залихи – Kurir.mk

На Западот ќе му требаат до 15 години да ги надополни залихите на артилериска муниција потрошени за војната во Украина

Ивона Петрова — Mon, 05 Dec 2022 15:01:30 +0000

Ќе бидат потребни 10 до 15 години за да се надополнат залихите на западната артилериска муниција користени за поддршка на војската на Украина во борбата против руската агресија, изјави сопственикот на големиот производител на оружје Чехословачка групација (Czechoslovak Group). И покрај дотурот на муниција во Украина, сопственикот на ЦСГ, Михал Стрнад, рече дека на украинските сили им недостасува муниција бидејќи на западните влади полека им снемува арсенал поради ограничувањата на производниот капацитет. – Артилериската муниција денес е многу ретка стока денес. Проценувам дека ќе бидат потребни 10 до 15 години за да се надополнат залихите (на западните армии) поради војната во Украина, рече тој. Европските влади значително го искористија својот арсенал за поддршка на Украина. Стрнад вели дека Украина истрелува 40.000 гранати неделно од неколку стотици хаубици што и ги дале западните земји. – На Украина и беа испорачани многу работи … Сепак, факт е дека денес Украинците пукаат помалку отколку што би можеле затоа што немаат доволно муниција, рече тој. ЦСГ е главниот снабдувач на модернизирано оружје од советската ера за Украина, вклучувајќи тенкови, хаубици, ракетни фрлачи со повеќе цевки и борбени возила. ЦСГ во својот инвентар има 90 модернизирани тенкови Т-72, кои ги платија САД и Холандија. Сепак, залихите на оружје на ЦСГ од советската ера исто така се намалија, а на пазарот остануваат малку работи погодни за модернизација и испорака во Украина, истакна Стрнад.

Србија: На залихи домаќинствата потрошиле 16,6 милиони евра за помалку од три недели

Ивона Петрова — Fri, 27 Mar 2020 07:06:03 +0000

Домаќинствата во Србија потрошиле речиси две милијарди динари за помалку од три недели за да купат залихи во страв од пандемијата, објави „Политика“. Регистрирано е зголемувањето на потрошувачката од 20 проценти и најголемо учество на пазарот имаа големите синџири за трговија, додека уделот на малите продавници е намален. Во Србија, за време на пандемијата, најмногу се купуваат брашно, шеќер и тоалетна хартија, а најголем број клиенти се претежно постари домаќинства, соопшти ГфК компанија за истражување на пазарот. Истражувањето анализирало 32 милиона набавки помеѓу 24 февруари и 15 март. Купувачите од Белград и Војводина потрошиле малку повеќе на залихи отколку домаќинствата во источна и јужна Србија.

Маркетите и дистрибутерите на храна имаат залихи за 30-45 дена, како во редовни услови, граѓаните да не паничат

Ивона Петрова — Tue, 17 Mar 2020 10:01:29 +0000

Маркетите и дистрибутерите на храна имаат залихи за 30-45 дена, како во редовни услови. Им порачуваат на граѓаните да не паничат, да бидат релаксирани и да водат сметка единствено за своето здравје. Како што соопштија денеска нивните претставници по работниот состанок со министерот за економија Крешник Бектеши, засега цените на производите не се менуваат и остануваат на нивото како досега. Пазарниот инспекторат, пак, е постојано на терен, ја контролира состојбата. -Ги координираме сите активности за нормално фунцкионирање, работиме максимално на заштита на условите на работа на сите наши вработени, но и на потрошувачите. Во постојан контакт сме со добавувачите и правиме максимални напори за снабдување на дефицитарните производи. Апелирам дека нема потреба од паника, работиме интензивно. Сите потреби ќе бидат намирени, истакна претставникот од „Веро“. И според претставникот од „Тинекс“, нема простор за паника. -Состојбата е под контрола. Нема апсолутно причина за паника, за купување залихи. Нашите залихи се за 30 – 45 дена, во редовниот обем. Трговците и државата стојат зад нас, охрабрени сме. Сакаме да ги релаксираме потрошувачите, сите стратегиски артикли ќе ги има во доволни количини, напомена претставникот на „Тинкес“. Ставот дека нема простор за паника го делат и дистрибутерите на храна. Тие единствено бараат постојан контакт на нашата држава со соседните земји, за да нема застои на граничните премини. -Минатата недела имавме потешкотии за увоз на стока, но од вчера, благодарение на Владата, коридорите се ослободени од земјтие кои направија ограничувања. Веќе се регулирани коридорите од каде доаѓа стоката. Нема место за паника. Имаме залиха за 30 дена и тековно се носи стока. Бараме постојано контакт со соседните земји, за да нема застои на граничните премини, како и да се ослободат контингентите и царинските давачки за брашно, зејтин и шеќер, да има забрана за увоз од Србија каде цените се пониски, истакна Џемаил Даути, сопственик на „Даути комерц“. На заедничката прес-конференција по состанокот беше соопштено и дека пазарните инспектори, кои се постојано на терен, работат во две групи, дневна и ноќна. -Благодарност до сите што ги почитуваат препораките за да останат што помалку луѓе за контрола. Од наша страна ќе сториме се за да им излеземе во прерсет на граѓаните и на трговците. Сепак, се она што ќе се донесе како владина одлука, ќе биде спроведено, истакна директорот на Пазарниот инспекторат.

Нема нови закажувања за пасоши до надминување на проблемот, Чулев врши истрага во МВР за лоцирање на одговорноста

Ивона Петрова — Tue, 18 Feb 2020 10:49:08 +0000

Системот за закажување термин за патна исправа ќе биде ставен надвор од функција до изнаоѓање на решение за надминување на проблемот со недостаток на обрасци за овие лични документи. Ова денес го истакна техничкиот министер за внатрешни работи Наќе Чулев кој потенцираше дека се врши истрага во МВР за да се лоцира одговорноста за овој проблем. -Проблемот со личните документи, лични карти и возачки дозволи е надминат. Но патните исправи проблемот останува и истиот е резултат на лошо планирање, пропусти и доцни нарачки. На 6.12.2019 Оливер Спасовски бил информиран дека залихите на обрасци се при крај и остануваат уште 88.000 обрасци за патни исправи. По моето доаѓање, еден месец подоцна, на 8.1.2020 година, добив информација се остануваат уште 27.580 обрасци за пасоши. Ова се е резултат на нестручно работење и во МВР се врши контрола за да се лоцира одговорноста, нагласи Чулев. Тој посочи дека до овој момент поднесени се 16.500 барања на патни исправи по редовна постапка, а МВР на располагање има уште 3.600 обрасци. Барањата поднесени по итна постапка кои се околу 650 ќе бидат процесирани. Чулев нагласи дека до надминување на овој проблем нема да има аплицирање за патни исправи ниту по редовна, ниту по итна постапка. Министерот истакна и дека на денешната владина седница повторно ќе се отвори ова прашање со цел што поскоро надминување на проблемот. НАСКОРО ПООПШИРНО...