жариште – Kurir.mk

Жариште на Ковид-19 во најголемата британска лабораторија за тестирање

Ивона Петрова — Fri, 25 Dec 2020 11:57:32 +0000

Најголемата лабораторија во Велика Британија, во која дневно се спроведуваат десетици илјади тестови за коронавирусот, стана ново жариште на Ковид-19, откако членовите на лабораторијата не ги следеле безбедносните процедури, јави денеска „Дејли меил“. Три од четирите научни тима од лабораторијата во Милтон Кинс се заразени со коронавирусот. Токму оваа лабораторија беше првата која откри новиот, многу заразен вид на мутиран Ковид-19 уште во септември, според информациите од јавното здравство на Англија. Администраторите и вработените во магацините исто така пријавиле случаи, така што 20 од 70-те членови на тимот биле изолирани, изјави вработен во лабораторија кој инсистирал да остане анонимен. Жариштето на коронавирусот се заканува да ја запре работата на лабораторијата, која има се повеќе барања за тестирање, кои надминуваат 70.000 ПЦР тестови на ден. Британското Министерство за здравство и социјална заштита демантираше дека не се почитувале безбедносните мерки.

Ковид-19: Скопје и натаму најголемо жариште Македонија – Следуваат Тетово, Прилеп, Битола…

Тале Кристо — Sat, 12 Dec 2020 20:04:53 +0000

Вкупната бројка на ковид дијагностицирани во Македонија од почетокот на епидемијата изнесува 73025, бројката на оздравени пациенти е 48726, на починати е 2096, а бројот на активни случаи изнесува 22203. Од вчера се евидентитра еден контролен тест, а според досега завршените епидемиолошки анализи во моментов дистрибуцијата по градови е следна: • Скопје 31554, активни 11425 • Куманово 4231, активни 661 • Дебар 547, активни 153 • Штип 3045, активни 485 • Прилеп 3643, активни 964 • Тетово 4367, активни 998 • Струга 1763, активни 458 • Велес 2418, активни 692 • Битола 2630, активни 911 • Охрид 2016, активни 620 • Кавадарци 1659, активни 626 • Гостивар 3054, активни 845 • Гевгелија 926, активни 282 (66 лица од ПЕ Гевгелија се жители на Дојран, 156 на Богданци и 12 се странски државјани) • Струмица 1994, активни 579 • Крива Паланка 519, активни 125 • Радовиш 512, активни 132 • Крушево 152, активни 74 • Кочани 1416, активни 261 • Пробиштип 402, активни 66 • Демир Хисар 218, активни 55 • Македонски Брод 196, активни 37 • Пехчево 119, активни 23 • Берово 441, активни 95 • Валандово 253, активни 60 • Виница 417, активни 125 • Делчево 598, активни 287 (169 лица од ПЕ Делчево се од Македонска Каменица) • Кратово 172, активни 27 • Свети Николе 968, активни 205 • Кичево 1437, активни 381 • Ресен 556, активни 187 • Неготино 802, активни 364 (122 лица од ПЕ Неготино се жители на Демир Капија), информираа денеска од МЗ.

Токио жариште на епидемијата во Јапонија

Тале Кристо — Sat, 12 Dec 2020 12:56:29 +0000

Токио со 621 нов случај на Ковид-19 постави уште еден рекорд во Јапонија во последните 24 часа. Како што пренесуваат странските агенции, зголемувањето на бројот на новозаболени се смета за директна последица на неуспехот на Владата да воведе построги мерки, што може да доведе до ново зголемување на бројот на заразени лица за време на празниците. Досега, во Јапонија се потврдени 174.000 случаи на Ковид-19 и околу 2.500 смртни случаи. Градскиот кризен штаб во Токио стравува поради зголемениот број пациенти со сериозна клиничка слика и се поголемиот притисок врз здравствениот систем.

Дали е Брисел новото европско жариште?

Магдалена Андонова — Sun, 27 Sep 2020 17:10:15 +0000

Дневниот просек на новозаразени со вирусот ковид-19 во последната една недела во Брисел изнесува 2.305, односно 340 инфицирани на 100.000 жители, пренесува Вијести.ме. Станува збор за пораст од 460 инфицирани на ден во однос на средината на септември со што Брисел е најголемо жариште на епидемијата во Белгија. Цела Белгија заради драстичниот пораст на новозаразени минатата недела е ставена во „црвената“ зона на ЕУ ковид-19 мапата со предупредување за „висок ризик“ од зараза. Истовремено, Советот за државна безбедност одлучи од 1 октомври да ги намали постоечките рестриктивни мерки така што Белгијците веќе нема да мораат да носат маски насекаде, а траењето на задолжителниот карантин од 14 дена се намали на 7 во случај на негативен тест. Белгиските државни власти таквите мерки ги образложуваат со потребата на воведување на стратегија која ќе биде „одржлива на долг период“, а која подразбира „што е можно повеќе нормализирање на постоечката ситуација“ и животите на граѓаните во состојба кога не се гледа крај на пандемијата. Од друга страна, властите во Брисел воведоа построги мерки од оние кои важат на државно ниво. Граѓаните мораат да имаат заштитна маска со себе, која ќе мора да се носи доколку се наоѓаат во поголема група на улиците. Работното време на баровите е скратено, забранети се собири на повеќе од 10 лица меѓу 23:00 и 06:00 часот, а сите продавници за храна и пијалоци мораат да бидат затворени до 22 часот. Во Белгија од почетокот на епидемијата има вкупно 112.803 потврдени случаи на зараза со коронавирус.

Дали Италија повторно станува жариште на коронавирусот ?

Магдалена Андонова — Thu, 20 Aug 2020 20:29:32 +0000

Италија, која досега беше релативно поштедена меѓу земјите со повторна појава на коронавирус, во последните 24 часа забележа 845 нови случаи. Вчера, Министерството забележало 642 нови случаи во споредба со вторникот, потврдувајќи ја нагорната крива на нови случаи на инфекција во Италија. -Ние не сме во толку лоша ситуација како Франција и Шпанија, но сегашната состојба не е задоволителна, рече професорот Масимо Гали, раководител на одделот за инфективни заболувања во престижната болница Сако во Милано, пренесува „Ла Република“. Запрашан за причините за ваквиот скок на бројот на случаи, Гали оцени дека укинувањето на мерките за изолација даде прекумерно чувство на лажна безбедност. -Треба да бидеме внимателни или ќе се најдеме во многу тешка ситуација, предупреди тој. Тој исто така рече дека патувањата и одморите се исто така извор на проблеми, додавајќи дека тој нема да ги преобрази младите луѓе, но дека е засегнат од некои случаи, на пример, враќањето на девет млади луѓе позитивни на вирусот од одмор во Хрватска. -Сепак, не верувам дека само враќањето од одмор влијае на зголемувањето на бројот на заразени лица ... треба да бидеме внимателни и за тоа што се случува кај нас, вирусот сè уште циркулира, рече тој. За разлика од првиот бран во Италија, кога заразата беше сконцентрирана на северот на земјата и ја наведе владата да нареди изолација од над два месеци во март, овој пат е зафатена целата територија на земјата, ниту еден регион не е поштеден. Според министерството, во последните 24 часа починале шест лица, со што вкупниот број на смртни случаи достигна 35.418 од почетокот на пандемијата, а заразени се 256.1118 лица.

СЗО: Балканот е ново жариште на коронавирусот

Магдалена Андонова — Thu, 20 Aug 2020 19:26:14 +0000

СЗО денеска изјави дека Балканот е ново жариште на коронавирусот, а една од последиците ќе биде тоа дека во Хрватска би можела да се најде на англиската листа за карантин и тоа од утре. Претставниците на СЗО рекоа дека биле „загрижени за Балканот од почетокот на јуни“, поради големиот прилив на туристи во овие области и големото зголемување на нови случаи. Се стравува дека туристите кои престојувале на Балканот ќе ја шират инфекцијата понатаму, па можно е дека Хрватска ќе биде прва од регионот на ризик што ќе заврши на „црвените списоци“, што значи дека, да речеме, на британските граѓани ќе им се советува да не патуваат таму освен во итни случаи и дека дводневн карантин ќе ги чека при нивното враќање. - Состојбата на Балканот нè загрижува уште од почетокот на јуни, кога видовме дека расте бројот на нови случаи. Мора да преземеме соодветни чекори за да се обидеме да спречиме појава на инфекција - рече д-р Кетрин Смалвуд од СЗО, додавајќи дека строго се следат сите бројки. Во Хрватска тие цела недела се борат со зголемувањето на бројот на заразени лица, а вчера имаа најголем број новозаразени лица во текот на целиот месец. Ова ќе предизвика вистинска хистерија кај Британците кои веќе се во Хрватска или планираат одмор таму, затоа што при враќањето не сметаа на задолжителна карантин. И, слична судбина, се чини, ја чека и Грција. Бројките растат и кај нив, но сè уште не се драматични, велат од СЗО. (МИА)

Табела: Каде епидемијата со коронавирусот е најголема

Ристе Здравков — Mon, 27 Jul 2020 06:37:31 +0000

Бројот на активни случаи на ковид-19 во земјава порасна за околу 20% во изминатите две недели. Сепак, во Штип, Свети Николе, Дебар, Гостивар и други подрачја растот е многу поголем Последните бројки на Министерството за здравство покажуваат дека во последните две недели повторно има значителен раст на бројот на т.н. „активни случаи“, показател кој ги прикажува пациентите кои се уште не се излечиле од коронавирусот или не ја загубиле битката со него.

Како што покажува графиконот погоре, на 13 јули здравствените власти известиле дека во земјата има 3 486 активни случаи, на 19 јули таа бројка изнесувала 3 921 а вчера имало 4 199 лица кои во моментов се болни од ковид-19. Но, растот на активните случаи не е подеднакво распределен на територијата на земјата. Напротив, во некои подрачја бројот на болни се намалува, во други стагнира, додека во трети расте.

Кластер(и) конфекции

Според податоците на Министерството за здравство и Институтот за јавно здравје, најрапиден раст на бројот на активно болни од коронавирусот во последниве две недели има во Штип и во Свети Николе. На подрачјето на Центарот за јавно здравје во Свети Николе, на 13 јули имало само 42 активно болни. Неполна недела подоцна, на 19 јули имало 111 болни, додека вчера бројката стигна до 182 случаи. Во проценти, бројот на болни за неполни две недели се зголемил за близу 450%.

Штип веќе подолго време има зголемен број на случаи, но последните две недели се особено загрижувачки. На 13 јули, на подрачјето на Центарот за јавно здравје – Штип имало 178 болни, за на 26 јули да има двојно повеќе – 380 пациенти со коронавирусот.

И во Свети Николе и во Штип, најголем „инкубатор“ на заразата беа конфекциите и организираниот превоз до нив. Заедничкото возење во автобус на работничките и работниците од различни населени места и халите со голем број на вработени доведоа до ширење на вирусот. Уште кога имаше два и пол пати помалку случаи во Штип, директорката на тамошниот Центар за јавно здравје кажа дека „заразата излезе од кластерите“.

Западна Македонија

Кога е во прашање Полошката котлина, фокусот на јавноста досега беше свртен кон Тетово. Бројките од подрачјето кое го покрива Центарот за јавно здравје од градот, во еден момент беа пониски само од Скопје. Но, веќе неколку недели бројот на активно болни во Тетово постепено се намалува ама расте на јужниот дел од котлината. Гостивар, во последниве две недели има за околу 50% повеќе пациенти. Споредено со крајот на јуни пак, има три и пол пати повеќе болни од ковид-19. Односно, на крајот на јуни, на подрачјето кое го покрива тамошниот Центар за јавно здравје имало 63 активно болни од коронавирусот. Наглиот раст секоја недела доведе до 223 активно болни вчера.

Кичево не е дел од Полошката котлина, но и таму бројките не одат во добра насока. Во последниве две недели двојно е зголемен бројот на болни од ковид-19. Ако споредбата се прави со крајот на јуни, растот на активно болни пациенти е близу 700%.

Дебарскиот регион, заедно со Центар Жупа, беа единственото подрачје во државата кое беше ставено под целосен карантин. Откако епидемијата еднаш се смири, сега повторно е вон контрола. Последните податоци од тамошниот Центар за јавно здравје говорат за 125 активно болни, што е трипати повеќе споредено со состојбата пред неполн месец.

Веќе подолго време негативен тренд има и во Струга. Во последните две недели бројот на активно болни од коронавирусот се искачи од 171 на 206 случаи. Ако анализата се продолжи до крајот на јуни, може да се види како заразата континуирано расте.

Кумановски „трет бран“

По Скопје, Куманово е подрачјето каде досега се регистрирани најмногу случаи на ковид-19. Но епидемијата таму имаше повеќе „бранови“ отколку во остатокот на земјата. Уште во април, градот и околината беа најпогодени според процентот на население кој се зарази од коронавирусот. Состојбата потоа се смири, за повторно да „експлодира“ со т.н. втор бран кој почна во јуни. Но, на почетокот на јули, од Центарот за јавно здравје во Куманово пристигнуваа позитивни вести за драматично намален број на активно болни. Во последниве две недели сепак, бројките повторно пораснаа за значителни 45%, од 194 на 282 случаи.

Скопје се врти во круг

Подрачјето на главниот град и околината и понатаму се подрачјето со најголем број на активно болни од ковид-19. Речиси цел месец таа бројки се движи околу 2 000. Најдобар „резултат“ Центарот за јавно здравје пријави на 13 јули, кога имало 1 788 активно болни. Но вчера, таа бројка повторно порасна и тоа за 10%, на 1 935 пациенти кои се болни во моментов.

Како и за целата држава, така и во Скопје, во некои општини паѓа бројот на болни а во други се зголемува. Најмногу пациенти се уште има во Чаир, но веќе неколку недели нивниот број се намалува. Но затоа веќе неколку недели по ред, се зголемува бројот на болни во Аеродром и Кисела Вода. извор: 360stepeni.mk

Јужна Америка е на второ место по бројот на смртни случаи од последици од Ковид-19

Тале Кристо — Mon, 13 Jul 2020 13:08:52 +0000

Јужна Америка и Карибите од денеска се втор најпогоден регион во светот по смртни случаи од последици на новиот коронавирус, со над 144.000 починати лица. Со 144.758 починати од последици од Ковид-19, Јужна Америка и Карибите ги надминаа смртните случаи во САД и во Канада, и регионот се наоѓа зад Европа, каде починаа 202.505 луѓе. Дел од експертите истакнуваат дека најверојатно бројот на смртни случаи во Јужна Америка е многу поголем од официјалните бројки. Бразил е најпогодена држава, во која починале 72.100 луѓе односно речиси половината од смртните случаи во Јужна Америка. По Бразил следи Мексико со 35.006 починати, потоа Перу – 11.870 и Чиле – 6.979 смртни случаи. Со повеќе од 3.370.000 починати, Јужна Америка е на второ место и по бројот на инфицирани е на второ место, зад САД и Канада. (МИА)

Њу Делхи ново жариште на Ковид-19 во Индија

Магдалена Андонова — Wed, 24 Jun 2020 12:32:25 +0000

Во главиот град на Индија, Њу Делхи регистрирани се речиси 4.000 новозаболени лица со Ковид-19, што е рекорден пораст од почетокот на пандемијата. Њу Делхи сега е на второ место по бројот на заразени лица со новиот коронавирус во Индија со повеќе од 66.000 случаи, веднаш зад Мумбај, каде се инфицирани околу 68.000 луѓеод почетокот на пандемијата. Локалните власти во Њу Делхи најавија дека ќе се тестира секое домаќинство во градот, со цел да се сузбие ширењето на заразата. Во Индија минатиот месец беа укинати карантинските мерки и оттогаш бројот на заразени расте со голема брзина. Од почетокот на епидемијата во Индија, Ковид-19 е потврден кај повеќе од 456.000 лица, од кои 14.500 починаа од последици од вирусот. (МИА)

Шпанија ново жариште во Европа, го надмина бројот на заразени во Италија од коронавирусот

Тале Кристо — Sat, 04 Apr 2020 10:40:31 +0000

Шпанското Министерство за здравство соопшти дека во земјата се регистрирани нови 7.000 заразени лица со Ковид-19. Вкупниот број на инфицирани со новиот коронавирус во Шпанија веќе изнесува 124.736, наспроти Италија која во овој момент има 119.827 заболени лица. Бројот на смртни случаи во Шпанија достигна 11.744, соопшти Институтот „Џон Хопкинс“. Засега бројот на починати во Италија е 14.681 лица.