Закон за попис – Kurir.mk

Мицкоски: Собрани над 100.000 потписи, ВМРО-ДПМНЕ ќе продолжи да ја води битката против мафијашката власт

Ивона Петрова — Mon, 01 Mar 2021 09:23:04 +0000

Претседателот на ВМРО-ДПМНЕ Христијан Мицкоски информира дека партијата за 8 дена собрала над 100.000 потписи од граѓаните кои не се задоволни од операцијата попис. -ВМРО-ДПМНЕ за 24 часа, или по 3 часа дневно, во рок од 8 дена собра повеќе од 100.000 потписи од граѓани кои се незадоволни од начинот на кој се води операцијата попис. ВМРО-ДПМНЕ ќе продолжи да ја води битката против мафијашката власт од внатре низ институциите за одложување на пописот, а во меѓувреме е потребно истата таа операција да ја девалвираме. Затоа, ја повикуваме дијаспората масовно да се пријави на онлајн апликацијата. Доколку мафијашката власт продолжи насилно да се однесува, тогаш при превземањето на институциите истата ќе биде предмет на детална проверка, а ВМРО-ДПМНЕ нема да ги признае овие политички резултати, пишува Мицкоски на Фејсбук.

Мисајловски: Од утре започнува кампањата за собирање на потписи за поништување на Законот за попис, придружете ни се и заедно да го собориме овој закон

Магдалена Андонова — Fri, 19 Feb 2021 12:22:35 +0000

Потпретседателот на ВМРО-ДПМНЕ Владо Мисајловски по денешната средба со пензионерите во општина Бутел, одговарајќи на новинарско прашање, рече дека од утре започнува кампањата за собирање на потписи се со цел понишување на Законот за попис, и упати апел до сите граѓани да се придружат на ваквата иницијатива додавајќи дека штандови ќе има насекаде низ државата. Ние започнуваме уште од утре насекаде низ Македонија да ги собираме овие потписи, затоа ги охрабруваме граѓаните ќе не има секаде низ плоштадите, ќе не има на улиците секој кој што сака да ни даде поддршка да дојде да се потпише, бидејќи сакаме што повеќе граѓани да бидат опфатени, а потоа се разбира ние заеднички да ги поднесеме за соборување на овој закон. Секако тука ќе бидеме сите пратеници да се потпишеме и потоа да ги доставиме, вели потпретседателот Мисајловски и додаде: Затоа започнува оваа кампања би ја нарекол во наредните 20тина, 30тина дена и секој еден граѓанин кој што сака да ни се приклучи е добредојден, ќе не има од утре насекаде и ќе продолжиме и во наредните денови се разбира, да дојдат да се потпишат и потоа со едно мото да имаме реален потпис, и затоа го бараме потписот на граѓаните за сето ова да го измениме.

Сајкоски: Ги поднесовме потписите од Иницијативата за поништување на Законот за попис

Ивона Петрова — Mon, 08 Feb 2021 11:29:56 +0000

До Претседателот на Собранието денеска ги доставивме потписите и записниците од Иницијативата за донесување на закон за поништување на законот за попис, изјави пратеникот од ВМРО-ДПМНЕ Ѓорѓија Сајкоски. Тој посочи дека како партија во повеќе наврати укажувале дека имаме лош закон, штетен закон, што нема да ја прикаже реалната состојба на жители во Македонија. -Затоа, и преку Собранието поднесовме четириесетина суштински амандмани со кои што требаше да се подобри текстот на законот. За жал, беа сите амандмани одбиени. Исто така укажавме дека лошо е да имаме врзан потпис затоа што прави сомнеж врз самиот процес. Укажавме дека никаде во светот нема попис на резидентно население, а да се попишуваат и нерезидентите односно граѓаните кои не живеат во Република Македонија. Апелираме и укажуваме до власта, да прекине со постапката за попис бидејќи секаде во Европа и во светот, пописите се одложени за 2022 година. Ја повикуваме власта да се одважи и да го одложи пописот за 2022 година, да направат забелешки во текстот на законот и да го подобри за да може да имаме онаков попис каков што е потребен за развој на државата, бидејќи сегашниот текст на законот за попис нема да донесе ништо што е различно од она што го имаме ние како државјанства во Република Македонија, посочи Сајкоски.

Мицевски: Иницијативата за собирање на потписи ја поднесуваме заради сериозни забелешки на Законот за попис

Ивона Петрова — Wed, 03 Feb 2021 10:51:59 +0000

Пратеникот на ВМРО – ДПМНЕ Никола Мицевски во гостување во „Утрински Брифинг“ кажа дека иницијативата за собирање на потписи ВМРО – ДПМНЕ ја поднесува пред собранието поради сериозните забелешки на законското решение за законот за попис како европското знаменце на законот и неможноста за транспаретна дебата по основ на самото законско решение. Дополнително тој потенцираше дека забелешите се и во однос на роковите и на двојниот потпис. - Иницијативата пред собранието ја поднесуваме затоа што имавме сериозни забелешки на самото законско решение на законот за попис. Како што знаете во Р.Македонија повеќе од 20 години не е одржан попис и ние дојдовме во ситуација да пописот односно законот за пописот кој што е единечен акт и се поднесува секогаш кога има попис да биде едно законско решение во кое што не се дадени сите факти. Забелешката е прво за европското знаменце на законот и неможноста за транспарентна дебата по основ на ова законско решение. Имаме огромни сомнежи затоа што начинот на кој што влезе во собранието не ни дава за право да веруваме дека ќе биде транспарентна и статистичка операција. Забелешки по основ на самото законско решение затоа што кога се прави едно законско решение специјално за ваква намена во него треба да ги има дефинициите кое е резидентно население и слично, државјанин.Покрај тоа имаме забелешки на роковите кои што се дадени таму, имаме забелешки на двојниот потпис. Зошто е потребен двоен потпис од одредена институција кога во таа институција имаме директор на Државниот завод за статистика која е улогата заменик директорот да го потврди пописот ако веќе се работи за статистичка операција.И многу други забелешки истака Мицевски. Пратеникот Мицевски појасни дека иницијативата за собирање на потписи за прекинување на важењето на законот за попис е постапка која има одредена форма и започнува во наредните денови. Оваа иницијатива започнува во наредниве денови значи поведувањето на иницијатива е постапка која што има одредена форма. Тоа се оди согласно член 3 став 2 и член 66 од законот за референдум и други обливи на непосредно изјаснување на граѓаните. Денеска планираме да ја поднесеме иницијативата на која што овластен предлагач ќе биде Христијан Мицкоски , се собираат 100 потписи за отпочнување на постапка за иницијатива. Откако ќе се соберат тие 100 потписи во подрачните единции во Државната изборна комисија собраните потписи заедно со записниците се доставуваат до собранието каде што обврска на претседателот е до законодавно правната комисија и матичната комисија да ја разгледа уредноста на иницијативата. Доколку иницијативата е уредна таа истата се враќа претседателот на собранието го известува претседателот на владата кој што има обврска за уредноста на иницијативата да ја извести Државната изборна комисија и која што во рок од 20 дена отвора постапка односно собирање на потписи за прекинување на важењето на законот за попис додаде Мицевски.

ВМРО-ДПМНЕ до ДИК ќе поднесе Иницијатива за собирање потписи за укинување на Законот за попис

Ивона Петрова — Wed, 03 Feb 2021 09:09:16 +0000

Претседателот на ВМРО-ДПМНЕ, Христијан Мицкоски заедно со Генералниот секретар на ВМРО-ДПМНЕ, Ѓорѓија Сајкоски денеска во просториите на Државната изборна комисија ќе ја достават Иницијативата за собирање на потписи за укинување на Законот за попис. Од партијата најавуваат дека при што ќе биде дадена изјава за медиуми пред просториите на ДИК. Изјавата на Мицкоски може во живо да ја следите во видеото во продолжение.

Пописот ги седнува на маса државниот врв, Симовски и градоначалниците

Ивона Петрова — Fri, 29 Jan 2021 06:52:41 +0000

Во Собранието денеска ќе се одржи средба на државниот врв и директорот на Државниот завод за статистика, Апостол Симовски, со градоначалниците и секретарите на општините за спроведување на Пописот на населението, домаќинствата и становите. На средбата ќе присуствуваат претседателот на Република Северна Македонија Стево Пендаровски, претседателот на Собранието Талат Џафери, премиерот Зоран Заев, министерот за правда Бојан Маричиќ, министерот за локална самоуправа Горан Милевски, претседателот на ЗЕЛС Петре Шилегов и директорот на Државниот завод за статистика Апостол Симовски. Претставниците од Државниот завод за статистика ќе ги информираат претставниците на локалните самоуправа за нивните должности кои произлегуваат од Законот за попис. Ќе има и сесија за поставување прашања. Според Законот, претседатели на пописните комисии во 50 региони ќе бидат секретарите на општините.

Пендаровски го потпиша Указот за прогласување на Законот за попис

Дарко Андоновски — Mon, 25 Jan 2021 13:22:05 +0000

Претседателот Стево Пендаровски, денеска го потпиша Указот за прогласување на Законот за попис на населението, домаќинствата и становите во Република Северна Македонија, 2021 година. Указот, како што информираат од Кабинетот на Пендаровски, бил потпишан по извршените консултации со правни експерти. Пендаровски очекува процесот на спроведување на пописот да не се политизира, а добиените податоци да бидат од корист за севкупниот развој, со што ќе се овозможи формулирање на долгорочни стратегии во виталните области во државата. Собранието на 21 јануари со 62 гласа „за“, без „воздржани“ и без „против“ го донесе Законот за попис на населението, домаќинства и становите во Република Северна Македонија. Пописот ќе се спроведе во периодот од 1 до 21 април 2021 година.

Законот за попис пред гласање, опозицијата собира потписи да го поништи

Ивона Петрова — Sun, 17 Jan 2021 07:44:43 +0000

Со успешен попис добиваат граѓаните и државата, порачаа вчера од владејачката СДСМ, а опозициската ВМРО ДПМНЕ повтори дека се подготвува за акција за собирање потписи со кои што ќе се бара поништување на законот за попис, за кој завчера во Собранието заврши расправата. Доста е со неразумни блокади, кочења, поларизација, изјави Стефан Васев од СДСМ, порачувајќи му на опозицискиот лидер Христијан Мицкоски дека пописот на пописот не се гласа односно тоа не се избори, туку е статистичка операција. -По шест изборни порази можеме да разбереме дека Мицкоски има страв од граѓаните, но не треба да се плаши, на пописот не се гласа, тоа не се избори, тоа е статистичка операција. Доста се неразумни блокади, кочења, полиризација. Успешниот попис Мицкоски може да го смета за уште еден негов пораз, но пописот не се избори таму нема губитници и победници. Со успешен попис, добиваат граѓаните, добива државата, изјави Васев од СДСМ. Од ВМРО ДПМНЕ пак истакнаа дека подготвуваат документи, кои треба да се поднесат до Министерството за правда за да може да се спроведе акцијата за собирање потписи на терен, но, како што рече партискиот портпарол Наум Стоиловски, до тоа може и да не дојде ако власта се повлече од носење ваков закон. Го повтори ставот на партијата дека законот е без методологија и содржи индиции за политичка, а не статистичка операција. -Таа акција ќе биде спроведена онака како што треба, преку подрачните единици на Министерството за правда, луѓето ќе може да се потпишат во подрачните единици низ градовите, а бројот на потпишани нема да биде нешто за занемарување од страна на владејачкото мнозинство. И целта е тоа, да се повлече овој закон и да се донесе закон кој што ќе значи општествен консензус за статистичка операција – попис поддржана од сите, изјави Стоилковски. Претседателот Стево Пендаровски во интервју за МИА порача дека не постои политичка терминологија што користи израз бојкот на пописот. -Вие може да не ги признаете резултатите, тоа е легитимно, меѓутоа не постои израз ќе ги повикаме граѓаните да го бојкотираат пописот. – Не би сакал за нечија политичка реторика, не обвинувам никого конкретно, меѓутоа за нечија политичка реторика дека треба не знам какви услови да се исполнат какви што не се исполнети никаде во Европа, на пример, отпечатоци на прсти, за кои јас знам дека премиерот се обиде да направи нешто, меѓутоа му беше кажано од многу меѓународни експерти дека така не се прави попис никаде во Европа, дури ни на Балканот. И особено не е можно да се направи отпечаток на прсти да се земе од малолетници под 18 години. Тоа ни по закон не е дозволено ни по меѓународна пракса. Значи, ако вие се обидувате со одредена реторика да кажете дека ние не сме толку колку што ќе прикаже пописот утре, а затоа имате скриена политичка агенда, тогаш е чесно да го кажете тоа однапред, а не по пописот, вели Пендаровски. Собранието завчера по три дена ја заврши расправата по Предлог-законот за попис на населението, домаќинствата и становите во Република Северна Македонија, согласно кој по 19 години земјава годинава треба да ја изврши оваа статистичка операција. По Предлог – законот, како што најави е најавено, ќе се гласа на продолжение на оваа седница, кое ќе биде дополнително закажано. Министерот за правда Бојан Маричиќ во обраќање пред пратениците истакна дека државата и системот се подготвени за попис, бидејќи, како што рече, речиси 20 години таква операција не е спроведена, а е од исклучителна важност за развојот на државата. Доказ за подготвеноста наведе дека е и извештајот на Европската Комисија, во кој се нотирал добар напредок, особено во спроведувањето на пилот фазата од пописот на населението, како и тестирањето на новата методологија. Во земјава првиот попис е одржан во 1948 година. Спроведени се осум пописи, а последниот во 2002 година. Во 2011 година почна да се релизира ваква статистичка операција, но, таа беше прекината.

Продолжува собраниската расправа по Предлог-законот за попис

Ивона Петрова — Fri, 15 Jan 2021 06:26:29 +0000

Во Собранието денеска напладне треба да продолжи расправата по Предлог-законот за попис. Пратениците вчера и завчера ги искажаа спротивставените ставови главно околу тоа дали на земјава токму оваа година и е потребен попис и колку процесот ќе биде навистина статистички, а не политички. Според ВМРО-ДПМНЕ, пописот е политички договор и пазарење меѓу СДСМ и ДУИ за опстанок на коалицијата и за задоволување на внатрепартиските барања, со однапред утврден исход, како и алатка за демографски и етнички инженеринг, а резултатите што ќе се добијат од него, нема да бидат релевантни, ниту ќе ја отсликуваат реалната состојба во државата. Предлог-законот, смета опозициската партија, е со низа недоследности, во него не се вметнати регулативите и стандардите на ЕУ и Евростат, поради што треба да се повлече и да се отвори широка јавна дебата со цел постигнување општествен консензус. -Законот предвидува попишување државјани, а не резидентно население, не ги содржи методологијата и компаративните бази на податоци и овозможува давање податоци само со усмено кажување на матичниот број, се главните забелешки на ВМРО-ДПМНЕ. За СДСМ, Предлог-законот што треба да се донесе по скратена постапка е транспарентен и објективен, а неговото донесување е од суштинско значење. Пописот ќе го спроведе Државниот закон за статистика (ДЗС) и ќе овозможи релевантни податоци врз основа на кои ќе се креираат равојни, долгорочни политики и стратегии. Согласно законот, пописот треба да се спроведе од 1 до 22 април оваа година, а со него ќе бидат опфатени и лицата кои работат надвор од државата. Од ДЗС најавуваат дека пописот ќе биде спроведен согласно стандардите на Обединетите нации и Евростат. Планирано е постапката да заврши за шест месеци и да чини вкупно 8,5 милиони евра. Последниот попис во земјава беше спроведен во 2002 година, а најавениот попис во 2011 година не се реализира.

Стојаноска: Пописот мора да се темели на консензус од сите политички чинители, Законот веднаш да се повлече од Собрание

Ивона Петрова — Thu, 14 Jan 2021 10:51:18 +0000

Пратеничката група на ВМРО-ДПМНЕ и коалицијата бараат веднаш да се повлече Законот за попис од собраниската дебата и да се организира внатрепартиска и внатре државна дебата на целата територија на Република Македонија, изјави денеска пратеничката од ВМРО-ДПМНЕ Дафина Стојаноска. Таа посочи дела спроведувањето на пописот мора да се темели на постигнат консензус од сите политички чинители, сите општествени фактори, за да може да дојдеме до успешно спроведена статистичка операција во која што ќе имаат доверба сите граѓани на Република Македонија. -После очигледната злоупотреба на европското знаменце, одбивањето на сите конструктивни амандмани на Пратеничката група на ВМРО-ДПМНЕ и коалицијата, власта продолжува со своето самоволие, нетранспарентност и арогантност да спроведува штетни решенија за државата и граѓаните. Ние, пратениците во Собранието на Република Македонија сме бирани од страна на граѓаните и треба да ги браниме интересите на граѓаните и токму затоа ги повикуваме граѓаните на мобилизација, заедно да поднесеме иницијатива до подрачните единици на Министерството за правда, за собирање на потписи за предлог закон кој што ќе биде доставен во Собранието и за поништување на овој закон кој што по насилен пат, планира парламентарното мнозинство да го донесе. Република Македонија треба да спроведе попис кој што ќе ги содржи препораките на Евростат и регулативите на Европскиот парламент како и препораките и стандардите на Обединетите нации и затоа како земја која што треба да започне преговори со Европската Унија не смееме да си дозволиме експерименти кои што очигледно се само коалициски пазарења. Граѓаните уште сега кога не е донесен ниту законот за попис немаат доверба во оваа операција и затоа ние како пратеници имаме должност и обврска да направиме се за овој процес да запре и да започне одново и консензуално да покажеме дека сепак за битни прашања знаеме и можеме да носиме исправни одлуки. Апелираме до пратениците од парламентарното мнозинство да се издигнат над ситуацијата и како приоритет да ги стават интересите на Република македонија и граѓаните, а не нивните партиски интереси, вели Стојаноска.