Одбраната во случајот „Топлик“ на СЈО, каде обвинет е поранешниот министер за транспорт и врски, Миле Јанакиески, на денешното рочиште се жалеше до судскиот совет дека цд-ињата од аудиовизуелниот записник што ги добиле се прекинати на 20 минути и 20 секунди.

Сите адвокати добиле од судот цд-иња на кои не е доснимено целото претходно рочиште. Недостасуваат околу 15 минути токму делот каде што судијата се произнесе дека ќе донесе формално правно решение во врска со барањето на одбраната да се изземе вештачењето од списите.

Причина е затоа што ќерката на вештакот, Борис Тунџев, била вработена во СЈО. Поради ова адвокатите сметаат дека вештачењето било пристрасно. Кога би им се доставило формално правното решение одбраната би имала право на жалба, но судијата во меѓувреме ја менува одлуката и донесува обично решение.

-Дали се работи за грешка или нешто друго незнам. Сите цд-иња запираат на 20 минути и 20 секунди. По закон снимките треба да бидат целосни во Акмисот. Не можам да го споредам записникот со аудиовизуелниот запис, рече адвокатот Дончо Наков.

- Освен тоа забележавме дека записникот не соодвествува со она што беше кажано на претходното рочиште. Недостасува и изјаснувањето на јавното обвинителство, додаде адвокатката Сања Алексиќ.

Тунџев е сега директор на државниот Катастар. Според адвокатите на Јанакиески и другите обвинети, Тунџев немал лиценца кога го изготвувал вештачењето за продажбата на државно земјиште за изградба на Сончев град.

Од СЈО, пак, потврдија дека ќерката на вештакот Тунџев е вработена кај нив.

Дополнително судот ги одби и барањата на одбраната да се изземе еден од снимените разговори од листата на докази бидејќи е набавен на незаконит начин и јавно објавен.

Во „Топлик“ се обвинети шест лица, а првообвинет е поранешниот министер. Според обвинението на фирма и е незаконски овозможено да купи државно земјиште за изградба на комплесот.