заштита на податоци – Kurir.mk

Во Европа дневно има над 300 пријави за кршење на заштитата на податоците

Тале Кристо — Tue, 26 Jan 2021 10:16:54 +0000

За широкиот спектар кршење на строгите европски закони за заштита на податоците изречени се парични казни од вкупно 272,5 милиони евра, покажува новиот извештај на глобалната адвокатска фирма ДЛА Пајпер. Како што се наведува, води италијанскиот регулатор, кој изрекол казни од вкупно 69,3 милиони евра од 25 мај 2018 година, кога почна примената на Општата регулатива за заштита на податоците (ГДПР). На второ место е Германија со парични казни во висина од 69,1 милиони евра, а на трето е Франција со 54,4 милиони. Од мај 2018 година вкупно се регистрирани повеќе од 281.000 пријави до регулаторот поради нарушувања на заштитата на податоците, најмногу во Германија (77.747), потоа во Холандија (66.527) и Велика Британија (30.536). Франција и Италија, земји со повеќе од 60 милиони жители, регистрираа само 5.389 и 3.460 пријави до регулаторот поради кршење на заштитата на податоците, што укажува на културолошки разлики по тоа прашање на континентот. На дневно ниво, во 2020 година во Европа е регистрирано двоцифрено зголемување на бројот на повици кон регулаторот – на 331 пријава дневно од 28 јануари до крајот на 2020 година, во споредба со 278 на ден претходната година. На 28 јануари се одбележува Меѓународниот ден за заштита на личните податоци.

Фејсбук конечно ја ограничи достапноста на податоците

Даниел Василев — Thu, 05 Apr 2018 08:39:36 +0000

Американската компанија Фејсбук соопшти дека ќе ја ограничи достапноста на некои податоци за корисниците во сетот на мерки кои ги презема по скандалот со кршење на приватноста. Британската компанија Кембриџ аналитика обвини дека користела лични податоци на милиони корисници, кои биле собрани на Фејсбук, за да му помогне на Доналд Трамп да победи на претседателските избори во САД во 2016. година. Фејсбук денеска наведе дека Кембриџ аналитика можеби имала неовластен пристап до податоците на 87 милиони луѓе, а не на 50, како што се мислеше во почетокот. Во склоп на најавените промени, Фејсбук со внатрешни апликации ќе го ограничи пристапот на случувања на кои еден корисник на социјалната мрежа има намера да оди, како и пристапот на информации од Фејсбук групите, како што е списокот на нивните членови и содржината. Компанијата исто така ќе ја тргне опцијата на барање корисници според телефонскиот број или имејл адреса. Иако тоа досега им помагаше на поединци за да најдат некого, Фејсбук наведува дека компаниите кои имале телефонски број или мејл адреси на корисниците, можеле на тој начин да собираат податоци за профилите. Во понеделник сите корисници на Фејсбук ќе добијат известување за да можат да ги видат апликациите, но и за да одберат кои видови на информации одбрале да ги делат со тие апликации. На тој начин ќе имаат можност да ги избршат апликациите кои веќе не ги сакаат. Корисниците бидат информирани и дали нивните податоци се меѓу оние до кои Кембриџ аналитика имала пристап, а такви корисници најмногу ги има во САД, соопшти Фејсбук.

Цукерберг ги призна грешките, најавува подобра заштита на податоците

Ивона Петрова — Thu, 22 Mar 2018 07:32:19 +0000

Извршниот директор и основач на Фејсбук Марк Цукерберг денеска ги призна грешките и најави чекори кон подобра заштита на податоците на корисниците по скандалот со преземање на личните податоци на повеќе од 50 милиони корисници. Цукерберг се огласи по четири дена молчење, забележуваат светските агенции. Тој на својот профил на Фејсбук напиша дека компанијата има „одговорност“ да ги заштити податоците на корисниците. - Ако тоа не го можеме, тогаш не заслужуваме да ви бидеме на услуга, истакна тој. Цукерберг информира дека работел на тоа да сфати што точно се случило и како да се обезбеди тоа да не се случи повторно. - Добрата вест е дека најважните чекори за спречување ова да не се повтори повеќе ги направивме пред неколку години. Но, ние исто така направивме грешки, има уште да направиме, и треба да засилиме и да го направиме тоа, напиша тој. Компанијата Фејсбук загуби околу 37 милијарди долари по скандалот со преземање на лични податоци на повеќе од 50 милиони корисници. Тоа ги исплаши инвеститорите па вредноста на акциите на Фејсбук падна за околу седум отсто. Извршниот директор и основач на Фејсбук Марк Цукерберг претрпе загуба од четири милијарди долари.