затворска полиција – Kurir.mk

Поднесена кривична пријава против вработен во Затворска полиција за „противзаконито ослободување на лице лишено од слобода“

Катерина Бојаџиева — Tue, 20 Jun 2023 10:29:13 +0000

Единицата за корупција при Одделот за сузбивање на организиран и сериозен криминал (ОСОСК) денеска (20.06.2023) до ОЈО за гонење на организиран криминал и корупција поднесе кривична пријава против И.П.(45) од Скопје, за сторено кривично дело „противзаконито ослободување на лице лишено од слобода“, предвидено и казниво по член 373 од Кривичниот законик. Имено, И.П. во својство на службено лице-затворски полицаец при КПУ-КПД Идризово Скопје, на 18.05.2023, додека бил на смена, на барање на Д.К. од Куманово, осуден за издржување казна затвор до 2027 година за сторени кривични дела по чл.237 ст.1 и чл.396 ст.1 од Кривичниот законик, со затворен третман, му ја отворил вратата кон Отвореното одделение, овозможувајќи му истиот да избега од КПУ Идризово. Со вака преземените дејствија И.П. постапил спротивно на процедурите, надлежностите и работните задачи и обврски за обезбедување, со што сторил кривично дело „противзаконито ослободување на лице лишено од слобода“, по чл. 373 од Кривичниот законик.

Поднесена кривична пријава против вработен во Затворска полиција за „противзаконито ослободување на лице лишено од слобода“

Тале Кристо — Thu, 25 May 2023 11:00:35 +0000

Единицата за корупција при Одделот за сузбивање на организиран и сериозен криминал (ОСОСК) денеска (25.05.2023) до Основното јавно обвинителство за гонење на организиран криминал и корупција поднесе кривична пријава против Ј.Ј.(47) од Скопје, за сторено кривично дело „противзаконито ослободување на лице лишено од слобода“, предвидено и казниво по член 373 од Кривичниот законик. Тој, во својство на службено лице – вработен во Затворска полиција во КПУ-КПД Идризово Скопје, го ослободил осуденото лице Д.К. од Куманово, овозможувајќи му да избега од установата. Имено, Ј.Ј. на 20.05.2023, додека бил на смена, го ослободил Д.К., осуден на издржување казна затвор до 2027 година за сторени кривични дела по чл.237 ст.1 и чл.396 ст.1 од Кривичниот законик, кој имал затворен третман од категорија Б2. Осуденикот, искористувајќи ја довербата на Ј.Ј., му ја побарал службената магнетна картичка за отворање на безбедносната врата од Отвореното одделение, со образложение дека ќе оди во друг дел од одделението каде претходно бил работно ангажиран. Откако осуденото лице ја отворило безбедносната врата, му ја вратило картичката на сопственикот, а потоа се оддалечило кон „зелената капија“. Нешто подоцна, при извршена проверка на бројната состојба, било констатирано дека осуденото лице недостасува, односно дека побегнало од затворот. Истиот ден, околу 09.16 часот во казино на ул„Благоја Стефковски“, осуденикот извршил разбојништво со закана со пиштол, при што од вработениот одзел пари и избегал. За кусо време бил пронајден од страна на полициски службеници и лишен од слобода, а кај него биле пронајдени предмети кои потекнуваат од кривичното дело и еден пиштол „Чешка Зброевка ЦЗ 85“.

Тетовецот бил осуден до 2040 година: Затворското возило пресретнато од сиво „Ауди“, спроводот бил без полициска придружба

Ивона Петрова — Fri, 13 Jan 2023 09:34:39 +0000

Вонредна инспекција во затворот „Идризово“ најавува Управата за извршување санкции откако доцна синоќа избега осуденик на затворска казна од 21 година. Денеска се огласија и од Управата за извршување санкции од каде официјално соопштуваат детали за настанот. -Околу 23:20 часот при спровод на осуденото лице Б.М (36) од КПУ Идризово во Ургентниот центар ,,Мајка Тереза“ поради повреда на десната рака, на автопатот кон Скопје кај бензиската пимпа на Лукоил, службеното возило било пресретнато од возило марка „Ауди” со сива боја без регистерски таблички кое им го блокирало патот. Осуденото лице во тој момент му го одзел службениот пиштол од футрола на затворскиот полицаец И.Х. кој го возел комбето, пукал во него и го повредил во долниот дел на стомакот. Поради повредата, возачот го запрел возилото, а осуденото лице се дало во бегство со патничкото возило „Ауди”, се наведува во соопштението. Вработените во затворската полиција го пријавиле случајот во СВР Скопје. Повредениот затворски полицаец е префрлен во болница на натамошно лекување, а со учесниците на настанот извршени се разговори од страна на надлежните на МВР. Издадена е наредба за распишување на централна потерница. -Управата за извршување на санкции ќе направи вонреден надзор во КПУ Идризово и за сите утврдени неправилности ќе преземе соодветни мерки со цел да се утврди зошто не била обезбедена полициска асистенција за спровод до болница. Воедно ќе се утврдува дали постои одговорност за организацијата на спроведувањето на осуденикот како и за пропустите кои довеле до ваква разврска на целиот настан. Осуденото лице Б.М од Тетово бил осуден на вкупна казна од 21 година затвор , од кои 19 за убиство и 2 за неовластено производство и пуштање во промет на наркотични дроги, психотропни супстанции и прекурсори. Казната ја издржува од 28.12.2020 година а истекува на 17.04.2040 година, се наведува во соопштението.

ДЕТАЛИ: Затвореник ранил полицаец додека го носеле во болница

Ивона Петрова — Fri, 13 Jan 2023 08:44:04 +0000

Затвореник од КПУ „Идризово“ ноќеска пред полноќ пукал во затворски полицаец, го ранил и побегнал со друго возило. -На 12.01.2023 во 23.20 часот, четворица вработени во Затворска полиција кои биле со комбе „форд транзит“ на Затворската полиција побарале помош од полициски службеници на СВР Скопје, откако, според нивната пријава, додека вршеле спровод на осуденик Б.М. , од КПУ Идризово кон Ургентен центар „Мајка Тереза“, на автопатот, осуденикот му го одзел пиштолот на возачот И.Х. (вработен во Затворска полиција), пукал и го ранил И.Х.. Потоа осуденикот избегал со патничко возило „ауди“, информира МВР. Повредениот вработен во Затворската полиција е пренесен во Ургентен центар за укажување лекарска помош. Дел од медиумите јавуваат дека полицаецот е потешко повреден. Од МВР посочуваат дека се преземаат мерки за расчистување на случајот.

Приведено лицето кое утрово им избега на затворската полиција

Тале Кристо — Thu, 22 Apr 2021 12:02:35 +0000

Денеска (22.04.2021) од страна на полициски службеници од СВР Скопје - Единицата за прв одговор и интервенција, кај Камен мост во Скопје бил приведен А.З.(30) од Скопје, кој во 09.40 часот, при излез од Кривичен суд во Скопје, додека бил спроведуван од страна на Затворска полиција, избегал. Веднаш по добиената пријава, преземени се соодветни мерки и А.З е приведен во Полициската станица Центар за понатамошна постапка, информираат од МВР.

КУРИР ДОЗНАВА: Пронајден бегалецот од пред Кривичен суд

Ивона Петрова — Thu, 22 Apr 2021 10:27:24 +0000

Затворската полиција заедно со полициски службеници на МВР го пронашле лицето кое утринава избега од пред Кривичниот суд, дознава Курир. Како што претходно објави Курир, осомничено лице за криумчарење мигранти утринава успеало да и избега на затворската полиција откако било спроведено пред Кривичниот суд за одржување на судски процес. Според најновите информациите на Курир, лицето кое избегало со лисици на рацете било пронајдено во околината на Кривичниот суд. Од Министерството за правда претходно ни го потврдија случајот. -Се работи за лице кое е осомничено за криумчарење на мигранти и кое од притвор било спроведено до судот. Затворската полиција и екипи од МВР во моментов трагаат по лицето, имаат сознанија за неговата локација. Наскоро се очекува негово приведување, истакнаа од Министерството за правда за Курир. Лицето кое избега утринава за бегството најверојатно ја искористило гужвата пред Судот.

НОВИ ДЕТАЛИ: Во тек потрага по избеганото лице од пред Кривичен суд

Ивона Петрова — Thu, 22 Apr 2021 08:50:15 +0000

Од Министерството за правда за Курир потврдија дека утринава од пред Кривичниот суд на затворската полиција и избегало лице кое било спроведено до судот за одржување судски процес. -Се работи за лице кое е осомничено за криумчарење на мигранти и кое од притвор било спроведено до судот. Затворската полиција и екипи од МВР во моментов трагаат по лицето, имаат сознанија за неговата локација. Наскоро се очекува негово приведување, истакнаа од Министерството за правда за Курир. Како што претходно објави Курир, осомниченото лице утринава откако било спроведено, избегало од затворската полиција најверојатно искористувајќи ја гужвата пред Судот.

Драма пред Кривичен: Избега лице спроведено до судот

Ивона Петрова — Thu, 22 Apr 2021 08:29:22 +0000

Лице кое утринава било спроведено до Кривичниот суд успеало да и избега на затворската полиција, дознава Курир. Според неофицијални информации на Курир, лицето било спроведено до судот за рочиште, но најверојатно ја искористило гужвата пред Судот и избегало. Наскоро повеќе детали

Околу 100 војници со навршени 45 години од утре на нови работни места

Ивона Петрова — Thu, 31 Oct 2019 11:05:27 +0000

Околу 100 војници со 45 години старост од утре ќе преминат во Министерството за правда, односно под Управата за извршување на санкции во затворската полиција. Со ова, се решава проблемот за околу 100 поранешни војници, за кои по навршувањето на 45 година им престануваше професионалниот ангажман во Армијата. Државниот секретар на Министерството за одбрана Драган Николиќ појасни дека веќе од утре првата група од 97 професионални војници кои имаат 45 години старост добиваат нов ангажман во казнено – поправните установи во државата. -Војниците повеќе не треба да се грижат за нивниот натамошен ангажман. Добиваат достоинствена работа која ќе им овозможи исти дури и поголеми финансиски примања, како и соодветни услови на новите работни задачи, истакна Николиќ. Тој појасни дека тие нема потреба да одат на дополнителна преквалификација, а установите каде што ќе одат ќе добијат обучени кадри. Посочи дека за оваа одлука добиле позитивен одговор од војниците. Првиот човек на Управата за извршување санкции Јовица Стојановиќ рече дека затворската полиција ќе добие обучен кадар. -На новите вработени ќе им излеземе во пресрет и ќе бидат распределени според местото на живеење, односно, лоцирани се онаму каде што има најблиску казнено поправни домови, истакна Стојановиќ. Надлежните најавија дека оваа пракса ќе продолжи и понатаму, а за овој проект на Министерството за одбрана добиле поддршка и од синдикатите.