западно нилска треска – Kurir.mk

Грција: Потврдени 100 случаи на вирусот Западен Нил, починаа 13 лица

Ивона Петрова — Wed, 06 Sep 2023 10:49:15 +0000

Во Грција досега се потврдени 100 случаи на вирусот Западен Нил, од кои 11 се во изминатата седмица, а починаа 13 лица, согласно неделниот извештај на Националната организација за јавно здравје (ЕОДИ), јави дописничката на МИА од Атина. Првиот случај за 2023 година во Грција беше регистриран во средината на јули, а новите податоци се заклучно со вчерашниот ден. Потврдените случаи се во северниот и централниот дел на земјата. Од ЕОДИ во соопштението потсетуваат дека во тековното лето, до 30 август, освен во Грција, случаи на Западен Нил биле потврдени и во Северна Македонија, Србија, Италија, Франција, Романија, Унгарија, Германија и Шпанија. Вирусот Западен Нил во Грција беше регистриран во летниот период од 2010 до 2014 година, како и од 2017 до 2022 година. Најголем број случаи на Западен Нил имало во 2018 година, вкупно 317, а истото лето, највисок бил и бројот на починати лица вкупно 51. Лани, во Грција биле регистрирани 286 случаи, а од Западен Нил починале 33 лица.

Во Македонија се заразил со западно-нилска треска: 66-годишен скопјанец во критична состојба на Инфективна

Ивана Ефремовски — Mon, 19 Aug 2019 13:41:52 +0000

Сè уште е критична здравствената состојба на 66-годишниот човек од Скопје кај кого беше потврдена нилска треска. Од Инфективната клиника објаснуваат дека дополнително состојба се отежнува поради претходните здравствени проблеми што ги имал човекот. Човекот не ја напуштил земјата, бил на одмор во Македонија. Епидемилозите велат дека во рој на комарци може да има еден комарец кој се заразил со треска и да го пренесе. Но најмногу зависи каква е здравствената состојба на човекот. Од клиниката за Инфективни болести велат дека досега нема најава ниту потврда за нови случаи со нилска треска. Извор: Канал 5

Четворица починати до западнонилска треска во Грција

Ивона Петрова — Fri, 09 Aug 2019 09:53:16 +0000

Од почетокот на сезоната, заклучно со вчера, од западнонилска треска во Грција починале четири лица, на возраст од над 80 години, а 35 се заразени, според податоците на националната организација за јавно здравје, пренесе грчката новинска агенција АНА-МПА. Националната организација за јавно здравје, во седмичниот извештајот пишува дека е веројатно и очекувано во следниот период да се појават и нови случаи. Од 2010 до 2018 во Грција биле регистрирани вкупно 988 случаи, починале 134 лица, најголемиот број на смртни случаи имало лани (50), а во 2015 и 2016 воопшто не бил регистриран случај со заразен со вирусот, jави дописничката на МИА од Атина. -Случаи со заразени со вирусот Западен Нил кај луѓе и животни се забележани во различни делови на земјата во годините 2010 – 2014 и 2017 – 2018 година, во скоро сите региони. Ова укажува дека вирусот Западен Нил веќе континуирано постои во нашата земја, како и во други европски земји, пишува во извештајот на грчката Национална организација за јавно здравје. МИА

Потврдена смртта на едно лице во Косово од западнонилска треска

Дарко Андоновски — Mon, 13 Aug 2018 15:50:17 +0000

Косовскиот Национален институт за јавно здравство потврди денеска дека во Косово една 82-годишна жена починала од западнонилска треска, а друга, 52-годишна, која била заразена од истиот вирус, е излекувана и пуштена на домашно лекување, јави дописникот на МИА од Приштина. Насер Рамадани, директор на Инситутот, за телевизијата КТВ изјави дека нема место за паника, но апелира до граѓаните да избегнуваат излегување од дома рано наутро и приквечер, кога убодите од комарците, кои можат да го пренесат заразниот вирус, се позачестени. Исто така граѓаните се упатуваат да се јават на лекар доколку по убод од комарец забележат влошување на здравствената состојба. Медиумите денеска ја објавија информацијата од Европскиот центар за заштита и контрола на епидемиите, кој соопшти дека во периодот од 3 до 9 овој месец, како последица на зараза од вирусот, во Европа починале 17 лица, од кои девет во Србија, три во Грција, три во Италија и по едно во Романија и Косово.