затајување данок – Kurir.mk

Кривична пријава против скопјанец, 4 години избегнувал да плати данок и го оштетил буџетот на Македонија за 1.728.465 денари

Магдалена Андонова — Thu, 13 Oct 2022 12:54:20 +0000

Единицата за економски и компјутерски криминал при СВР Скопје поднесе кривична пријава против Р.Т.(48) од Скопје, поради постоење основи на сомнение за сторено кривично дело „даночно затајување“. Пријавениот, во периодот од 2018, 2019, 2020 и 2021 година, за секоја година поединечно, реализираните приливи на парични средства не ги пријавил како личен доход и не поднел задолжителна Годишна даночна пријава до Управата за јавни приходи како даночен орган. На тој начин тој избегнал да плати данок на личен доход од 10% за реализираните приливи за 2018 година во вкупен износ од 34.470 евра, за 2019 година во вкупен износ од 68.976 евра, во 2020 година 925.850 денари и 104.100 евра и за 2021 година во износ од 71.000 евра. Со ваквото дејствие пријавениот го оштетил Буџетот на Република Северна Македонија за вкупен износ од 1.728.465 денари, а за себе во истиот износ прибавил противправна имотна корист.

Супермоделот Бар Рефаели обвинета за затајување дано

Ивона Петрова — Wed, 10 Jun 2020 10:59:56 +0000

Израелската манекенка Бар Рефаели и нејзината мајка потпишаа спогодба со Обвинителството во својата земја, со што прифатија вина за затајување данок. Сепак, супермоделот избегна затвор, па е осудена на девет месеци општокорисна работа. Heјзината мајка Ципи Рафаели е осудена на 16 месеци затвор. Таа како агентка на ќерка сѝ, одделно затаила милион долари данок. Освен тоа, како што соопштија израелските власти, тие двете ќе добијат и условни казни, парични глоби од по 634.000 евра, како и обврска за плаќање на данокот од над два милиона евра. Рефаели го прикрила данокот на заработка во периодот од 2009 до 2012 година, кога живеела делумно во Израел, делумно во странство. Манекенката тврдеше дека тогаш живеела главно во странство, а тужителите велат дека тоа не е точно, и оти таа не го пријавила приходот, подароците и попустите коишто ги добила додека имала живеалиште во Израел. Во процесот, барајќи олеснителна околност според тамошните закони, девојката тврдеше дека е во блиски, „речиси семејни односи“ со својот американски пријател, глумецот Леонардо ди Каприо, во чијшто дом таа често престојувала и „живеела“ во спорниот период. Ди Каприо не сведочеше во нејзина корист. Случајот почна во декември 2015 година.

Серхио Рамос казнет поради затајување данок

Ивона Петрова — Thu, 24 Oct 2019 09:07:29 +0000

Капитенот на Реал Мадрид, Серхио Рамос, е казнет со еден милион евра за затајување данок. Даночната служба на Шпанија смета дека играчот го сокрил приходот добиен од продажба на права на имиџ, пренесува „Марка“. Претходно, Рамос веќе плати 500 илјади евра. Сега фудбалерот ја обжали одлуката без да се изјасни за виновен.

Пике доби ужасна казна поради затајување данок- пеколна пресуда ја чека и Шакира!

Дарко Андоновски — Wed, 10 Jul 2019 10:12:20 +0000

Една од ѕвездите на Барселона, Џерард Пике ќе мора да се раздели со 2 милиони евра. Дефазнивецот беше осуден во 2016 година да ја плати сумата за неплатени даноци за имиџ правата помеѓу 2008 и 2010 година, но ја обжали одлуката. Неговата партнерка, колумбиската пејачка Шакира, исто така е на суд за долгови кон касата, но во нејзиниот случај сè уште нема пресуда. Пике е уште еден играч на Барса кој има проблем со даночните власти во Шпанија, откако и ѕвездата Лионел Меси беше осуден пред одреден период за долгови кон властите.

Шакира ќе сведочи за затајување на данок во Шпанија

Катерина Бојаџиева — Tue, 26 Feb 2019 15:48:09 +0000

Шпанските истражни органи ја обвинија познатата колумбиска пејачка Шакира за затајување данок од 14,5 милиони евра. Суд во Шпанија ја повика пејачката за тој случај да даде исказ на сведочењето во средина на јуни. Шакира во тоа време главно живеела во Шпанија, иако нејзиното постојано живеалиште е во Панама. Во обвинението се наведува дека пејачката прикривала приходи преку 14 различни компании во земјите, т.н. даночен рај. Тимот на Шакира за односи со јавност наведува дека таа во локалните даночни служби го подмирила долгот.

Грчките даночни служби со дронови откриваат затајување данок

Ивона Петрова — Tue, 25 Sep 2018 06:28:58 +0000

Грчките даночни власти соопштија дека првпат користеле дронови со цел на островот Санторини да откријат сопственици на бротчиња кои носат туристи да го разгледуваат вулканскиот кратер и не издаваат сметки. Грчката Управа за јавни приходи соопшти дека мерката е преземена минатата недела кога за еден ден биле следени девет бротчиња за туристи. Утврдено е дека само тогаш биле затаени 25.000 евра данок. Грција минатата година ја посетиле повеќе од 27 милиони туристи, што е за речиси 10 отсто повеќе во однос на 2016 година, соопшти Грчката централа банка. МИА

Санчез затајувал данок додека играл за Барса, осуден на 16 месеци затвор

Ивона Петрова — Wed, 07 Feb 2018 14:04:20 +0000

Фудбалерот на Манчестер Јунајтед, Алексис Санчез е осуден на 16 месеци затвор поради затајување данок во Шпанија во висина од еден милион евра, но нема да ја отслужи казната зад решетки, бидејќи првпат направил таков прекршок и затоа што казната е помала од две години. Поранешниот напаѓач на Барселона ја призна вината и ќе го врати споменатиот износ, со камата, но нема да оди во затвор, затоа што шпанскиот закон дозволува казната под 24 месеци да не се отслужува. Чилеанецот е обвинет дека, додека играл за Барселона, во 2012 и 2013 година, тој не ги пријавил приходите од имиџ правата. Ист договор со шпанските власти склучија Кристијано Роналдо, Лионел Меси, Рикардо Карваљо и Жозе Мурињо, кои исто така признаа затајување данок.

На Шакира и се заканува затвор?

Ивона Петрова — Wed, 24 Jan 2018 10:53:04 +0000

Колумбиската поп-ѕвезда Шакира е осомничена за затајување данок во Шпанија, а доколку наводите се покажат како точни, таа може и да се најде зад решетки. Шпанските даночни власти тврдат дека Шакира не го платила целосниот износ од данокот на приходи, по што наложија истрага во врска со финансиите на пејачката во периодот од 2011 до 2014 година, објави каталонскиот весник „Вангардија“. Даночната агенција на Шпанија соопштува дека поради тоа што Шакира во тоа време живеела во Шпанија, требало да плати данок не само приходите остварени во земјата, туку и за заработката стекната надвор. Државните обвинители треба да утврдат дали постои основано сомнение за подигнување обвинение.