закон за лична карта – Kurir.mk

Седници на три собраниски комисии, Законот за лична карта една од точките на дневен ред

Ивона Петрова — Thu, 22 Jul 2021 05:17:00 +0000

Во Собранието денеска седници ќе одржат комисиите за политички систем и односи меѓу заедниците, за европски прашања и Законодавно – правната комисија. Предлог – законот за изменување и дополнување на Законот за лична карта, во второ читање е единствената точка на дневниот ред на седницата на Комисијата за политички систем и односи меѓу заедниците. Комисијата за европски прашања на денешната седница ќе расправа по Предлог – законот за изменување и дополнување на Законот за трговија, во прво читање, како и за Предлог – законот за изменување и дополнување на Законот за воведување на систем за управување со квалитетот и заедничката рамка за процена на работењето и давањето на услуги во државната служба, во второ читање. На седницата на Законодавно-правната комисија, на агендата е Предлог-законот за изменување и дополнување на Законот за извршување на Буџетот на Република Северна Македонија за 2021 година, по скратена постапка, во второ читање, предлог – законите за изменување и дополнување на Законот за работните односи, на Законот за заштита и спасување и на Законот за трговија, сите во прво читање, како и Предлог-законот за изменување и дополнување на Законот за лична карта.

Личните карти со натписот „Република Македонија“ ќе важат најдоцна до 12 февруари 2024 година

Ивона Петрова — Tue, 13 Jul 2021 05:39:22 +0000

Собраниската Законодавно-правна комисија денеска на седница ќе расправа по Предлог-законот за изменување и дополнување на Законот за лична карта, во прво читање. Како што стои во образложението на предлог-текстот, донесувањето на законот ќе имплицира ревидирање на подзаконскиот акт со кој се уредува образецот на барањето за издавање на личната карта, образецот на потврдата за поднесено барање за издавање на личната карта, образецот на личната карта, постапката за издавање и замена на личната карта, како и за начинот на водење евиденција за издадените лични карти, во насока на нивно усогласување со новиот Закон за употреба на јазиците, како и нивно усогласување со уставниот амандман ХХХIII во однос на усогласување на називот на државата, како и усогласување со уставниот закон за спроведување на амандманите од ХХХIII до XXXVI на Уставот на Република Македонија. Личните карти кои го содржат натписот „Република Македонија“, издадени до денот на почнувањето на примената на овој закон, ќе важат до истекот на рокот на важење кој е наведен во личната карта, најдоцна до 12 февруари 2024 година. Овој закон влегува во сила осмиот ден од денот на објавувањето во „Службен весник на Република Северна Македонија“, а ќе почне да се применува од 1 јули 2021 година. Според Владата која е предлагач, Законот за изменување и дополнување на Законот за личната карта нема да предизвика фискални имликации и за неговото спроведување не се потребни дополнителни финансиски средства од Буџетот на државата. -По донесување на Уставниот закон и Законот за употреба на јазиците, Министерството за внатрешни работи потпиша Рамковна спогодна за набавка на хардвер и софтвер за изготвување на лични документи (лични карти, патни исправи, возачки дозволи и дозволи за престој на странци), за чија реализација беа обезбедени финансиски средства во Буџетот на Министерството за внатрешни работи во износ од 6.563.436,45 евра и веќе, согласно утврдена временска динамика, се врши исплата. Наведените финансиски средства се однесуваат за целиот пакет на лични документи (лични карти, патни исправи, возачки дозволи и дозволи за престој на странци). Истовремено, укажуваме дека финансиските средства се враќаат согласно динамиката на издавањето на личните документи на граѓаните, стои во предлог-текстот на Законот. Законодавно-правна комисија на седницата треба да расправа и по Предлог-законот за изменување и дополнување на Законот за неевидентирани лица во матичната книга на родени, по скратена постапка, во второ читање, поднесен од Љатифе Шиковска. Со законот се уредува постапката за прибирање и евиденција на личните податоци за лицата кои не се евидентирани во матична книга на родени, видот на податоците што се евидентираат, условите за запишување во посебна матична книга на родени, условите за запишување во посебна матична книга на умрени, издавањето извод од посебната матична книга на родени, издавањето извод од посебната матична книга на умрени, идентификациската исправа и дополнителниот упис на овие лица во матичната книга на родените. -Целта на овој закон е лицата неевидентирани во матична книга на родени да се евидентираат во посебна матична книга на родени, заради добивање на извод од посебната матична книга на родени и идентификациона исправа заради остварување на право на образование, здравствена заштита, социјална заштита и вработување со задолжително социјално осигурување согласно со закон, до дополнителен упис во матична книга на родените и добивање на прв извод од матичната книга на родени, се наведува во предложениот текст.

Изменувањето и дополнувањето на Законот за личната карта на собраниска седница

Ивона Петрова — Thu, 06 May 2021 05:22:31 +0000

Во Собранието за денеска се закажани продолженија на четири седници и тоа 29, 30, 34 и 36. седница. Во 12 часот е закажано продолжението на 29. седница на чиј дневен ред се останати уште пет предлог законски решенија. Меѓу предлог-законите е и Предлог на законот за изменување и дополнување на Законот за личната карта, по скратена постапка, поднесен од Бастри Бајрами, Кастриот Реџепи, Биљал Касами, Фадил Зендели, Сурија Рашиди, Илире Даути, Артина Ќазими, Зиадин Села, Халил Снопче, Абдула Салиу, Сафије Садики Шаини. Во 12 и 10 часот е закажано продолжение на 30. седница, на чиј дневен ред се останати уште три предлог законски решенија, меѓу кои Предлог на закон за отпис на камати и репрограмирање на долгови и трошоци на јавни претпријатија, по скратена постапка. По 30. седница, закажана е 34-тата, на која една од точките е Предлог на закон за изменување и дополнување на Законот за прекршоците, по скратена постапка, и пет предлог-законски решенија во прво читање. На седницата е и Информацијата за нацрт Концепција за основно образование поднесена од група пратеници. По 34. седница, закажано е продолжение и на 36-тата. За денеска се закажани и седници на собраниската Комисија за финансирање и буџет и Законодавно-правната комисија.