Симовски: Имаме скафандери, мантили, маски, дезинфекција…, пописот може да започне

Ивана Ефремовски — Thu, 25 Mar 2021 20:13:16 +0000

Протоколите за попис се јавно објавени, има различни протоколи за различни ситуации. Имате ситуации со лица во самоизолација, имате позитивни, имате ситуација каде има и заразени и здрави лица. Затоа некаде ќе се носат и скафандери при попишувањето. Ќе знаеме на кои адреси какви лица има и ќе делуваме. Имаме голема количина средства за дезинфекција, имаме маски, мантили, скафандери и сето она што е неопходно. На терен попишувачите ќе имаат средства за секаква дезинфекција, како за маските, така за компјутерот и за сето останато, објасни дел од протоколите за попис, директорот на Заводот за статистика, Апостол Симовски, вечерва во „Само вистина“ на Канал 5. Тој нагласи и дека попишувачот мора да носи маска, да дезинфицира рацете пред да влезе, но и да ги замоли домаќините да стават маска. Според Симовски, ако некој не биде пронајден во својот дом ќе му се остави известување за следна посета. (МИА)

Заводот за статистика ќе објави детали за пописот

Ивона Петрова — Fri, 05 Feb 2021 06:42:56 +0000

Директорот на Државниот завод за статистика Апостол Симовски заедно со заменикот-директор Илми Селами денеска ќе одржат прес-конференција за Методологијата за подготовка, организација и спроведување на Пописот на населението, домаќинствата и становите во Република Северна Македонија 2021. Прес-конференцијата ќе биде онлајн преку апликацијата ЗУМ, а ќе може да се следи и на Фејсбук каналот на Државниот завод за статистика. Собранието на 21 јануари со 62 гласа „за“, без „воздржани“ и без „против“ го донесе Законот за попис на населението, домаќинства и становите во Република Северна Македонија, според кој пописот треба да се спроведе од 1-ви до 21 април годинава. Законот гарантира одржување попис според меѓународните стандарди и стандардите на Евростат. Опозицијата останува на ставот дека пописот треба да се одложи за наредната година, или ако се инсистира тој да се одржи пролетва, да се спроведе по електронски пат. ВМРО-ДПМНЕ, формално почна и иницијативата за укинување на Законот за попис. Претседателот на државата Стево Пендаровски неодамна изјави дека според него не би било проблем спроведувањето на оваа статистичка операција да се одложи и да се одржи во мај или јуни, на што завчера и премиерот Зоран Заев изјави дека таквата можност е вредна за разгледување, но, нагласи, само ако станува збор за одложување од еден или два месеца.

завод за статистика – Kurir.mk

Симовски: Имаме скафандери, мантили, маски, дезинфекција…, пописот може да започне

Заводот за статистика ќе објави детали за пописот