железници – Kurir.mk

Дванаесетти ден од бојкотот на машиновозачите, очекуваат исплата на вториот дел од платата за февруари

Катерина Бојаџиева — Tue, 11 Apr 2023 10:43:04 +0000

Машинскиот и помошниот персонал во Железници на РСМ Транспорт, којшто е во бојкот со прекин на железничкиот сообраќај веќе 12 дена, денеска очекува исплата на вториот дел од платата за февруари. Тони Димовски, претседател на Синдикат на машиновозачи и претставник на машинскиот и извршниот персонал, за МИА изјави дека вчера имале средба со раководството на железничкото претпријатие и оти им било речено дека ќе има исплата до 15 часот. Од почетокот на бојкотот на 31-ви минатиот месец во 12 часот досега, потсетува, не сообраќаат ниту патничките ниту товарните возови. - До вчера требаше да се исплатат и патните трошоци за март, но тоа не се случи, изјави Димовски, појаснувајќи дека бојкотот е организиран самоиницијативно и оти машинскиот и помошниот персонал е на работа но не ги извршуваме работните задачи. Во барањата на машиновозачите е и зголемување на вредноста на бодот за 30 проценти, исплата на ноќна работа за кондуктерите, како и вработување на 40 машиновозачи за што, како што велат, уште во февруари испратиле барање до министерствата за транспрот и врски, и за финансии и до Владата.

„Железниците пропаѓаат, а менаџерскиот тим со дебели плати, за еден мандат ја чинат Македонија над 650.000 евра“ – обвинува ВМРО-ДПМНЕ

Ивана Ефремовски — Wed, 23 Nov 2022 07:57:16 +0000

Возот Скопје - Битола патува 10 часа, линиите кон Кичево и Кочани се укинати, железниците се во кома, ама битно џебовите на директорите се полнат со дебели плати во време на криза. Железниците пропаѓаат и трупаат загуби, ама битно директорите именувани од СДС и ДУИ земаат над илјада евра месечна плата, без додатоци, реагираат од ВМРО-ДПМНЕ.

Во продолжение следува интегрален текст од нивното соопштение:

Саша Јовановски, директор на патнички сообраќај член на Управен одбор на МЖ транспорт АД – Скопје, со плата над 70.000 денари.
Милчо Смилевски, директор на товарен сообраќај и член на Управниот одбор на МЖ, со плата над 72.000 денари.
Брахим Ајваз, директор на маркетинг и продажба и член на Управен одбор на Железници, плата над 72.000 денари.
Сашко Ангеловски, директор за влеча и одржување на возни средства и член на Управен одбор на Железници, плата над 70.000 денари.
Шенур Османи, директор за финансиски и економски работи и член на УО на Железници, плата над 70.000 денари.
Местото директор за правни работи и човечки ресурси и секако член на УО, во моментов е испразнето, а е позиција, со плата над 70.000 денари.
И секако на крај, Мајан Вејсели, Генерален Директор и Претседател на Управниот Одбор на Железници, со плата околу 75.000 денари.

Згора на ова ангажирале и 5 советници со мрсни хонорари од 1.000 евра. Ако се соберат вкупните средства годишно овој менаџерски тим ја чини Македонија над 10 милиони денари или за еден мандат неверојатни 650 илјади евра! Само за потсетување овие скапо платени менаџери водат компанија загубар со минус од неколку милиони евра.

Ете каде завршуваат парите на граѓаните во време на криза. Додека економијата тоне, а народот осиромашува, неспособните функционери на власта добиваат дебели плати.

Штрајк на вработени во холандските железници, бараат повисоки плати

Ивона Петрова — Fri, 26 Aug 2022 09:17:49 +0000

Вработени во холандските железници денеска штрајкуваат во западниот, најнаселениот дел на земјата и бараат повисоки плати поради високата инфлација. Железничкиот оператор НС соопшти дека тоа значи оти услугите ќе бидат прекинати и во други делови на Холандија, вклучувајќи меѓународни линии до Белгија. „Користете друг превоз или одложете го своето патување. Нема да сообраќа ниту еден заменски автобус“, пишува на веб страницата. Станува збор за 24-часовен штрајк втор во три дена, по оној во средата во северниот дел на земјата. Синдикати протестираат поради прекинати преговори со управата за колективен договор, каде се бараа повисоки плати. Потрошувачките цени во Холандија би требало да пораснат за 9,9 отсто во 2022 година. Раст од 4,3 проценти се предвидува следната година. Во план се уште три 24-часовни штрајкови. В понеделник во северозападниот дел, во вторник во централниот, а в среда во југоисточна Холандија.

Почина генералниот директор на Железници на РМ Транспорт Мубекир Палоши

Тале Кристо — Sat, 18 Jun 2022 10:57:07 +0000

Генералниот директор и претседател на Управен Одбор на Железници на РСМ Транспорт АД Скопје, Мубекир Палоши, починал изутрината, соопштија од политичката партија Алтернатива. Палоши беше именуван за директор на Железници на РСМ Транспорт АД Скопје во декември лани по склучениот договор за влегување на Алтернатива во владината коалиција. Палоши е роден во 1980 година во Скопје, каде дипломирал на Економскиот факултет за маркетинг и менаџмент.

Стојаноски: Железниците во Република Македонија се во вештачка кома, вработените немаат земено плата

Ивана Ефремовски — Wed, 04 Aug 2021 11:01:19 +0000

Железничкиот сообраќај во нашата држава ги живее најлошите години од своето постоење. Не се памети кога железниците во Република Македонија биле во олку лоша состојба. За жал, на праг сме на целосно замирање на железничкиот сообраќај, а со тоа Македонија да стане единствената земја во Европа без железнички сообраќај, посочува пратеникот на ВМРО-ДПМНЕ, Бојан Стојаноски. -Пред 3 години со укинувањето на единствената меѓународна железничка линија Солун-Скопје-Белград, станавме меѓународно железнички изолирана земја, а сега со укинувањето на внатрешните железнички линии кон Кичево и Кочани се најавува и домашно замирање на овој превоз. Железниците во Република Македонија се во вештачка кома. Нема изградба на нови пруги, нема ремонти на постоечките пруги, нема набавка на нови возови и нови локомотиви. Буквално железниците се оставени на забот на времето. Како никогаш до сега, сведоци сме како локомотиви горат по македонските пруги, како вагони исклизнуваат на отворена пруга, како патничките вагони спротивно на сите железнички прописи во зима се загреваат со плински боци, како расположливоста на возниот парк поради не доволно одржување се преполовува, вели тој. Стојаноски потенцира дека од друга страна пак, додека вработените во железница со право реагираат и ја чекаат својата плата за месец јуни, постојано фрчат огласи за нови партиски вработувања. -Раководствата вршат масовна партизација со нови кадри. Патем според информациите од Железница, голем дел од овие ново вработени земаат плата, а не даваат речиси никаков придонес во работењето. Оттука наместо по секоја основа да се намалуваат непродуктивните трошоци, власта за свои партиски цели дополнително ги оптоварува буџетите на МЖ Транспорт АД и на ЈП МЖ Инфраструктура. Нема пари за плати на вработените, а има пари за нови партиски вработувања. Нема пари за изградба на пруги и набавка на нови возови, ама има пари за набавка на супер луксузни лимузини за директорите. Очигледно е дека оваа Влада предводена од СДСМ нема ниту волја, ниту има капацитет да се справува со предизвиците на железничкиот систем во нашата држава. Се покажало во минатото, секогаш кога СДСМ е на власт железницата стагнира. Наместо да спроведуваат проекти за подобровање на железничкиот сообраќај тие размислуваат како побрзо да ги продадат и да се оттарасаат од железниците. Да не се заборави владата на ВМРО ДПМНЕ купи 6 нови возови, 4 нови електрични локомотиви, 150 товарни вагони, а СДСМ не се способни ни да ги управуваат, а камоли да купат нови. Ете тоа е СДСМ, рече тој. Стојаноски посочи: „Затоа што поскоро оваа неспособна Влада треба да си оди од власт, а на нејзино место да дојдат стручни кадри кои максимално посветено ќе работат, но овојпат не за обнова, туку за одново градење на се што е до сега уништено“.

Машинскиот персонал почнува бојкот поради неисплатена плата, нема да тргнат возовите по 16 часот

Ивана Ефремовски — Tue, 03 Aug 2021 12:08:08 +0000

Машинскиот персонал во Железници на Република Македонија (ЖРСМ) Транспорт донесе одлука за бојкот поради неисплатениот втор дел од платата за јуни годинава, поради што попладне по 16 часот нема да ги извршува работните задачи, изјави за МИА Тони Димовски, претставник на машинскиот персонал во ЖРСМ Транспорт. Како што информира Димовски, одлуката е донесена на денешниот собир на машиновозачите и помошниците, а бојкотот значи дека нема да тргнат патничките и товарните возови по 16 часот денеска. Во возниот ред за попладне, како што информира Димовски, се предвидени сообраќања на возовите на релацијата Скопје-Гевгелија и Скопје-Велес, како и неколку товарни возови. -Ние баравме платата да биде исплатена до 25 наредниот месец или да не извести менаџерскиот тим дека ќе доцни платата, но се уште не сме известени, изјави Димовски. Тој најави дека до УО на ЖРМ, како и до Министерство за транспорт и врски и до Агенцијата за железничи сообраќај ќе испратат допис преку кој, покрај исплатата на платата бараат и исплата на надомест за квалитет. (МИА)

Поради полицискиот час изменет е и возниот ред на „Железници“ – еве го распоредот

Магдалена Андонова — Wed, 10 Mar 2021 11:17:26 +0000

Поради донесената одлука со која се ограничува движењето на цела територија на државата од денеска е изменет возниот ред со редуцирање на патничките возови и промена на времето на поаѓање кај некои од нив, информираат од „Железници на Република Македонија“. План за сообраќај на патнички возови во услови на ограничено движење измена ќе има на следните релациите: Скопје – Битола – Скопје: 1. воз бр. 643 од Скопје со променет возен ред, ќе сообраќа предвреме со поаѓање од Скопје во 13.49 часот, 2. воз бр. 644 од Битола со променет возен ред, ќе сообраќа предвреме со поаѓање од Битола во 17.45 часот, 3. воз бр. 645 од Скопје со променет возен ред, ќе сообраќа предвреме со поаѓање од Скопје во 17.25 часот, 4. воз бр. 640 од Битола со променет возен ред, ќе сообраќа со задоцнување од +135 мин. со поаѓање од Битола во 05.30 часот, Возовите бр. 641 и 642 ќе сообраќат по важечкиот возен ред. Табановце – Скопје – Велес– Скопје – Табановце: 1. воз бр. 600 од Велес со променет возен ред, ќе сообраќа со задоцнување од +27 мин. со поаѓање од Велес во 05.30 часот, воз бр. 600 со поаѓање од Скопје по важечки возен ред, 2. воз бр. 2083 од Скопје со променет возен ред, ќе сообраќа предвреме со поаѓање од Скопје во 20.39 часот. Возовите бр. 601, 2080, 2081 и 2082 ќе сообраќат по важечкиот возен ред. Табановце –Скопје – Гевгелија – Скопје: 1. воз бр. 611 од Табановце со променет возен ред, ќе сообраќа со задоцнување од +10 мин. со поаѓање од Табановце во 05.20 часот, o воз бр. 611 со поаѓање од Скопје по важечки возен ред, 2. воз бр. 630 од Гевгелија со променет возен ред, ќе сообраќа со задоцнување од +64 мин. и поаѓање од Гевгелија во 05.30 часот. Возовите бр. 631 и 632 ќе сообраќат по важечкиот возен ред. Скопје – Кочани – Скопје: 1. воз бр. 651/650 по важечки возен ред, Скопје – Кичево – Скопје: 1. воз бр. 660/661 по важечки возен ред, Скопје – Табановце – Скопје: 1. воз бр. 2024 со променет возен ред, ќе сообраќа со поаѓање од Скопје по важечки возен ред само до Куманово, воз бр. 2024 ќе изостанува на релација Куманово – Табановце, 2. воз бр. 2020 со променет возен ред, ќе сообраќа со поаѓање од Куманово со задоцнување од +15 мин. и поаѓање од Куманово во 05.00 часот, воз бр. 2020 ќе изостанува на релација Скопје – Куманово, Возовите бр. 2022 и 2023 ќе сообраќат по важечкиот возен ред. Воз бр. 2025 нема да сообраќа. Овој План за сообраќај на патнички возови во услови на ограничено движење ќе важи до 22.03.2021 година.

Комисија на ВМРО-ДПМНЕ: 100 дена од 4 катастрофални години во железничкиот сектор

Ивана Ефремовски — Thu, 10 Dec 2020 10:53:54 +0000

Дали целта на систематското уништување на железниците во Македонија во изминативе 4 години, беше да се обезвреднат, да се клекнат на колена и да се продадат по багателна цена како “бонбона бизнис“? - прашуваат од Комисија на ВМРО-ДПМНЕ. Во продолжение го пренесуваме нивното соопштение: Поминаа 100 дена од старо-новата Влада на СДСМ, 100 дена во кои продолжи катастрофата и неодговорноста на власта кон железничкиот сообраќај. Поминаа 100 дена во кои не се започна ниту еден единствен проект. Всушност, единствен “проект“ кој започна во овој период беше најавата за продажба на единствениот државен железнички оператор во нашата држава МЖ Транспорт АД. Без никакви финансиски анализи, без стратегија што понатаму со железничкиот сообраќај, власта реши да ги продава железниците само со цел да обезбеди средства во буџетот за непродуктивни трошоци. Средствата ќе се потрошат, а Македонија ќе остане без железница. Овие 100 дена на Влада беа само продолжување на погрешните политики кои Владата ги водеше во изминативе 4 години. Во овие 100 дена добивме одговор на прашањето: Која беше целта на систематското уништување на железниците во Македонија во изминативе 4 години? Владата на СДСМ јавно најави продажба на железниците во Македонија. Па од таму, се појасно е дека целта на ова систематско уништување била да се ослабне Македонски Железници Транспорт АД, со цел да се обезвредни, да се клекне на колена и да се продаде по багателна цена како “бонбона бизнис“. СДСМ по принцип на стариот комунистички метод прво ќе ја обезвредни и ќе ја прикажи во лошо светло состојбата на МЖ Транспорт АД, а потоа ќе ја продаде (читај, некој ќе си ја купи) за багателна цена. Лажни биле ветувањата на СДСМ во изминативе 2 изборни циклуси за наводни развојни проекти во железниците: Ветуваа изградба на пругата кон Бугарија – НАПРОТИВ, ЈА СТОПИРАА, Ветуваа изградба на пруга кон Албанија – НЕ ЈА НИ ЗАПОЧНАА, Ветуваа проектна техничка документација за реконструкција на железничката пруга Скопје - Кичево – НИШТО НЕ НАПРАВИЈА, Ветуваа пуштање во сообраќај на пругата Битола-Кременица – СЕУШТЕ НЕ Е ПУШТЕНА, Ветуваа брза пруга за возовите по коридорот X – СПРОТИВНО НА ТОА ДОПОЛНИТЕЛНО ГИ УСПОРИЈА, Ветуваа приградски патнички железнички сообраќај околу Скопје – НЕМА ПРИГРАДСКИ ЖЕЛЕЗНИЧКИ СООБРАЌАЈ, НАПРОТИВ ЖЕЛЕЗНИЧКИ ЈА ИЗОЛИРАА МАКЕДОНИЈА, Ветуваа ремонти на локомотиви и возови – СПРОТИВНО НА ТОА И ПОСТОЕЧКИТЕ ГИ УНИШТИЈА И ПРЕПОЛОВИЈА, Ветуваа почеток на изработка на проектна техничка документација за електрифиција на пругата Скопје – Блаце (граница со Република Косово) – НИШТО НЕ ЗАПОЧНАА, Ветуваа набавка и инсталација на опрема за европскиот систем за контрола на возовите – ETCS (т.н. автоматска регулација на брзината на возовите) – НИШТО НЕ НАПРАВИЈА Ветуваа проектна техничка документација за изградба на нова пруга Миладиновци до аеродромот TAV Петровец – НЕ ЗАПОЧНАА ВАКОВ ПРОЕКТ Ветуваа осигурување на патните премини – НАПРОТИВ ОД ПОСТОЕЧКИТЕ ГОЛЕМ ДЕЛ СЕ НЕФУНКЦИОНАЛНИ. Ветуваа завршување на ремонтот од Ногаевци до Неготино – НЕ ГО ЗАВРШИЈА. Очигледно е дека оваа Влада предводена од СДСМ ниту има волја, ниту има капацитет да се справува со предизвиците на железничкиот систем во нашата држава. Не грижата кон железниците, предизвикува непоправливи штети и го загрозува безбедното одвивање на железничкиот сообраќај. Македонија никогаш не била во полоша состојба во делот на железничкиот сектор. Комисија за инфраструктура, урбанизам и транспорт.

Работници ангажирани на пругата Куманово- Бељаковце немаат ни плати, ни здравствено осигурување

Ивана Ефремовски — Fri, 12 Jun 2020 14:08:08 +0000

Работници ангажирани за изведување на градежни активности за реконструкција на железничката пруга Куманово – Бељаковце, како дел од проектот за изградба на железничкиот Коридор 8, денеска изјавија дека не зеле плата за април и мај годинава и оти од почетокот на месецов немаат ниту здравствено осигурување. Зоран Крстевски, ангажиран работник, изјави дека од први јуни немаат здравствено осигурување и оти платите не им се исплатени од април. -Ова е еден капитален проект, не знам што е работа. Компаниите подизведувачи си ги собраа своите машини и си заминаа. Никој ништо не кажува. Ако не добиеме плата до понеделник, не знам што ќе правиме, рече Крстевски. Неговиот колега Бобан Величковски вели дека не знаат како ќе продолжат со работа, а нагласи и дека не им се исплатени ниту часовите од прекувремена работа. -Досега немаше проблеми, но со почнување на коронавирусот, се случи и ова, вели Величковски. Одговорното лице од компанијата Х.Ф.Вибе ГмбХ&Ко.КГ изјави дека нема коментар за состојбата со работниците чиј што договор истекува во август годинава. Од ЈП за железничка инфраструктура Железници на Република Македонија велат дека за платите е задолжена компанијата Вибе како посебен правен субјект. -Според информациите од надзорниот инженер, градежните работи се во тек, но со помал интензитет поради ситуацијата во која се наоѓа нашата држава, велат од ЈП за железничка инфраструктура Железници на Република Македонија Во Куманово од март годинава почнаа да се изведуваат градежните активности за изградба на втор столб од новиот патен надвозник на улицата „Ѓорче Петров“, како дел од проектот за реконструкција и обнова на железнички премини на пругата Куманово-Белљаковце. Реконструкцијата на оваа пруга во должина од 31 километар стартуваше во 2014 година. Таа е првата од трите делници за железничкото поврзување на државава со Бугарија. (МИА)

Патничките возови, конечно, дезинфицирани за заштита од коронавирус

Ивана Ефремовски — Mon, 09 Mar 2020 12:32:45 +0000

Се дезинфицираат патничките возовите што се во оптек, како превенција од ширење на вирусот Ковид-19. Специјализиран тим, како што соопштуваат од Железници на Република Македонија Транспорт АД – Скопје, дезинфекцијата ја извршил денеска на четири гарнитури и четири вагони што превезуваат патници на различни релации. -Железници на Република Македонија Транспорт АД-Скопје, како општествено одговорна компанија, се приклучи на иницијативата за спречување на ширењето на вирусот Ковид-19 познат како коронавирус, откако Владата донесе мерки за превенција од вирусот за заштита на јавното здравје и здравјето на граѓаните, информираат од претпријатието. Акцијата е започната денеска за превентивна дезинфекција против ширењето на овој вирус, а по потреба ќе се спроведе повторно. (МИА)