, пратеник и член на ИК на ВМРО-ДПМНЕ во емисијата „Трилинг“ на 24 телевизија. Милошоски додаде дека власта некогаш знае одредени закони да ги повлече откако ќе види дека нема простор за нивно поминување и да ги запечати со европско знаменце за да ја скрати дискусијата и можноста законскиот текст да биде корегиран. „Доколку овој закон за амнестија не се носи со европско знаменце тогаш ние ќе бидеме присутни и ќе го блокираме законот со долги дискусии, со многубројни амандмани“, заклучи Милошоски. „Зошто сметаме дека овој закон не треба да се донесе? Затоа што се работи за еден закон кој што го руши начелото на правда и ги наградува оние кои што биле санкционирани од правосудниот систем и мислиме дека тоа наградување е селективно направено во комуникација помеѓу двете партии би рекол Алијанса на Албанците и ДУИ. Кои што од политички опоненти станаа сега политички сојузници. И сметаме дека амнестирањето на нарко дилери, на луѓе кои што извршувале насилство, разбојништво или некои биле помагатели како на случајот кај Смилковското езеро при убиството на петте недолжни граѓани навистина не треба да биде дел од законскиот систем на Македонија. И за тоа сметаме дека треба да се попречи“, заклучи Милошоски. Тој рече дека ВМРО-ДПМНЕ тоа што го има како сознание е тоа што ДУИ и Алијанса на Албанците знаат точно кој ќе биде ослободен и тие луѓе планираат да ги искористат во изборната кампања за време на парламентарните и претседателски избори следната година. Милошоски посочи дека смета дека законот за амнестија нема за цел хумана мисија на условно кажано ресоцијализација или растоварување на затворските установи туку дека има политичка мисија каде што политичката елита на Алијанса на Албанците и ДУИ се договара со подземјето во Република Македонија за да си завршат едни на други услуга.

Лефков: ВМРО-ДПМНЕ ќе го блокира законот за амнестија со 5.000 амандмани

Ивона Петрова — Fri, 06 Oct 2023 16:48:18 +0000

Во вечерашната емисија „За или против“ на Алфа ТВ гостуваше пратеникот од редовите на ВМРО-ДПМНЕ, Миле Лефков кој што во однос на законот за амнестија истакна дека ВМРО-ДПМНЕ ќе го блокира законот за амнестија со 5.000 амандмани, бидејќи законот е резултат на коалициони пазарења а не на реалните потреби на граѓаните. „Серијата на штетни закони кои што пристигаат во Собрание, најверојатно коалиционите неприлики кои што им се случуваат во влада за жал завршуваат во собрание со непринципиелни закони, видовме како кривичниот закон беше најавен и пристигнат со европско знаменце, видовме како се подготвува уште еден закон за амнестија кој што повторно не знаеме зошто е, не е објаснето доволно, пристигнува во собрание по скратената постапка. Скратената постапка значи дека ќе се прескокне оној дел каде што имаме општа и теоретска расправа, која е потребата на законот, и директно ќе се оди на амандманска. Видовме како премиерот самиот најавува амандмани со кои што тој ќе интервенира, притоа бришејќи ја би рекол онаа поделба на власта помеѓу извршна и законодавна и затоа најавивме дека ние ќе направивме се за да го блокираме овој штетен закон, за таа цел ќе бидат изработени амандмани, со што ќе се обидеме да го блокираме ова законско решение кое што стигна по скратена постапка, ќе видиме што ќе се случува“, нагласи Лефков. Лефков истакна дека ВМРО-ДПМНЕ ќе го блокира законот за амнестија со пет илјади амандмани. „Од прилика се подготвува бројка на едно 5 000 амандмани, а тоа кога ќе биде закажана седницата знаете зависи од султанот на собранието од Талат Џафери, се уште не е најавено и покрај тоа што е пристигнато на мејловите како материјал немаме друго известување за тоа кога ќе биде ставено на седница“, истакна Лефков. Пратеникот од редовите на ВМРО-ДПМНЕ, Лефков додаде и дека закони кои што не се резултат на реалните потреби на граѓаните, и закони кои што не се објаснети туку се резултат на коалициони пазарења и треба да бидат блокирани. „Закони кои што не се резултат на реални потреби на граѓаните, закони кои што не се објаснети, закони кои што не се донесуваат во корист практично на никого, туку се резултат на коалициони пазарења и треба да бидат блокирани“, нагласи Лефков. Лефков посочи и дека не може со еден закон за амнестија да се компензира нефункционалност на цели институции, мислејќи на судството, обвинителството, законот за пробација и на тој начин власта да се обидува да го компензира хаосот кој го прави со државата.

Мицкоски: Ќе го блокираме Законот за амнестија кој го пуштија по скратена постапка

Ивона Петрова — Wed, 04 Oct 2023 17:46:30 +0000

ВМРО-ДПМНЕ ќе го блокира Законот за амнестија кој власта го пушти по скратена постапка изјави претседателот на ВМРО-ДПМНЕ за Тема на денот во дневникот на Сител, при што потенцираше дека ако се случи тој закон власта да го стави со европско знаме, тогаш ВМРО-ДПМНЕ ќе го напушти Собранието. - Не гледам што е европска вредност да амнестирате криминалци кои се осудени за перење пари, за насилство, да амнестирате луѓе кои помагале во најгрозоморниот чин во последната историја на Македонија, а тоа е убиството кај Смилковското езеро. Ако се случи да дојде тој закон со европско знаме ќе излеземе надвор од Парламентот и ќе побарам поддршка и од Извршниот и Централниот комитет да застанат позади оваа одлука, истакна Мицкоски. Во однос на изјавата на Ковачевски дека власта ќе интервенирала со амандмани, Мицкоски прашува како може владата да интервенира со амандмани, а тие го правеле овој закон. - Тој закон дошол на владина седница и требале да ги усогласат тие работи таму, зошто тогаш не ги усогласиле? Кога станува збор за овие луѓе се случувало да нема европско знаме, па да ги повлечат и да го стават со европско знаме, да почекаме да видиме, рече Мицкоски. - Рековме дека ќе го блокираме со сите можности кои ги нуди Деловникот во Парламентот. Нашиот став и мојот личен став е јасен и ако дојде до злоупотреба на европското знаме ќе побарам одлука од Извршен и Централен комитет да го напуштиме парламентот, а ако дојде во нормална процедура тогаш ќе го блокираме, изјави Мицкоски.

Јаревски: Законот за амнестија е неприфатлив за ВМРО-ДПМНЕ, Владата упорно работи на промоција на неодговорност и на неказнивост

Ивона Петрова — Mon, 02 Oct 2023 19:27:11 +0000

Ова е една власт, една Влада која што упорно работи на промоција на неодговорност и на неказнивост“, истакна Тони Јаревски, пратеник во гостување во „Топ тема“ на Телма телевизија. Јаревски запраша како Ковачевски може да каже за предлог законот за амнестија доколку нешто опфаќа што не треба, нема да го поддржат во Собрание. Па што дискутирале на владина седница пред законот за амнестија да се достави во Собрание. „Како може да ни каже премиерот доколку е тоа опфатено, ние нема да го поддржиме. Да, треба да го видиме се сложувам, но што правеле на Влада? Како можеме да имаме таква рашомонијада од такви изјави за волку сериозна тема“, праша пратеникот. „Околу 280 лица се опфатени со оваа амнестија и да се каже дека причината е дека сакале да ги растеретат затворите, каде што знаеме дека најмалку 2.000 чекаат за да влезат за издржување на санкциите, тогаш е несериозно“, рече пратеникот. Тој нагласи дека законот за амнестија е неприфатлив за ВМРО-ДПМНЕ. „Овој закон е апсолутно неприфатлив за нас. Укажа и претседателот јасно дека доколку се појави со европско знаменце ќе напуштиме. Доколку не биде со европско знаменце ќе ги искористиме сите можни инструменти и алатки кои што ги имаме на располагање да го спречиме ваквиот закон доколку се опфатени тие дела“, појасни Јаревски.

Сајкоски: Законот за амнестија не носи ништо добро за државата, само ќе предизвика дополнителна штета за целото општество

Ивана Ефремовски — Fri, 29 Sep 2023 17:15:52 +0000

Ѓоргија Сајкоски, генерален секретар на ВМРО-ДПМНЕ и пратеник во Собранието во своето гостување во емисијата „За или против“ зборуваше за Законот за амнестија каде потенцираше дека овој закон доаѓа пред избори и дека станува збор за еден штетен закон кој не носи ништо добро за државата. Имено тој додаде дека овој закон ќе донесе дополнителна штета за целото општество. -Предлог законот за амнестија не е доставен сеуште до Собранието. Она што го слушаме во јавноста и она што го слушавме од страна на министерот, тоа се информациите кои што ги имаме за предлог законот за амнестија. Но, можам да кажам дека овој предлог закон за амнестија доаѓа пред избори, за неколку месеци од денес ќе има избори и мислам дека тој е еден штетен закон кој што не носи ништо добро на државата затоа што на ваков начин ние како држава покажуваме дека неправдата треба да стапи на сцена и дека во нашата држава фактички со законот и претходно со Кривичниот законик и со овој закон за амнестија ние покажуваме дека нефункционалноста на правдата, нефункционалноста на судскиот систем и севкупно што ни се случува во државата се пресликува со носење на нови законски решенија кои што се многу лоши и кои што ќе донесат дополнителна штета за целото општество, рече Сајкоски. Сајкоски во текот на своето гостување потсети каква е состојбата во државата односно дека има тотална нефукционалност во државата и тоа треба што побрзо да се смени. -Имајќи во предвид дека во нашата држава во изминатиов период ние гледаме дека ние имаме разградување на државата, имаме разградување на системот, имаме разградување и руинирање на голем број институции-стануваат нефункционални, имаме институции исто како да не постојат во нашата држава, имаме зголемен степен на криминал и корупција, имаме тотална нефукционалност во нашата држава што мора што побрзо да се смени. Јас ако се прашувам требало да се смени и вчера, и вчера беше доцна меѓутоа мора на денот на изборите да бидеме активни и до денот на изборите и на таков начин да дадеме шанса на нашата држава за да може да оди напред, вели тој. Сајкоски порача дека пратеничката група на ВМРО-ДПМНЕ ќе го разгледа законот за амнестија, ќе дискутира и ќе направи се за да овој законско решение не помине. -Со сите средства пратеничката група на ВМРО-ДПМНЕ и ќе направи се неказнивоста да не биде принцип во нашата држава, бидејќи со ваквите законски решенија ние ја донесовме неказнивоста да биде принцип во нашата држава и даваме можност на секој да прави криминали, да корумпира и да го разградува нашето општество. Ние како пратеничка група ќе го разгледаме првично законот, ќе дискутираме во пратеничката група и ќе направиме се за да може ова законско решение да не помине, порача Сајкоски.

Мицкоски: Што прави Ковачевски кога се носат законите како тој за aмнестија, нека не се однесува како турист на седниците на Влада

Ивона Петрова — Fri, 29 Sep 2023 10:29:25 +0000

Претседателот на ВМРО-ДПМНЕ, Христијан Мицкоски денеска од Гази Баба каде што присуствуваше на увид на градежни активности во рамките на акцијата „Ова е Македонија за сите“, беше запрашан и за коментар за најавениот Закон за амнестија, за кој премиерот Димитар Ковачевски рече дека ќе поднесат амандман ако со тоа законско решение се опфаќаат и лица осудени за случајот „Монструм“, при што прашува што прави премиерот на седници на Влада кога се усвојуваат ваквите закони. „Премиерот Ковачевски, се надевам дека не е турист на седницата на Влада и кога ќе дојдат предлог текстовите на законите, добива детална информација што содржат тие предлог закони, а посебно вакви, би рекол, многу специфични закони и самиот ги чита. Доколку тоа не го прави, тогаш треба час поскоро да си замине од местото кое што во моментов го зазема, затоа што не е достоен за тоа место. Законот уште не донесен во Парламент зборуваме за амандмани кои што доаѓаат од самата влада. Па што правеле, се поставува прашањето, сите тие на таа владина седница кога се разгледувал овој закон“, прашува Мицкоски. Мицкоски додава дека одамна е заминато времето за оваа влада на СДСМ-ДУИ и цени дека колку побргу заминат, толку подобро ќе биде за сите граѓани на Македонија, колку побргу овој недостоен претседател на владата замине, толку подобро ќе биде за сите граѓани и за самата Македонија.

Демократскиот сојуз: Ковачевски да го повлече закон за амнестија

Ивона Петрова — Fri, 29 Sep 2023 09:00:46 +0000

Демократскиот сојуз бара од премиерот Димитар Ковачевски да го повлече новиот Предлог-закон за амнестија, бидејќи овој закон е политички пазар помеѓу коалиционите партнери СДСМ, ДУИ и Алијанса на Албанците и продолжение на неодамнешните измени на Кривичниот законик со кои брутално е нападнат правниот поредок. -Господине Ковачевски, немојте да се мачите да пишувате амандмани на закон кој го предлага Владата со која Вие раководите. Амандмани ќе има илјадници и бидете сигурни дека законот нема да помине! Инаку, знаете ли на што личите сега со најавата за амандмани? На јавноста ѝ испраќате порака: „ИМАМ СВОЕ МИСЛЕЊЕ, НО НЕ СЕ СОГЛАСУВАМ СО ИСТОТО“. Демократскиот сојуз нагласува дека Владата го урниса системот на владеење на правото и ги загрози евроинтеграциите на Македонија. Воедно ја повикуваме Европската унија да изгради јасен став во врска со измените на Кривичниот законик со кои се намалуваат казните за функционерите, како и за најновиот предлог закон за амнестија со кој ќе се амнестираат лица сторители на тешки кривични дела. Повеќе од јасно е дека сето ова, како и најавите за дополнителни амнестии се прави наводно за да се изгласаат уставните измени со кои се предлага Бугарите да бидат вградени во Уставот, а суштината е неказнивост на функционерите и да се остане ден повеќе на власт, се вели во соопштението на партијата.

ВМРО-ДПМНЕ: Со сите демократски и парламентарни методи ќе го спречиме донесувањето на законот за амнестија

Ивона Петрова — Fri, 29 Sep 2023 07:00:43 +0000

Оваа власт на Ковачевски е во очај. Затоа во рок од 6 години подготвуваат нова амнестија со која треба на слобода, а со тоа и на улиците, стотици криминалци на кои веројатно им било ветувано ослободување за да може да им работат во изборна кампања, велат од ВМРО-ДПМНЕ. Од партијата истакнуваат дека овој закон за амнестија како и скорешната измена на КЗ значат упад во правната држава и се прават шверцерски, интерно само внатре во владината коалиција без јавна расправа и консултации со експертите, што само говори дека се работи за партиско - политичка операција. -Информациите во јавноста кои говорат дека со оваа амнестија се ослободуваат учесници во тешки кривични дела, како учесници во странски боишта или осудени за случајот со убиството кај Смиљковци, само покажуваат зошто власта се обидува сето ова да го протурка кришум и набрзина. ВМРО-ДПМНЕ ваков закон нема да поддржи и со сите демократски и парламентарни средства ќе го блокира неговото донесување, бидејќи овој закон не е ништо друго туку исполнување на одредени концесии кои коалицијата на Ковачевски ги давала кон одредени структури. ВМРО-ДПМНЕ има јасна намера да се пресмета со криминалот од каков било облик, вклучително и со подземјето кое шурува со владеачките партии, но и со нивните наредбодатели кои креираат хаос за евентуално да се спасат од одговорност. Пораката е јасна, правната држава и владеењето на правото се врвен приоритет на ВМРО-ДПМНЕ како одговор на тоталниот криминалитет и распад на системот кој го спроведува власта на Ковачевски, се наведува во соопштението на ВМРО-ДПМНЕ.

Лога: Законот за амнестија за десет дена во Собрание, очекувам поддршка од сите пратеници

Ивона Петрова — Thu, 28 Sep 2023 12:18:21 +0000

Законот за амнестија ја доби поддршката во владина постапка и за десет дена истиот закон ќе биде пред пратениците во Собрание. Тврдам дека ниту еден избран или именуван од страна на институциите нема да биде опфатен со амнестијата, исто така ниту семејното насилство и предмети врзани со семејно насилство нема да бидат дел од амнестијата. Значи се повторува законот од 2018 година, кога предлагач беа сите политички партии, со тоа што беше и ВМРО-ДПМНЕ, и СДСМ, ДУИ, Алијанса и сите други политички партии кои се дел од Собранието, изјави денеска министерот за правда Кренар Лога. Тој нагласи дека очекува поддршка од сите пратеници и политички партии, бидејќи, како што рече, ова не е за секојдневната политичка агенда туку, произлегува од неговата посета на затворот Идризово. - Видовите и сами дека државата не е на ниво, на тоа што го бара законот и на тие стандарди кои се дел од нашиот систем. Очекувам поддршка и освен албум со слики од мојата посета, ќе купам и огледало, за секој пратеник да се гледа пред да гласа за овој закон. Јас носам одговорност за условите за овие шест месеци, сите други треба да сносат одговорност од 1945, а особено од 1991 година, нагласи Лога. Ако државата нема можност да ги рехабилитира лицата со помали тешки дела, тогаш, посочи Лога, тие ќе треба да се вратат дома како насилници или како криминалци. - Не очекувам дека ќе биде блокиран, бидејќи тогаш ВМРО-ДПМНЕ и другите партии ќе треба да се демантираат самите себеси од 2018 година. Законот е ист, не се додавани, туку се изземени кривични дела, изјави Лога. Лога, исто така, информираше дека веќе се обезбедени средства и дозвола за градба на нов објект во КПД Идризово, и најави тендер до крајот на ноември годинава. - Се очекува после сите постапки, во рок од четири години истиот да биде пуштен во употреба. До тогаш, јас и целта на овој закон е, да имаме амнестија за да може овој сив период од четири години, да може државата да делува како што се очекува од една сериозна држава, појасни Лога. Прашан за тоа дали со законот излегуваат дел од осудените за случајот „Монструм“, рече дека прашањето е тенденциозно и се врзува само со еден предмет и повика да не се игра со имиња и емоции на случаи. - Кажав дека е истиот закон од 2018 година. Ако во 2018 такви дела биле амнестирани, пак ќе се амнестираат. Значи, законот не влегува во конкретни предмети. Законот е ист и таков ќе биде предложен до Собранието, изјави Лога. Од таму, посочи Лога, нема да излегуваат академици, туку се знае дека ќе излегуваат затвореници осудени за кривични дела. -Значи само во ВМРО-ДПМНЕ може да се случи затворник да влегува како криминалец, и да излезе како академик и да се пречека во палатата како да е некој јунак во државата, изјави Лога.

ТВ24: Двајца осуденици за „Монструм“ ќе излезат на слобода доколку помине Законот за амнестија!

Ивана Ефремовски — Wed, 27 Sep 2023 15:56:19 +0000

Хаки и Фејзи Азири, двајцата осудени за помагање во случајот „Монструм“, ќе се најдат на слобода со новиот закон за амнестија на Кренар Лога, доколку законот помине во Собрание, пренесува ТВ 24. Двоецот Азири е осуден на 9, односно на 15 години затвор за помагање по ликвидацијата на четири момчиња и еден возрасен човек кај Смилковското езеро, но со законот кој што го протурка во Влада министерот за правда Лога, а премиерот Димитар Ковачевски тврдеше дека тоa е само за осудени за полесни кривични дела, ќе излезат на слобода. ТВ 24 дојде до дел од листата на осуденици кои ќе го напуштат Идризово доколку помине во Собрание законот за амнестија, на неа го има Хаки Азири, но адвокатот на Фејзи Азири, Насер Рауфи тврди дека и тој апсолутно излегува од Идризово. -Не само што очекувам, туку сум сигурен дека ќе излезат, дека ги опфаќа законот за амнестија, бидејќи тие се осудени, иако морам да кажам незаконски со фалсификувано вештачење и на кривични дела на помагање на сторител по извршувањето на кривичното дело, што значи дека има сосема друга правна квалификација. Затоа за таквите дела е предвидена амнестија, вели Рауфи, пренесе ТВ24. Според Рауфи, двоецот Азири по автоматизам треба да излезе, но доколку има како што вели проблеми, адвокатите ќе интервенираат. -Очекуваме целосно ослободување, бидејќи опфаќа една третина од таа предвидена казна, чинам дека и Фејзи Азири со 15 години ќе излезе веднаш, а за Хаки Азири кој е осуден на 9 години има и повеќе од што треба за издржување со законот за амнестија, вели Рауфи, пренесе ТВ24.