затвор шутка – Kurir.mk

СООБРАЌАЈКА ВО ШУТКА – двајца 20.годишни скопјани се судрија, ова се деталите

Магдалена Андонова — Fri, 22 Oct 2021 08:31:23 +0000

Во текот на синоќешната вечер, во 20:05 часот на улица „ Индира Ганди“ пред затворот Шутка се случила сообраќајна несреќа. МВР за КУРИР информира дека сообраќајката се случила меѓу две возила Пасат со скопски регистерски таблици управуван од Б.Н. (20) и Поло со скопски регистерски таблици управуван од М.А. (20), и двајцата од Скопје. На местото на несреќата било возило на Брза Помош, а на возачите им биле константирани телесни повреди во скопскиот клинички центар. На терен беа и екипи од СВР Скопје кои извршија увид.

Вработен во затворот во Шутка тврди дека е отпуштен само затоа што бил активен член на ВМРО-ДПМНЕ

Катерина Бојаџиева — Fri, 12 Feb 2021 14:37:33 +0000

Вработен во затворот Шутка тврди дека добил отказ од политички причини. Љубомир Божиновски кој повеќе од една деценија работел во казнено поправната установа бил избркан од работа поради, како што вели, неговите активности во опозициска партија. Предупредува дека последниве месеци надлежните засилено работеле на бркање работници од повеќето институции оти биле членови на други партии, пренесува Алфа телевизија. -Како што знам, од многу блиски луѓе, ова се случува во исто време во повеќе институции, буквално лов на членови на ВМРО – ДПМНЕ, и после проблемот е што оваа Влада иако ветуваше дека ќе ги врати младите во државава, изгледа дека на крајот сите ќе си одиме од оваа држава, вели Љубомир Божиновски. Божиновски во затворот на почетокот работел како информатичар по што бил унапреден во виш полицаец. Тој кон крајот на минатата година бил обвинет од колега дека физички го нападнал, но според неговите тврдења, сведоците не го потврдиле тоа. -Комисијата донесе одлука да ме казнат парично 20% еден месец, после директорот ја менува одлуката во бркање, спротивно од комисијата. Причините беа дека сум го оставил оружјето на моето биро, тоа го направив бидејќи се спремав да си одам дома, тоа го правиме сите дека ние немаме соодветно место каде да го чуваме оружјето. Ова е дефинитивно монтиран политички процес со цел да се замолчиме и да не коментираме што се случува во државава, вели Божиновски. Од Алфа го контактирале директорот на затворот Филип Андов кој вели дека Божиновски не бил избркан поради членување во одредена партија, туку дека направил тешка повреда на службената должност. Лицето Љубомир Божиновски од Скопје, НЕМА добиено отказно решение поради тоа што истиот е член на Општинскиот Комитет на ВМРО-ДПМНЕ Причините поради кои добива Решение за престанок на работен однос е тоа што именуваниот на стражарно место наречено пријавница, несовесно и небрежно ракувал со службено огнено оружје-пиштол, со што истиот ја загрозил личната сигурност и сигурноста на другите вработени – вели директорот на КПУ – Скопје Филип Андов. Божиновски ќе ја бара правдата на второстепена комисија за работен однос. Вели дека ја ужива поддршката од трите синдикати во затворот Шутка.

Пронајдено починато лице во затворот во Шутка

Магдалена Андонова — Tue, 20 Oct 2020 13:48:51 +0000

МВР извести дека во затворот Шутка, било најдено починато 52-годишно лице, а медицинска помош констатирала смрт без траги на насилство. На 19.10.2020 во 06.50 часот било пријавено дека во Затвор Скопје бил пронајден починат И.С.(52) од Скопје. Од страна на лекар од Итна медицинска помош била константирана смрт без траги на насилство, се вели во соопштението на МВР.

Сведоштва на затворениците: Страв и паника владее по вториот смртен случај, ќе излеземе на протест

Дарко Андоновски — Wed, 15 Apr 2020 21:42:16 +0000

Страв и паника владее во истражниот затвор Шутка во Скопје откако вечерва беше регистриран втор смртен случај на затвореник за само една недела. Иако од затворот информира дека починатото лицето било наркозависник, затвореник за Сител телевизија вели дека починатото лице било во изолација бидејќи претходно бил сместен во иста соба со затвореникот кој што почина од корона вирус. Тој додава дека надлежните органи лажат дека им било извршено тестирање, додавајќи дека им била измерена само температура. Затворениците најавуваат протест во кои што од другата страна на затворот ќе бидат присутни и нивните семејства. Во затворот нема никакви услови. Значи за една недела умираат двајца затвореници, а вечерва дури хитно се вадат луѓе кои што се болни од корона вирус. Во крилото каде што умре денеска нашиот другар кој што лежеше затвор е вп исто крило каде што умре претходниот, значи уште има луѓе таму. Овој што умре денеска беше во карантин изолиран во соба затоа што спиел со тој поранешниот. Имаме страв и се плашиме многу за нашето здравје. Ни немаат земено тестови за Ковид 19, значи се е лага, ни имаат измерено само температура. Ако утре до 12 часот нема одговор од нивна страна, цел затвор од Шутка, сите затвореноцо сме сложни значи веднаш стануваме и тргнуваме до влезната бела капија и ќе протестираме. Значи најавуваме мирни протести а од другата страна и нашите семејства ќе бидат повикани бидејќи и тие се исплашени, вели еден од затворениците.

Јанева не се гледа ниту со „пријателите“, ниту со непријателите во Шутка

Предраг Кукиќ — Fri, 23 Aug 2019 13:29:15 +0000

Ден по распитот кај обвинителката Вилма Русковска, Катица Јанева ја загуби својата мајка, а истото утро беше и приведена за вмешаност во аферата „Рекет“. Следниот ден на погребот присуствуваше во улога на притвореник, со забрана да комуницира со роднините, а по завршувањето на погpeбната церемонија, веднаш беше вратена во затворот во Шутка. Во „Шутка“, пак, за Јанева немаше место во таканареченото „хашко одделение“, за кое се смета дека има нешто подобри услови, бидејќи тие ќелии се доделуваат по принцип „прв дојден, прв услужен“. Сепак, како што пренесува „Независен“, според извори од затворот, направена е безбедносна проценка и Јанева е сместена во соодветна ќелија, при што за неа се предвидени посебни безбедносни мерки. Со оглед дека станува збор за обвинител што гонел криминалци и од низок и од висок ранг, како за време на СЈО, така и претходно, Јанева е распределена во ќелија каде нема да биде во контакт со „пријателите“ обвинети за „Рекет“, но ниту со непријателите кои од претходно можеби ги има во затворот и кои евентуално би имале мотив да и се одмaздaт. –Направена е безбедносна проценка и таа е сместена во соодветна ќелија. Внимаваме да не биде во контакт со другите обвинети од случајот „Рекет“, но и со евентуално други затвореници што можеби сакаат да ѝ се одмаздат. Вообичаено, притворениците не одат сами во соба, туку имаат цимер – велат извори од затворот во населбата Шуто Оризари за „Независен“. Според нив, Јанева е сместена во женскиот оддел на првиот кат од затворската зграда. Условите од женскиот дел во затворот се за нијанса подобри отколку во машкиот, но и натаму се далеку од просекот што важи во европските држави. Целиот текст можете да го прочитате ТУКА.

Владата иако вети дека директорот на Шутка Ѓоко Котевски ќе биде разрешен по изборите тој се уште остварува партиски приватни средби (ФОТО)

Дарко Андоновски — Sat, 18 May 2019 07:58:51 +0000

Директорот на управата за извршување санкции Јовица Стојановиќ и директорите на затворите од СДСМ остваруваат партиски приватни средби. Сепак на овие партиски средби не се појавиле директорите на затворите од ДУИ, па така на фотографиите не се директорите на затворите во Струга и Тетово, дали ова е уште еден доказ за проблеми во владината коалиција останува да видиме. Спорно и чудно во целата ситуација е зошто ако се разговарало на овие средби за планот и работата и досегашните активности се разговара само со едни партиски директори, кога програмата и планот се државни и владини. На фотографијата се гледа и директорот на Шутка, Ѓоко Котевски кој ја излажа јавноста дека понудената оставка поради инцидентот во затворот Шутка ќе се ефектуира веднаш после изборите, а сега јасно се гледа како тој продолжува без срам и морал и одговорност да биде на директорската функција. Инаку во февруари годинава Котевски изјави дека до Владата ги доставил оставката и извештајот во врска со инцидентите во кои беа нападнати притворените поранешни министри, Спиро Ристовски и Миле Јанакиески. Извештајот за инцидентот, како што рече, го доставил и до Министерството за правда и до Управата за извршување санкции По ова портпаролот на Владата, Миле Бошњаковски на прес конференција, истакна дека за оставката на директорот на истражниот затвор „Скопје“, ќе се дебатира по претседателските избори, но повеќе од очигледно е дека од тоа се уште нема ништо... За време на претседателските избори тој беше дел од кампањата и со тоа стана сосема јасно зошто на премиерот Заев му беше важно тој да остане на функцијата. Па така Котевски беше целосно посветен на промоцијата на Пендаровски.

Министерство за правда контра директорите на затворот и болницата: Контрадикторни изјави за претепувањето на Јанакиески и Ристовски

Ивана Ефремовски — Thu, 21 Feb 2019 21:00:47 +0000

Директорот на ГОБ „8-ми Септември“, Христијан Костов, вечерва потврди дека по сите медицински иследувања што биле направени било констатирано дека поранешниот министер Миле Јанакиески не е повреден во инцидентот во затворот „Скопје“ во Шутка, каде е во притвор. -Денеска во попладневните часови после 16 часот е донесено лице од затворот „Скопје“ за медицински преглед. После приемот во Ургентниот центар дежурна екипа од специјалисти изврши преглед при што се направени најразновидни инстигации, од крвна слика, лабораторија, ехо на стомачна шуплина, компјутерска томографија на глава… Откако беа завршени сите прегледи беше донесен заклучок дека кај лицето не се евидентирани повреди. Значи не е индицирана потреба за хоспитализација на лицето, рече Костов. Од затворот во Шутка, потврдуваат дека Јанакиески се здобил со повреди по физичкиот напад врз него. Затоа и бил препратен во болница. Како што вечерва изјави директорот на затворот, Јанакиески побарал помош и бидејќи затворскиот доктор ја немал потребна апаратура за да постави дијагноза, тој бил веднаш однесен во Ургентен центар. Дали од затворот би пратиле лице кое не е повредено во болница? Изјавите на директорите на ГОБ „8-ми септември“ и затворот се спротивни една на друга. Министерството за правда, се огласи со соопштение во кое јасно и недвосмислено кажува дека Јанакиески и Ристовски се тие кои биле нападнати и бара санкции за нивните напаѓачи, но и за тие кои овој настан не го спречиле. Од таму велат дека очекуваат санкционирање на сторителите на насилство, но и на сите оние кои не презеле мерки за спречување на вакви ситуации. Воедно, од Министерството, бараат и очекуваат сите надлежни институции да одговорат на највисоко професионално ниво во расветлувањето на денешниот настан. Од затворот рекоа дека провокатори на инцидентот се повредените и дека безбедноста е добра, а од кабинетот на министерката Десковска посочуваат на нешто сосема друго. Контрадикторност се јави и меѓу ставовите на затворот и самиот директор на установата. По инцидентот во притворското одделение во Шутка, каде беа претепани поранешните министри Миле Јанакиески и Спиро Ристовски, се огласија писмено од затворот. Од таму, за инцидентите ги обвинија повредените дека испровоцирале да бидат нападнати. -На ден 21 февруари 2019 година околу 13 часот за време на редовна прошетка на притвореници дошло до вербален инцидент предизвикан од лицето С.Р. кон лицето Л.К. кој подоцна преминал во лесна физичка пресметка која била веднаш прекината од службите на затворот. Околу 13:45 часот, повторно за време на редовна прошетка на притворениците дошло до друг вербален инцидент предизвикан од лицето М.Ј. кон лицето Е.К. кој подоцна преминал во физичка пресметка која била веднаш прекината од службите на затворот. За двата инциденти прибрани се писмени изјави од очевидци и известен е надлежниот суд, велат од затворот „Скопје“. Под притисок од јавноста, дека од затворот треба да се огласат и да одговорат на повеќе прашања, но и да ги образложат ваквите тврдења, вечерва изјава за медиумите даде директорот на затворот, Ѓоко Котевски. Тој го прочита пред камерите соопштението кое веќе беше испратено до медиумите, но проблемот настана кога започнаа новинарските прашања. Иако во писменото соопштение и неговата изјава беше дефинирано дека Јанакиески и Ристовски провоцирале, тој потоа кажа дека допрва треба да бидат разгледани снимките, за да се утврди како дошло до овој инцидент. Тогаш директорот почна со контрадикторни тврдења и тези, оставајќи простор за сомнеж дека сака нешто да сокрие од граѓаните. -Ние ќе почнеме постапка, денеска веќе работиме на тоа. Постојат камери, надзор, постојат овластени службени лица кои вршат мониторинг на тој простор. Се прибавуваат изјавите. Во тоа шеталиште не биле само двете лица, туку биле лицата кои се во тие соби. Да почекаме да видиме што ќе каже истрагата, не сакам да прејудицирам како ќе биде, истакна директорот. Дали од затворот можат да тврдат дека претепаните провоцирале инцидент ако самите признаваат дека истрагата не е ниту почната, а камоли завршена? Се отвора простор за сомнеж дека во овој случај нешто не е сосема јасно, но и дека е можно нешто да сакаат да сокријат. Дали затворот сака да ги заштити напаѓачите? Котевски најави дека управата допрва ќе почне истрага за тоа дали е направен некаков пропуст од страна на припадниците на затворската полиција или другите служби, па ќе биде покрената соодветна истрага и дисциплинска одговорност.

Вработен во затворот Шутка нападнат од притворено лице

Ивона Петрова — Sat, 01 Dec 2018 12:21:15 +0000

МВР информира дека вчера околу 12.10 часот во СВР Скопје, било пријавено дека вработен во Затвор Скопје – Шутка, физички бил нападнат од притвореното лице В.З., додека вршел претрес кај притвореното лице. Се преземаат мерки за расчистување на случајот.

Детали за здравствената состојба на четирите лица од затворот во „Шутка“

Ивона Петрова — Mon, 29 Oct 2018 14:55:18 +0000

Четирите лица од КПУ Затвор Скопје, кои по пожарот во соба од затворското одделение се пожалиле на отежнато дишење и се хоспитализирани на Универзитетската клиника за токсикологија, се во добра здравствена состојба и вон животна опасност, изјави за МИА директорот на таа јавна здравствена установа, Нико Беќаровски. – Сите четворица се во Одделот за интензивна нега, добри се, свесни се. Тројца се затвореници, а едниот е службено лице кое помагало во гаснење на пожарот. Стабилни и се вон животна опасност. Клинички се работи за лесни случаи, меѓутоа токсиколошките анализи ќе бидат утре во 13 часот од судска медицина ги очекуваме, рече Беќаровски. Посочи дека четирите лица на Клиниката биле донесени во свесна состојба, а едното од нив било малку поспано. Во врска со тоа кога ќе бидат пуштени на домашно лекување, тој рече дека тоа многу зависи од утрешниот наод што ќе го добијат од судска медицина, но следните 24 часа сигурно ќе бидат задржани на Клиниката. МИА