заштитни маски – Kurir.mk

Хонг Конг го укина задолжителното носење заштитни маски во борбата против коронавирусот

Тале Кристо — Tue, 28 Feb 2023 07:19:35 +0000

Хонг Конг ќе ја укине обврската за носење маски во борбата против коронавирусот, изјави денеска главниот извршен директор на регионот Џон Ли во обид да привлече посетители и бизниси и да го врати нормалниот живот, на повеќе од три години по наметнувањето строги правила. -Укинувањето на обврската за носење маска во Хонг Конг ќе стапи на сила утре, 1 март, рече Ли на брифингот со новинарите. Специјалниот административен регион Хонг Конг е едно од последните места во светот каде носењето маски сè уште е задолжително. Административните региони на Хонг Конг и Макао во последните три години ја следат кинеската политика на нулта толеранција за коронавирусот. Хонг Конг почна да ги укинува рестриктивните мерки минатата година, но обврската за носење маски е на сила од 2020 година. -Сметаме дека ова е најдобро време да се донесе оваа одлука. Тоа е јасна порака што покажува дека Хонг Конг се враќа во нормала, рече Ли. Во местата со висок ризик, како што се болниците, менаџерите можат да одлучат дали да бараат од персоналот и посетителите да носат маски, додаде тој. Соседниот специјален административен регион Макао најави укинување на обврската за носење маски на 26 февруари, за сите локации освен јавниот превоз, болниците и уште неколку места. Жителите на континентална Кина не мораат да носат маска на отворено, иако властите ги охрабруваат да го прават тоа на јавни затворени простори како што се аеродромите и железничките станици.

Од први март во Виена без задолжителните заштитни маски

Тале Кристо — Thu, 09 Feb 2023 17:38:39 +0000

Од први март во Виена се укинува обврската за носење маски. Дотогаш тие се задолжителни во јавниот превоз, во аптеките, во болниците и домовите за стари лица.

Од 1 март ќе се укине и задолжителниот ПЦР тест за придружници во болниците и домовите за стари лица, а се отстранува и ограничувањето болните и старите лица да можат да ги посетуваат најмногу три лица дневно.

Според експертите, овој чекор за враќање во нормала е оправдан, но нивниот совет е во одредени ситуации луѓето да носат маска FFP2 со себе. Препораката е болниците да воведат построги правила доколку е потребно, особено кога станува збор за пациенти со висок ризик. Препораката за носење маски во овие случаи е логична превентивна мерка.

Луѓето од ризичните групи, а особено оние кои се постари од 60 години и имаат хронично заболување, треба да продолжат да преземаат мерки на претпазливост кога се со други луѓе, препорачуваат виролозите.

Кинезите гневни поради неносење заштитни маски во Катар

Катерина Бојаџиева — Wed, 23 Nov 2022 18:37:35 +0000

Телевизиските снимки од Светското првенство во Катар на кои можат да се видат навивачи без заштитни маски на лицата предизвикаа гнев кај дел од кинескиот народ, кој сè уште е подложен на нулта толеранција на Ковид-19, додека остатокот од светот живее со коронавирусот. – Некои посетуваат натпревари на Светското првенство без маски, а други се затворени во своите домови еден месец и не можат да излезат надвор, реагира жител на Гвангдонг на социјалната мрежа Weibo, која е кинески еквивалент на Твитер. – Кој ми го украде животот? Нема да коментирам, додава авторот на реакцијата поради немилосрдниот пристап на кинеските власти во ограничување на ширењето на ковид заразата. Кина, во која беше откриен првиот случај на Ковид-19, кон крајот на 2019 година, е последната голема економија во светот која сè уште се обидува да го спречи ширењето на коронавирусот преку затворање цели населени места и наметнување задолжителни тестови за милиони луѓе. И покрај рестриктивните мерки, бројот на дневни случаи денеска во Кина достигна 29.157, што е близу до националниот рекорд од април оваа година.

Италија ја укинува обврската за носење маски во јавниот превоз

Катерина Бојаџиева — Fri, 30 Sep 2022 08:22:06 +0000

Италијанците повеќе нема да бидат задолжени да носат маски во јавниот превоз, соопшти Министерството за здравство. Во соопштението се наведува дека условот за носење маски во возовите, автобусите и траектите, кој истекува денеска, нема да се обнови. Маските остануваат задолжителни само за болниците и домовите за стари лица. Италија е една од земјите што беше најтешко погодена од коронавирусот. Смртните случаи поврзани со Ковид таму надминаа 177.000 од почетокот на пандемијата во 2020 година.

Во Црна Гора повторно задолжително носење заштитни маски

Ивона Петрова — Fri, 29 Jul 2022 09:11:25 +0000

Во Црна Гора, поради влошување на епидемиската состојба предизвикана од коронавирусот, во следните 15 дена ќе биде задолжително носење заштитни маски, а здравствените власти уште еднаш апелираа до граѓаните да се вакцинираат против Ковид-19. Директорот на Институтот за јавно здравје Игор Галиќ изјави дека е воведено задолжително носење заштитни маски во сите институции на јавната администрација, продавници за храна, аптеки и бензински пумпи, поради зголемувањето на бројот на заболени и хоспитализирани лица. Галиќ додаде дека заштитните маски се задолжителни и во затворените места на аеродромот, железничките и автобуските станици и најави дека ќе следи задолжително носење маски во сите затворени места доколку тие мерки не доведат до подобрување на состојбата. Тој апелираше да се вакцинираат сите кои досега не биле вакцинирани.

Oд понеделник оваа соседна земја ги враќа заштитните маски против Ковид-19

Тале Кристо — Wed, 13 Jul 2022 08:55:10 +0000

Од понеделник Бугарија го враќа носењето заштитни маски против ковид-19, изјави за БНР главниот државен здравствен инспектор Ангел Кунчев. Според него, „Бугарија се соочува со нов бран на коронавирусот и варијанта на вирус кој се шири многукратно побрзо, работите се менуваат толку бргу и толку неочекувано што мора да бидеме подготвени за секоја ситуација“. Тој ќе предложи нов пандемичен план за здравствените власти да преземат безбедносни мерки. Меѓу нив се носењето маски, ограничувањето на собири и собирање на многу луѓе на едно место. Од понеделник со новите мерки кои се очекува да стапат во сила од понеделник. Тој беше дециден дека никој нема да ја пропадне туристичката сезона или економијата во оваа комплицирана ситуација, но сепак, кога ќе се носат одлуки, вклучително и од Националниот фонд за здравствено осигурување на Бугарија, мора да размислуваме за здравјето на луѓето, потоа – за заштеда на пари, категоричен беше Кунчев.

Во Гостивар казнети 30 патници за неносење заштитни маски во јавен превоз

Дарко Андоновски — Wed, 06 Jul 2022 12:05:40 +0000

Полицијата открила 30 лица кои се превезувале со јавен превоз и немале заштитна маска, како мерка за спречување на ширење на КОВИД 19. Тие ќе се соочат со парична глоба од 20 евра во денарска противвредност. Од СВР Тетово информираат дека вчера од 12:00 до 15:00 часот на поширокото гостиварско подрачје е спроведена акциска контрола во рамките на активностите за спречување на ширењето на Ковид-19. Притоа се контролирало дали и колку се почитува законската обврска за задолжително носење на заштитни маски во возилата од јавниот превоз, автобуси и такси комбиња. – При контролата откриени и законски санкционирани биле 30 лица кои не носеле заштитни маски или друга заштита на лицето. На сите им се изготвени соодветни поднесоци по член 66-б од Законот за заштита на населението од заразни болести, вели Марјан Јосифоски портпарол на СВР Тетово. Тој потенцира дека ваквите контроли ќе продолжат и во наредниот период и ќе се преземаат законски предвидените мерки.

Франција: Граѓаните повторно да носат заштитни маски во јавниот превоз

Ивона Петрова — Tue, 28 Jun 2022 05:27:45 +0000

Французите би требало повторно да почнат да носат маски на преполни места, особено во јавниот превоз, бидејќи Франција се бори со новиот бран на заболени од Ковид-19, изјави синоќа министерката за здравство Брижит Боругињон. – Не велам дека треба да биде задолжително, но барам од народот на Франција да стави маска во јавниот превоз, рече таа за Ер-Те-Ел, додавајќи дека тоа е „граѓанска должност“. – Не дека само го препорачувам, ве молам да го направите тоа, додавајќи дека маските треба повторно да се носат на други затворени простори, како што се работни места и продавници. Франција регистрира 17.601 нови случаи на инфекција со коронавирус во изминатите 24 часа, што е најголем број од 18 април. Пред пет дена, лидерот на кампањата за вакцинација Ален Фишер потврди дека новиот бран на Ковид-19 ја пустоши земјата, поттикнат од појавата на нови варијанти на вирусот, како и насекаде во Европа, додавајќи дека тој лично се залага за повторно воведување на задолжително носење маски во јавниот превоз. Новите случаи на инфекција во Франција растат бавно, но сигурно од крајот на мај и до седумдневен дневен просек се зголеми за повеќе од четирипати, од 17.705 случаи на 27 мај на 71.018 вчера.

ГОТОВО Е: Официјално во Македонија без маски, освен на овие места!

Дарко Андоновски — Tue, 12 Apr 2022 12:24:28 +0000

Откако претпладнето Главниот координативен кризен штаб (ГККШ) ги усвои заклучоците од Комисијата за заразни болести, и Владата на денешната редовна седници ги донесе новите ковид-мерки со кои меѓу другото се укинува носењето маски на затворено. Оваа информација ја објави на својот фејсбук профил првиот заменик на претседателот на Владата и министер за политички систем и односи меѓу заедниците, Артан Груби. Со новите владини одлуки се укинува мерката за задолжително носење маски во затворeни простории освен во здравствени домови, аптеки, јавни превозни средства (автобус, воз, авион, такси), установите за згрижување на стари лица и лица со посебни потреби; учениците од средните училишта да следат настава со физичко присуство без задолжително носење на заштитни маски. Исто така, се укинува забраната за организирање екскурзии и настава во природа во основните и средните училишта и се дозволува работата со физичко присуство на лекарските комисии за утврдување на надоместоци за попреченост и комисиите за утврдување право на помош и нега од друго лице.

Главниот штаб го одобри укинувањето на маските, се чека одлука на Владата

Катерина Бојаџиева — Tue, 12 Apr 2022 06:33:58 +0000

Укинување на обврската за носење маски за време на физичката настава во средните училишта, укинувањето на забраната за екскурзии и настава во природа, укинување на обврската за носење на заштитни маски во затворен простор, со исклучок на здравствените установи, јавниот превоз, аптеките и домовите за возрасни лица, се усвоените заклучоци кои Комисијата за заразни болести ги достави до Главниот координативен кризен штаб (ГККШ). Како што информира владината прес-служба, на петта седница на Главниот координативен кризен штаб беа усвоени повеќе заклучоци од одлуки и препораки на Комисијата за заразни болести. Заклучоците ќе бидат доставени до Владата, која за нив ќе одлучува на следната владина седница.