здравствено осигурување – Kurir.mk

Македонските полицајци од денеска се без здравствено осигурување, на лекар плаќале приватно

Ивана Ефремовски — Wed, 24 Aug 2022 17:19:43 +0000

Полицајци кои утрово биле на лекарски и на стоматолошки прегледи се жалат дека им било кажано оти немаат уплатено здравствено осигурување, поради што прегледите и интервенциите морале да ги платат приватно, објави Телма, цитирајќи неколкумина полицајци кои се обратиле до телевизијата. Ситуацијата со здравственото осигурување ја потврдуваат и од Независниот синдикат на полицијата. Оттаму бараат МВР да го реши проблемот, кој е дополнително тежок и поради тоа што без здравствено се и децата осигурани преку родителите-полицајци.

„Во текот на денот, на мејловите и на телефоните на Независниот Синдикат на Полицијата, пристигнаа повеќе од 50-тина известувања како поплаки по барање совет како да се справат со некои од вечните Неработници кои се по удобните канцеларии во седиштето на МВР. Денеска повеќе 10-тина вработени во полицијата приватно платија за прегледи, неколку од нив и за систематски прегледи за првачиња, за деца на полицајци кои треба да бидат запишани во прво одделение во учебната 2022/23 год, соопштија од НСП.

Од МВР засега нема одговор на информациите дека нивните вработени немаат уплатено здравствено осигурување.

Колку и дали естрадните личности во Македонија имаат здравствено осигурување (ВИДЕО)

Дарко Андоновски — Wed, 30 Mar 2022 09:34:36 +0000

„Немам книшка“ и „Уметникот мора да е здрав“ се стиховите од песната што победи на Песна за Евровизија 22 и ќе ја претставува Србија на Евровизија во Италија. Пејачката Ана Ѓуриќ Констракта, која ја изведува оваа песна, изјави дека овие стихови се автобиографски и дека навистина нема здравствено осигурување, што го привлече вниманието на јавноста да се запраша колку луѓе на Балканот немаат здравствена книшка. Естрадниот магазин зад сцената реши да истражува на оваа тема и ги праша дел од нашите јавни личности: Дали имаат здравствено осигурување, ова се нивните одговори

Џонсон Мети обезбеди приватно здравствено осигурување за вработените во Македонија

Super Admin — Mon, 10 Jan 2022 08:02:42 +0000

Сите вработени во Џонсон Мети во Македонија отсега ќе добиваат приватно здравствено осигурување. Компанијата обезбеди здравствени придобивки од Триглав осигурување за сите вработени, бидејќи нивното здравје е приоритет.

„Нашата посветеност за вработените ја покажуваме на дело со воведување нова придобивка - приватно здравствено осигурување. Во соработка со Триглав осигурување, вработените ги добиваат сите поволности од приватното здравствено осигурување. Една од фундаменталните вредности на Џонсон Мети е „Заштита на луѓето и планетата” и затоа сме среќни што ги имплементираме највисоките стандарди за здравје и заштита на вработените на работното место и надвор од него. Преку различни програми за добросостојба, обезбедуваме здрава и сигурна работна средина за нашите вработени“, вели Ана Апостолова, менаџер за човечки ресурси во Џонсон Мети.

Како дел од информативната кампања за вработените, заедно со Триглав Осигурување, Џонсон Мети организираа „Денови на здравјето“. Претставници на Триглав Осигурување темелно ги информираа вработените што значи приватно здравствено осигурување.

„Свесни сме дека нашата добросостојба може да биде афектирана од различни фактори, како што се физичкото здравје, финансиската стабилност, менталната состојба и од квалитетот на нашите социјални интеракции. Сме компанија која се грижи за целокупната добросостојба на вработените и обезбедуваме различни видови тренинзи, онлајн платформи за учење и поддршка за вработените и нивните семејства. Многу сме горди што имаме вработени кои се грижат за нивната добросостојба и што им ја даваме оваа можност“, додава Апостолова.

Во Триглав Осигурување сметаат дека вработените се вистинскиот капитал на секоја компанија и затоа е важно да се инвестира во нивната добросостојба. „Нашиот главен фокус се клиентите, а како компанија се залагаме за здрав начин на живот и заштита на средината во која што работиме и живееме. Тоа го имплементираме и во производите, кои што ги развиваме, особено во доменот на здравствената заштита. Изборот на поздрав начин на живот подразбира и носење вистински одлуки за негова заштита, бидејќи ништо не е поважно од нашето здравје. Ни причинува вистинско задоволство што во овој домен соработуваме со компанија како Џонсон Мети и што компанијата ги препознаа предностите на приватното здравствено осигурување и го вклучија во пакетот бенефити за своите вработени“, изјавија од Триглав Осигурување.

* * *

Британската компанија Џонсон Мети ја користи науката за да создаде почист, поздрав свет. Тие се светски лидер во производство на катализатори за автомобилската индустрија и системи на катализатори за контрола на загадувањето. Џонсон Мети работи во над 30 земји ширум светот и вработува повеќе од 15 000 луѓе. Една третина од сите нови возила ширум светот имаат катализатори од Џонсон Мети. Џонсон Мети ја одбра Северна Македонија како дестинација за својата европска мега-фабрика за автокатализатори во Технолошко-индустриската развојна зона Скопје 1. Ова е најголемиот инвестициски проект, а воедно и најсофистицирана и најнапредна фабрика на Џонсон Мети во светот и компанијата е најголем извозник од Северна Македонија. Џонсон Мети минатата година ја затвори со 1.696 милиони евра увоз и 1.850 милиони евра извоз. Џонсон Мети во Северна Македонија вработува повеќе од 1.000 луѓе. Ја инспирираме науката, го подобруваме животот.

Пандемијата на коронавирусот предизвика раст на продажба на осигурителни полиси за здравствено осигурување

Магдалена Андонова — Wed, 24 Feb 2021 10:28:10 +0000

Бројот на лица кои купиле здравствено осигурување лани пораснал за пет пати во однос на 2019 година, а во полиси граѓаните вложиле 4,45 милиони евра што е за 45 отсто повеќе од 2019 година, информираат од Агенцијата за супервизија на осигурувањето. Официјалните агрегатни податоци на Агенцијата за супервизија на осигурување (АСО) за 2020 година покажуваат дека вкупно 114 559 граѓани лани одлучиле да купат полиси за здравствено осигурување и тоа е за 93 161 осигуреник повеќе од претходната година кога полиси за здравствено осигурување имале 21 398 лица. Во своите полиси за здравствено осигурување, како што наведуваат од АСО, лани граѓани вложиле 4,45 милиони евра и тоа е за 44,8 отсто повеќе од бруто полисираната премија (вредност на продадени полиси) во претходната година. Полисите за здравствено осигурување лани ги продавале 10 компании за неживотно осигурување. Според АСО влијание врз растот на продажбата на осигурителни полиси за здравствено осигурување минатата година има пандемијата предизвикана од вирусот COVID 19, но и добрите корпоративни практики на се повеќе фирми кои купуваат полиси за здравствено осигурување за своите вработени. Според податоците лани компаниите за неживотно осигурување на своите осигуреници им исплатиле штети во вкупен бруто износ од 1,72 милиони евра врз основ на покритијата од полисите за здравствено осигурување. Во споредба со 2019 година износот на бруто исплатени штети кои компаниите ги платиле на осигурениците се зголемил за 44 отсто. АСО апелира до сите потенцијални осигуреници при изборот на осигурително друштво особено да обрнат внимание на ризиците кои се опфатени со осигурувањето и дали, заради актуелниот момент, се покриени ризици предизвикани од пандемии или епидемии. Агенцијата за супервизија на осигурувањето (АСО) е независно регулаторно тело, основано во 2009 година, кое го регулира пазарот за осигурување и се грижи за заштита на правата на осигурениците и развој на перцепцијата за значењето на осигурувањето. (МИА)

Дипломатијата оставена без здравствено осигурување, вработени во МНР не можат да си ги однесат децата на лекар

Ивана Ефремовски — Fri, 18 Dec 2020 12:03:13 +0000

Вработени во МНР останаа без здравствено осигурување. Среде пандемија, тие не можат да дојдат до здравствена услуга, ниту пак да си го однесат децата на лекар. Придонесите за здравствено осигурување не им се платени, па не можат ниту да ги користат здравствените услуги.

Лекарите специјализанти се жалат дека и покрај заложбите и во центрите за Ковид не им се плаќаат придонесите ниту здравственото осигурување

Магдалена Андонова — Wed, 09 Dec 2020 15:23:44 +0000

Тие се меѓу првите кои застанаа на фронтот. Специјализантите, покрај на матичните клиники, се ангажирани заедно со специјалистите во борбата против Ковид -19. Околу 700 од нив се во целата земја, 200 од нив се во специјализирање со самофинансирање. Оваа категорија доведе до ангажирање на 15 од нив во ковид центрите. Сепак, не им се плаќаат дожурствата, иако тие ја извршуваат истата работа како лекарите и држат продолжено работно време. Еден од нив е Иле Кузманов. Тој зборува во име на сите дека дури не им се плаќаат ниту придонесите за здравствено осигурување, пренесува Алсат. Во меѓувреме, министерот Венко Филипче по состанокот одржан со директорите на внатрешните клиники заедно заклучи дека има потреба од дополнителен медицински персонал и медицински сестри. Министерство за здравство „Што се однесува до персоналот, ќе има дополнителен број лекари во сите ковид центри и интерни клиники. За лекарите специјализанти, ќе се разгледат можностите за да се реализираат нивните барања “. Во однос на капацитетот на болницата, околу 150 легла остануваат слободни низ целата земја, најавуваат здравствените власти. Во последните 24 часа во Скопје се хоспитализирани 32 пациенти со тешка клиничка слика, додека вкупно бројот на хоспитализирани е околу 1.350 пациенти. Извор: АЛСАТ

Пејоска: Филипче да обезбеди пензиско и здравствено осугурување за младите специјализанти и да им ги покачи платите за 100%

Магдалена Андонова — Wed, 11 Nov 2020 12:15:21 +0000

Барањата на приватните специјализанти се уште не се исполнети дури и после месец и половина од нивната средба со министерот за здравство Венко Филипче. Дали министерот свесно ги фрла во оган младите доктори во Македонија и со тоа го загрозува дополнително и онака кревкиот здравствен систем?, изјави денеска за медиумите Марија Пејоска од ВМРО-ДПМНЕ. - Во време на пандемија додека сите држави низ Европа го наградуваат медицинскиот кадар со зголемување на платите од 100%, ние говориме за елементарни услови за работа и остварување на законски или човекови права. Барањата на специјализантите вклучуваат најпрво да се платат 24 часовни дежурства, а потоа и здравствено осигурување за сите приватни специјализанти, како здравствено, така и пензиско осигурување, субвенции за домување на специјализанти, како и израмнување на коефициентот специјалисти/супспецијалисти во интернистичките и хируршки гранки. Овие барања беа доставени до министерот на 29 септември 2020 година и нивното исполнување било ветено од страна на министерот, посочи таа. - Зошто, дури и после месец и половина, кога огромен број на млади доктори секојдневно го ставаат својот живот на ризик грижејќи се за болни од КОВИД-19, се уште нема одговор и решение за нивните барања? Зарем младите доктори не заслужуваат да бидат наградени за својот несебичен труд и придонес во справувањето со КОВИД-19? Го повикуваме министерот да поминува помалку време со ангажман на ПИ-ар папагали, а повеќе време да посвети на млади доктори специјализанти кои секојдневно се на првата борбена линија со КОВИД 19. Бараме: -Покачување на платата на младите доктори и специјализанти во сите установи во кои се ангажирани за 100%. -Пензиско и здравствено осигурување за СИТЕ приватни специјализанти, бидејќи најголем дел од нив немаат никакво здравствено осигурување, а се ангажирани во КОВИД центрите. -Соодветно домување за сите кои немаат каде да престојуваат, а се распоредени во КОВИД центри надвор од нивното место на живеење. Младите лекари се искористуваат и злоупотребуваат како никаде во светот! Време е тоа да прекине! Специјализантите заслужуваат достоинствена плата и награда, децидна е Пејоска.

Студентите во лето остануваат без здравствено осигурување

Ивана Ефремовски — Fri, 12 Jul 2019 15:36:37 +0000

Студентите во лето остануваат без здравствено осигурување. Доколку се разболат или имаат потреба од хирурска интервенција мора да платат приватно за терапијата или операцијата. Матичните лекари бараат од Фондот да направи промени во софтверот и студентите потврдите да ги доставуваат во септември или октомври зошто администрацијата на факултетите овој период користи годишни одмори и неможе да им се издаде документ дека уште студираат. -Алармираат матични лекари дека пациентите кои се студенти остануваат без здравствено осигурување, што не е добро, а нема од каде луѓето да донесат потврда заради тоа што неработат студентските прашања и не може да се однесе таа потврда дека сеуште се студенти во ФЗО. Замолено е, Фондот овој момент да го решат и потврдите да се носат во октомври, изјави д-р Лилија Чолакова Дервишова, претседател на ЗПЛРМ. Од Фондот велат дека студентите се осигуруваат преку еден од родителите. Останувале без здравствено осигурување само ако не доставиле потврда за запишан семестар најдоцна до март односно за зимскиот семестар до декември, а за ова имеле и договор со факултетите. -Сите оние факултети кои навремено ги имаат доставено податоците за студентите (имаат прикачено електронска датотека) кои запишале соодветен семестар или пак студентите сами донеле потврда за редовен студент продолжено е здравсвеното осигурување како членови во здравствено осигурување преку еден од родителите, се вели во одговорот од Фондот. Извор: Сител

Нов скандал во МНР: Со месеци се без здравствено осигурување

Дарко Андоновски — Thu, 04 Jul 2019 11:38:25 +0000

Нема ден Македонија да мине без нов скандал предизвикан од власта која што тоне, ова денеска на прес-конференција го истакна Наум Стоилковски од ВМРО-ДПМНЕ. -И повторно во центарот на вниманието е МНР под Никола Димитров! Почитувани, трет месец македонската дипломатија не е здравствено осигурана. Трет месец, македонските дипломати, амбасадорите, целата дипломатија, службите, вработените во ДКП-ата, не им се покрива здравственото осигурување. Замислете, македонската дипломатија и вработените во МНР, кои што се државни службеници, администрација, повеќе месеци земаат плата од државата, од буџетот, ама немаат здравствено осигурување. Ова е скандал од огромни размери кој што отвора повеќе скандалозни прашања. Прво, како е можно министерство, особено МНР, македонската дипломатија да дели плата, а вработените да немаат здравствено осигурување? Како е можно Министерство, дел од Влада, да не уплаќа здравствено осигурување? Каков пример дава Владата, МНР до македонското стопанство, до бизнисмените, со тоа што може да исплатува плата, а вработените да немаат здравствено осигурување?, прашува Стоилковски. Тој додава дека втор аспект на проблемот е каде е Синдикатот на МНР? Каде се членовите на Синдикатот на македонската дипломатска служба, чија што веројатно последна активност беше да се повикаат вработените на таканаречениот марш за Европска Македонија, односно за поддршка на референдумот за промена на државното име? Посебен аспект на проблемот е Каде се овие месеци претставниците на Синдикатот на МНР, Синдикатот на македонската дипломатска служба, водени од звучни „борци“ како Сашко Тодоровски и други видни Амбасадорски имиња, каде се да го повторат преседанот, како што се посочуваше и повторно да организираат протест, но овој пат за вистинско синдикално прашање, за состојба во која повеќе месеци се доведени македонските дипломати? -Како е можно синдикалци да не изустат ни збор за тоа што дипломатите и службениците во МНР немаат здравствено осигурување од министерувањето на Никола Димитров, ниту за ниеден друг скандал кој што го тресе МНР? Скандалите кои го следат МНР и работењето на Никола Димитров не само што не згаснуваат туку и се посилно удираат врз делот што треба да биде репрезент на македонската држава. Димитров знае „среде ноќ“ да среди Комисија за неговата ќерка да добие стипендија, ама не знае или не сака да го реши проблемот на вработените дипломати кои повеќе месеци не се здравствено осигурани. Никола Димитров го претвори МНР во приватно гранапче на СДСМ! Ова е срамно, жално и ништо помалку од намерно девастирање на македонската државата, потенцира Стоилковски.

Обвинители не можат да се лекуваат: 35 вработени во Обвинителство немаат здравствено осигурување

Ивана Ефремовски — Wed, 03 Apr 2019 14:03:48 +0000

Триесет и пет вработени во Вишото скопско обвинителството од кои десет обвинители три месеци се без здравствено осигурување, дознава Алсат. -Од први јануари годинава тие не фигурираат во системот на Фондот за здравство. Вработените се соочиле со овој проблем кога побарале лекарска помош. Проверката во системот на Фондот за здравство од матичните лекари покажала дека не се осигуреници. Поради овој проблем без здравствена заштита останале и нивните деца кои биле осигурани преку нив. Имало и обвинителите кои имале закажано хируршки зафати, но биле приморани да ги одложат, бидејќи не сакале или не можеле да ја платат приватно услугата, објавува телевизијата. Основното јавно обвинителство потврди дека има административен пречки и дека колегите од вишото обвинителство се без здравствено осигурување. Детален одговор најавија за утре, откако ќе ги соберат сите информации од службите. И од Фондот за здравство потврдија дека постои ваков проблем. Од стартот на годинава дел од вработените во Вишото скопско обвинителство не се водат како осигуреници и не можат да се лекуваат во болниците на товар на фондот. Како што дознава Алсат, проблем се јавил бидејќи на само една вработена не и било платено здравственото осигурување. -Поради неа, системот не ги евидентирал останатите уплати и сите вработени биле ставени во ист кош, па останале без осигурување и без можност да се лекуваат во државните болници и да ги користат услугите за кои одделуваат пари од нивната плата, пренесе Алсат.